Luk 11

Unuqittaknu kobol

1Haen laa Jesus Nug aben laappa unuqittatta dayom. Unuqitta male, nuhig ippunittak awak danab laa amegppa aum. “Naɗi, Layattak Jon nug anukka nuhikkud ippunittak awak danab ippuanattom bia, na ig unuqidkkunignu ippunikke!” awa aum. 2A amu Jesus amelagppa aum. “Haen ag unuqidna inam aig! ‘Mame, na heppe, ig danab oh ig na onin am oppiaawak daatte dootu!! Na heppe, ɗo maɗoɗ nahip wan imuppa daakkunu unuqidttem. 3Ig ee megattem ele amu, gemunu ele megakkutnu na oɗ medattem. 4Laa hipunin megatteb, ig uhuqta madattem amubia na hipunin ihinig uhuqna megakkutnu na unuqidttem. Na ippun ena, ig nau hekkunignu eeɗak iittappa omaigppe gokkunignu oɗ medattem,’ ” awa aum.

5-6Jesus Nug anam ana amu Nug baula ippunittak awak danab amelagppa aum. “Ag oolagppanu laa nug tuqan tugmag ukka, layag amegppa, ‘Lai, da layal laa oiya oiya uɗia, da gumiɗa be, da ee laa nug medakkulnu iitta amunu, na bret kunum ewam meɗe!’ awa akku dayeb, 7nug layag, nug lag ooppa daatte amu, nug oɗeppa awa, inam akkutai. ‘Na da uɗat aib meɗame. Od manak, nid naunau dahilad da ele abenppa niittem. Da ahe na keeke medakkulnu amu elele iitta,’ awa akkutai. 8Anam aakku, amu da ag amelagppa attem. Lag mameg nug danab amu layag, amge diig amunu nug aha, keeke ii medakkutai, amge nug layag dimittim dayaya, tappaɗa ge iitta eeb bahi yeeb, diig amunu nug aha, nug keeke oh iittanu aum amu medakku.

9Anam daakku amunu, da ag amelagppa attem. Ag Kayak unuqidppeg, Nug ag madakku. Ag mattina, ag anidkkulag. Ag od qeqalppeg, Kayak Nug ahilagnu od matulkku. 10Aun nug Kayak unuqidtte, nug aotte. Aun nug maditte, nug anidtte. Aun nug od qeqaltte, Kayak Nug od matultte.

11Ag oolagppanu danab laa bekka nug mameg kakai laa medakkunu oɗ metteb amu, mameg nug mat nau medakkute? Iitta! 12Aria, nid nug mameg matuk oppa medakkunu oɗ metteb amu, mameg nug apiap medakkute? Iitta! 13Anam amunu, ag nau aɗi ag genab keeke ena ag nid ahilkad mattaglagnu dootteb dayeb, genabnab ag Mamelag, hab attan daatte, Nug danab ag Nug unuqidppeg, Nug nuhig Ouɗi ag madakku,” awa aum.

Laa ag Jesus Belsebubnu ɠagattagppa uɗat hette appig

14Aria, haen laa Jesus Nug oɗetup danab laa, ouɗi nau laa nug he, danab amu nug oɗetup dayom amu, Jesus Nug danab amu antta, Nug ouɗi nau lamitte ukke, aria danab oɗe oppate nai mattie, danab ah kuɗum appa daappig ag amu anidna, dabmak kuɗum aoppig. 15Amge danab laala ag appig. “Nug ouɗi nau ikkilag Belsebub, Nug nuhig ɠagattagppa ouɗi nau lamadtte,” aon appig. 16Ag anam aeg amu, danab laala ag Jesus ma anttak mettanna, ag Nug Kayak dabmettaknu kobol danab haknu elele iitta laa heeb anidkkulagnu oɗ medappig, 17amge Nug ahilag dabmak doya, Nug ag amelagppa aum. “Amu ɗo maɗoɗ laippuppan danab ag ahan oppatna, ameg aɗit bena nug qekkulag amu, wan amu nug elele iitta, ɠagattag ii daama. Laa ele, baekkudppa laippuppanu ag oppatna nug qekkulag amu, baekkudppa amu nug na qekku. 18Amubia Satannu daup ag oppatna, ameg aɗit bena akka akka nug qetteb amu, Satannu ɗo amu attem ha ɠagattag daakku? Ag dahilnu atteb. ‘Nug ouɗi nau lamadtte amu, Nug Belsebubnu ɠagattagppa hette,’ aon atteb. 19Da genab Belsebubnu ɠagattagppa ouɗi nau lamadttem dayeb amu, ag ahilkad laala ag uɗat imu ele hetteb ele, ag aunnu ɠagattagppa hetteb? Anam amunu ag ag epeɗiadna, ⌊ag eheɗ maditteb ippunadkkulag⌋. 20Amge Kayak Nug da ehaniɗe, da ouɗi nau lamadttem dayeb amu ag doyeg; Kayaknu ɗo maɗoɗ aakku ahilagppa uɗiom,” awa aum.

