Luk 13

Danab nug oo ii eɗueb amu, nug padal mekku

1Haen amuppa amu danab laala ag daanna, Galili danab laala ag mana mettak heegeg, Pailat he, aqaeg mauhppig amu, ag amunu Jesus amegppa appig. 2Amu aeg amu Jesus Nug amelagppa aum. “Ag ahilag dabmakppa, ‘Galili danab amu ag hipunin danab nau, Galili laa oh eɗattak amunu aqappig,’ aon attebte? 3Da tutukku ag amelagppa attem, amu iitta. Amunu ag dabmeig! Ag oolag ii eɗueb amu, ag ele laa mauhppig bia mauhkkulag. 4Laa ele, danab 18, anukka Siloam appa lag attan ta ukkak menppa hak na qa aqe mauhppig amu, ag ahilag dabmakppa ag amu dilagnu amu ag, ‘Danab amu, eheɗ hak ahilag am danab laala Jerusalem daatteb ele amu, ahilag eheɗ hak oh eɗattak,’ aon attebte? 5Da tutukku ag amelagppa attem, amu iitta. Amunu ag dabmeig! Ag oolag ii eɗueb amu, ag ele laa mauhppig bia mauhkkulag,” awa aum.

6Jesus Nug nai baula tuɗitta, keeke danab ag dootteb ii dootteb ele ouaqata ippuanatta, nai laa mattia aum. “Danab laa nug nuhig grep dadppa ad fig laa eppom, am dimppa nug uɗia meu anidkkunu dabmeum, amge meu iitta anttom 7amunu, nug dad gumaknu maɗi nid amegppa aum. ‘Doye, maɗ ewam uue iikku da ad fig meu anidkkulnu uɗimi amge meu iitta amunu, na oppe qiiaɗ! Aɗinu nug wannu ittag hamu latte?’ awa aum. 8Amu dad gumaknu maɗi nid nug amegppa aum. ‘Danab okkai, uuppe! Maɗ imuib dayebeb, da diigppa wan buuen, wan ittag daakkunu ehanittak keeke nug diigppa mekkul. 9Anam heppi, maɗ laappa geha nug meu okkutai. Okku am ena, amge nug meu ii okku, aria na oppe qiikku,’ awa aum.” Jesus Nug anam aum.

Jesus Nug ah laa Sabat deɗppa babaittom

10Aria, Sabat deɗppa Jesus Nug ahilag nai doyak lag ooppa danab ah nai ippuanattette, 11ah laa appa dayom amu, ouɗi nau nug he, ah amu nug maɗ 18 ebehi kaliak ele dayom; ah nug gomelmel oiyaya, tutukku hibaitta daakkunu elele iittanab. 12Jesus Nug ah amu anttowa, onigppa e do, amegppa aum. “Ah da oɗe nahip amuppanu uhuqttem,” awa aum. 13Nug anam awowa, Nug eppeg ah amu qaɗeppa me, pahanab nug tutukku hibaitta, Kayak binag meum. 14Amge Juda dilag nai doyak lagnu ikki danab nug Jesus Sabat deɗppa Nug ah amu he ena dayom, nug amunu oo nauhe, nug danab ah amelagppa aum. “Deɗ eblaih laippu ele am uɗat haknu daatteb amunu, ag danab nug oɗe ahilag heeb ena daaglagnu dayeb, aria ag uɗat deɗppaib uɗina, ehanittak amu aoglag. Amge Sabat deɗppa amunu aib uɗippig,” awa aum. 15Anam a amu, Naɗi Nug eɗua aum. “Ag am hambuppuak danab. Sabat deɗppa amu, ag oh doɗ laulagppa gotteb. Gona ahilkad makau, donki ele diin gona, le madatteb. 16Amu ah imu, nug amu Abraham aɗeg laa, am Satan nug maɗ 18 oɗe metta aɗa dayom. Amu diig aɗinu da Sabat deɗppa da nug beɗu ii uhuqkkul? Am aɗinu amuam elele iitta?” awa aum. 17Nug anam a amu nuhikkud kekeɗ ag uɗalag eheɗ neum, amge danab ah laa oh ag nuhignu enanagnab dooppig. Aɗinu? Nug keeke oh ena heum.

Jesus Nug mastet aegnu, yisnu ele aum

18Am Jesus Nug nai imu ippuanatta aum. “Kayaknu ɗo maɗoɗ am aɗi keeke bia daatte? Da aɗi keeke laa ippunadppi, ag Kayaknu ɗo maɗoɗnu oolag maidkku? 19Nug am ad mastet aeg bette amubia. Danab laa nug ad mastet aeg amu awa, dad nuhigppa eppe, dimppa nug ba, okkai mewowa ad daatte, ai ag uɗin eppegppa daatteb,” awa aum.

