LUKAS 6

Tau Kelineʹ Tuhan

(Un te neng Matius 12.1-8; Markus 2.23-28)

1Neng ca Tau Kelineʹ, tai kun Yesus masat dalau uma gandum. Kun nte diaʹ bayaʹ katuk ke nuget ulo jelai gandum, ngan lemusit luang nge man ujoʹ de, kun nte uman ne. 2Un dau diaʹ Perisi dina: “Adeʹ kem ngesa adet le tegoʹ Tau Kelineʹ tupe?”

3Kun dau Yesus mipa ida: “Abeʹ lepe ikem baca surat ban puyan Daut dalau ue laʹu peging ngan diaʹ ngan ne are? 4Tai ie kedalem amin Allah, sulo ho alaʹ ruti ban pengencai me Allah ina, penco ho uman ne. Kun ne naʹ me diaʹ ngan ne pelaʹa, kenuen pe adet le mulen dulu diaʹ tuaʹ ke uman ne, bang diaʹ detaʹu le iaʹ sukat uman ne.”

5Un dau Yesus neng ida laʹa: “Anak Sio ini, ia atek Tuʹa neng Tau Kelineʹ.”

Laki iaʹ uping ujoʹ

(Un te neng Matius 12.9-14; Markus 3.1-6)

6Neng ca Tau Kelineʹ laʹa, tai kun Yesus kedalem amin sebayang Yahudi, pekatuk dulu kidi. Un ca laki kina iaʹ uping ujoʹ o tahaʹ taʹu. 7Un palai diaʹ guru Adet Yahudi ngan diaʹ Perisi kina nai nile diseʹ Yesus, selu ue ke paget dulu tegoʹ Tau Kelineʹ, apan un ukan nte ke naʹ salaʹ mia. 8Naʹ pia pekina Yesus tengen tisen seʹ kimet de. Un dau ue neng laki iaʹ uping ujoʹ ina: “Beteʹ ne ikoʹ, nai ne nekejeng kaʹ beluaʹ ne.” Penco kenai laki ina beteʹ, nekejeng kina. 9Un dau Yesus pelaʹa neng ida mung: “Ubaʹ keʹ ke lemutu ikem: Kumpin baʹan dau adet le, inu iaʹ ilu sukat uyan tegoʹ Tau Kelineʹ tupe? Sukat le lesau dulu mo, buk are nyakit ida pe? Pudip dulu, buk are lematai ida pe?” 10Kun Yesus nekeneng naʹat ida mung, penco dau ue neng laki ina: “Mejo ne ujoʹ koʹ.” Kun ne mejo ho, penco tiga ne ujoʹ o.

11Ina ukoʹ buseʹ laleʹ ne ida. Ketai re ngedudun ida selepeʹ, ngan peseket inu iaʹ senteng ida keti neng Yesus ʹo.

Yesus lemileʹ puloʹ dua Lawa Injil

(Un te neng Matius 10.1-4; Markus 3.13-19)

12Ngajan ina lete, tai kun Yesus pukat ca mudung, moʹ o ke lemameʹ. Utung alem ina ha lemameʹ palaʹ Allah. 13Neng kenai dema ha, kun Yesus mengin ketoʹ diaʹ bayaʹ katuk ke are, nai palaʹ ia. Penco ho lemileʹ puloʹ dua usa neng ahang ida, ngan uyan ida lawa Injil. 14Un nte didi: Simun (iaʹ Yesus naʹ Peterus), ngan Anderias iaʹ cenganak usa Simun ina; Yakup ngan Yaya, Pilipus ngan Batulumius, 15Matius ngan Tumas, ngan Yakup anak Alpius, ngan Simun iaʹ sanget pasat pulitik ading nte, 16ngan Yudas anak Yakup, nga Yudas Iskariut iaʹ ban mencai Yesus me bunoʹ o.

Yesus pekatuk ngan paget dulu

(Un te neng Matius 4.23-25)

17Nai Yesus peging ngan nte dina puno cen mudung ina, nekejeng kaʹ lekaʹ ne. Kadoʹ de diaʹ bayaʹ katuk ke nai tugung ia kina. Un pelaʹa ca mpun bioʹ dulu diaʹ ban nai cen mung lepoʹ diaʹ kaʹ tanaʹ Yudia, ngan lepoʹ Yerusalim, ngan pekina pe diaʹ cen sada bahi alo arap lepoʹ Tirus ngan lepoʹ Sidun. 18Kenai re ubaʹ ke ngeringa dau ue, ngan nyat ia paget ida cen penyakit de. Nai pe dulu diaʹ ban bali nelasek. Penco re maget kuʹun ne puʹo. 19Mung dulu dina ten ke ngkang Yesus, moʹ nyingan nai cen ia ke paget ida mung.

