LUKAS 7
7
Yesus paget ca ulaʹ pengebioʹ sedadu Rum
(Un te neng Matius 8.5-13)
1Uʹo Yesus pelepa mung tiraʹ a palaʹ dulu kina, sulo ketai ie kaʹ lepoʹ Kapernaum. 2Un kaʹ lepoʹ ina, ca pengebioʹ sedadu Rum. Un ca ulaʹ a sakit, iaʹ ia selum laleʹ le. Kenyarem laleʹ sakit te; kece seʹ ke matai ie. 3Tegoʹ pengebioʹ sedadu ina kenahan dau denga puyan Yesus, kun ne cuk diaʹ pengencam lepoʹ Yahudi tai mengin Yesus nai paget ulaʹ a ina. 4Tai re palaʹ Yesus, ngan naten mengin ia, kun dau re: “Tekep lete Tuhan lesau ia, 5moʹ malaʹ seʹ e neng lepoʹ ilu, ngan ia pe medeng amin sebayang milu.”
6Tai kun Yesus serengan ida. Dalau re nyeng dudo amin nte ina, kun pengebioʹ sedadu ina cuk kudaʹ usa diaʹ ngan ne tai nyelalang, kun dau re: “Ahaʹ Tuhan, ayen petusa ikoʹ laʹa. Lan ne abeʹ keʹ tekep kaʹ ke alaʹ ikoʹ nai kedalem amin nceʹ puʹo. 7Cen penepa usa heʹ, abeʹ keʹ tekep ke nai palaʹ ikoʹ. Naʹ pe ca le dau isiu hoʹ, sukat ne ulaʹ keʹ maget. 8Moʹ akeʹ ini ne ca tahaʹ ntaʹ pengecuk diaʹ mpau neng akeʹ. Ngan pekina pe un sedadu diaʹ tahaʹ ntaʹ neng akeʹ diaʹ akeʹ cuk. Buk keʹ cuk ca usa: ‘Tai hoʹ,’ sulo ketai ie, palaʹ diaʹ ca laʹa: ‘Baka kini,’ sulo kenai ie, ngan un dau heʹ neng ulaʹ keʹ laʹa: ‘Uyan ina,’ sulo seʹ e uyan ne.”
9Salam tekaʹ Yesus kenahan dau ue, penco ho sileʹ palaʹ diaʹ kadoʹ diaʹ nai bayaʹ ia, kun dau ue: “Nyahut ceʹ tegoʹ iaʹ un pengelan koʹ baʹan ini, di pe neng aheʹ aheʹ lepoʹ Yahudi.”
10Kenai lawa dina uleʹ palaʹ amin pengebioʹ sedadu ina, penco re taʹan ulaʹ idai lepa maget.
Yesus pudip ca anak balu
11Laho dalau ina, tai Yesus masat kaʹ ca lepoʹ iaʹ ngadan ne Nain. Un diaʹ bayaʹ katuk ke, peging diaʹ kadoʹ dina, nai tugung ia. 12Dalau tai ie nyeng palaʹ pamen kerahan lepoʹ ina, selalang kenai dulu nekalang lungun diaʹ matai. Moʹ un ca demanai, anak balu, ban matai ne ia. Bang ia le anak ke. Un pe kadoʹ dulu lepoʹ de diaʹ nai masek tugung ida. 13Tegoʹ Tuhan taʹan leto ina, tai lesau laleʹ ne tekaʹ a neng ia. Un dau ue neng ia: “Ayen ncoʹ nange.” 14Tai kun ne ngenyeng tekalang lungun ina, nga naʹ ujoʹ o neng usun lungun ina. Pekenaʹ ne dulu diaʹ nekalang nge. Kun dau Yesus: “Demanai, akeʹ keti mikoʹ, beteʹ ne ikoʹ.” 15Sulo kenai laki iaʹ matai ina beteʹ, madung, ngan pisiu. Penco Yesus cuk ia tai ngan ueʹ e.
16Salam ngan takut ne ketoʹ de mung, penco re pempau Allah, un dau re: “Ini ca pegawa iaʹ atek bioʹ nai luhaʹ kahang ilu.” Ngan: “Seʹ kenai Allah keniga udip ilu diaʹ anun ne.”
17Ngan denga ne ban puyan Yesus pa tipo tanaʹ Yudia ngan mung dale teliling nge.
