Genesis 15

Yawe Nug Abram nug bekkanab menukkunu aum

1Dimppa Yawe Nug tuleglegppa nuhig nai imu Abram mettom. “Abram na aib baɗame. Guppiɗ nahip, nob ena okkainab awaknu diig nahip ele amu, am da iikkuib,” awa aum.

2Yawe Nug anam aum, amge Abram nug aum. “O Naɗi Yawe, da enul oh am attem da ehaniɗkku. Aɗinu? Da nid iitta. Da nid iitta amunu, Damaskus danab laa, Elieser, nug da enul oh aokku. 3Na nid ii meɗame amunu, dahil maɗi nid imu nug dahil aben, enul ele aokku,” awa aum.

4Abram anam a amu, Yawe Nug nuhig nai imu Abram mettom. “Damaskus danab nug nahip aben, na enun ele ii aoma. Iitta. Na bekkatnab keeke amu oh aokku,” awa aum. 5Awowa amu, Nug Abram omala, dimittim noa, amegppa aum. “Na neegppe teeb, habppa hoɗopai daatteb ele umu, na ebaqadkkutnu elele daattem dayeb amu, na ebaqe! Na buɗunad amu, geha ag anam daaglag,” awa aum. 6Aria, Abram nug Yawenu nai ooppa genab doyom amunu, Yawe Nug Abramnu, “Nug am genab tutukku hak danab daatte,” awa aum. 7Abram nug Yawenu nai ooppa genab doye, amu Yawe Nug Abram amegppa aum. “Da am Yawe. Da na wan imu medappi, nahip daakkunu Ur, Kaldia wanppanu awitten, omaitti uɗime,” awa aum. 8Yawe anam aum, amge Abram nug Yawe oɗ mettom. “O Naɗi Yawe, da dimppa wan imu genab aokkulnu amu, da attem hein, da amu dookkul?” awa aum. 9Yawe Nug oɗmak amu doya amu, Nug aum. “Na makau balat laippu, meeme anig laippu, sipsip dawai laippu, ag oh maɗ ewam ele amu, na amu diiadna, uppuɗil beɗulag nakok laa, aria uppuɗil beɗulag okkai nag laa ele diiatna uɗikkut,” awa aum.

10Yawe anam awa a, Abram nug doɗ amu oh diiatta uɗia oppatatte, aɗit aɗit ne, laih laih me ukkom. Ai aɗit ele diiata meum, amge nug ii oppatom. 11Abram nug anam he, gaɗalkad anam daaegeg amu, ai teppu latteb ele amu, ag Abramnu doɗ lakkulagnu neppig, amge Abram nug lamattom. 12Lamatte, aam noono, Abram nug niia gad meeme, gatatu nau, hinqaknab na tonene, nug baɗak okkai doyom. 13Tone amu, Yawe Nug amegppa aum. “Na imu tutukku doye! Na buɗunad ag geha danab laa dilag wanppa aab diig danab iitta maɗ 400 daaglag. Ag anam daabppeg, wan amuppan danab ag heppeg, na buɗunad ag ahilag begbeg maɗi nid daaglag; amu ag ele ag eheɗ hattaglag. 14Wan amuppanu danab ag heppeg, na buɗunad ag begbeg maɗi nid maɗi ah ele anam daaglag, amge da wan amuppan danab bu madappi, na buɗunad ag wan amu uun, wan amuppanu keeke kuɗum aon aɗaglag. 15Amge na daanna oikkutnu am inam. Na oot maɗoɗ ele dayebeb ukkeb, kaino elelenab mena mauhkkut. 16Na gemu Amo danab oolagppa oittem amu, ag gemu hipunin huana, okkainab ii hetteb amunu, na gemu wan imu aokkutnu elele iitta. Amge dimppa da anidttem, ag hipunin tuɗidppeg, elab bekku. Aria, haen amuppa da hipunin okkainab ahilag amunu heppi, na buɗunad ag wan imu aoglag. Buɗub buɗub doak waɗeleppa, haen amu gamagppa ag eɗun uɗin aoglag,” awa aum.

17Yawe Nug anam a amu, aam no, gatatu ne, keeke waa bia, aab kahug amuppa teete, ooppa aab aɗu, hul dittiak bia dittieye, amu newowa, doɗ teppu amu gamagppa oiyom. 18Oiye amu, deɗ amuppa Yawe Nug kobol amuppa he, Nug Abram ele nug tituanya nai qagapiɗ. Aa nug tituanya, nai qakkaya, Yawe Nug Abram amegppa aum. “Da wan imu na buɗunad madattem. Tom nuhig amu inam; le nakok onig Isip, tom am amuppanu digma ukka, le okkai onig Yupretis batak. 19Gemu amu, Ken danab, Kenis danab, Katmon danab, 20Hit danab, Peres danab, Repaim danab, 21Amo danab, Kanan danab, Girgas danab, Jebus danab ele ag wan imuppa daatteb,” awa aum.

Currently Selected:

Genesis 15: NB

Highlight

Copy