Bangen ngan kelesau

(Un te neng Matius 5.1-12)

20Kun Yesus naʹat ida diaʹ bayaʹ katuk ke dina, un dau ue:

“Bangen ne ikem diaʹ taru mudip:

moʹ puyan pengaren Allah ne iaʹ anun ncem.

21“Bangen ne ikem diaʹ laʹu naʹkini:

moʹ ikem iaʹ ke beso ʹo.

“Bangen ne ikem diaʹ nange naʹkini:

moʹ ikem iaʹ ke petawa ʹo.

22“Bangen ne ikem buk dulu miʹi neng ikem, ngan nyekang ikem, ngan pejaʹat dau neng ikem, ngan kuma ikem jaʹat suaʹ ban ncem temek bayaʹ dau Anak Sio ini. 23Dalau ina bangen ncem ngan kancet, moʹ kuʹun bangen cen dalem penawai hem, moʹ bioʹ laleʹ bang ngkem kaʹ surga. Moʹ pekina lete ban puyan diaʹ tepun nte neng diaʹ pegawa Allah cen naʹaʹ are.

24“Di lareʹ ke kelesau hem ʹo, ikem diaʹ kayaʹ naʹkini:

moʹ kesalai laho ne peniga iaʹ un neng udip kem ini.

25“Ke kelesau hem ʹo, ikem diaʹ beso naʹkini:

moʹ ikem iaʹ ke tai laʹu ʹo.

“Ke kelesau hem ʹo, ikem diaʹ petawa naʹkini:

moʹ ikem iaʹ ke bihe ngan nange ʹo.

26“Ke kelesau hem buk dulu pancau ikem: moʹ pekina ban puyan diaʹ tepun nte neng pegawa palo cen naʹaʹ.”

Malaʹ neng bunoʹ le

(Un te neng Matius 5.38-48; 7.12a)

27Kun Yesus: “Pekini dau heʹ neng ikem diaʹ ngeringa dau heʹ: Malaʹ ne ikem neng bunoʹ kem, ngan uyan tiga me dulu diaʹ miʹi neng ikem. 28Badaʹ seʹ tiga saheʹ kem me dulu diaʹ nunoʹ ikem, ngan lemameʹ me dulu diaʹ petuyen ikem. 29Buk aheʹ nepap pinga hem, mata pe ceng bese laʹa. Buk aheʹ alaʹ sapai hem, pedayo ne ia alaʹ sapai tempan ncem laʹa. 30Singket de diaʹ nyat neng ikem, naʹ mida. Buk aheʹ alaʹ inu hem, ayen nyat te uleʹ. 31Koʹ baʹan pengubaʹ kem dulu ke uyan neng ikem, pekina te ikem ke uyan mida.

32“Buk kem malaʹ diaʹ malaʹ neng ikem, inu peniga iaʹ ikem ke nebelum cen Tuhan Allah ʹo? Moʹ un kelunan penyalaʹ, nco pe ida malaʹ neng diaʹ malaʹ neng ida. 33Buk kem uyan tiga me diaʹ uyan tiga mikem le, inu peniga iaʹ ikem ke nebelum cen Tuhan Allah pelaʹa ʹo? Diaʹ un penyalaʹ, nco pe ida mencam uyan pekina pe. 34Buk kem naʹ inu hem me dulu diaʹ ke kanan ne kena, ngan nebelum ida ke naʹ a ngeliwet palaʹ ikem, inu peniga iaʹ ikem ke nebelum cen Tuhan Allah pelaʹa ʹo? Moʹ diaʹ un penyalaʹ, nco pe ida mencam naʹ inu re selepeʹ kanan ne kena pe. Moʹ de nebelum ke alaʹ ngeliwet suaʹ a kuaʹ kadoʹ. 35Di lareʹ tiga hem malaʹ neng bunoʹ kem, ngan uyan tiga mida. Naʹ inu hem dulu kanan kena, ayen nebelum me ngeliwet laʹa. Ban ne bioʹ bang peniga hem uʹo, ngan luhaʹ ban diseʹ kem anak Allah iaʹ Atek Mpau. Moʹ Allah lemuto naʹ peniga me dulu diaʹ muau ia pe, ngan dulu diaʹ jaʹat pe. 36Tiga hem un pengelesau koʹ baʹan Amai Bioʹ kem iaʹ un pengelesau.”

