Luk 10

Jesus danab 72 misin uɗatnu maatte goppig

1Amu dimppa Naɗi Nug danab 72 laa, ag aɗit aɗit anuqna, aab okkai nakok ele ohppa, Nug gokkunu dabmeum ele, amuppa goppeg, dimppa Nug nukka ele amuppa dim lamatta gokkunu otiattom. 2Nug otiatta, Nug amelagppa aum. “Datta ee kuɗumnab oɗuppig, amge uɗat nid kuɗum iitta amunu, ag dad Mameg, Nug uɗat nid maatteb, ag gona ee nuhig qagmekkulagnu unuqitteg!” awa aum. 3Nug anam ana, Nug nai baula tuɗitta aum. “Ag aakkude ukkeg! Da ag maatti, ag sipsip nakkud wulp oolagppa gotteb bia gotteb. 4Ag men doɗo inaknu hogot, oiyaknu battam, baelag gaɗa ele amu aib aoppig. Ag gonana, ibppa laa ele nai mattiglagnu haen aib kakidppig.

5Amu haen ag lag laa ooppa nona amu, aria ag tatam inam akkulag. ‘Kayaknu maɗoɗ lag imuppanu danab ah dilagppa daakkunu oonig daatte,’ aon aig! 6Amu lag amuppan danab ag ag am danab ah maɗoɗ ele daatteb dayeb, nahip itittak ena amuam ahilagppa daakku. Iitta dayeb amu, ahilag itittak ena am ahilagppa eɗua dokku. 7Ag lag laippu humadppig ele, amuppaib daanna, lanaknu keeke, ee le ele madappeg laig! Aɗinu? Uɗat nid nug nuhig uɗatnu nob aokkun daatte. Ag lag laala ohppa aib gona daappig.

8Am haen ag gona, aab laappa noppeg, ag ag ele laippu dayaknu oolagppa eleleib doon, ee ele panin madappeg amu, ag laig! 9Aab amuppan oɗe danab amu, ag heppeg ena daappeg, ag amelagppa, ‘Kayaknu ɗo maɗoɗ aakku ahilagppa miag doum daatte,’ aon aig! 10Amge haen ag gona, aab laappa noppeg, appanu danab ag ag ele laippu dayaknu oolagppa eleleib ii dooppeg amu, ag gona, aab amunu ibppa daanna, ag inam aon aig! 11‘Ahilag aabnu gappud, ig baenigppa teum daatte amu, ag eheɗ heppig ippunadkkunignu, ig gappud amu iikku oppiut nette, amge ag imu dabmena autna aweg! Kayaknu ɗo maɗoɗ aakku miag doum daatte!’ aon aig! 12Anam aakku amu da ag amelagppa attem; epeɗiak haen okkaippa Sodom am nob nau aokku, amge aab amuam nob nau amu eɗittak aokku.

13O gadonnab gadon aab Korasin, o gadonnab gadon aab Betsaida ele! Da ahilah danab oolagppa oiyeye, kobol digdig danab hekkunu elele iitta hemi amu, danab laa nug Tair Saidon ele, danab appa daatteb ag am iitta aɗi danab amu, nug danab amu ahilagppa kobol amubia helo amu, Tair Saidon ele dilah danab ag anukkanab lamen heɗiag ele takkan, uhuɗppa daanna, ag oolag eɗulo. 14Amunu da ag amelagppa attem; epeɗiak haen okkaippa Tair, Saidon ele aa nob nau aoglah, amge aa Korasin, Betsaida ele, aa nob nau amu eɗittak aoglah. 15Amu Kaperneam na onin okkai, laa oh eɗattak aokkutte? Iitta! Na padal mekkut,” awa aum. 16Jesus Nug anam ana, Nug ippunittak awak danab amelagppa aum. “Danab nug ahilag nai dootte amu, nug dahil nai dootte. Am danab nug ag dimadatte amu, nug da dimeɗatte. Danab nug da dimeɗatte, nug laa Nug he da uɗimi ele amu, Nug dimedatte,” awa aum.

17Dimppa danab 72 ag maɗoɗppan gamag ahak huana ele eɗun uɗin appig. “Naɗi, ig na onin diiutut, ouɗi nau ele ag ihinig nai dim lamidppig,” aon appig. 18Anam aeg am Jesus Nug ag amelagppa aum. “Da Satan nug amemɗi bia hab aabppanu na qeeqe anidmi. 19Amu doyeg! Da ag ɠagattag mattai, ag mat, apiap ele tappadna, kekeɗnu ɠagattag amu oh eɗadkkulagnu elele daatteb. Keeke laippu laa heeb, ag ii nauhmana. 20Amge ouɗi nau ag nai ahilag dim lamidtteb, ag amunu oolag aib gamag ahom! Iitta. Kayak Nug ag onilag hab aabppa yom, ag amunu maɗoɗppan gamag ahak doyeg!” awa aum.

21Haen amuppa Kayak Ouɗi Nug he, Jesus Nug maɗoɗppan gamag ahak doya, Nug aum. “O Mame, na hab wan ele dilah Okkai daattem, amu na ⌊wan imuppan dabmakppa⌋ danab laala ag doyak dabmak ena ele, danab laala sul okkai heppig ele, na amu dilagppa keeke imu lokkumna, nid naunau ippunadme amunu, da na onin humattem. Yo, Mama, na amu hekkutnu enanag doome, amunu na heme,” awa aum.

