Luk 15

Sipsip qettoɗomnu nai

1Amu takis awak danab, danab ag Juda dilag ɗo oh ii dim lamidppig ele, ag Jesus gumidna uɗina, nuhig nai dooppig. 2Amunu ɗo gumak danab-Parasia amu ɗo mehuqak danab ele ag nai hena appig. “Danab amu Nug hipunin danab, amu danab laa, ag ig Juda, ihinig ɗo oh ii dim lamidtteb ele, Nug ag ele laippu dayaknu ooppa eleleib dootte, amu ag ele oh ee latteb,” aon appig.

3Ag anam aon appig amunu, Jesus Nug keeke danab ag dootteb ii dootteb ele ouaqata ippuanatta, imu amelagppa aum. 4“Ag oolagppanu danab laa nug sipsip 100 ele dayeb, amge nug nuhig sipsip laippu nug qettoɗeb, aria geha sipsip mameg nug 99 laa amu uuatteb, ag aben laappa daabppeg, nug ukka sipsip laippu amu iite mattia mattia anidkku? 5Haen nug mattia antta amu, aria nug maɗoɗppan gamag ahak doya, huma awa, mawa gokku. 6Nug mawa ukka, laugppa ta amu, nug laikkud am nuhig mudippan ele ag onilagppa eeb, ag uɗin qagmeppeg, nug amelagppa, ‘Da dahil sipsip laippu imu nug qettoɗom, amge da nug mattien eɗuen aomi amunu, da ag ele ig oh maɗoɗppan gamag ahak dootu!’ awa akku. 7Amunu da ag amelagppa attem, amubia hab aabppa ag genab tutukku hak danab 99, oo eɗuak maɗi ahilag am heppig, ag amu dilagnu maɗoɗppan gamag ahak dootteb, amge hipunin danab laippu laa nug oo eɗueb, haen amuppa am maɗoɗppan gamag ahak naɗinab hab aabppa daakku.

Men doɗo qettoɗomnu nai

8Am laa ele inam. Ah laa nug silwa men doɗo eblaih laih ele dayeb, amge laippu laa qettoɗeb, geha nug lam amota, laugppa kinipan tateb ukkeb, mattia neekka auta awa iite haaha, nug antta aokku. 9Antta awowa amu, aria geha nug laikkud am mudippan ele onilagppa eeb ag uɗin qagmeppeg, nug ag amelagppa, ‘Silwa men doɗo dahil laippu qettoɗom, amge da mattie eɗuen aomi amunu, da ag ele ig oh maɗoɗppan gamag ahak dootu,’ awa akku. 10Amunu da ag amelagppa attem. Amubia am hipunin danab laippu laa nug oo eɗutte dayeb amu, Kayaknu engel ag maɗoɗppan gamag ahak dootte,” awa aum.

Nid bau nug mameg uuitta ukkomnu nai

11Jesus Nug anam awowa, Nug baula mattiom. “Danab laa bekoɗ aɗit. 12Amu nid gehanu nug aha, mameg amegppa aum. ‘Mame, keeke oh na geha da awai ele i ihinih aognihnu otikkut amu, otiak dahil aokkulnu na gemu da meɗe!’ awa aum. Aria, mamelah nug nuhig keeke oh bekoɗ aoglahnu otia mate aopiɗ.

13Nug aa mate aoeh, haen elab iitta amu bekka gehanu nug aha, nuhig keeke am oh akka qagma awa, wan laappa umanab ukkom. Nug nukka appa wan amuppa dayaya, am nuhig men doɗo amu enaen mak kobolppa oh akke ukkom. 14Amu nug nuhig keeke oh akke ukka male, dimppa wan amuppa enug haen naɗi beum, ge nug keeke laa iitta. 15Amunu nug ukka, wan amuppanu danab laa nuhig uɗat hekkunu he, danab amu nug he, nid amu ukka, danab amu nuhig bo gumattom. 16Amu nug bo dilag ee lakkunu baag ukkom, amge danab laa nug lanak keeke laa nid amu ii mettom.

