Luk 17

Kobol nau danabnu ooppa genab doyak he nauhtte

1Amu Jesus Nug nuhikkud ippunittak awak danab amelagppa aum. “Am keeke digdig danab ah ag hipunin hekkulagnu eeɗadkkulagnu daatteb, amge danab nug heeb, danab laa ag hipunin hekkulag amu, nuhignu gadonnab gadon. 2Amu laa nug heeb, nid naunau imunu laippu laa nug hipuninppa na qeeb amu, danab he na qeum ele, laa ag nug ii heum haenppa nug baagppa ee aeg ganuɗaknu men qakkan, maoppeg yuppa noa mauhlo, amuam nakok nau, amge nug dayaya, nid nakok laanu ooppa genab doyak heeb nauhkku, amuam naunab nau. 3Am ag akka ahilagnu ele dabmeig! Amu ag awalag o amalag laa nug hipunin heeb amu na nug daug bate! Amu nug oo eɗueb amu, na nuhig hipunin uhuqna mette! 4Amu nug nahip-ppa deɗ laippuppa hipunin heeb, ukka eblaih aɗit teeb, haen eblaih aɗit nug eɗua na gumitta uɗia, ‘Gadon, da eheɗ hemi,’ awa ab amu, na nuhig hipunin amu uhuqna mette!” awa aum.

5A amu totol danab 12 ag Naɗi amegppa appig. “Na heppe, ig ihinig ooppa genab doyak amu okkainab maɗ!” aon appig. 6Aeg amu Naɗi Nug aum. “Ag ahilag ooppa genab doyak am mastet aeg, am aeg nagnag, am amubia dayeb amu, geha ag ad mulber imu, nuhignu, ‘Na diɗin ele oh kakeɗinna, gona yuppa be!’ akkulag amu, nug geha ahilag nai am dim lamidkku. 7Amu ag oolagppan laippu laa nug nuhig maɗi nid, nug dad okkaippa wan oppatkkunu ab, o iitta nug doɗ sipsiptai gumadkkunu ab, maɗi nid nug ukka ha, dimppa nug eɗua lakka uɗieb amu, gumak danab nuhig nug nug amegppa, ‘Na paha dona daanna ee la!’ awa akkute? 8Iitta. Nuhig okkai nug nug amegppa inam akku. ‘Na dahil ee bappaidna, matagiɗ takkana, na dahil ee yaan aon doppe, da tatam lawoya, le ele lappi, dimppa amu na ee lawona, le la!’ awa akku. 9Maɗi nid nug anam heeb amu, nuhig okkai amu nug maɗi nid nug nuhig nai dim lamittom amunu nug amegppa, ‘Ena heme,’ awa akkute? Iitta. 10Amubia ag ele keeke oh Kayak aum amu ag hena malona, ag, ‘Ig am maɗi nid, ig keeke hemut ele amu, ig ihinig uɗat aakkuib hemut amunu, ig binanig aognignu elele ii daattem,’ aon akkulag,” awa aum.

Jesus danab 10 gaɗalag oɗe ele bappalattom

11Amu Jesus Nug Jerusalem ukkaknu ib amu dim lamitta, nug Samaria, Galili ele dilah tomppa ukka, 12aab laappa teete amu, danab eblaih tanig ele, ag gaɗa oɗe nau ele, ag ibppa anidppig. Ag uma piɗe uppa hippaidna daanna, 13ag am huana enan appig. “O Jesus, danab Naɗi, na ihinignu oot gai-iitta doon oot mekkan ehanikke!” 14Ag anam aon eeg, haen Nug ag anatta, Nug amelagppa aum. “Ag gona, beɗulag mana mettak danab ippuanatteg!” awa aum. Nug anam a, aria ag wana ukkaegeg, ibppa oɗe ahilag amu iitta meum. 15Amu ag oolagppanu danab laippu, nug beɗu eɗua ena dayom anttowa, nug eɗua ukka, huana ewawa, Kayak binag meum. 16Nug ukka, Jesus baegppa laippun gateg qaun o, gomela, iɗu wanppa ma, “Na ena heme,” aum. Danab amu nug am Samaria danab. ⌊Samaria Juda ele ag am layam iitta.⌋ 17Am Jesus Nug danab amu nug anam he antta, Nug aum. “Am da doottem, ag danab eblaih tanig ele beɗulag eɗua ena dayom, amge danab eblaih waɗele laa amu ag adeppa daatteb? 18Danab laa nug eɗua uɗia, Kayak binag mekkunu amu iittatai? Danab imu nug am wan laihnu danab, nug nukka iikkuibte?” awa aum. 19Nug anam ana amu Nug danab amu amegppa aum. “Na ahan ukke! Na ootppa genab doome amunu, na eɗun ena daattem,” awa aum.

