MATTHEU 17

Üshe Leijeipu

(Mk 9.2-13; Lk 9.28-36)

1 # Mk 9.2-10; Lk 9.28-36; 2 Pet 1.17-18. #Mt 26.37; Mk 5.37; 13.3.Nyihwok ngohyange Jesuwe Peter, Jeams, hüyange Inao John iman shaha shedaopu kahtang ja te yanne ong. 2Tüoken me iman sheshao me I üshe-leijeiye ngai, hüyange I sheta wanghe kih tee, hüyange I nyemo wangngai shinne heng. 3Tüome mokh she Mosa hüyange Elijah ni Iphei ngaowe imante ngai. 4Hüwante Peterwe Jesute i, “Youngwanpa, tüome teman ngohpu meiteki. Nange mongma-a taowe hatüo me panha lüm welakei, nang jingne ja, Mosa jingne ja hüyange Elijah jingne ja.” 5#Mt 3.17; Isa 42.1; Tüo 2.7; Jn 12.28.I yelakpe ngaowe ngohwante, yeonge jaopu wangphom-e imante nyeih, hüyange wangphom mepu ngao jawe hüke i, “Hatüo ü-mongkenpu Ha, ao me Tao yeonge monghah nang; Ite jaiyah!” 6Aope pinlan-e tüopa jai, iman-e iman sheta büangyange ümme ta hüyange yeonge nyam. 7Hüpoi Jesu wenne imante powe i, “Lüotüoh tahnyam.” 8Aope iman-e nganne lei hüyange Jesu I shaha kaiye ao-o ye-nge.

9 # Mt 8.4; 16.20; Mk 3.12; 5.43; 7.36. Hüyange iman kahtang mepu yewante Jesuwe imante hüke i, “Kahta üha lipu mepu yange manye manye himang aohite-o tah i.” 10#Mk 9.11-13; Mt 11.14; Mal 4.5.Pinlan-e Ite tong, “Hüma-a ngaokeng nyüopalan-e hangne Elijah üwangne yulak she ipu?” 11Iye jan, “Elijah ütingme yukülak hüyange lampheli linge yelak. 12#Mt 16.21; 17.22; 20.17; 26.2; Lk 17.25.Hüyangpoi Taowe numante inang, Elijah peiyangki, hüyange iman-e I yeshing, hüyangpoi iman-e hanghe leng Ite lingyangki. Tüo kih-e kahta üha-o iman yakme shange ponglak.” 13Hüwante Iye baptipa John ngaonang she iman-e shing.

Laapheipu Nahaja Jesuwe Meitam

(Mk 9.14-29; Lk 9.37-43)

14 # Mk 9.14-27; Lk 9.37-43. Aope iman ükhong ngohjing te leihye, I sheshao me kahta ja ngai, hüyange yatuhshinge Ite khümme i, 15“Üyongpa, ühate shüpshe pha, hangjingne Ime mahudak ngohnang hüyange dak nangki; I vün me sha-a sha-a sheak hüyange yengme sha-a sha-a hüng nangki. 16Taowe I nang pinlan tangte woipei hüyangpoi iman-e I yemei ok.”

17Jesuwe jan, “Oh üting yelakpu hüyange ünyong yete kempu jin! Numan phei Tao hangshin laowe ngohlak? Numan phei Tao hangshin nünne ngohlak shi? Naha-a ü-tangte tüome woipei kei.” 18Jesuwe laate teeye i, I mepu laa tai, hüyange hüwante muh naha mei. 19#Mk 9.28-29.Pinlan Jesu tangte jünge pei hüyange i, “Hatüo toman-e hangne yejang okpu shi?” 20#Lk 17.6; Mt 21.21; Mk 11.22-23; 1 Kor 13.2; Mk 9.23.Iye imante i, “Hangjingne numan ütinglakpu jamloi shoipu nanjingne; tüokhei Taowe numante üting inang, numan me yanhoi li shinne nehoi ütinglakpu ngohma-a, numan-e tüopa kahtangte ilak, ‘hatüo mepu otüo ngoiye potüoh, hüyange tüopa pokülak’ numan jingne ye-oklak hango yenanglak.” (21Hüyangpoi ülao hango yeje, yoppu hüyange nyaolepu kaiye tüopa kihpu jang oklak.)

Jesuwe I Lilak Jeng Üne-o Inang

(Mk 9.30-32; Lk 9.43-45)

22 # Mk 9.30-32; Lk 9.43-45; Mt 16.21; 20.17-19; 26.2. Aope pinlan khongküm jamshe Galilee me shüppe jem, hüwante Jesuwe imante i, “Kahta üha kahtalan yak me phünne phalak. 23Iman-e I toilak, hüyange lümshepu nyih me I yange yelak.” Iman yeong mongmeng.

Khümjing Kahngin Phapu

24 # Woi 30.13; 38.26. Aope iman Kapernaum te pei khümjing kahngin shaipalan Peter tangte pei hüyange i, “Numan konnyüopawe khümjing kahngin phanang kü a?” 25#Rom 13.7; Mt 22.17-21.Iye jan, “Phanang.” Aope I nokte pei, Iye hango man ipe Jesuwe i, “Simon, nange hangke teihnangki? Kahtoknyu ahnglan-e nanlei ngin yejema-a kahngin ao mepu shainangki? Iman hayimlan mepu heiya, yinpa mepu?” 26“Yinpalan mepu,” she aope Iye i, Jesuwe Ite i, “Tüokihpu hayimlan jingne phalak wongpong ne yeje. 27#Mt 5.29; 18.6-9; Jn 6.61; 1 Kor 8.13.Hüyangpoi iman yashah yehüolak jingne, nang yengching te taitüoh, yankeih ja shüptüoh hüyange üwangne ompu nyah yahtüoh; I ju katüoh hüyange nange nginmei ja tüolak. Hatüo yahtüoh hüyange imante nang hüyange ü-jingne phatüoh.”

Currently Selected:

MATTHEU 17: KONYBSI

Highlight

Copy