Luk 16

Uɗat gumak danab laanu nai

1Aria, Jesus Nug nuhikkud ippunittak awak danab amelagppa mattia aum. “Enub danab laa nug dayaya, nug maɗi nid laa nuhig keeke oh gumakkunu tituane dayom. Am danab laa ag enub danab amu gumidna uɗin, uɗat gumak danab nuhig amu beɗuppa nai inam yaan appig. ‘Nahip uɗat gumak danab nug nahip keeke hamu kakidtte,’ aon appig. 2Anam aeg amu nug uɗat gumak danab nuhig onigppa e uɗie, amegppa aum. ‘Na keeke heme amu, nai amu da doomi amunu, na gona, dahil keeke oh na aɗattem amu uɗug laappa ye! Aɗinu? Na baula uɗat gumak danab daakkutnu am elele iitta,’ awa aum. 3Anam a amu uɗat gumak danab amu nug nukka nukka nai mattia aum. ‘Da attemtai hekkul? Danab okkai nug am dahil gumaknu uɗat amu eɗua aotte. Da wan oppatkkulnu amu, da ɠagattag elele iitta, laa amu da danab laa unuqadppi, ee meɗaglagnu am da uɗal nette,’ awa aum. 4Anam ana, nug baula dabmakppa aum. ‘Okkai dahil nug uɗat dahil eɗua aweb, da danab laala ag da ag laulagppa daakkulnu akkulagnu amu, da inam hekkul. Danab amu ag dahil okkainu lon aoppig amu, da ag ehanadppi, dimppa ag da ehaniɗkkulag,’ awa aum. 5Anam ana amu nug danab laippu laippu ag anen anen nuhig danab okkainu lon aoppig ele, nug ag onilagppa e gumidna uɗippig. Aakku danab laa nug tatam be, uɗat gumak danab nug oɗ mettom. ‘Na lon dahil okkainu aome amu, lon amunu daden nob am gane ele?’ awa aum. 6A am nug, ‘3,000 lita olip goɗen,’ awa aum. A am uɗat gumak danab nug amegppa aum. ‘Na keeke nobnu yaak qatti nahip iikkude aon, na paha daanna, na amunu big laih 1,500 aakkuib ye!’ awa aum. 7Nug anam he dimppa amu uɗat gumak danab nug danab laa oɗ mettom. ‘Na lon aome amu, lon amunu daden nob am gane ele?’ A am nug, ‘1,000 bek wit,’ awa aum. A amu nug amegppa aum. ‘Na keeke nobnu yaak qatti nahip iikkude aona, na amunu big laih 800 aakkuib ye!’ awa aum. 8Uɗat gumak danab nug ib laa doyak ele, amge ib amu ele am ena iitta, nug ib amuppa keeke amu he beum amunu, nuhig okkai nug gumak danab nug uɗat kaliak amubia hekkunu doya aut autanab awak dayeyenu aum. Aɗinu ⌊nug anam aum⌋? Wannu haen imuppan danab amu, ag ahilag uɗat hekkulagnu elelenab, ag amuppa, ag danab amahlakppanu eɗadtteb,” awa aum. 9Jesus Nug anam ana, Nug baula aum. “Amunu da ag amelagppa attem. Ag wan imunu enub, men doɗo, ag amuppa ehanittak heig! Am dimppa men doɗo iitta meeb, aria ag lailkad ag ag ele laippu dayaknu oolagppa eleleib doon omaladppeg, ag hanhan dayaknu laulagppa gona daaglag.

10Am danab laa nug keeke nakok dabmedakkunu oo metta ii uuak kobolppa dabmedatte amu, aria geha nug keeke okkai ele oo meta ii uuak kobolppa dabmedakku. Amu danab nug keeke nakokppa uɗat tutukku haknu ii dootte, am geha nug keeke okkaippa uɗat tutukku haknu ele ii dooma. 11Am anamib ag enub, men doɗo, wan imunu ag amu ena dabmettaglagnu oo metta ii uuak kobolppa dab-ii-madatteb dayeb, geha aun nug ag keeke genab gumaglagnu uɗat madakku. 12Am ag danab laanu keeke atognokkulagnu oo metta ii uuak kobolppa ii dabmettaglag dayeb, am geha aun nug ag keeke akka ahilagnab dayebeb atognokkulagnu madakku?

13Maɗi nid laa nug gumak danab aɗit dilahnu uɗat hekkunu elele iitta. Am nug laanu oo mauhebeb, laanu amu nug ooppa nau ninig ele dookku. Doyaya, laaib amu nug dim lamittatta, laa amu dimedakku. Ag danab ah, ag Kayaknu uɗat amu enub uɗat ele oh hekkulagnu elele iitta,” awa aum.