21Jesus Nug anam ana, Nug nai tuɗitta aum. “Haen danab ɠagattag laa nug ban haknu keeke aɗa, nug laug guma ɠagattag daatte amu, aria nuhig keeke oh am ena daakku. 22Amge haen danab ɠagattagnab laa, nug lag mameg eɗittak, nug uɗie, aa nug qeya, aria laa uɗiom ele nug lag mamegnu ban haknu keeke nug ehanidkkunu ooppa genab doyom ele, nug amu aɗitta awa, nug keeke oh awa pania, danab laa madakku. 23Am danab laa nug da ele layam iitta amu, nug dahil kekeɗ. Danab laa nug da keeke qagmettem ele, nug ii ehaniɗa qagmette amu, nug aakku keeke ehale gotte.

24Haen ouɗi nau laa nug danab laa uuidtte amu, nug ukka atu taɗakppa nug aben laa antta, hik awa daakkunu oitte. Oiya oiya, nuhig dayaknu aben ena laa ii anidtte, aakku nug atte. ‘Da eɗuen, anukka daamippa ukken daakkul,’ awa atte. 25Ana amu nug ukka, tatam dayom amuppa ta, lag amu oo tatak, bala mettak ele antta, 26aakku nug eɗua ukka, ouɗi nau eblaih aɗit laa ele, ag ahilag ɠagattag, kobol nau hekkulagnu am nug eɗittak ele, nug amu diie, nug ele uɗitteb. Uɗin, ag lag amu ooppa nona daatteb. Noeg amu danab amu nug anukka nau dayom amu, gemu nug naunab daatte,” awa aum.

27Jesus Nug nai amu mattiom am haen amuppa danab ah kuɗum daaegeg, ag oolagppanu ah laa ewa aum. “Ah na menuitta, nug na huh mettom ele amu, nug itittak ena awom daatte,” awa aum. 28Amge Jesus Nug aum. “Anam iitta! Danab ag Kayak nai doon dim lamidtteb ele, ag itittak ena aoppig daatteb,” awa aum.

Danab laa ag epponak keeke anidkkulagnu appig

29Danab ah kuɗum ag uɗin Jesus gukkuidna qagmeegeg, Jesus Nug ag amelagppa inam aum. “Danab ah haen gemu imunu ag danab ah nau. Ag Kayak dabmettaknu kobol danab haknu elele iitta laa anidkkulagnu oɗmak hetteb, amge da laa ii hepa. Propet Jona nuhigppa aɗi beum aakkuib ag ippunadkkul. 30Jona nug Niniwe dilag epponak keeke dayom, amubia Danab Bekkalag da, da gemu imunu danab ah dilag epponak keeke daakkul. 31Am dimppa haen Kayak Nug danab ah epeɗiadkku, haen amuppa wan laappan kwin, wan amuam yau uɗitteppanu daatte, nug aha, danab ah haen gemunu dilag eheɗ hak amu miag atikku. Aɗinu? Nug wan batakppanu, amge nug Solomonnu doyak dabmak ena ele, nug amu dookkunu Solomon gumitta uɗiom. Nug anam uɗiom, amge gemu laa Solomon eɗittak am iikku daatte. 32Haen Kayak Nug danab ah epeɗiadkku amu Niniwe danab ah ag ahan, danab ah haen gemunu dilag eheɗ hak amu miag atiglag. Aɗinu? Niniwe danab ag Kayak nai Jona oɗeppa doona, ag oolag eɗuom, amge gemu laa Jona eɗittak am iikku daatte,” awa aum.

Beɗunu amahlak

33Jesus Nug nai amu ana, Nug nai baula tuɗitta aum. “Am danab laa nug lam amota ii lokkumtte. Nug lag heɗkkud, oɗe amuppa ii inatte o tappiɗ waappa ii mette. Iitta. Nug danab ag lag amu ooppa nona, amahlak anidkkulagnu amota, lam maknu balal attan me eotte. 34Na amen amu na beɗun laih laih oh amahlak madatte. Na amen nug ena dayeb amu, na beɗun laih laih laa oh amu amahlak ele daaglag, amge na amen am nau dayeb, na beɗun laih laih laa oh amu gatatu manak ooppa daaglag. 35Amunu aɗi dabmak na ootppa daatte, na dabmak amunu, ‘am amahlak’ doottem amu, dabmak amuam gatatu daatte daamanu na dabme! 36Am na beɗun oh amahlak ele dayeb, na beɗun laih laa gatatu iitta, amu aria na beɗun laih oh ag amahlak ele. Amuam lamnu amahlak amahalidtte amubia,” awa aum.