Diaʹ lawa cen Yaya Guru Batis
(Un te neng Matius 11.2-19)
18Un diaʹ bayaʹ katuk Yaya, kun nte badaʹ denga puyan Yesus me Yaya. Kun Yaya mengin dua usa diaʹ bayaʹ ia dina, 19penco ho cuk ida tai lemutu neng Tuhan: “Pekini dau hem: Kumpin ikoʹ ini lete iaʹ Yaya nekena badaʹ ke nai idai, buk are ameʹ mengaʹ kenai ca laʹa tupe?”
20Tai abeʹ de dua palaʹ Yesus, un dau re dua: “Ban Yaya Batis cuk ameʹ nai lemutu ikoʹ, kumpin ikoʹ ini ne ia iaʹ Yaya nekena badaʹ ke nai idai, buk are ameʹ mengaʹ kenai ca laʹa tupe?”
21Dalau ina lete Yesus kadoʹ paget dulu cen penyakit de, ngan keta, ngan diaʹ bali nelasek, ngan pekina pe ia naʹ penaʹat me kadoʹ diaʹ butaʹ. 22Un dau Yesus mipa ida dua: “Tai ne ikem dua uleʹ, ngan badaʹ me Yaya inu iaʹ ikem dua lepa taʹan ngan kenahan: dulu diaʹ butaʹ lepa taʹan, ngan diaʹ apet sukat tai masat, ngan diaʹ sakit bekayen tai malit, ngan diaʹ dengen sukat kenahan, ngan diaʹ matai nai mudip, ngan un pe diaʹ tai badaʹ Denga Injil palaʹ diaʹ taru mudip. 23Bangen saheʹ ne aheʹ iaʹ abeʹ un kawaʹ tekaʹ neng akeʹ.”
24Uʹo re dua diaʹ lawa Yaya ina tai uleʹ, sulo Yesus nading badaʹ me mpun kina neng puyan Yaya, un dau ue: “Dalau tai hem kaʹ tanaʹ lenga idai are, inu iaʹ ikem nebelum ke taʹan? Ca usa iaʹ lemaʹ koʹ udu iaʹ payo kuʹun bahiu tupe? 25Inu iaʹ ikem tai naʹat? Ca diaʹ un gelam lanya? Lan ne diaʹ un gelam tiga ngan mudip lento, bang kaʹ amin laja le ida. 26Ca inu iaʹ ikem nebelum ke taʹan? Ca pegawa? lan dau heʹ mikem, un te ca iaʹ atek bioʹ neng ʹo pegawa. 27Un dau Kitap neng puyan Yaya, pekini dau ue: ‘Kun dau Allah, tiga ne ikoʹ ngetisen ini lawa heʹ, iaʹ akeʹ cuk ading neng ikoʹ. Ia iaʹ ke petenup janan tahaʹ tena ikoʹ.’ ” 28Un dau Yesus pelaʹa: “Yaya ne iaʹ atek bioʹ neng ketoʹ dulu diaʹ musang kusun tanaʹ ne. Un sepuʹo ia iaʹ iʹut dalem puyan pengaren Allah, ia ne atek bioʹ neng ʹo Yaya.”
29Mung dulu peging diaʹ nemo pupu pe ban lepa ngeringa dau Yaya. Mung nte diaʹ naʹ a teneng katuk Allah cen Yaya, ida le iaʹ cuk Yaya ngebatis ida. 30Naʹ pe pekina, dulu diaʹ Perisi ngan guru Adet Yahudi nyekang dau katuk pengubaʹ Allah mida, mentung nte are dayo Yaya ke ngebatis ida.
31Un dau Yesus laʹa: “Kumpin nceʹ ke pekata udip dulu naʹkini? Inu iaʹ ilu alaʹ kata kidi taʹin? 32Un diseʹ de ko baʹan anak madung kaʹ pasen. Un palai ngelengap pisiu diaʹ ceng bese, kun nte: ‘Kun meʹ ti sampeʹ, abeʹ kem tai kancet kidi. Kun meʹ nyidau, abeʹ pe ikem nange.’ 33Moʹ lepa kenai Yaya Batis ne, tahaʹ palai abeʹ e uman kanen, nyahut te tisen nisep jakan, adeʹ kem kuma ha ia un bali buling. 34Nai kun Anak Sio ini, uman ngan nisep pe ia. Toʹ dau hem neng ia reʹ: ‘Naʹat ini ca diaʹ mekum uman ngan aleʹ aleʹ nisep jakan, diaʹ pemung ayo ngan diaʹ nemo pupu ngan diaʹ dulu kuma jaʹat.’ 35Naʹ pe pekina, ilu tisen penudi kimet Allah uban un teneng, ban le taʹan puyan iaʹ nuyan kuʹun kelunan diaʹ alaʹ a.”
