Genesis 17

Kayak Nug Abram gaɗa otaɗak kobol at daakkunu amegppa aum

1Aria dimppa, Abram nug maɗ 99 dayeye, Yawe Nug gumitta na, nug amegppa aum. “Da am Kayak Dakka Ɠagattag Oh Ele. Na dahil neekkakppa danab ooppa kaliak laa iitta ele oiye! 2Da nug tituana nai qakkak dahil, da na ele hemuɗ amu, da heppi beeb, na buɗun elab bekku,” awa aum.

3Kayak Nug anam a amu, Abram nug laippun gateg qaun o, gomela, iɗu wanppa ma daye, Kayak Nug tuɗitta aum. 4“Nug tituana nai qakkak nai dahil am nahip-ppa aakku daatte. Da heppi, na wanppan wan laala kuɗum mamelag daakkut. 5Da heppi, na wanppan wan laala kuɗum mamelag daakkut amunu, na onin Abraham daakku. Abram tuɗitta ii daama. 6Da heppi, keeke ewam bekku. Laa amu, da heppi, na buɗunad ag kuɗum bekkulag; laa amu, da heppi, na wanppan wan laala kuɗum mamelag daakkut; laa amu, da heppi, na buɗunad oolagppa danab laala ag king bekkulag. 7Da na, na buɗunad ele dilag Kayak daakkulnu, da heppi, nug tituana nai qakkak nai dahil, nai amu nahip-ppa, na buɗunad gemunu, dimppanu ele dilag haen oh daakku. 8Na gemu Kanan wan imu ooppa wan laihnu danab ina daattem, amu da na, na buɗunad ele, da ag wan imu madappi, ahilag wan hanhan daakku. Amu da ahilag Kayak daakkul,” awa aum. 9Kayak Nug anam awowa, Nug Abraham amegppa baula aum. “Nahipnu, amu na, na buɗunad dilag ele, ag dahil nug tituana nai qakkak nai buɗub buɗub doobob dim lamidkkulagoitte. 10Dahil nug tituana nai qakkak nainu at am gaɗa otaɗak, amu na, na buɗunadppan danab ele ag gaɗa otaɗak aoglagoitte. 11Gaɗa otaɗak am da hei, da ag ele nug tituanta nai qakkamutnu at daatte. Amu ag anam hekkulagoitte. 12Buɗub buɗub doobob, nid danab, ag anilkad ag laulkadppa menuadkkulag ele amu, deɗ eblaih ewamppa ag gaɗa otaɗak aoglag. Amu wan laihnu danab, ag ele tiilag laippu iitta, ag daden maadna diiglag amu, ag ele gaɗa otaɗak aoglag. 13Danab oh, ag laulkadppanu amu, ag gaɗa otaɗak aoglagoitte. Dahil nug tituana nai qakkaknu at iitta ii mema. Haen oh hebeppeg daakku. 14Danab laa nug gaɗa otaɗak ii aotte, nug dahil nug tituana nai qakkaknu nai tippaltte amunu, nug dahilad danab oolagppanu geɗittak daakkuoitte,” awa aum.

15Kayak Nug anam awowa, Nug tuɗitta, Abraham amegppa aum. “Na waatnu amu, na Sarai baula aib ame. Aɗinu? Nug onig Sarah daakku. 16Da nug itidppi, nug na bekkat menukku. Nug wanppan wan laala, king laala ele, nug ag anilag bekku,” awa aum.

17Kayak Nug anam a amu, Abraham laippun gateg qaun o, gomela, iɗu wanppa ma dayaya, nug nukka imaama, ooppa aum. “Danab laa nug maɗ 100 ele dayaya amu, nug nid danab aokkute? O Sarah nug maɗ 90 ele dayaya amu, nug nid menukkute?” ooppa aum. 18Nug nukka anam ana amu, nug Kayak amegppa aum. “Da Ismael nahip itittak ena waappa daakkunu ool daatte,” awa aum. 19Abraham anam a, amu Kayak Nug aum. “Ao, amge na waat Sarah nug na bekkat menukku. Menueb, na nug onig Aisak ataɗkkut. Anam amu, nug tituana nai qakkak nai dahil am nug, nug buɗub dim dokkulag ele, am ag oh ele haen oh daakku. 20Aria, na Ismaelnu ame amu, na ame am da doomi. Da nug ele itidkkul. Da heppi, nug buɗub elab bekku. Danab okkai 12 nug buɗub ooppa bekkulag, amu nug buɗupud ag appatna, huu okkainab, ɠagattag ele daaglag. 21Amge Sarah dimppa maɗ imu uueb, maɗ laa amuppa haen inamppa, nug nid nahip Aisak menukku; amu nug tituana nai qakkak nai dahil am nuhigppa daakku,” awa aum. 22Aria, Kayak Abraham ele nai mattiya malaya amu, Kayak Nug uuitta, eɗua teum.

23Kayak Nug eɗua te, Abraham nug deɗ amuppa Ismael, danab ag nug laugppa daappig ele amu, nug Kayak aum bia ag gaɗalag otaɗattom. Danab oh ag anilkad ag nug laugppa menuadppig, amu danab atu laihnu ele nuhig men doɗoppa diiak, nug ag oh gaɗalag otaɗattom. 24Abraham nug maɗ 99 dayeye, 25Ismael nug maɗ 13 dayeye, 26aa deɗ laippuppa gaɗa otaɗak aopiɗ. 27Abrahamnu maɗi nid laala ag anilkad nug laugppa menuadppig, laala nug wan laihnu daden meum ele, ag oh ele deɗ amuppa gaɗa otaɗak aoppig.

Currently Selected:

Genesis 17: NB

Highlight

Copy