Luk 14

Jesus Nug ɗo gumak danab-Parasia laugppa ukkom

1Am Sabat laappa Jesus Nug ɗo gumak danab-Parasia dilag ikki laa laugppa ee lakkunu ukkom. Ukke amu ɗo gumak danab-Parasia amu laikkud ag nug meidna daappig. 2Amu danab laa nug leele agittak ele, nug ele appa dayom. 3Am Jesus Nug danab amu antta, nug ɗo mehuqak danab doyak okkainab ele, amu ɗo gumak danab-Parasia ele oɗ matta aum. “Ɗoppa aɗi yaak niitte? Ig Sabat deɗppa danab oɗe ele bappaidkkunignu am elelete o iittate?” awa aum. 4Nug anam aum, amge ag Nug amegppa amunu nai laa ii madippig amunu, Nug danab amu aɗa, oɗe nuhig amu babaittowa he ukke, 5Nug ag inam oɗ mattom. “Ag oolagppa danab laa nug nuhig nidtai, o makau okkai ebehi ele nuhigtai le moɗppa nob amu, danab nug Sabat deɗppa paha iite eeɗeb bema?” awa aum. 6Nug nai amu mattia oɗ mattom amu ag nob mekkulagnu nai laa ii anidppig.

7Aria, haen Jesus Nug danab ag hobulppa uɗippig, Nug ag balalppa daaglagnu ag balal anuqak tituanattegeg anatta, Nug keeke danab ag dootteb ii dootteb ele ouaqata ippuanatta, nai mattiaya amelagppa aum. 8“Am haen danab laa nug ewau matulaknu hobul naɗippa gokkutnu na oninppa eeb amu na gona, na balal anuqakppa aib daame. Aɗinu? Danab nug hobul amu hette ele amu nug danab laa, binag okkai ele, na binan eɗittak, nug ele onigppa eebtai uɗikku. 9Anam dayeb amu, aa oh hobulppa uɗipeɗ, aria danab onilahppa eum ele nug doa, na balal anuqakppa daappe anitta, nug na amenppa, ‘Na balal amu danab okkai binag ele imu mette!’ akku. Anam ab am na geha uɗan eheɗ neebeb, na gona laa oh dimulagppanab daakkut. 10Amge haen danab laa nug hobul amuppa gokkutnu na oninppa eeb amu, na gona, na laa dimulagppa daye! Na anam daappe, danab oninppa eum ele nug geha amenppa, ‘Lai na uɗin balal anuqak laa imuppa daye!’ awa akku. Nug anam heeb amu, na geha ee lanakppa danab oh noolagppa am na binan ele daakkut. 11Am danab aun nug onig humatte amu, Kayak Nug heeb, danab amu nug onig nekku, amge danab aun nug onig qe nette amu, Kayak Nug danab amu onig humakku,” awa aum.

12Aria, Jesus Nug ag amelagppa anam ana, Nug danab nug ele ee lakkulahnu onigppa eum ele, nug amegppa aum. “Amu haen na hobul hekkutnu oot daatte amu, na laipad, na awanad amapad, na buɗunad, nahip mudippan, ag enulag kuɗum ele amu, ag dimppa na ahilag hobulppa eɗun daakkutnu oninppa emananu, na amuppa nob ena eɗun aomnanu, na ag onilagppa aib eme. 13Iitta. Haen na ee naɗi hekkutnu henana, aria na daɗek danab, danab ebehilag kaliak ele, danab baelag nau autaut oitteb ele, amu danab amelag gaɗuak ele onilagppa ekkut. 14Am danab amu, ag am nahip ee amu nob mettaglagnu elele iitta, am na anam heppe amu, Kayak na itittak ena medakku. Yo, dimppa Kayak Nug amunu haen genab tutukku hak danab ag eɗun hippaidkkulag amu, Nug na nob ena medakku,” awa aum.