Jesus Nug danab laalanu gadonnab gadon aum

37Jesus Nug nai amu mattia male, ɗo gumak danab-Parasia laa nug laugppa ee lakkulahnu onigppa e, Jesus Nug ukka, lakka ta, Nug balalppa dayom. 38Dayom amge ɗo gumak danab-Parasia amu nug Jesus tatam ahilag ɗo atte, kobol amuppa Nug eppeg ii ihowa ee laum amu antta, Nug dabmak kuɗum awom. 39Anam heum amge Jesus Nug amegppa aum. “Ag ɗo gumak danab-Parasia ag kap, tappiɗ ele gaɗaib ihatteb, amge ooppa baubau awaknu hik qak, nau hak kobol ele ambak daattep. 40Ag am dabmak tutukku iitta ele. Kayak keeke heum amu dimittimnuib ii heum. Iitta! Ooppanu ele heum 41amunu, ag danab daɗek ehanadppeg, ii nauhppeg, ag oolag oppiaawak ele daakku.

42Amge o gadonnab gadon ɗo gumak danab-Parasia, ag dabmeig! Ag dattanu keh naunau amu oh oppateg, ameg eblaih tanig ele neeg, ameg laippu ag Kayak medatteb, amge ag nai doya mala hettoɗia epeɗia elele mettak kobol, Kayaknu oo mauhak kobol ele ii dim lamidna oitteb. Ag ɗo ii dim lamidtteb, amu laa dim lamidtteb ele, ag amu oh dim lamidlob, amuib am tutukku. 43O gadonnab gadon ɗo gumak danab-Parasia, ag dabmeig! Ag nai doyak lakka aben anuqakppa daaglagnu, ee oɗiak abenppa danab ah ag humadkkulagnu oolag mauhtte. 44O gadonnab gadon, ag dabmeig! Ag am boumaknu moɗ laa, moɗ amuppa moɗ laa iikku daattenu at laa ii daatte amu, danab ii doonna qaɗeppa oitteb, ag amubia daatteb,” awa aum.

45Jesus Nug anam a amu ɗo mehuqak danab doyak amu okkainab ele laa nug oɗeppa awa aum. “Ippunittak danab, na nai ame amu, na nai amuppa ig nai dittiakppa yaaigttem,” awa aum. 46A amu Jesus Nug aum. “O gadonnab gadon ag ɗo mehuqak danab doyak amu okkainab ele, ag dabmeig! Ag keeke uug ele danab ah qaɗelkadppa meegeg, ag maoglagnu uɗat okkai hetteb, amge ag akka ag eppelag doɗo laa uug amu maoglagnu nakok ii meeg otte.

47O gadonnab gadon, ag dabmeig! Aɗinu? Ag mamelkad aɗi ag anukka Kayaknu propet aqaeg mauhppig, amge ag gemu daatteb, ag propet anam mauhppig dilag boumak aben bappaidtteb. 48Ag kobol amuppa ag mamelkad aɗi anukka heppig, ag amunu oolag ena dayeye danab ah ippunadtteb. Ag mamelkad aɗi ag Kayaknu propet aqaeg mauhppig. Ag gemu daatteb amu, ⌊ag mamelkad aɗi bia, ag ele oolag ena iitta amunu, ag ahilag uɗat tuɗidna,⌋ ag propet dilag matmat bappaidtteb. 49Amu Kayak nuhig doyak enappa amunu Nug matu aum. ‘Da am dahil totol danab am propet ele maadppi, ahilagppa goppeg, ag danab amu laala eheɗ hattaglag, amu ag laala aqappeg mauhkkulag!’ awa aum. 50-51Anam amunu, wan imunu digmakppanu propet aqe mauhak digmak Abel, nug mauhe uɗie, Sekaraia, ag nug qaɗab, Kayak laug ele gamagppa qeeg mauhom, nuhig mauhak batak amu, qe mauhak hipunin amu oh danab ah haen geha imunu ag qaɗelagppa daakku. Da genab ag amelagppa attem. Keeke imu oh am danab ah gemu daatteb ele dilagppa bekku.

52O gadonnab gadon, ag ɗo mehuqak danab doyak okkainab ele, ag dabmeig! Ag doyak awaknu ki amu maoeg ukkom. Od ag akka matulna ii noppig, amu ag danab ah ag nokkulagnu hetteb ele amu, ag nomananu, ag ib oo neppig,” awa aum.

53Amu Jesus Nug lag amu uua noa dimittim no, am ɗo gumak danab-Parasia amu ɗo mehuqak danab ele ag gakkaɗak bia doonna, ag oɗmak kuɗumppa Jesus uug medappig. 54Nug nai eheɗ laa ab, ag Nug dimug mekkulag, amunu heppig.

Currently Selected:

Luk 11: NB

Highlight

Copy