MATTHEU 18

Ahngching Me Üyongpa

(Mk 9.33-37; Lk 9.46-48)

1 # Mk 9.33-37; Lk 9.46-48. Tüohipak me pinlan Jesu tangte pei hüyange i, “Hüma-a wangdang ahngching me üyongpa ao shi?” 2Iye naha ja I tangte nyik, iman sheshao me shotne tam; 3hüyange i, “Ütingme Taowe numan te inang, numan jeileiyange hüyange nahalan kih-e manmeng manmeng, numan wangdang ahngching te ongpu ye-oklak. 4Tüokhei aowe tüopa naha leye innenyai wangdang ahngching me I Üyongpa. 5#Mt 10.40; Lk 10.16; Jn 13.20.Aowe ümin jingne hükihpu hashih naha ja yah nang Iye Tao yahnang.

Ünu Omne Tokpu

(Mk 9.42-48; Lk 17.1,2)

6 # Mk 9.42-48; Lk 17.1-2. “Aowe üte ütinglakpu tüolan üshoipa ja nehoi ünu me yeine tamlakei, I jingne shamshu long üyong ja üngme yükyange, hüyange yengching ülu me yeipupa I jingne shemeilak. 7Kahtalan ünu omtamlak ne toi hei nan ngaipu, kahtoknyu jingne onyukei: hükihpu toi jinte ngailak, hüpoi tüolan ngaine tampupa jingne onyukei.”

8 # Mt 5.29-30; 17.27. “Nang yak yejema-a nang yawe ünu omne tamküma-a, tüopa langtüoh hüyange nang mepu wintüoh. Nang jingne yak hei ya moini phei jinte yemahpu vünte taipu phei yakja yejema-a ya ja yenangpe üyin chingte taipu meilak. 9Hüyange nang mükke ünu omne tamküma-a, tüopa yoktüoh hüyange nang mepu wintüoh. Nang jingne mük ni phei molovün te taipu phei ja phei üyin chingte taipu meilak.”

Mahtepu Nyeeha Me Ngaolep

(Lk 15.3-7)

10 # Lam 12.11. “Hatüo üjoilan yo me numan-e ja te nehoi ye-i-yeshepe yelinglak kentingyah, hangjingne Taowe numante inang, iman wangdang me wangdang shongmokpalan jinte wangdang me ngohpu üpa phei ngohnang. (11Hangjingne mahpu yinlak jingne Kahta Üha pei.)

12 # Lk 19.10. #Lk 15.3-7.“Numan-e hangke teihnangki? Kahta jawe nyee gho ja ngoh hüyange iman yo me ja lamnyong yete tai mahma-a, Iye detu metu waktang yeme angyange hüyange leih-e yeye lamnyong yete tai mahpupa yeyam a? 13Hüyange Iye tüopa tüoma-a, ütingme Taowe numante inang, ünyong yete yetaipu detu metu phei shenyei she tüopa ja tangme I mongmei nang. 14Tüokih-e tüolan üjoilan yo me ja nehoi mahlak jingne wangdang me ngohpu numan üpawe yemong.”

Nang Jeiheinao Aowe Ünu Ling

15 # Lk 17.3; 1 Kor 6.1-6; Gal 6.1; Jas 5.19-20; Lev 19.17; Hin 19.15. “Nang jeiheinao ütam-e nang phei tüi-e ünu lingma-a, taitüoh hüyange nang ni shaha ngohyange I ümeng ngaitam tüoh; Iye nangte jaima-a, nang jeiheinao nange okpu ngeteki. 16Hüyangpoi Iye nang ngao yejaima-a jamme ni yejema-a lüm woiyah, hangjingne ‘tüolan ni yejema-a lümme phapu saki kaiye ngaolam lili üpong tüowe meiye lingne ok.’ 17Iye ngao-o yejaima-a, bumeinok te itüoh; hüyange Iye bumeinok ye-i-yeshema-a, I shaaji yinhu hüyange kahngin shaipa kih angtamtüoh.”