14Amu ɗo gumak danab-Parasia, ag am men doɗonu oolag mauhom amunu, Jesus Nug nai amu oh mattie doona, ag ahan, nuhignu guhuɗittak nai madippig, 15amge Nug ag amelagppa aum. “Ag amu danab dilag neekkakppa genab tutukku hak danab daaglagnu, ag amunuib oolag daatte, amge Kayak Nug ag oolag diig dootte. Danab ag aɗi keekenu enanag dootteb ele, Kayak Nug amunu ooppa uuaknab dootte.

16Ɗo nai, amu Kayaknu propet nai ele, anukka danab ag amu mehuqegeg uɗie uɗie, Layattak Jonnu haen batak; amu Layattak Jonnu haenppa uɗie, gemu ele amu ag Kayaknu ɗo maɗoɗnu Nai Ena mehuqtteb. Amu danab oh ag Kayaknu ɗo maɗoɗ amu ooppa nokkulagnu wagai metteb. 17Geha dimppa hab wan ele amu iitta mekkulah, amge Kayaknu ɗo nai, nuhig huppu laippu laa amu iinab qettoɗma.

18Danab laa nug ah nuhig lamittowa, ah bau aotte amu, danab amu nug ewau pakkua gappai hak kobol hette. Amu danab nug ah laa nug gamu anukka uuitte oiyeye aotte, danab amu nug ele ewau pakkua gappai hak kobol hette,” awa aum.

Enub danab Lasarus ele

19Jesus Nug ele aum. “Anukka enub danab laa dayom, am nug hanhan beɗuppa lamen perpel, aria linen lamen hakkab eleib mettom. Am nug hanhan ee ena enaib lattom. 20Amu nug laug od guguittak amu daɗek danab laa hanhan meeg daattom. Nug onig amu Lasarus. Nug beɗu ihiud nau ambak ele. 21Nug am enub danab amu nug ee laabob, ee huppu neeb amu awa lalonu dabma daattom. Nug anam dayeye, qai ag dona, lemaɗulagppa nug ihi nau amu hoɗuegeg daattom.

22Am dimppa daɗek danab amu nug mauhom. Mauhe am engel ag nug aon meeg, Abraham ele daapiɗ. Daaeheh amu enub danab nug ele mauhe, ag nug boumppig. 23Nug mauhe, nug ukka, Hadesppa guittak naɗi ele dayom. Anam dayaya, nug neekke attan ukke, Abraham umanab dayeye, Lasarus nug ele daaeheh anatom. 24Anata amu enub danab nug ewa aum. ‘Mame Abraham, na dahilnu oot gai-iitta doon oot meɗan ehaniɗna heppe, Lasarus nug uɗia, nug eppeg hiqal nob nakok leppa ma, lemaɗulppa meeb, oug nakok maɗ! Aɗinu? Da aab gakkaɗak imuppa guittak naunab doottemde,’ awa aum. 25Awa a amu Abraham nug aum. ‘Nagppi, keeke laippu imu na dautppa dokku. Anukka haen na wanppa bau daanna, na keeke ena oh aome, amu Lasarus nug am keeke oh nau awom. Amge gemu aben imuppa nug am oo ena dayeye, ge na amu guittak nau doottem. 26Amu keeke laa ele, ig ag ele oh gamagppa Kayak Nug bai naɗi umanab noa ukkak laippu meum daatte amunu, danab ippa daatteb ele ag ahan, bai amu nona tena, ag daattebppa wakkulagnu amu, ag elele iitta. Am danab appa daatteb ag ahan, bai amu nona bena, ig daattemppa dokkulagnu amu, ag elele iitta,’ awa aum. 27Anam a amu enub danab nug aum. ‘Mame, anam dayeb amu da na unuqttem, na heppe, Lasarus nug da mamel laugppa gokku. 28Aɗinu? Da amalad tanig ele, amu ag ele aben guittak naɗi imuppa uɗimnanu, Lasarus nug nau aomnanu dabmettak nai ab ag dooglagnu ool daatte,’ awa aum. 29Nug anam aum, amge Abraham nug aum. ‘Ag amu Mosesnu nai am Kayaknu propet dilag nai ele; ag am nai amu doyeg!’ awa aum. 30Am enub danab nug aum. ‘Iitta mame Abraham! Ag amu dootteb, amge laippu mauhom ele, nug matmatppanu eɗua aha ukka amelagppa ab, ag oolag eɗukku,’ awa aum. 31Nug anam aum, amge Abraham nug amegppa aum. ‘Ag Mosesnu nai amu Kayaknu propet dilag nai ele doona ii dim lamidppeg amu, aria laippu laa nug mauhom, matmatppanu aha ukka amelagppa ab amu, ag amu ele geha ag oolagppa amunu genab ii doomna,’ awa aum.” Jesus Nug nai amu mattiom.

Currently Selected:

Luk 16: NB

Highlight

Copy