LUKAS 13

Nyepuleʹ kimet cen penyalaʹ, buk are matai penco

1Dalau ina lete kenai kudaʹ usa, nai badaʹ me Yesus denga ca puyan Pilatus ban lematai kudaʹ usa lepoʹ Galilia, dalau re naʹ pegencai me Allah kaʹ lepoʹ Yerusalim. 2Un dau Yesus mipa ida kina: “Kumpin tekaʹ baʹan ncem, ida lepoʹ Galilia diaʹ ban matai pekina moʹ seʹ penyalaʹ de ban lapa bioʹ neng ʹo penyalaʹ mung lepoʹ Galilia diaʹ ca mo? 3Abeʹ e pekina. Lan dau heʹ mikem, buk kem abeʹ un nyepuleʹ kimet cen penyalaʹ kem, ngan nai bayaʹ Allah, atek kem mung ke matai pekina ʹo. 4Kumpin neng diaʹ puloʹ aya diaʹ ban matai pencit kuʹun sukaʹ batu iaʹ tubang kaʹ Siluam didai? Kumpin baʹan ncem? Bioʹ salaʹ de neng ʹo diaʹ ca diaʹ mudip kaʹ lepoʹ Yerusalim ne? 5Abeʹ e pekina. Lan dau heʹ mikem, buk kem abeʹ un nyepuleʹ kimet cen penyalaʹ kem, ngan nai bayaʹ Allah, atek kem mung ke matai pekina ʹo.”

Kata katuk cen buaʹ abung iaʹ upa

6Kun Yesus badaʹ kata katuk ini, kun dau ue: “Un ca usa iaʹ un ca inan buaʹ abung dalau pula buaʹ anggur ne. Kudaʹ liwai ketai ie naʹat buaʹ a. Pabeʹ ca buʹan ne pe abeʹ un. 7Sulo dau ue neng iaʹ mengau pula ina: ‘Naʹat, dalem telu uman ne majan ne, singket nai heʹ naʹat buʹan buaʹ abung ini abeʹ un. Nepeng ne ia. Mpi un bang le neng ia, bang nyingen tanaʹ tuaʹ le iaʹ.’ 8Un dau iaʹ mengau pula ina mipa ia, kuma ha: ‘Ahaʹ amai, inu pia uman ini le laʹa, akeʹ macun teliling puʹun ne ading, ngan naʹ ke bileng kidi ʹo. 9Buk ke un buʹan uman ca ʹo, tiga pe ina. Buk ke abeʹ un buʹan sepuʹo, ina le ikoʹ ke nepeng nge ʹo.’ ”

Tegoʹ Tau Kelineʹ, Yesus paget ca leto iaʹ utut likut

10Tegoʹ Tau Kelineʹ ca liwai ie, kun Yesus pekatuk dalem ca amin sebayang Yahudi. 11Kidi un ca leto iaʹ ban bali nelasek. Puloʹ aya uman majan ne bali ina naʹ ca penyakit mia, pa ketai ie utut. Nyahut te senteng ke nelit usa ha ne. 12Dalau Yesus taʹan leto ina, penco ho ngelengap pisiu ia: “Cenganak, pesau ne ikoʹ cen penyakit coʹ ne.” 13Kun Yesus napoʹ ujoʹ o neng leto ina. Dalau ina lete ia maget ngan telit usa ha, penco ho pempau Tuhan Allah.

14Un laki bioʹ amin sebayang Yahudi ina buseʹ, moʹ Yesus paget kelunan tegoʹ Tau Kelineʹ. Ina ukoʹ bioʹ dau ue me dulu kina: “Un dalem nem tau tekep le pegayeng. Dalem nem tau dina nai hem nyat aget. Ayen ne tegoʹ Tau Kelineʹ.”

15Un dau Tuhan mipa ia: “Ikem diaʹ ngaloʹ, moʹ abeʹ mung ngkem te iaʹ sau telu sapi ngan keledai hem cen liwang nte, ngan tai ngkin ida nisep sungai tegoʹ Tau Kelineʹ? 16Un sepe ini ca usa anak cen mela Ibrahim, iaʹ Sitan ban lemeka puloʹ aya uman ban majan ne. Salaʹ baʹan ncem tupe buk ke ban pesau cen beka ha tegoʹ Tau Kelineʹ?” 17Mung diaʹ ban peneti neng Yesus kina saʹe tekaʹ de kenahan dau ue. Un sepuʹo dulu diaʹ kadoʹ kina saheʹ diseʹ de taʹan mung puyan peniga iaʹ ia uyan kina.

