MATTHEU 20

Wulick Kahme Kahhampalan

1 # Mt 21.28,33. “Wangdang Ahngching wulick kah nokpuwe napning shomme Inok wulick kahte tailak nanpalan yamne taipu lenang. 2Nyih te nantoi ja jingne adholi ja pha ne nanpalan phei Iye taisho hüyange Inok wulick kahte iman shon. 3Tupaji nanjing me (taipong) I chingyang te tai hüyange hatleih nyoi me kahta ütam lahwange yonge nge; 4hüyange Iye imante i, ‘Numan-o wulick kahte tatüoh, hüyange taowe nanmee hangshin shanglak yahpha ning.’ Hüyange iman ta. 5I üne-o pen-me-ni paji (nyihning) hüyange lüm paji (ünshao) nanjing me taiye hükemuh ling. 6Nga paji nanjingme (ünpongme) I tai hüyange ülaolan yonge nge. Iye imante i, ‘Numan-e hatüo me hangne nyihlao hipak lahwange yonge ngoh nangki?’ 7Iman-e Ite i, ‘Hangjingne aowe-o toman nan yeyah.’ Iye imante i, ‘Numan-o wulick kahte tatüoh.’ 8#Lev 19.13; Hin 24.15.Aope ün ngoi wulick kah nokpupawe yoi shaoshanpa üjeng te i, ‘Nanpalan nyiktüoh hüyange aoyin üküm ne ta tüolan mepu wange üwangpa ne tapalan ngoiye, iman nanmee phatüoh.’ 9Aope aoyin ünpong ngapaji nanjing me nanshak, pei ngoi hüyange iman-e adholi japong tüo. 10Aope üwangpalan pei, iman-e sheyongshe tüolak she iman-e teih; hüyangpoi imane-o adholi japong hei tüo. 11Aope iman-e tüopa yah, nokpu phei tüi-e iman-e pa i; 12‘Tüolan üküm ne peiye ghonda ja nanjing toiling, hüyange toman nyihlao hipak hüyange wanghe phei hokke toi ling. Toman phei tüolan-o jakih-e nange ling.’ 13#Mt 22.12; 26.50.Hüpoi iman yo mepu ja te Iye janne i, ‘Shümpa, taowe nangte lolampu yeje. Adholi ja jingne nang ü-phei mong yehahpu a? 14Nangjing hanghe, yayah hüyange taitüoh. Tüopa ükümpa kahtate taowe nang phei jakih pha hunangki. 15#Mt 6.23; Mk 7.22; Hin 15.9.Üjinga taowe hangke mong hüke linglak ne yeje a? Tao meipute nang mong yemeipu a?’ 16#Lk 13.30; Mt 19.30; Mk 10.31.Hatüo kih, ükümpalan üwangne menglak, hüyange üwangpa lan ükümne menglak.”

Lümshe Jesuwe I Lilak Jeng Inang

(Mk 10.32-34; Lk 18.31-34)

17 # Mk 10.32-34; Lk 18.31-34; Mt 16.21; 17.12,22-23; 26.2. Aope Jesu Jerusalem te ong, Iye pinlan penme ni shaha woi, hüyange lamme Iye imante i, 18“Jaiyah, teman Jerusalemte ongnang, hüyange Kahta Üha ngengpa üjenglan hüyange ngaokeng nyanpalan te phünne phalak. Iman-e I lilak jingne ümeng phakülak; 19hüyange yaoleye tamlak jingne yinhulante phünne phalak, shetlak, hüyange takke toilak, hüyange I nyihlüm shepu nyih me yange yelak.”

Jeams Hei John Ünyuwe Tongpu

(Mk 10.35-45)

20 # Mk 10.35-41. #Mt 8.2; 9.18; 15.25; 18.26; Jn 9.38.Hüwante Zebedee ünyu yoi hayim phei I tangte pei, I sheshao me ümmekhüm hüyange Imepu ülam ja yu. 21#Mt 19.28.Iye yha te i, “Nange hanghe yah hunangki?” Yhawe Ite janne i, “Hatüo üha ni, ja nang yakjah yeme, hüyange ja nang yak nya yeme, she nang Ahngching me shotlak jingne ngaopha kei.” 22#Mt 26.39; Jn 18.11.Hüpoi Jesuwe janne i, “Numan-e hanghe tong numan-e yeshing. Taowe yingne ngohpu wan numan-e yingpu ok ningya?” Iman-e Ite jan, “Toman-e oklakei.” 23#Lam 12.2; Ütah 1.9; Mt 13.11.Iye imante i, “Numan-e ü-wan me yingne ok, hüyangpoi ü-yakjah yeme shotlak hüyange ü-yaknya me shotlak Taowe phalak ne yeje; hüyangpoi hatüo ao jingne üpawe tüm iman jingne ngohnang.”

24Hüyange aope ülao pin pen ne tüopa jai, Ijei Inao ni jingne iman mongmeng. 25#Mk 10.42-45; Lk 22.25-27.Hüyangpoi Jesuwe imante nyik hüyange i, “Kahtoknyu wanglam lampalan-e kahtalan tangme wong ngohnang, hüyange iman woipalan-e iman tangme wanglam lamnang she numan-e shing. 26#Mt 23.11; Mk 9.35; Lk 9.48.Numan yo me hükihpu yenanglak; hüyangpoi numan yo me ütam üyongpa ne menghuma-a, ülaolan shaoshanpa ne I mengtüoh; 27hüyange numan yo me ütam üwangpa ne menghuma-a, I numan rhapa ne hüng mengtüoh. 28#Mt 26.28; 1 Tim 2.5-6; Jn 13.15-16; Tit 2.14; 1 Pet 1.18.Hatüo kih, Kahta Üha shaoshanne tamlak jingne peipu yeje, hüyangpoi shaoshan ne pei, hüyange maapu jingne I üyin dopu ümee jaleye pha ne pei.”

Mükmüopa Ni Jesuwe Mei

(Mk 10.46-52; Lk 18.35-43)

29 # Mk 10.46-52; Lk 18.35-43; Mt 9.27-31. Iman-e Jerikho tüohyange taiwante ükhong üyong I pheite woi. 30Mükmüopa ni, lamnah me shotte ngoh, hüyange Jesu peinang she imniye jai hüyange üngwün, “Üyongpa, David üha, tomante shüpshe pha.” 31Ükhonge imnite yelangmanpe ngohlak jingne tee, hüyangpoi imni ünyeine üngwün, “Üyongpa, David üha, tomante shüpshepha!” 32Hüwante Jesu lak, hüyange imnite nyik-e i, “Taowe numan jingne hanghe lingne tamhu nangki?” 33Imniye Ite i, “Üyongpa, nange toman mük eppe tampha.” 34Hüyange Jesuwe yayenge teihyange imni mükte jon, tüophei me mokhshe imni mük ep hüyange I pheite woi.

Currently Selected:

MATTHEU 20: KONYBSI

Highlight

Copy