Puyan pebetep dau salaʹ neng kelunan

(Un te neng Matius 7.1-5)

37Sulo dau Yesus pelaʹa: “Ayen ncem pebetep dau salaʹ neng dulu, idi Allah abeʹ un ke pebetep dau salaʹ neng ikem ʹo. Ngan ayen ncem mekem penyalaʹ me dulu, idi Allah abeʹ un mekem penyalaʹ mikem ʹo. Sau penyalaʹ neng dulu, idi Allah ke sau penyalaʹ neng ikem ʹo. 38Naʹ inu hem ngan tiga tawai me dulu, idi Allah ke naʹ mikem, moʹ Allah man tukaʹ iaʹ teneng. Ia lemenaʹ ngan meko pa tanet ngan lusut, pa ke penyukat cem alaʹ a. Tukaʹ iaʹ ikem nukaʹ me dulu, idi te man Allah ke nukaʹ mikem puʹo.”

39Kun Yesus badaʹ ca kata mida, kun dau ue: “Senteng te kelunan butaʹ ke ajak kelunan butaʹ baʹan ncem? Abeʹ de dua ketai laboʹ dalem lubang ʹo? 40Aheʹ iaʹ bayaʹ katuk guru re, abeʹ e ke mpau neng guru re. Toʹ dulu diaʹ bayaʹ katuk guru, ke tai te ida pekuaʹ ngan guru re, buk de pekalai pa daʹam mung.

41“Moʹ inu hoʹ badaʹ pelem un dalem mata cenganak koʹ: petem un ca batang dalem mata hoʹ tengen, abeʹ koʹ pesingo ho? 42Moʹ inu hoʹ kuma ha neng cenganak koʹ: ‘Cenganak, tiga heʹ sau pelem koʹ ading,’ petem pia abeʹ koʹ taʹan ngan tisen batang iaʹ dalem mata hoʹ tengen? E kelunan ngaloʹ, sau batang iaʹ dalem mata hoʹ tengen ading, uʹo ina le ikoʹ ke taʹan ke sau pelem cenganak koʹ ina ʹo.”

Inan buaʹ ngan buʹan ne

(Un te neng Matius 7.16-20; 12.33-35)

43Sulo dau Yesus pelaʹa: “Moʹ abeʹ un inan buaʹ iaʹ tiga ke un buʹan iaʹ jaʹat. Pekina pe abeʹ un inan buaʹ iaʹ jaʹat ke un buʹan iaʹ tiga. 44Singket inan buaʹ ilu tisen cen buʹan ne. Moʹ cen puʹun suhaʹ, abeʹ le taʹan dulu alaʹ buaʹ abung. Ngan cen kelukun aka, abeʹ le alaʹ buaʹ anggur. 45Aheʹ iaʹ tiga, atek ke ke peluhaʹ iaʹ tiga cen pengetiga kimet te. Pekina pe aheʹ iaʹ jaʹat, atek ke ke peluhaʹ iaʹ jaʹat cen pengejaʹat kimet te. Inu iaʹ pasak sangan dalem kimet le, idi te ke isiu le puʹo.”

Dua naʹan tukeng amin

(Un te neng Matius 7.24-27)

46Sulo dau Yesus laʹa: “Inu hem pisiu akeʹ: ‘Tuhan, Tuhan’, un sepuʹo abeʹ kem bayaʹ dau tiraʹ keʹ? 47Un diaʹ nai kata akeʹ, ngan ngeringa dau tiraʹ keʹ, ngan tudep bayaʹ dau heʹ, akeʹ alaʹ kata neng ida dina pekini: 48Un nte koʹ baʹan ca usa iaʹ medeng amin. Kun ne mekat pa dalem, pa ha luhaʹ batu iaʹ ke tentan ne. Nai kun sungai bioʹ pelempam me. Naʹ pe kumpin kas sungai nantaʹ amin ina, abeʹ e ke tekicuk, moʹ puyan ne salet. 49Un sepuʹo dulu iaʹ ngeringa dau tiraʹ keʹ, abeʹ de bayaʹ dau ue, un nte koʹ baʹan ca usa iaʹ medeng amin neng tanaʹ tuaʹ le, abeʹ un uyan nten ne. Nai kun sungai bioʹ nantaʹ amin ina, beliʹau tai ie mapeʹ. Bura laleʹ diseʹ amin ina nuʹo.”

Currently Selected:

LUKAS 6: KNT

Highlight

Copy