Ca kata katuk cen luang ampeʹ

(Un te neng Matius 13.31-32; Markus 4.30-32)

18Lepa ina, un dau Yesus: “Inu iaʹ ke kuaʹ neng puyan pengaren Allah ngkang kelunan? Man inu heʹ ke pekata neng idi taʹin? 19Ilu ke pekata ha koʹ baʹan ca luang ampeʹ iaʹ ban ca usa ngkin kaʹ pula ha, ngan mula ha kidi. Nai luang ina mudip ngan dadoʹ, koʹ baʹan ca inan kayu. Senteng pe diseʹ sui ke nyala neng daʹan ne.”

Ca kata katuk cen ala lamut

(Un te neng Matius 13.33)

20Un dau Yesus pelaʹa: “Man inu heʹ ke pekata puyan pengaren Allah? 21Ilu ke pekata ha koʹ baʹan ala lamut are. Kun ca leto pekelet te kedalau napu telu tukaʹ, pa mung nge tai banga kuʹun ne.”

Pamen iaʹ singen

(Un te neng Matius 7.13-14, 21-23)

22Tai Yesus masat cen ca lepoʹ kaʹ ca lepoʹ, ngan singket singket umaʹ, mentung nge pekatuk dalem pengasat te tai kaʹ Yerusalim. 23Un dau ca usa lemutu ia: “Ahaʹ Amai, ke kediʹut le kelunan iaʹ ke un udip dalem Tuhan Allah tupe?”

Un dau Yesus neng ida mung: 24“Un pamen surga singen le. Nengayet ne ikem tai kedalem cen pamen ina. Lan dau heʹ mikem, kadoʹ diaʹ ke ten ketai kedalem me, un sepuʹo abeʹ de senteng. 25Moʹ laki bioʹ dalem amin ina nai beteʹ mekep pamen ne, uʹo ina kenai hem nekejeng tahaʹ awang. Naʹ pe kenuen dau hem ke megoʹ pamen ngan kuma ha: ‘Ahaʹ Amai, mesik pamen mameʹ.’ Un dau ue ke mipa ikem: ‘Abeʹ keʹ tisen ikem aheʹ dina.’ 26Ina le ikem ke mipa kuma ha: ‘Lepa ne ameʹ uman ngan nisep pemung ngan ncoʹ are. Un pe ikoʹ pekatuk kedalem lepoʹ meʹ.’ 27Un dau ue neng ikem laʹa: ‘Abeʹ keʹ tisen ikem aheʹ dina. Kelap ne ikem cen amin nceʹ, mung ngkem diaʹ uyan jaʹat.’ 28Kina te ʹo bang tange ngan dau taret jipen, ikem diaʹ tahaʹ awang. Cen ina hem ke taʹan Ibrahim, Isak, Yakup, ngan mung pegawa dalem puyan pengaren Allah. 29Un diaʹ ke nai cen tahaʹ sek tau, cen tahaʹ tau lenca, cen tahaʹ taʹu asat tau, ngan tahaʹ kabing asat tau, kenai pemung pebulung kedalem puyan pengaren Allah ʹo. 30Ngetisen ncem dau ini, un diaʹ ban bayaʹ naʹkini, ida diaʹ ke ading ʹo. Un diaʹ ban ading naʹkini, ida diaʹ ke bayaʹ dalau ina ʹo.”

Pengelesau Yesus neng lepoʹ Yerusalim

(Un te neng Matius 23.37-39)

31Dalau ina, nai kudaʹ usa Perisi palaʹ Yesus, un dau re: “Tai ne ikoʹ kelap cen ini, moʹ Herudis ubaʹ ke lematai ikoʹ.”

32Un dau Yesus mipa ida: “Tai ne ikem badaʹ me laki panyi ina: ‘Iaʹ lan ne akeʹ ke pet bali, ngan paget dulu tegoʹ tau ini, ngan pabeʹ nempam. Neng iaʹ ketelu tau ue akeʹ ke pelepa gayeng keʹ ʹo.’ 33Atek keʹ ke lemejo asat ceʹ dalem tau ini, ngan nempam, ngan uʹo nempam, uban abeʹ un tekep ca usa pegawa dulu ke lematai tahaʹ awang neng lepoʹ Yerusalim.

34“Yerusalim, siʹau pe ikoʹ Yerusalim, lepoʹ iaʹ lematai pegawa, ngan lemulo batu neng diaʹ Allah cuk nekena ngkin tiraʹ palaʹ ikem. Kudaʹ liwai ne akeʹ ubaʹ tekaʹ ke keluʹung ikem panak mung, koʹ baʹan ca iap tuʹa ke keluʹung anak ke kentaʹ kapit te, un sepuʹo abeʹ kem dayo akeʹ. 35Uʹo ina atek ke lenga amin ncem ʹo. Dau heʹ mikem laʹa, abeