MATTHEU 15

Pajeiyonglan Jeng Nyüopu

(Mk 7.1-13)

1 # Mk 7.1-23. Hüwante Phariseelan hei ngaokeng nyanpalan ütam Jerusalem mepu Jesu tangte peiye i, 2“Hangne nang pinlan-e pajeiyong lan-e itte shempu ngaokeng kaipu shi? Hangjingne iman-e hahne iwante yak yetuh!”

3Iye imante janne i, “Hangne numan-o numan-e itpu jonne she iwante Kahwang ngaokeng kaipu shi? 4#Woi 20.12; Hin 5.16; Woi 21.17; Lev 20.9.Hangjingne Kahwange hüke i, ‘Nangpa hei nangnyute iyesheyah,’ hüyange, ‘Aowe yoipa yejema-a yoinyu te phoiwüm lakei ütingme li ne tamlak.’ 5Hüyangpoi numan-e inang, ‘Kahta jawe Ipa hei Inyute jamme oklak jingne jonlak ütam ngoh, hüyangpoi hatüo Kahwang jing she ima-a, 6Iye Ipa te wangshüm hüolak wongpong ne yeje.’ Hatüo kih-e numan-e yoi ngao jonne iwante Kahwang ye-i-yeshe.” 7Jutok meipalan, numan jingne Isaia hi-ngao yeonge meiye inang;

8 # Isa 29.13. “Hatüo kahtalan-e üte iman juwe yihlu,

hüyangpoi iman mongjang ü-mepu yanne ngohnang.

9Jajang jawe iman-e üte yop,

Kahwang lamjong leye iman-e kahtawe lingpu lamjong nyüo!”

Kahta Ja Nuwetampu Toi

(Mk 7.14-23)

10Hüyange Iye ükhong I sheshao me nyik hüyange imante i, “Jaiyah, hüyange shingyah! 11#Lam 10.14-15; 1 Tim 4.3.Kahta ja ju kaiye hanghe ongnang hatüowe kahta nupu ne yeje; hüyangpoi, hanghepa ju mepu ngainang tüowe nutam nang.” 12Hüwante pinlan pei hüyange Ite i, “Nange hanghe ngao tüowe phariseelan te shahyange iman mongmengpu nange shingya?” 13#Isa 60.21; Jn 15.2.Iye jan, “Hanghepa deiha liha wangdang mepu üpawe yedei, bheiwinlak. 14#Lk 6.39; Mt 23.16,24; Rom 2.19.Iman shaha angtamtüoh iman mükmüopu kahta woipu mükmüopa woipalan. Mükmüopa kahta jawe eiha ja woima-a, moini kahsa te yetlak.” 15Peterwe Ite janne i, “Tomante ngaoleppu khoih itehu.” 16Iye i, “Numan-o sha-a ngoiye manshing okpu a? 17Hanghepa ju me ong seanyu te ta nang hüyange jeamtai wante tainang she numan-e yeshing a? 18Hüyangpoi hanghepa ju me ngai hatüo mongsa mepu, hüyange tüowe kahta ja nuwe tamnang. 19#Gal 5.19-21; 1 Kor 6.9-10; Rom 14.14.Hangjingne mongjang mepu kon ümeng, toilak, phwngpu, phwngekempu, kuhpu, ngaoleih saki, hüyange eiha jing ünyei yah hupu ngainang. 20Tüolan toiye kahta ja nuwe tamnang, hüyangpoi yak yetuhpe hahpu kaiye kahta ja nuwe yetam.”

Ütinglakpu Kanan Sheko Ja

(Mk 7.24-30)

21 # Mk 7.24-30. Jesuwe tüopa nyoi tüohyange Tyre hei Sidon kahtok yete tai. 22Tüoye mepu peipu Kananlan sheko jawe hüke üngwün, “Üyongpa, David üha, üte shüpshe pha. Üha sheko naha laa omyange yeonge shaoshi nang.” 23Hüyangpoi Iye yhate ngao ja nehoi yejan. I pinlan pei hüyange yha yene tamyangkei, hangjingne “Yha teman phei me üngwünne woikei ki” she Ite tonge i. 24#Mt 10.6,23.Iye jan, “Israel nok mahpu nyee jingne hei Tao shon.” 25#Mt 8.2; 18.26; 20.20; Jn 9.38.Hüwante yha kemme pei hüyange I sheshao me khümme lamyange i, “Üyongpa, üte jempha.” 26Iye jan, “Nahalan nük yahpuwe kuihalante shüplak yemei.” 27Yhawe jan, “Üting, Üyongpa; hüyangpoi kuihalane-o iman nokpuwe khao me hahyange yeipu nükkek hahnang.” 28#Mt 9.22,28; Mk 10.52; Lk 7.50; 17.19.Hüwante Jesuwe yhate jan, “Sheko, nang ütinglakpu yong nangki! Nange hangke leng, hatüo nangjingne lingpha lak.” Hüyange tüopa hipak memuh yha sheko naha mei.

Jesuwe Kahta Maawe Meitam

29 # Mk 7.31-37. Jesuwe tüopa nyoi tüohyange Galilee yengching paowe tai hüyange I kahtangja te ong hüyange tüome shot. 30Ükhong üyong yafaipa, yakshokpa, mükmüopa, ngao ükpa hüyange ülao kahta maawe I tangte pei; hüyange I yashong me moilan angetam, hüyange Iye iman meitam; 31tüokhei ükhong üshei aope ngao ükpalan-e ngaopu, yakshokpa meipu, yafaipa kempu, hüyange mükmüopalan-e ngepu nge yashan, hüyange iman-e Israel Kahwangte yihlupu pha.

Jesuwe Haja Peli Uh

(Mk 8.1-10)

32 # Mk 8.1-10; Mt 14.13-21. #Mt 9.36.Tüophei me Jesuwe yoi pinlan I tangte nyik hüyange i: “Tüopa ükhong jingne Tao yeonge yayeng teihnangki, hangjingne iman ü-phei nyihlüm ngoiye ngohtepu hüyange hahlak hango yenang. Taowe iman seanyaowe teine yetamhu, yejema-a iman lamme seanyaowe nyailak.” 33Pinlan-e Ite i, “Teshin yongpu ükhong moh uhlak jingne hükihpu wanwüng jengme, ü-mepu an wange tüolak?” 34Jesuwe imante i, “Numan me an hangshin ngohnangki?” Iman-e jan, “Ankhüo nyit hüyange nyah ükhoih üjingha.” 35Kahtok me shotlak jingne Iye ükhong te ngaopha. 36Iye ankhüo nyit hüyange nyah jon. Tüophei me Iye minyong pha, tüolan khoihtam hüyange tüolan pinlante pha, hüyange pinlan-e ükhongte pha. 37Iman manmoh manmoh iman-e hah; hüyange shaipu ükhoih ünyai iman-e muhto üyong nyit a maawe shaijem. 38Aoyinne hahya peih sheko hei nahalan ye-i-pe kahta haja peli ngoh. 39Tüophei me Iye ükhong yanne tam, lisheng ja me ong hüyange Magadan yikeng yete tai.

Currently Selected:

MATTHEU 15: KONYBSI

Highlight

Copy