Luk 12

Nau aomnanu, Kayak eppegppa ehanittak awaknu ele dabmettaknu nai

1Haen danab ah ameg tausen kuɗum ag qagmena qataiettan, laala ag akka akka nug baeg tappan daaegeg amu, Jesus Nug tatam nuhikkud ippunittak awak danab amelagppa aum. “Ag ɗo gumak danab-Parasia dilag yisnu dabmeig! Da ahilag hambuppuak kobolnu attem. 2Keeke oh laa anidmanu tonak daatte am geha miag atikku. Ge, keeke oh lokkumak daatte ele, Kayak Nug heeb, danab ag anidkkulag. 3Amunu nai oh ag gatatuppa madippig am geha aam neeb, danab ah dooglag. Amu nai oh ag lag ooppa otiptip-ppa madippig amu, geha lag koɗokko uɗem ukkakppa hippaidna daanna mehuqppeg gokku,” awa aum.

4Jesus Nug nai amu ana amu, Nug nai tuɗitta aum. “O lailad, da ag amelagppa imu attem. Ag laa ag beɗulag aakkuib qekkulagnu elele, ag anam hewona, ag keeke laa hekkulagnu elele iitta, ag amu dilag aib baɗadppig. 5Amge ag aun baɗidkkulagnu amu, da ag ippunadkkul. Laa nug danab qeeb mauheb, buɗieb padal mak abenppa gokkunu ɠagattag ele amu, ag nuhignu baɗeg! Ao, da ag amelagppa attem, ag nuhignu baɗeg! 6Danab ag ai naunau tanig ele men doɗo nagnagppa daden metteb, amge Kayak Nug ai nakok laippunu am daug ii atitte. 7Nug ag ikkilag uɗug oh ebaqa malom. Ag aib baɗappig. Ag ai naunau kuɗum, ag amu dilag daden oh eɗadna malappig.

8Am da ag amelagppa attem. Danab laa nug dahilnu daatte danab ah amelagppa akku dayeb amu, geha Danab Bekkalag da, da ele danab amunu, ‘Nug dahilnu daatte,’ Kayaknu engel amelagppa akkul. 9Amge danab nug danab ah noolagppa da dimeɗatte, am geha da ele Kayaknu engel noolagppa danab amu dimedakkul. 10Am danab nug Danab Bekkalag da, dahilnu nai nau akku amu, geha Kayak Nug hipunin amu uhuqa medakku. Amge danab nug Kayak Ouɗinu dabittak nai madikku amu, nug hipunin uhuqa mettak ii aoma. 11Amu laa ag ag diiadna, Juda dilag nai doyak lakka, o gabman noolagppa, o laa ag gumaknu ehah ele noolagppa keeke goppeg, ag haen amuppa ag ena daaglagnu aɗi akkulagnu, ag nai aɗinab mattiglagnu ele dabmak huan aib aoppig. 12Aɗinu? Am aua amuppaib geha Kayak Ouɗi Nug ag aɗi akkulagnu ag ippuanatteb, ag amelagppa mattiglag,” awa aum.

Enub danabnu kaya

13Jesus Nug anam a amu, danab laa danab ah ameg amu oolagppanu, nug amegppa aum. “Ippunittak danab, na da awal amegppa appe, nug i mamenihnu keeke amu otia, laih da meɗaɗ!” awa aum. 14Nug anam aum amge Jesus Nug amegppa aum. “Amu attemun? Aun nug da aa epeɗiatkkulnu meiɗa, amu ahilah keeke otikkulnu ele meiɗom?” awa aum. 15Anam awona, Nug danab ah oh amelagppa aum. “Ag dabmena, tutukku doyeg! Ag baubau awaknu hik qak kobol oh aib heppig. Aɗinu? Danab nug keeke ohnu elelenab eɗittak daatte amu, nug nuhig keeke amuppa bau dayak ii aotte,” awa aum. 16Ana amu Jesus Nug keeke danab ag dootteb ii dootteb ele ouaqata ippuanatta, inam amelagppa aum. “Enub danab laa nug dad okkai nuhigppa ee meu huanak ele antta, 17Nug ooppa nuhig dabmak inam dayom. ‘Da ee dahil huanak imunu attemtai hekkul? Da ee dahil oh qagmekkulnu amu, ee maknu lag elele iitta,’ awa aum. 18Aria, nug anam ana, nug baula aum. ‘Da inam hekkul. Da ee maknu lag oh loppaɗena, ee mak lag okkai okkai hatten amu, da ee aeg qagmein, keeke ena dahil oh ele lag amuppa qagmeppi dayebeb, 19da dakka, da inam dabmekkul. “Da lagnu keekenu laa ii bahuhupa, dahil keeke ena ena daatte, maɗ kuɗum daakkunu elele. Aria, da hik awe dayeye, da ee, le ele oh lanakib lainne, gamag ahakppa daakkul,” ’ awa aum. 20Nug dabmak nuhigppa anam aum, amge Kayak Nug amegppa aum. ‘Na am Kayak dab-ii-maama ii dim lamittak danab! Gemu tuqan imuppanab amu, na mauhkkut. Anam am, keeke oh na bappaidme daatte amu, aun nug aokku,’ awa aum?” 21Jesus Nug nai amu ana, Nug nai gog ta aum. “Danab ag keeke kuɗum ahilagnu qagmetteb, amge Kayak noobppa amu ag danab ena iitta daatteb, ag am amubia anidkkulag,” awa aum.

