LUKAS 12

Mulen ilu neng puyan ngaloʹ

(Un te neng Matius 10.26-27)

1Dalau ina ketai kudaʹ ibu usa pempun, pa re cut taket de peselepeʹ. Un dau Yesus pisiu neng diaʹ bayaʹ katuk ke: “Jagaʹ ne ikem lemuto neng ala lamut Perisi, iaʹ ina neng puyan ngaloʹ de. 2Moʹ abeʹ un ca inu iaʹ ke pekep iaʹ are ke luhaʹ bayaʹ, ngan abeʹ un tiraʹ iaʹ ke suhuk iaʹ are ke tugen bayaʹ. 3Buk ke pekina, inu iaʹ ikem pisiu neng ntem, dulu ke kenahan neng beluaʹ dema ʹo. Ngan inu iaʹ ikem pisiu selem me dulu kedalem amin, dulu ke ngelengap dau pedenga ha cen belubung amin ʹo.”

Aheʹ iaʹ ilu ke takut

(Un te neng Matius 10.28-31)

4“Dau heʹ mikem cenganak cenganak keʹ, ayen ncem takut dulu diaʹ ke lematai usa hem, diaʹ abeʹ un senteng ke ngejaʹat berua hem. 5Lan dau heʹ badaʹ iaʹ tekep ikem ke takut: Takut ne ikem neng Allah, moʹ buk ke lepa lematai, ngan un penyukat pe ia pet ikem kedalem ukum luten laʹa. Atek lan dau heʹ neng ikem, takut ne ikem neng ia.

6“Moʹ abeʹ un upit, dulu pebeli lema usa dua sin tupe? Naʹ pia pekina, neng penaʹat Allah pabeʹ ca usa upit dina, abeʹ e lingu. 7Un puk kaʹ ulu hem, lepa ne Allah pecap pe. Moʹ ina, ayen ncem takut. Allah malaʹ neng ikem lapa neng ʹo ca aba upit.”

Teto dau ngahaʹ buk are nyepati Keristus

(Un te neng Matius 10.32-33; 12.32; 10.19-20)

8Un dau Yesus: “Pekini dau heʹ neng ikem laʹa, aheʹ iaʹ teto dau ngahaʹ ban ia iaʹ anun nceʹ neng ahang dulu, ke pekina lete akeʹ, iaʹ Anak Sio ini, ke teto dau ngahaʹ ia kata melikat Allah ʹo. 9Un sepuʹo aheʹ iaʹ ke nyepati akeʹ neng juma dulu, ke pekina lete akeʹ, iaʹ Anak Sio ini, ke nyepati ia neng juma melikat Allah puʹo.

10“Aheʹ iaʹ nyepati tiraʹ neng Anak Sio ini, sukat penyalaʹ ina ke pesau. Un sepuʹo aheʹ iaʹ pejaʹat Berua Buheʹ, nyahut penyalaʹ a ina ke pesau ne.

11“Buk dulu tai ngkin ikem kaʹ amin sebayang Yahudi, mele kempi tai re ngkin ikem ke mekem salaʹ mikem, kata gebenur pe, ngan kata diaʹ lataʹ lepoʹ pe, ayen janga pekimet kumpin dau hem ke mipa ida, ngan inu iaʹ ikem ke pisiu ngan nte, 12moʹ Berua Buheʹ iaʹ ke pekatuk ikem dalau ina ʹo, idi telit dau isiu hem.”

Kata katuk cen laki kayaʹ iaʹ untau

13Un ca usa neng diaʹ kadoʹ dina iaʹ pisiu Yesus: “Guru, cuk ne seken nceʹ petulat galen ban anun matai amai meʹ.”

14Un dau Yesus mipa ia: “Anak, aheʹ ban uyan akeʹ pebetep ukum, iaʹ senteng ke petulat galen ncem mikem dua?” 15Un dau Yesus neng dulu mung kina: “Nawai tiga le ikem, ngan jagaʹ kimet cem neng mung naʹan tutun. Moʹ pengudip kelunan, iaʹ atek lan ne, abeʹ e un neng pengekadoʹ inu iaʹ un neng ida.”