Kayaknu ɗo maɗoɗ geha uɗikku

20Amu haen laa ɗo gumak danab-Parasia ag Jesus oɗ mettan appig. “Haen ganeb Kayaknu ɗo maɗoɗ am uɗikku?” aon appig. Aon aeg amu Jesus Nug nai ahilag amu nob ma aum. “Kayaknu ɗo maɗoɗnu uɗiak am danab ah ag amelagppa anidkkulagnu elele iitta. 21Amu ele danab ah ag, ‘Antteg, ippa ina daatte,’ o iitta ‘Antteg, laih uppa uma daatte,’ ii amana. Aɗinu? Kayaknu ɗo maɗoɗ amu ag oolagppa daatte,” awa aum.

22Awowa Jesus Nug eɗua, nuhikkud ippunittak awak danab amelagppa aum. “Geha dimppa haen laa uɗiebeb, ag am Danab Bekkalag da ele deɗ laippu oignignu oolag huanak daakku, amge geha anam ii daamna. 23Am geha danab ag amelagppa inam akkulag. ‘Antteg! Nug am laih uppa uma daatte,’ o iitta, ‘Antteg! Nug am ippa ina daatte,’ aon akkulag, amge ag am aib dim lamadna goppig. 24Amemɗi awa amahaltte amu, ag dootteb. Amemɗi awa nuhig amahlak amu atu ohppa amahaltte, lokkumak iitta. Am Danab Bekkalag da, geha dahil uɗiak haenppa da ele lokkumak ii uɗipa amunu, ag laa amu aib dim lamadna goppig. 25Amge tatam amu da guittak kuɗum aokkul. Amu danab haen gemu imunu amu, ag da geɗilkkulag,” awa aum.

26Nug anam ana amu Nug baula aum. “Noanu haenppa danab ag kobol aɗi aɗi heppig, amubianab Danab Bekkalag da, da eɗue uɗikkulnu haenppa amu, danab ag kobol anamib hekkulag. 27Hiɗ naɗi ii beum haenppa danab ah ag ee lanana, le lanana, ewau matulak aona, ah nug mettanna, amu heegeg ukke, Noa uubppa teum. Danab ah ag anam heegeg, le hiɗ naɗi ba, danab ah amu ohnab diie padal meppig. 28Amu Lotnu haenppa am ele anamib heppig. Ag ee lanana, le lanana, keeke daden menana, keeke danab laa mattaeg, daden meegeg, ee aona, lag buunna daappig. 29Amge Lot nug Sodom uua ukkom, deɗ amuppa amu aab aɗu gakkaɗaknab, kalu huana eotte onig salpa hab attannu ele gu bia na, danab ah ewatte padal meppig. 30Amu geha Danab Bekkalag da amu, da dahil deɗppa miag bekkul, amu danab dilag kobol am anamib daakku. 31Amu deɗ amuppa danab laa nug lag koɗokko uɗem ukkakppa dayaya, nug oolkkunuib dabmaama, nug nuhig keeke lag ooppa daatte ele amu, nug keeke amu aokkunu lag ooppa aib noum. Iitta! Nug oola ukkaɗ! Anamib danab laa nug dad okkaippa dayaya amu, nug oolkkunuib dabmaama, keeke laa aokkunu eɗua lakka aib ukkom. 32Ag Lot wau daulagppa doaɗ! 33Am danab laippu laa nug wanppanu bau dayak nuhig aɗakku, aria geha bauklel nuhig am iitta mekku, amge danab laa nug wan imuppanu bau dayak uutte, am geha nug bauklel hanhan daakku. 34Am da ag amelagppa attem, geha tuqan amuppa danab aɗit laa niiak aben laippuppa niiglah, am Kayak Nug laippu awawa, laa uuitteb daakku. 35Ah aɗit aa bretnu plaua kalu nekkunu hebepeɗ, laa amu awawa, laa am uuitteb daakku. 36((Am geha danab aɗit laa dad okkaippa daapeɗ am, geha Kayak Nug laippu amu aokku, laa am uuitteb daakku,” awa aum.)) 37Jesus Nug anam a, ag amu doona, ag appig. “Naɗi amuam geha adeppa bekku?” Ag anam aeg am Jesus Nug amelagppa aum. “Mauhak gaɗalag niitteb, aben amuppa kaub ag uɗin appa qagmetteb,” awa aum.

Currently Selected:

Luk 17: NB

Highlight

Copy