Uug doya dabmak qak kobolnu nai

22Aria, Jesus Nug nuhikkud ippunittak awak danab amelagppa aum. “Anam daatte amunu, da ag amelagppa attem. Ag wanppan bau dayaknu dabmak aqadna, ‘Ig ee elete daagnig?,’ o iitta beɗulagnu, ‘Ig beɗunigppa takkaknu amu, ig lamen elete daagnig?’ aib appig. 23Bau dayak amu ee lanakib iitta, beɗu nug lamen takkaknuib ele iitta. 24Ag ai aakkude anadna doyeg! Ag ee ii ebatteb, ag qagmena bakkalenu lakka ele ii metteb. Ag eeppulag, enulag ele mekkulagnu lag laa iitta, amge Kayak Nug ee madatte. Am danab ah ag ai iite eɗadtteb? Yo, ag huana eɗadtteb. 25Amu ag oolagppa aun nug wanppa dayaknu dabmak qeeqe, haen nuhig baula ele tuɗidtte? Elele iittanab. 26Ag keeke nakok laa anam hekkulagnu elele iitta amu, aria aɗinu ag keeke laanu dabmak huana qette?

27Ag atuppan bala lili haɗag bena daatteb, ag amu anatteg! Ag uɗat ii hetteb, lamen ele ii hetteb, amge da ag amelagppa attem. Anukka Solomon nug bala nuhig oh meum, amge nuhig bala ena amu, am enanag bala haɗag amubia laa iitta. 28Ag antteg! Gikkiɗah gemu hippaitta daatte amu, butti ag okkulna, aab aɗuppa maoppeg tekku. Gikkiɗah am keeke hamu bia, amge Kayak Nug bala medatte amunu, ag tutukku doyeg! Kayak Nug ag ele genabnab dabmadakku. Ag oolagppa genab nakokib dootteb. 29Amu ag aɗi ee le ele lakkulagnu hik aib aqom. Ag keeke amubianu aib dabmak aqom. 30Amu wan imuppanu iitta aɗi ag keeke amu ohnu hik aqadtte, amge ag dahilad amu, ag Mamelag Nug ag keeke amu oh aoglagnu dootte. 31Amge ag Kayaknu ɗo maɗoɗnu anuqak dooppeg, geha Nug keeke amu oh ele ag madakku.

32O lailad, ag aib baɗappig. Da Mamel Nug nuhig ɗo maɗoɗ ag madakkunu oo daatte. 33Ag ahilag keeke oh maadppeg, danab daden meppeg, men doɗo aona, daɗek danab ehanadna matteg! Ag anam hekkulag amu ag men doɗo inaknu hogot, alag ma nauhkkunu elele iitta ahilkadnu diiglag. Ag aakku ahilag en ii iitta memanu hab aabppa qagmekkulag. Appa amu yab danab laa nug ii daama, dittuɗ ele ag keeke laa ii heppeg nauhma. 34Aben adekkuppa ag enulkad daatte ele amu, ahilag dabmak ele am appaib daakku,” awa aum.

Babaittak dayaknu nai

35Jesus Nug nai amu ana, Nug nai imu ele mattiom. “Ag lamen matagiɗ ele takkan, lam amotna, uɗat hekkulagnu bappaidna, 36ag maɗi nid, ag ahilag danab okkai, nug danab ah ele dilah ewau matulak hobulppanu eɗua uɗia, od qeqaleb, od paha matulkkulagnu ameg men daatteb bia dayeg! 37Am danab okkai nug uɗia, nuhikkud maɗi nid ag ii niippeg anadkku, aria maɗi nid amu, ahilagnu am ena. Da genab ag amelagppa attem. Geha danab okkai nug nukka lamen tutu matagiɗ ele takkowa, nug ab, maɗi nid amu ag balalppa daappeg, nug nukka ag ee madakku. 38Amu nug tuqan tugmagtai uɗikku, iitta matuk laippu gayebtai uɗia ag ii niippeg anadkku, maɗi nid amu ahilagnu am ena. 39Ag keeke imu tutukku antteg! Lag mameg nug haen adekkuppa yabhok danab uɗikku doolo, nug heeb, yabhok danab nug laug loppaɗa, lag ooppa ii nolo. 40Amunu ag ele bappaidna dayeg! Aɗinu? Danab Bekkalag da, da haen laa ag ii dabmekkulag ele, haen amuppa uɗikkul,” awa aum.