16Penco dau Yesus ti ca kata katuk mida kina, kun ne: “Un ca usa iaʹ kayaʹ iaʹ un tanaʹ bileng. Kadoʹ padai ie, ngan tiga seʹ pula ha. 17Un kaʹ kimet te selem: ‘Abeʹ un ukoʹ keʹ ke pedemun padai heʹ mung ne. Inu iaʹ tekep akeʹ ke uyan taʹin?’ 18Un dau ue neng ata ha tengen: ‘Ahaʹ, pekini heʹ ke uyan ne ʹo: Akeʹ ke ngasing ketoʹ lepubung keʹ, penco heʹ ke uyan lepubung iaʹ nawa le ʹo. Kidi heʹ ke pedemun mung padai ngan mung senganan nceʹ diaʹ ca ʹo. 19Uʹo ina akeʹ ke pisiu me penawai heʹ kuma: Saheʹ ngan tadan udip koʹ. Ikoʹ lepa un mung naʹan inu iaʹ tiga, sukat kudaʹ kudaʹ uman uʹo. Mudip nyio ne, uman, nisep, ngan ngebangen ne tawai hoʹ.’ 20Un dau Tuhan Allah neng ia: ‘E laki untau, alem ina lete berua hoʹ ke petat cen usa hoʹ. Aheʹ ke alaʹ mung inu iaʹ ikoʹ lepa pempun me usa hoʹ tengen didai ʹo?’ ”

21Yesus pedaʹam katuk ke, un dau ue: “Pekina puyan dulu diaʹ pempun inu me usa re tengen, un sepuʹo abeʹ sepe ida kayaʹ kata Allah.”

Petapi tawai neng Allah

(Un te neng Matius 6.25-34)

22Un dau Yesus neng diaʹ bayaʹ katuk ke: “Ina ukoʹ keʹ pekini dau mikem laʹa: Ayen janga tawai neng penguman iaʹ ke pudip usa hem, pekina pe neng gelam usa hem. 23Moʹ un udip kem bioʹ neng ʹo penguman, ngan usa hem bioʹ neng ʹo gelam. 24Ikem pekimet seʹ sui kaʹ. Abeʹ de mula luang. Abeʹ de majau, nga abeʹ un lepubung ukoʹ de pedemun inu re. Ina moʹ Allah iaʹ ban petubo ida. Inu le nco hem neng ʹo sui dina. 25Cen pengejanga tawai hem, abeʹ kem senteng ke ngedadoʹ udip kem, naʹ pe ia kediʹut le. 26Buk iaʹ kediʹut ina ikem are senteng ke uyan, inu adeʹ kem janga tawai neng diaʹ ca dina laʹa?

27“Naʹat diseʹ piu kaʹ dalau baʹi, kumpin puyan udip de. Abeʹ de pegayeng, nali, ngan manyam ke gelam usa re pe. Moʹ ina ukoʹ keʹ badaʹ mikem, un Suliman are, naʹ pe kenuen seʹ kayaʹ a, abeʹ pe gelam me ketai selawan diseʹ koʹ baʹan ca piu dini are. 28ngan Allah lete iaʹ pegelam mung udu dalau baʹi iaʹ un neng tau ini, ngan neng kenempam me kun dulu pet kaʹ mpun luten. Buk pekina, moʹ abeʹ Allah lete iaʹ ke naʹ gelam mikem? Inu tepa pengelan ncem tupe? 29Cen diaʹ pekina, ayen lemuto ke janga mita inu iaʹ ikem ke uman ngan nisep. 30Moʹ ketoʹ dulu diaʹ are ngelan kusun tanaʹ ini, ida diaʹ lemuto ke mita inu pekina. Un sepuʹo Amai hem tisen neng inu iaʹ ikem tekep ke un. 31Di lareʹ ading ngkem mita puyan pengaren Allah, ina le ia ke petubo ikem, ngan naʹ inu iaʹ tekep ikem ke un.”

