Genesis 16

Abram, Hagar ele aa ewau matulak aopiɗ

1Aria, Abram wau Sarai nug nid iitta, amge Sarai nug Isipnu maɗi ah laippu onig Hagar gumom 2amunu, nug Abram amegppa inam aum. “Na doottem, Yawe nug he, da ah mattoi daattem amunu, na goppe, maɗi ah dahil ele oiyya, nug nid dahil menukkutai.” Sarai nug anam aum amunu, Abram nug Sarai oɗe doyom. 3Abram nug Kanan wanppa maɗ 10 daye, Sarai nug maɗi ah nuhig Hagar amu, nug Abram wau daakkunu Abram mettom. 4Nug awe oiyya amu, haen Hagar nug oo ele daya doya, nug nuhig okkai Sarai ameg heqo anttom. 5Anam antte amu, Sarai nug Abram amegppa aum. “Na heme amunu, da uug imu doottem. Da na Hagar mettai, nug gemu oo ele daatte amunu, nug da ameg heqo aniɗtte. Yawe Nug ihinih hak epeɗikkunu ool daatte,” awa aum. 6Anam a amu, Abram nug Sarai amegppa aum. “Maɗi ah nahip, nug na eppenppa daatte. Na attem hekkutnu oot daatte amu, na hekkut,” awa aum. Abram anam a amu, Sarai nug Hagar uug mette, nug oola ukkom.

7Oola ukke, Yawenu engel nug atu taɗakppa Hagar le ameg qeppuɗia bedeppa gumitta na anttom. Le amu, am Sur ukkaknu ib giginppa daatte. 8Engel Hagar antta amu, nug Hagar oɗ mettom. “Hagar, Sarainu maɗi ah, na adeppanu uɗime? Na adeppa gottem?” awa oɗ mettom. Anam ana oɗ mette, amu Hagar nug engel oɗeppa awa aum. “Da dahil okkai Sarai uuitten oole gottem,” awa aum. 9Awa a amu, Yawenu engel nug aum. “Na eɗun gona, nahip okkai Sarai waappa daye! 10Daappe amu, da heppi, na buɗun elab bekku. Beeb amu, danab laa nug na buɗun ebaqakkunu elele iitta,” awa aum. 11Yawenu engel nug baula ele aum.

“Na gemu oot ele daattem.

Dimppa na nid danab menukkut.

Menuna amu, na nug onig Ismael ataɗkkut.

Aɗinu? Yawe Nug nahip gayak doyom.

12Na nid menuppe amu, nid danab amu nug danab laa waappa ii daama.

Iitta. Nug danab laa oh dilag kekeɗ daakku.

Amu ag ele nuhig kekeɗ daaglag.

Anam amu, nid amu nug tiig laippu ele, nug ag ele kekeɗ daaglag,” awa aum.

13Anam amu, Hagar nug Yawe, Nug nug amegppa nai mattiom amu, Hagar onig imu Nug ataɗom. “Kayak Da Aniɗtte Ele Amu, Amuam Na.” Aɗinu? Nug aum. “Laa da aniɗtte amu, gemu da ele Nug anidmi.” 14Keeke amu beum amunu, dimppa ag aben amu onig Ber Lahai Roi ataɗppig. Le amu gemu, ⌊nai imu yaak haenppa,⌋ am Kades, Beret ele gamalahppa daatte.

15Aria, Hagar nug Abram bekka menue, Abram nug onig Ismael ataɗom. 16Haen Hagar nug Abraham bekka Ismael menuom amu, haen amuppa Abram nug maɗ 86 ele dayom.

Currently Selected:

Genesis 16: NB

Highlight

Copy