22Jesus Nug anam ana, Nug baula tuɗitta aum. “Da Mamel Nug keeke oh da eppelppa meum. Amu danab laippu laa nug Kayak Bekka am aun ii dootte, Kayak Nug nukkaib dootte. Ele amu, danab laippu laa nug da Mamel, Nug am aun ii dootte. Iitta. Da, Kayak Bekka, da aakkuib doottem, amu danab, da ag da Mamel am aun ippunadttem ele, ag amu dootteb,” awa aum. 23Aria, Jesus Nug nai amu oh mattia mala, Nug eɗua, ippunittak awak danab aakkuib amelagppa aum. “Ag dahilad ag da aniɗna, dahil hak ele anidtteb, laa oh ag ele amu anidtteb amu, ag oh itittak ena aoppig daatteb. 24Da ag amelagppa attem. Anukka propet kuɗum, king ele ag keeke gemu ag anidtteb ele imu anidkkulagnu oolag dayom, amge ag ii anidppig. Ag nai gemu ag dootteb amu, ag amu dooglagnu oolag dayom, amge ag ii dooppig,” awa aum.

Samaria ted nug Juda danab laanu oo doyomnu nai

25Aria, deɗ laa ɗo mehuqak danab doyak okkainab ele laippu laa aha, nug Jesus eheɗ aab anidkkunu oɗ ma aum. “Ippunittak danab, da attem heina da bauklel hanhannu aokkul?” awa aum. 26Anam a amu Jesus Nug amegppa aum. “Ɗoppa, nai yaak amunu aɗi daatte? Na appa aɗi ebqettem?” awa aum. 27Jesus anam a, Nug oɗeppa awa aum. “ ‘Na Naɗi, nahip Kayak, na nuhignu, na meut ohppa, na oot ohppa, nahip ɠagattag ohppa, amu nahip dabmak ohppa ele oot mauhaɗ!’ Amu laa am, ‘Na nakka nahipnu oot mauhtte, amubia na laipad dilagnu ele oot mauhaɗ!’ ” awa aum. 28Awa a amu Jesus Nug amegppa aum. “Na tutukku ame, na anam henana, na bauklel hanhannu aokkut,” awa aum. 29Nug anam aum, amge ɗo doyak danab nug nukka onig ena daakkunu ha, nug Jesus oɗ metta aum. “Am dahil mudippan laippu am aun?” oɗ mettom. 30Awa a aria Jesus Nug oɗeppa awa aum. “Danab laa Jerusalemnu aha, nug Jeriko gokkunu noum. Noono, yab danab naunab ag nug ibppa anidna, ag nuhig lamen aɗidna, ag nug eheɗ makkuɗppig. Ag makkuɗeg, ibppa anam mauhkkunu ha niieye, ag goppig. 31Haen amuppa Juda dilag mana mettak danab laa nug ele ib amuppa gokkunu noum. Am nug danab amu andatta, nug ib daug aiɗa wana, qe-eɗitta ukkom. 32Ugekke, Lewi buɗubppan mana mettak danab iitta ele nug ib amuib dim lamitta ukka, nug danab amu andatta, ib daug aiɗa wana, qe-eɗitta ukkom. 33Amge Samaria danab laa, ⌊Samaria Israel ele ag layam ena iitta amu,⌋ nug ib amuppa uɗia, danab amu gumitta doa, danab amu antta, nug oo bodoetta le meum. 34Nug oo bodoetta le me, gumitta wana, nug goɗen wain ele awa gokkaɗe, danab amu ihiudppa no itom. Itowa nug danab amu huma awa, nuhig donki attan ma awa ukka, ɗo lag amuppa ma nug gumom. 35Gume ukke, wagɗe deɗ amuppa nug silwa men doɗo aɗit awa, ɗo lag mameg amu medatta, amegppa aum. ‘Na men doɗo imuppa danab imu dabmettan autna awe! Na danab imu ehanidppe, men doɗo imu iitta meeb, nug ena daakkunu, na keeke laa men doɗo nahip-ppa daden mekkut dayeb amu, aria dimppa haen da eɗue uɗien, da nob na medakkul,’ ” awa aum. 36Jesus Nug anam awowa, Nug eɗua danab tatam nug amunu oɗ mettom ele, nug oɗ metta aum. “Nahip dabmak amu attem daatte? Danab ewam amu oolagppa aun nug danab yab danab naunab makkuɗppig ele amu, nuhig mudippan laippu dayom?” awa oɗ mettom. 37Anam a amu ɗonu doyak danab nug aum. “Danab nug oo gai-iitta doya oo metta ehanittom ele, nug aakku,” awa aum. A amu Jesus Nug amegppa aum. “Na gona amu, na ele anam he!” awa aum.

Mata, Maria ele dilah nai

38Jesus Nug nuhikkud ippunittak awak danab ele ag gonana amu, Nug aab nakok laappa no, ah laa onig Marta nug omalatta, laugppa ukkom. 39Marta nug makkeg amu onig Maria. Jesus Nug lakka te, Maria nug Naɗi gumitta doa, baegppa heɗep na dayaya, Jesus nai mattiom ele amu, nug doyom. 40Amge Marta nug ee hak uɗatib ha, hik qe, dabmak nuhig ib piɗe piɗe dayom amunu, Marta nug Jesus gumitta wana aum. “Naɗi, da makkel nug da ii ehaniɗtte, da dakkaib ee hak uɗat hettem. Na amunu iite dabmettem? Na nug amegppa appe doa, da ehaniɗaɗ!” awa aum. 41Amge Naɗi Nug oɗeppa awa aum. “Marta, Marta, na dabmak kuɗum ootppa dayeye, na keeke kuɗumnu ottaittem 42amge keeke laippuib am okkai daatte, am Maria nug keeke ena amu tituanom. Keeke ena nuhig amu ig aɗidta ii aomta,” awa aum.

Currently Selected:

Luk 10: NB

Highlight

Copy