Hobul okkainu nai

15Nug nai mattia male, ag daappig ele amu ag oolagppanu danab laa nug nai amu doyowa, Jesus amegppa aum. “Danab nug geha Kayaknu ɗo maɗoɗ ooppa ee lakku amu, nug itittak ena awom daatte,” awa aum. 16Amge Jesus Nug amegppa aum. “Am danab laa nug hobul okkai hekkunu ha, nug danab kuɗum ag nuhig hobul okkai amuppa uɗin, ee lakkulagnu onilagppa eum. 17Aria ee lanak haen amu do, hobul mameg nug maɗi nid nuhig nug ukka, danab anukka uɗiglagnu deɗ mattom ele amelagppa, ‘Keeke oh am babaitta malak amunu, ag uɗieg!’ akkunu me ukkom. 18Hobul mameg nug anam he ukke amelagppa mattiom, amge danab amu ag oh ahilag dabmak anen anen aɗaeg be mattina, ag hobul amu anuqak iitta doona uuppig. Anam amu, danab laa nug amegppa aum. ‘Da amu dad okkai laa daden memi amunu, da ukken anidkkuloitte. Gadon, hobulppa gokkulnu am elele iitta. Amu na okkai nahip amunu amegppa appe doya, nug oo uug aib qeum,’ awa aum. 19Am laa nug amegppa aum. ‘Da amu makau okkai ebehi ele eblaih tanig ele daden maadmi amunu, da ukken uɗat matte anidkkul. Gadon, da hobulppa gokkulnu am elele iitta, amu na okkai nahip amunu amegppa appe doya, nug oo uug aib qeum,’ awa aum. 20Amu laa nug aum. ‘Ge da amu geha iikku ah aomi amunu, da gokkulnu elele iitta,’ awa aum. 21Aria maɗi nid amu nug eɗua ukka, nug nuhig danab okkai amegppa ag appig amu mattiom. Aakku lag mameg nug oo nauhe, nuhig maɗi nid amu amegppa aum. ‘Na paha gona, aab okkai imunu ib okkai ohppanu, ib nakok ohppanu ele daɗek danab, danab ebehilag kaliak ele, amelag gaɗuak, danab baelag nau autaut oitteb ele, na amu oh omaladppe, ag da laul ooppa uɗieg!’ awa aum. 22Nug anam a am dimppa maɗi nid nug nuhig okkai amegppa aum. ‘Naɗi, da na ame amu dim lamitten hein malami, amge balal laa oh am-ii-beum,’ awa aum. 23Anam a amu danab okkai nug maɗi nid amegppa eɗua aum. ‘Na gona, ib okkaippa, dadnu aɗ ele mattan gonana, na danab ah eeɗadppe uɗin, ooppa noig! Da laul imu ambekkunu ool daatte. 24Am imu da na amenppa ele attem. Danab amu oh da ag anukka onilagppa emi ele amu, ag ee dahil iinab aomna,’ awa aum.” Jesus Nug anam aum.

Dabmak tutukku awa, Jesus dim lamidkkunu nai

25Aria, dimppa danab ah kuɗumnab ag Jesus dim lamitteg gonana, Nug eɗua ag amelagppa aum. 26“Danab nug dahilppa uɗitte, amge nug mameg, anig, am nuhig ah, bekkod dilag am awag, amag, apakkud, appinkkud dilag, nug nukka nuhig bau dayak ele amunu anuqak dootte ele, aria nug dahil ippunittak awak danab daakkunu elele iitta. 27Danab nug nukka nuhig ad emaitak mawa, da dim ii lamiɗtte, nug am dahil ippunittak awak danab daakkunu elele iitta.

28Am ag oolagppanu danab laa nug lag attan ta ukkak menppa hak laa hekkunu dabmekku dayeb amu, nug attemtai hekku? Nug tatam dayaya, nug lag amu haknu nob dabma tutukku dookku. Nuhig men doɗo, lag amu ha malakkunu am elelete o elele iittate dookkunu anam hekku. 29Amu nug tatam anam ii hekku, aria dimppa nug lag ukku hewowa, lag malakkunu elele iitta dayeb, danab oh ag nug anidna, geha ag nug imidna, 30inam akkulag. ‘Danab umu nug lag umu hekkunu digmeum, amge nug ha malakkunu elele iitta,’ aon akkulag.

31Amu anamib king laa nug king laa ele ban hekkulag, aria nug tatam dayaya, dabmak tutukku aokku. Aɗinu? Nug am nuhig daup 10 tausenib, am king laa nug nuhig daup am 20 tausen amunu nug tatam dookku, nug am king laa amu ele ban heya, nug lamidkkunu elele o elele iitta. 32Amu nug dabma, nug elele iitta anidkku dayeb, aria haen nuhig kekeɗ amu nug uma dayebeb, nug nuhikkud danab laala heeb, ag goppeg, ag ban heppeg ii bemanu nai mattiglag. 33Amge amubia ag oolagppanu danab nug nuhig keeke oh uuatta ii dimadatte dayeb, aria nug dahil ippunittak awak danab daakkunu elele iitta,” awa aum. 34Jesus Nug anam ana, Nug nai tuɗitta aum. “Yu kalu amuam keeke ena, amge yu kalu nug nuhig ubuhi amu iitta meeb, aria geha danab laa nug heeb, yu amu nug eɗua ena daakkunu attem hekku? 35Am yu kalu anam amu danab ag wanppa o iitta aben laappa uɗat mettaglagnu elele iitta. Ag hamu maoppeg gokku. Danab nug daug ele dayeb, nug doyaɗ!” awa aum.

Currently Selected:

Luk 14: NB

Highlight

Copy