18 # Mt 16.19; Jn 20.23. “Ütingme Taowe numante inang, hanghepa numan-e kahtok me sha nang hatüo wangdang me-o shalak, hüyange hanghepa numan-e kahtok me lantam nang hatüo wangdang me-o lantamlak.”

19 # Mt 7.7; 21.22; Jas 1.5-7; 1 Jn 5.14; Jn 14.13. “Üne-o ütingpa me Taowe numante inang, numan-e yah-hupu hanghe toilan jingne, kahtoknyu me numan kahta ni nehoi mong ja ne sheiyange yuma-a, wangdang me ngohpu üpawe hatüo numan jingne lingpha lak; 20hangjingne ümeken me ni yejema-a lüm ümin me jemme ngohnang, hatüo me Tao iman yome ngohnang.”

Ünu Winpu Ye-oklak Shaoshanpa Me Ngaolep

21 # Lk 17.4; Kaht 4.24. Tüophei me Peter pei hüyange Ite i, “Youngwanpa, aope ü-jeiheinao#Bumeinok kahta she-o ngelak jawe ü-phei tüi-e ümeng linglakei hangshin me taowe Ite ümeng winlak shi? Nyit me ngoiye hei?” 22Jesuwe Ite i, “Taowe nang te nyit ngoiye she ye-i, hüyangpoi, denyit me nyit ngoiye.#Denyit me nyit ngoiye yejema-a Nyit me denyit ngoiye.

23 # Mt 25.19. “Tüokhei, wangdang ahngchinga ahngpa jawe I shaoshanpa phei ngin jeng tümme anghupu ja lenang. 24Aope Iye tüo lingne wang, ao kahta jawe Ite ngin hajapen shümlak ngoh I tangte woipei. 25#Lk 7.42.I me pheeisea shümlak hango yenangpuwe, I nokpuwe hüke ngaophawe i, tüo kahta, I sheko hei nahalan, hüyange Ime ngohpu khongküm yüoyange pheeisea shümtüoh. 26#Mt 8.2.Tüokhei shaoshanpawe I sheshao me yatuh shünge khümme i, ‘Üte hüng nünpha, taowe nang te üshei shüm hahma.’ 27Tüopa shaoshanpa nokpupawe Ite yeonge yayenge teih hüyange I lantam, hüyange Ite tang yehahpe ang. 28Hüyangpoi tüopa shaoshanpa nokshao te yu hüyange I shümpa shaoshanpa ja muh Ite adholi gho ni nanjing phalak hüo. Iye yakme lük, üngme phütyange hüke i, ‘Üte phalak ne ngohpu pheeisea sha-a yahkei.’ 29Tüokhei I shümpa shaoshanpa ja ümme tayange ümeng winpha she yu. Üte hüng nünpha, she Iye i, ‘Hüyange taowe nang te phalakei.’ 30Hüyangpoi Iye yejai, hüyange I pheeisea pha manlan manlan phowe küpnok me I ang. 31Aope hüke lingpu iman-e nge, I shümpa ülao shaoshanpalan yeonge mongmeng, hüyange iman nokpu tangte wenne ngaipu lampheli ngaiye i. 32Tüo phei me nokpupawe Ite nyik, hüyange i, ‘Shaoshanpa ümeng, nange ümeng yupu nangjingne nange üte pha ne ngohpu tang khongkümpu angyangki. 33Taowe nangte yayengpu kih, nange-o nang shümpa shaoshanpa te yeyah yengpu a?’ 34Nokpupa yeonge mongmeng hüyange Iye phalak pheeisea khongkümpu manpha manpha shaoshi tamlaklan yak me I phünne pha. 35#Mt 6.14.Tüokhei numan pümlep iye yoi jeiheinaolan te numan mongjang me ümeng yewinma-a, hümma-a wangdang me ngohpu üpa-o hükih numante jonlak.”

Currently Selected:

MATTHEU 18: KONYBSI

Highlight

Copy