MATTHEU 16

Kahnyingwüngha Ja Jingne Tongpu

(Mk 8.11-13; Lk 12.54-56)

1 # Mk 8.11-12; Lk 11.16,29; 12.54-56; Mt 12.38-39; Jn 2.18; 6.30. Pharisee hüyange Sadduceelan Jesu tangte pei ngoi, hüyange Ite toklak jingne wangdang mepu kahnyingwüngha ja imante hüopha she Ite tong. 2Iye imante janne i, “Aope ün ngoi numan-e inang, wangmeilak yang, hangjingne wang taakke ngoh, 3hüyange napning numan-e inang, tenyih wang menglak yang, hangjingne wang taakke hüyange wangphom nyeihnang. Numan-e wangyete leiyange wangmeng wangmeilak ipu oknang; hüyangpoi numan-e füo jingne lüppu ye-ok a? 4#Jon 3.4-5.Ümenglan hüyange üting yelakpu jinne kahnyingwüngha füo jingne yamnang, hüyangpoi Jona hipa füo tokte kaiye füo hango yehüolak.” Iman tüohyange I tai.

Pharisee Hei Sadduceelan Do

(Mk 8.14-21)

5 # Mk 8.13-21. Pinlan jaye yengjan te tai hüyangpoi iman an peyange wen. 6#Lk 12.1.Jesuwe imante i, “Pharisee hei Sadduceelan do jingne yeonge kentinge leiyah.” 7Iman-e iman yo me teingaowe i, “Teman-e an yeyahpu yang.” 8#Mt 6.30; 8.26; 14.31.Jesuwe tüopa shing hüyange i, “Üjingha ütinglak palan! Numan me an yenangpu üko jeng hangne numan pa me tei ngaopu shi? 9#Mt 14.17-21.Numan-e sha-a ngoiye yeshing okpu a? Hüyange ankhüo nga numan-e haja nga te tamme pha, hüyange muhto hangshin numan-e shaijem numan-e yeteihtüopu a? 10#Mt 15.34-38.Hüyange ankhüo nyit haja pelite tamme pha, hüyange muhto üyong hangshin numan-e shaijem? 11Taowe numante an jeng ye-i-she numan-e hangke yeshing? Pharisee hei Sadduceelan do jingne kenting yah.” 12Hüwante an jingne do jonpu jeng ye i, hüyangpoi Pharisee hei Sadduceelan ne nyüopu me kenting yah she ipu iman-e shinge pei.

Jesu She Peter Janpu

(Mk 8.27-30; Lk 9.18-21)

13 # Mk 8.27-30; Lk 9.18-21. Aope Jesu Kaisarea Philippi kahtok ngoi Iye yoi pinlan te tong, “Kahtalan-e Kahta Üha ao she inangki?” 14#Mt 14.2; Mk 6.15; Lk 9.7-18; Jn 1.21.Iman-e jan, “Ütam-e inang, Baptipa John, ülao lanne inang, Elijah, hüyange ülao lanne inang, Jeremia yejema-a hipalan yo me ja she inang.” 15Iye imante i, “Hüyangpoi numan-e Tao ao she inangki?” 16#Mt 1.16; Jn 11.27; 1.49.Simon Peterwe janne i, “Nang üyin Kahwang üha, Messiah.” 17#1 Kor 15.50; Gal 1.16; Eph 6.12; Heb 2.14.Jesuwe janne i, Jona üha Simon, nang moimanpupa: hangjingne iy hei meiye hatüo nangte manhüo, hüyangpoi wangdang me ngohpu üpawe hüo, 18#Jn 1.40-42; 21.15-17; 1 Kor 15.5.Tüokhei Taowe nangte inang, Nanga Peter, hüyange tüopa longnyu tangme Taowe Ü-Bumeinok linglak, hüyange lipu taten ünganwonge hatüo ye-oklak. 19#Isa 22.22; Ütah 1.18; Mt 18.18; Jn 20.23.Wangdang ahngching pejong yüpmee Taowe nangte phalak, hüyange hanghe kahtoknyu me shalakei hatüo wangdang me-o shalak hüyange nange hanghe kahtoknyu me lanlakei hatüo wangdang me-o lanlak. 20#Mt 8.4; Mk 3.12; 5.43; 7.36; 9.9.Tüophei me ao te-o I-a Khrista (Messiah) she tahngai she yoi pinlante mong ngao i.

Jesuwe I Lilak Hüyange Yange Yelak Shaotan Ngao

(Mk 8.31—9.1; Lk 9.22-27)

21 # Mk 8.31—9.1; Lk 9.22-27. #Mt 17.22-23; 20.17-19; Lk 17.25; Mt 17.12; 26.2.Hatüo hipak me peiye Jesuwe yoi pinlante I Jerusalemte tailak, hüyange jeiyonglan, ngengpa üjenglan hüyange ngaokeng nyanpalan mepu, litamlak jingne yeonge shangne tamlak, hüyange nyihlüm shepu nyih me yange yelak jeng hüone wang. 22Peterwe jayete woitei hüyange Ite teeye ngaowe wang: “Youngwanpa, Kahwange hatüo tiennang; hatüo nang me yengailak.” 23#Mt 4.10.I lüppe ye hüyange Peterte i, “Ü-tokphei te yetepha, Satan. Nang üjingne tienpu ja, hangjingne nange Kahwange teihpu yeje, hüyangpoi kahta teihpu teihnang.”

Tangpem Lamnyu Wannang

24 # Mt 10.38-39; Lk 14.27; 17.33; Jn 12.25. Tüophei me Jesuwe I pinlante i, “Kahta ütam-e ü-phei te woihuma-a, Iye yoi nying nyingke tükyah, hüyange yoi tangpem paiyange ü-pheite woikei. 25Hangjingne aowe yoi üyin yinne nganglakei I mahlak, hüyangpoi aowe üjingne I üyin mahlakei hatüo tüolak. 26Hangjingne kahtawe kahtoknyu üshei tüowe okyange hüyange yoi üyin mahküma-a Iye hanghe küw tüolak? Yejema-a yoi üyin nanleiye kahtawe ümee ne hanghe phalak? 27#Mt 10.33; Lk 12.9; 1 Jn 2.28; Rom 2.6; Ütah 22.12.Hangjingne Kahta Üha yoipa müktishiwa me wangdang shongmokpalan phei peilak, hüyange kahta lilite Iye lingyangpu me tokyange hünghao Iye phakülak. 28#Mt 10.23; 1 Kor 16.22; 1 Thes 4.15-18; Ütah 1.7; Jas 5.7.Ütingpa me Taowe numante inang, tüome yonge ngohpu ütam-e kahta üha yoi Ahngching me yupu mannge mannge lipu yeshinglak.”

Currently Selected:

MATTHEU 16: KONYBSI

Highlight

Copy