17Aria, haen nug qagaiettak dayaya, nug nukka ooppa be dabma, nug nugakka nai mattia aum. ‘Da mamelnu uɗat nid oh ag am ee elelenab ele, amge da ippa daattem amu enug huanaknab niɗe, mauhkkulnu hettem. 18Amu da attem hekkul? Da gemu ahe eɗue, mame toppa ukken, am da nug amegppa inam akkul. “Mame, da Kayak nuhigppa, nahip-ppa ele hipunin hemi. 19Anam amu, gemu da na dahilnu, ‘Na am nid dahil,’ aon akkutnu elele ii daattem amunu, na heppe, da nahip uɗat nid laa bia daakkul,” awe akkul.’ Nug nukka nuhignu anam aum. 20Aria nug anam ana, nug aha ukkom, amge nug ugakka, uma uppa piɗe uɗieye, mameg nug antta, nuhignu oo bodoetta le mak doya aut autanab awa, qaiqaɗ ukka bekka aɗa ootuqittom. 21Ootuqitte amu bekka nug mameg amegppa aum. ‘Mame, da Kayak nuhigppa, nahip-ppa ele hipunin hemi amunu, gemu da na dahilnu, “Na am nid dahil,” aon akkutnu elele ii daattem,’ awa aum. 22Nug digma anam aum, amge nug mameg nug maɗi nid nuhikkud onilagppa e doeg amelagppa aum. ‘Lamen elab enanag paha aon dona tagittona, ring laa aon dona, eppeg doɗoppa aɗappeg nob, baeg gaɗa ele aona, baegppa aɗappeg taɗ! 23Amu makau nag ittag ele laa aon dona qeppeg, ig latata gamanig ahaɗ! 24Am aɗinu? Dahil nid imu nug mauhom, amge nug eɗua bau daatte. Nug qettoɗom, amge ig nug eɗut anidttem,’ awa aum. Amunu ag hobul laa heppig.

25Heegeg, nid tatamnu nug dad okkaippa dayaya, dimppa nug uɗia, nug lag guguitta ba amu, ag ahi ettak, goɗak ele heegeg doya, 26nug maɗi nid laa onigppa e do, oɗ mettom. ‘Umu aɗi henana hetteb?’ awa aum. 27A amu maɗi nid nug amegppa aum. ‘Na amap nug eɗua uɗie, na mamen nug makau nag ittag ele qeum. Aɗinu? Nug nid eɗua awe, nug ena daatte, ii padal meum,’ awa aum. 28A amu nid tatamnu nug anam doya, oo nauhe, nug lag ooppa noak uuom. Uue aria mameg aha dimittim doa, nug oo mekkunu oo mak nai amegppa aum, 29amge nug eɗua mameg amegppa aum. ‘Da maɗ kuɗum nahip begbeg maɗi nid bia, nahip uɗat hemi. Deɗ laippu laa da na oɗen tappai ii neum, amge na meeme nag laippuib laa, da lailad ele gamag ahak hekkunignu ii meɗame. Amu iittanab. 30Amge nid nahip amu, nug ib baag ah ele oinna, nahip keeke oh akke ukkom ele amu, haen nug eɗua uɗie, na gamag ahak haknu na makau nag ittag ele aakku qeme,’ awa aum. 31Aakku mameg nug bekka amegppa aum. ‘Nagppi, na ii uuiɗme, haen oh na dagattolppa ikku daattem. Dahil keeke oh am nahip, 32amge gemu amu ig gamag ahak doopput, ig oonig ele ena daakkunu elele. Aɗinu? Na amap imu nug mauhom, amge gemu nug eɗua bau daatte. Nug qettoɗom, amge ig nug eɗut anidttem,’ awa aum.” Jesus Nug nai amu mattiom.

Currently Selected:

Luk 15: NB

Highlight

Copy