41Jesus anam awa a aria Pita nug Jesus oɗ mettom. “Naɗi, na keeke danab ag dootteb ii dootteb ele ouaqatna ippunittak nai mattime ele amu, na ihinignuib amete o iitta na danab oh dilag amete?” awa oɗ mettom. 42Pita nug anam oɗ mette, Jesus Nug nob ma aum. “Maɗi nid laa, nug doyak dabmak ena ele, nug oo metta ii uuak kobol ele dim lamidtte amu, nuhig okkai nug nuhikkud maɗi nid laa gumattatta, haenppa ee madakkunu elele daatte antta, nug amu hekkunu meum amu, 43dimppa maɗi nid amunu okkai nug laih ukkakppanu eɗua uɗia, maɗi nid amu nug danab okkai nuhig anukka amegppa aumbia hette anidkku amu, nuhignu am ena. 44Da genab ag amelagppa attem. Danab okkai nug maɗi nid amu, nuhig keeke ohnu ikkilag meeb daakku. 45-46Amge maɗi nid amu nug ooppa, ‘Danab okkai dahil nug paha ii uɗima,’ dabmekku dayeb, nug digma, maɗi nid laa, maɗi ah laa ele makkuɗattatta, nug ee lanana, le ɠagattag ele lana, kaaka qeeb, nuhig okkai nug haen deɗ ele, maɗi nid amu nug ii doyom, ii dabmeum ele, amuppa eɗua uɗikku. Uɗia amu, danab okkai nug maɗi nid amu eheɗnab hettowa, awa meeb, nug danab laala ag oolagppa genab ii dootteb, amu ele daaglag.

47Am maɗi nid nug nuhig danab okkainu dabmak amu dootte, amge nug digma ii babaitta, nuhig danab okkainu dabmak amu dim ii lamidtte, geha danab okkai nug huana makkuɗkku, 48amge maɗi nid nug nuhig danab okkainu dabmak ii dootte, amge nug bu aokkunu kobol heum amu, geha nuhig danab okkai nug nakokib makkuɗkku. Danab ag keeke kuɗum aoppig amu, ag eɗun keeke kuɗum nob mekkulag. Am danab laa nug eppegppa keeke kuɗum mak daatte amu, geha laa ag nug keeke huanak nob madakkunu onigppa ekkulag,” awa aum.

Danab ag ameg ameg oppatkkulag

49Jesus Nug baula tuɗitta aum. “Da heppi, hipuninnu ɠagattag wan imuppa iitta mekkunu uɗimi. Nuhig ɠagattag aakku iitta melo am ena, 50amge uug laa da maokkulnunab daatte amunu, da gemu ukka batakppa oolppa uug nau doottem. 51Da uɗimi amunu wanppa maɗoɗib daakku amu ag anam aib dabmeppig. Da uɗimi amunu maɗoɗib ii daama. Iitta. Danab ag oppatna, ameg ameg daaglag. 52Am gemu, dimppa ele, geha lag laippuppan tanig ele ag daanna, laa ag da dim lamiɗppeppeg, laa ag iitta amunu ag geha oppatna, ameg aɗit daaglag. Ewam amu ameg laa daaglag, aɗit amu aa ameg laa daaglah. 53Mameg nug bekka ele aa dabmak laippu iitta, bekka nug mameg ele aa oolah laippu iitta daaglah. Anig nug aɗeg ele aa dabmak laippu iitta, aɗeg anig ele aa oolah laippu iitta daaglah. Ahipa bau nug ahipa kaino ele dabmak laippu iitta, ahipa bau, ahipa kaino ele aa oolah laippu iitta daaglah,” awa aum.

Keeke dimppa bekkunu doyaknu nai

54Jesus Nug danab ah amelagppa ele inam anana aum. “Ag anidna dootteb. Haen lombig nug aam nodeppa tette anidna, paha ag, ‘Gu nekkunu uɗitte,’ aon atteb, amu genab gu nette. 55Am haen yau uɗitte amu ag, ‘Geha aam nug gakkaɗkku,’ atteb amu genab, anam aakku hette. 56Ag hambuppuak danab, ag wanppanu keeke, amu hab waappanu keeke ele hettoɗin tutukku dootteb amunu, aɗinu ag dahil haknu hettoɗin tutukku ii dootteb? 57Am aɗinu ag akka kobol amu tutukku ii dabmena, tutukku ele ii epeɗitteb?

58Aria, haen na danab laa ele aa hettoɗiakppa goyaya, ibppa aa nai amu bappaidkkulahnu hee! Iitta amu nug na hettoɗiakppa meidkkutai. Meitteb amu epeɗiak danab nug na hettoɗiaknu daup laa eppegppa meitteb, daup amu nug na maniguittakppa meidkku. 59Meitteb amu da na amenppa attem. Na maniguittakppa daanna, nahip eheɗ hak nob ohnab eɗun medappe, ag od matulppeg, dimittim dokkut. Na ii mettak haenppa iinab dimittim uɗima,” awa aum.

Currently Selected:

Luk 12: NB

Highlight

Copy