Kayaʹ dalem surga

(Un te neng Matius 6.19-21)

32Un dau Yesus laʹa: “Ikem iaʹ koʹ baʹan ca aba dumba iaʹ kediʹut ini. Ayen mentam, uban ubaʹ laleʹ le Amai hem ke naʹ puyan pengaren ne mikem. 33Matu ne inu hem, ngan naʹ ne tuaʹ le me diaʹ taru mudip. Sereket cem petenup bahan ligit iaʹ abeʹ un ke teneboʹ kaʹ surga. Kidi hem atek pedemun kayaʹ kem iaʹ are tisen ketai pekaliu, moʹ abeʹ kelau un kina, ngan abeʹ un buken iaʹ ke ngejaʹat te. 34Uban kempi un inu hem pempun, kina lete kimet cem.”

Ulaʹ diaʹ mencam jagaʹ

35Un dau Yesus laʹa: “Lemuto hem jagaʹ, abeʹ kem tisen inu iaʹ ke nai nantaʹ ikem ʹo. Lemuto nyereteng ne tuʹing kem, ngan petenup ne jiget titiu hem. 36Tiga hem koʹ baʹan ulaʹ diaʹ mengaʹ kenai laki bioʹ de uleʹ cen pemung uman ngan diaʹ pepeto. Idi buk ke nai megoʹ pamen, jelarai te ida mesik pamen mia. 37Bangen saheʹ ne ulaʹ diaʹ pekina, buk laki bioʹ de ban taʹan ida taga mengaʹ kenai ie abeʹ. Lan dau heʹ mikem, laki bioʹ ina tengen pe ke nyereteng tuʹing nge, ngan cuk ida madung, sulo ho petubo ida. 38Bangen saheʹ ne ulaʹ diaʹ lemuto ke taga mengaʹ kenai laki bioʹ abeʹ, naʹ pe dalau beluaʹ alem, mele ke midan midan pe. 39Ca dau heʹ mikem laʹa, petawai hem kidi. Buk laki bioʹ iaʹ un amin ina tisen tegoʹ ke kenai kelau, abeʹ e ke pedayo diaʹ bekelau ke ngedare amin ne. 40Uban pekina, tiga hem tengen lemuto ke petenup, moʹ Anak Sio ini kenai luhaʹ tegoʹ tuket iaʹ ikem are ke ngihoʹ ʹo.”

Ulaʹ iaʹ tudep, nga ulaʹ iaʹ muau

(Un te neng Matius 24.45-51)

41Un dau Peterus: “Kumpin Tuhan, dau hoʹ pekata katuk ini me ameʹ pat tengen le tupe, buk ke are me dulu mung pe?”

42Un dau Tuhan mipa: “Aheʹ iaʹ koʹ baʹan ulaʹ iaʹ tudep ngan tudi pekimet tupe? Buk laki bioʹ diaʹ amin ne cuk ia ngkang amin ina, ngan petubo inu ue kidi, ngan lemakan ulaʹ diaʹ ca teneng teneng singket tau. 43Bangen saheʹ ne ulaʹ ina buk laki bioʹ ina nai uleʹ ngan taʹan seʹ e tudep pekina. 44Lan dau heʹ badaʹ mikem, laki bioʹ amin ina ke cuk ulaʹ ina ke ngkang mung inu iaʹ un neng amin ne ʹo. 45Un sepuʹo buk ulaʹ ina un ke pekimet kata ha tengen: ‘Duʹai ke kenai laki bioʹ meʹ abeʹ ʹo.’ Sulo diseʹ e nyakit ulaʹ diaʹ ca, inu pia laki, pekina pe neng leto, mentung nge uman ngan nisep pa ha mabuk. 46Dalau ina kenai laki bioʹ ina uleʹ tegoʹ tau ue iaʹ ulaʹ ina are ke ngihoʹ kenai ie, moʹ abeʹ e tisen midan ke kenai ie abeʹ. Sulo laki bioʹ ina ke pet ia lan, ngan ngukum ia pemung ngan dulu diaʹ ban muau.

