MATTHEU 19

Toiyanpu Jengme Jesuwe Nyüonang

(Mk 10.1-12)

1 # Mt 7.28; 11.1; 13.53; 26.1. #Mk 10.1-12.Aope Jesuwe tüolan khongküm ngaowe sho, Iye Galilee tüoh hüyange Jordan kaiye Judea kahtok yete pei. 2Ükhong üyong Iphei woi, hüyange tüome Iye iman meitam.

3Phariseelan ütam I tangte pei, hüyange Ite tokke ngaotong. “Teman ngaokeng me kahta jawe shemin lamphe hüyange yepah yewai jingne yoi sheko phei toi yanlak shu-nangpu a?” 4Iye janne i, “Üwangne muh Lingpupawe iman netan hei sheko ling she numan-e ye i a?” 5#Kaht 1.27; 2.24; Eph 5.31; 1 Kor 6.16.Hüyange Iye i, “Tüojingne kahta jawe yoipa hüyange yoinyu tüohlak; hüyange I yoi sheko phei shüpshalak, hüyange imni ja ne menglak. 6Hüyange shaaji iman ni yeje, hüyangpoi ja. Kahwange hanghe sheiye shüpne tam kahtawe yanne tahtam.” 7#Hin 24.1-4.Iman-e Ite i, “Hüma-a yanlak sakilai phayange yha yantamtüoh she hangne Mosawe ngaokeng pha?” 8Iye imante i, “Numan mong wanpu jingne Mosawe numante yoi shekonyu yantamlak ngaopha, hüyangpoi üwangne muh hüke ngohpune yeje. 9#Mt 5.32; Lk 16.18; 1 Kor 7.10-13.Taowe numante inang, aowe phwngpu kaiye, yoi sheko yantamyange ülao sheko yahlakei, Iye phwngngam nang.”

10I pinlan-e Ite i, “Netanpa hei shekonyu nipa me hükihpu yafün ngohpu ne mengma-a, nok yeyampu shemei.” 11#1 Kor 7.7-9.Hüpoi Iye imante i, “Aote shinglak wong phawe ngoh, iman kaiye ülaolan-e hatüo ngao shingne ye-ok; 12hangjingne ütam-a Inyu sea memuh moiko ne puhpu kahta ngohnang, hüyange ütam-a kahtawe linge tampu kahta ngohnang, hüyange ütam-a wangdang ahngching jingne yoi nying nyingke lingpu ngohnang. Aome tüopa shinglak okke ngoh nang Iye shingyah.”

Jesuwe Hashih Nahalan Moiman

(Mk 10.13-16; Lk 18.15-17)

13 # Mk 10.13-16; Lk 18.15-17; Mt 18.2-3; 1 Kor 14.20. Hüwante I yak iman me angtam yange yoptamlak jingne kahta ütam-e nahalan I tangte woipei; hüyangpoi pinlan-e aoyinne iman woipei imante yeonge yemeipe tee. 14Hüyangpoi Jesuwe i, “Hashih nahalan ü-tangte peine tamtüoh. Hüyange iman (ü-tangte) peilak mepu tahtien; hangjingne wangdang ahngching hatüo kihpulan jing ngohnang.” 15Iye iman tangme I yak shünge tam hüyange tüopa nyoi mepu I yoi lamte tai.

Hakpa Naoshe

(Mk 10.17-31; Lk 18.18-30)

16 # Mk 10.17-22; Lk 18.18-23. #Lk 10.25; Lev 18.5.Hipak ja me Jesu tangte kahta ja pei hüyange Ite i, “Konnyüopa, jintepu üyin#Jintepu üyin yejema-a yemah yemeelak üyin tüolak jingne taowe hanghe toimei linglak shi?” 17Iye Ite i, “Hanghe ümei tüopa jeng nange hangne üte tongnangki? Ao meinang, ja shingha ngohnang. Nange üyin ngoh huma-a, ngaokenglan jontüoh.” 18#Woi 20.12-16; Hin 5.16-20; Rom 13.9; Jas 2.11.Iye Ite janne i, “Hanghepa?” Jesuwe i, “Nange tahtoi, nange phwngngampu tahling, nange tahkuh, nange tahleih saki tahpha. 19#Lev 19.18; Mt 22.39.Nangpa hei nangnyu iyesheyah, hüyange nange nang yupi te nang kih-e kenyah.” 20Naoshepawe Ite i, “Tüolan khongküm taowe jonnangki; tao üne hangheye yewang?” 21#Lk 12.33; Lam 2.45; 4.34; Mt 6.20.Jesuwe Ite i, “Nang wang ngoihuma-a, taitüoh hüyange nang moth yüotüoh hüyange toihalante ngin phatüoh, hüyange nang shengngin wangdang me ngohlak; tüophei me peikei hüyange ü-pheite woikei.” 22Hüyangpoi aope naoshe pawe tüopa ngao ipu jai, I mongmenge tai; hangjingne Iye moth yeonge ngoh.

23 # Mk 10.23-27; Lk 18.24-27. Hüwante Jesuwe yoi pinlante i, “Ütingme Taowe numante inang, hakpa kahta ja jingne wangdang ahngching te yulak wannang. 24Üne-o Taowe numante inang, hakpa kahta ja Kahwang ahngching te onglak leima, vemei wo me udh ja helak she-o-lak.” 25Aope iman-e tüopa ngao jai pinlan yeonge yashan, hüyange i; “Hüma-a ao yinpu oklak?” 26#Kaht 18.14; Job 42.2.Jesuwe imante lei hüyange i, “Kahtalan jingne hatüowa ye-oklak, hüyangpoi Kahwang jingne khongkümpu oklak.”

27 # Mk 10.28-31; Lk 18.28-30; Mt 4.18-22. Tüophei me Peterwe Ite janne i, “Toman-a hangke? Toman-e khongküm tüoh, hüyange nang pheite woi. Hüma-a toman-e hanghe tüolak?” 28#Lk 22.30; Mt 20.21; Ütah 3.21.Jesuwe imante i, “Ütingme Taowe numante inang, kahtoknyu üla ne linge yepu me, aope kahta üha yoi müktishiwapu shotjing me shotlakei, hüwante numan ü-pheite woipalan-o Israel nokphong pen me ni ngao phünne, shotjing penme ni me shotlak. 29Ünyei ne, aoyinne nok, jeinaolan, nya-naolan, yoipa, yoinyu, hayim yejema-a kahtok ümin jingne tüoh, iman-e gho phei nyeiye hüyange jintepu üyin tüolak. 30#Mt 20.16; Lk 13.30.Hüyangpoi üwangpalan maawe üküm ne menglak, hüyange ükümpalan üwangne menglak.”

Currently Selected:

MATTHEU 19: KONYBSI

Highlight

Copy