20Nug nai amu ana, Nug baula ele aum. “Da aɗi keeke laa ippunadppi, ag Kayaknu ɗo maɗoɗnu oolag maidkku? 21Kayaknu ɗo maɗoɗ am yis bia. Ah laa nug plaua kuɗum awa, yis ele kabolie, dimppa plaua oh titiɗa okkai meum,” awa aum.

Od hogogdoak ele

22Anam awowa, Jesus Nug aha ukka, aab nakok okkai, aab nakok eleppa oiyaya, danab ah nai ippuanattatta, Nug Jerusalem gokkunu ukkom. 23Am danab laa nug Jesus oɗ mettom. “Naɗi, danab laippu laippuib Padal ii maknu ehanittak aoglagte?” oɗ mettom. Oɗ mette amu Jesus Nug amelagppa aum. 24“Ag od hogogdoak ele noaknu ebehilag qaiettaɗ! Da ag amelagppa attem, danab kuɗum ag od oɗe nakokppa nokkulagnu hekkulag, amge ag elele iitta. 25Lag mameg nug aha, lag od maneb amu ag uɗina, dimittim daanna od qeqalnana, inam unuqkkulag. ‘Naɗi od matulna mekke!’ aon akkulag. Amu geha nug ag amelagppa akku. ‘Da ag ii doyadttem, ag adeppanu uɗippig?’ 26Nug anam ab amu, ag nug amegppa akkulag. ‘Ig amu na ele ee, le ele lamut. Na ig ippunigppa daanna, ippunittak nai ele ame,’ aon akkulag. 27Ag anam akkulag, amge nug ag amelagppa akku. ‘Da ag ii doyadttem, ag adeppanu uɗippig? Ag eheɗ hak danab. Ag oh uuiɗna ukkeg!’ 28⌊Amu ag ooppa nokkulagnu elele iitta amu,⌋ haen ag Abraham, Aisak, Jakop amu propet oh ag Kayaknu ɗo maɗoɗ ooppa daappeg anadnana, ag am geɗattak dimittim daatteb doonna, ag gaanna, aelkad ele emalkkulag. 29Amu geha danab ah ag aam bedeppanu, aam nodeppanu, yau uɗitteppanu, yawalti uɗitteppanu ele uɗina, ag Kayaknu ɗo maɗoɗppa nona, hobulppa daaglag. 30Ao, danab laala gemu dim daatteb amu, geha ag anuqkkulag, amu danab laala gemu ag anuqak daatteb amu, geha ag dim daaglag,” awa aum.

Jesus Jerusalemnu gayom

31Jesus Nug nai amu mattia male, haen amuppa ɗo gumak danab-Parasia laala ag dona, nug amegppa appig. “Na laih imu uun, ahan laih ukke! Herot Antipas nug na nitteb mauhkkutnu hette,” aon appig. 32Am Jesus Nug amelagppa aum. “Ag gona, hippeg qakkak danab amu amegppa inam appeg dookku. ‘Doye, da gemu, butti ele ouɗi nau lamattette, oɗe danab ele heppi ena daappeg, deɗ ewamppa da geha uɗat dahil malakkulnu gogppa tekkul.’ 33Amge gemu, butti, laatu ele amu da oikkul. Aɗinu? Ag amu propet danab laa aab laappa ii qeppeg mauhma. Iitta. Ag Jerusalem appa nug qeppeg mauhkku.

34O Jerusalem, O Jerusalem, na propet aqae mauhtteb, maɗi nid Kayak nahip-ppa maatte uɗitteb ele amu, na ag ele menppa aqae mauhtteb. Da haen kuɗum na begapad, matuk anig nug nakkud haugppa qagmaatta tonadtte, amubia qagmaadkkulnu hemi, amge ag uuppig. 35Antteg! Ag ⌊Jerusalem daatteb amu, ag⌋ appalag am geha uɗ ba, aab dakkeɗ bia daakku. Da ag amelagppa attem. Ag da baula paha ii aniɗmana. Iitta. Ag, ‘Laa nug Naɗi onigppa uɗitte amu, ig Naɗi Nug itidkkunu oonig daatte,’ awona, ag da eɗun aniɗkkulag,” awa aum.

Currently Selected:

Luk 13: NB

Highlight

Copy