47“Ulaʹ diaʹ ban tisen pengubaʹ laki bioʹ de, un sepuʹo abeʹ de petenup kaʹ ke uyan neng pengubaʹ laki bioʹ de ne, ida iaʹ ke sihoʹ peta iaʹ atek bahat ʹo. 48Un sepuʹo ulaʹ diaʹ are tisen neng pengubaʹ laki bioʹ de ne, buk de uyan salaʹ iaʹ tekep ke sihoʹ peta, ke kenyiheng ukum nte ʹo. Neng kelunan iaʹ lepa alaʹ kadoʹ, cen ia lete ilu nebelum ke alaʹ kadoʹ laʹa. Ngan kelunan iaʹ lepa ban alaʹ kadoʹ laleʹ, cen ia lete ilu nebelum ke alaʹ kadoʹ laleʹ laʹa.”

Puyan paseʹ kuʹun Yesus

(Un te neng Matius 10.34-36)

49Sulo dau Yesus laʹa: “Seʹ kenai heʹ nengangan ngkin luten neng usun tanaʹ ini. Ubaʹ laleʹ kaʹ keʹ buk luten ina lepa jiget naʹkini. 50Un ca naʹan batis iaʹ tekep ke ngebatis akeʹ ʹo. Bahat laleʹ tekaʹ kimet ceʹ pa ha ke palup. 51Ikem kuma akeʹ kenai ngkin tadan udip kusun tanaʹ ini. Lan dau heʹ mikem, abeʹ e pekina. Bang ca paseʹ le iaʹ akeʹ kenai ngkin. 52Moʹ cen naʹkini ʹo buk un lema usa neng pemanak de, masaʹ de ketai paseʹ neng ida selepeʹ, telu usa ti ngan dua usa, ngan dua usa ke ti ngan telu usa. 53Amai ie ke ti ngan anak laki ie, ngan anak laki ie ke ti ngan amai ie. Ueʹ e ke ti ngan anak leto ho, ngan anak leto ho ke ti ngan ueʹ e. Ngan ueʹ laki ie ke ti ngan sabai leto ho, ngan sabai leto ke ti ngan ueʹ laki ie.”

Nugen sen udip

(Un te neng Matius 16.2-3)

54Kun Yesus badaʹ me diaʹ kadoʹ pelaʹa: “Buk kem taʹan kenai ca abun cen mpau tahaʹ lenca tau, un dau hem: ‘Kenai ujan ʹo.’ Ketai lete pekina. 55Buk bahiu nai cen kabing asat tau, kun ncem: ‘Ke katan tau ʹo.’ Ketai lete iaʹ pekina pe. 56Inu ngaloʹ ngaloʹ dau hem. Mencam dau nugen inu diaʹ neng usun tanaʹ ngan langit, ngan tisen sen ne. Un sepuʹo abeʹ kem tisen sen udip ngajan ini.”

Peteneng tiraʹ neng ikem semaheʹ

(Un te neng Matius 5.25-26)

57Un dau Yesus laʹa: “Uban inu hem abeʹ un pedaʹam puyan teneng neng ahang ikem semaheʹ? 58Buk un ca usa iaʹ ke mekem salaʹ mikem kata perinta, penco ho ngkin ikem tai kukoʹ pebetep tiraʹ te, nengayet ne peteneng puyan ncem ngalang janan, malap ia penco tai ngkin ikem palaʹ iaʹ pebetep ukum, ngan iaʹ pebetep ukum ina penco naʹ ikem me pulis, ngan pulis dina tai naʹ ikem kaʹ amin sepin ʹo. 59Lan dau heʹ mikem, nyahut cem kenai kawang cen ina buk kem are ke pedaʹam utang kem pa ha muʹo temo.”

Currently Selected:

LUKAS 12: KNT

Highlight

Copy