Yesus dalem amin Simun, ca Perisi
36Un ca Perisi, ngadan ne Simun. Kun ne mengin Yesus nai pemung uman ngan ne. Tai kun Yesus kedalem amin ne, penco ho madung uman ngan ne. 37Kedalem lepoʹ ina un ca leto iaʹ lepa mudip pepuk kuʹun penyalaʹ. Tisen ne leto ina Yesus tai pemung uman kedalem amin laki Perisi ina, sulo ho alaʹ ngan ngkin ca butun dumit, kukoʹ kenyo iaʹ me baʹoʹ. 38Ketai leto ina, sulo ho nekejeng dudo taket Yesus, tahaʹ likut kukoʹ Yesus madung lemik, mentung nge nange. Basaʹ ne taket Yesus kuʹun luloʹ o, kun ne lemasa ha man puk ke, sulo ho maʹoʹ taket Yesus, mentung nge muso kenyo iaʹ me baʹoʹ ina kidi. 39Un laki Perisi iaʹ ban mengin Yesus uman ngan ne taʹan seʹ puyan ina. Un kaʹ a dalem kimet te: “Buk lan laki ini ca pegawa Allah, atek ke tisen aheʹ leto iaʹ man taket te ina. Masaʹ pe ia are tisen leto ini ca diaʹ mudip pepuk kuʹun penyalaʹ?”
40Tisen ne Yesus kimet Simun, kun dau ue neng ia: “Simun, un ca tiraʹ iaʹ akeʹ ubaʹ ke badaʹ mikoʹ.”
Un dau Simun: “Ahaʹ Guru, badaʹ ne.”
41“Un dua usa iaʹ un utang ligit neng ca diaʹ kayaʹ. Un ca usa, utang nge lema ato ligit, ngan un ca laʹa lema puloʹ ligit. 42Abeʹ un man nte dua ke nyaliu ue. Ina ukoʹ laki kayaʹ lesau ida dua, ngan lematai surat utang nte dua mung. Buk pekina, aheʹ mida dua iaʹ malaʹ laleʹ neng puyan laki kayaʹ ina?”
43Kun dau Simun mipa ia: “Baʹan nceʹ, iaʹ kadoʹ utang nge pesau ina.”
Un dau Yesus: “Teneng te dau hoʹ mipa puʹo.” 44Sulo Yesus sileʹ tahaʹ leto ina, mentung nge pisiu Simun: “Un ncoʹ taʹan leto ini mo? Dalau kenai heʹ kaʹ amin ncoʹ, abeʹ koʹ naʹ sungai man muheʹ taket ceʹ. Un leto ini, ia iaʹ lemasaʹ taket ceʹ man luloʹ o, kun ne lemasa ha man puk ke. 45Abeʹ koʹ maʹoʹ akeʹ dalau kenai heʹ are. Un leto ini, nyahut te tai beto maʹoʹ taket ceʹ cen tading kenai heʹ te. 46Abeʹ koʹ ngejemo ulu heʹ man telang kenyo. Leto ini ne iaʹ muso taket ceʹ man kenyo iaʹ me baʹoʹ o. 47Cen diaʹ pekina puyan, akeʹ badaʹ mikoʹ, un ban penyalaʹ a iaʹ kadoʹ lepa pesau ne, ina ukoʹ o bioʹ diseʹ malaʹ a neng akeʹ. Un diaʹ kediʹut penyalaʹ de pesau, kediʹut te malaʹ de neng akeʹ.”
48Sulo dau Yesus neng leto ina: “Ketoʹ penyalaʹ koʹ pesau ne.”
49Un diaʹ pemung uman ngan nte kina, selem selem dau re pisiu: “Moʹ aheʹ kelunan ini tupe? Inu senteng nge ke sau penyalaʹ.”
50Un dau Yesus neng leto ina: “Pengelan ncoʹ ia pudip ikoʹ. Tai ne ikoʹ uleʹ ngan tadan pengudip koʹ.”
Currently Selected:
LUKAS 7: KNT
Highlight
Share
Copy
Want to have your highlights saved across all your devices? Sign up or sign in
Kenyah New Testament © Bible Society of Malaysia, 1984.
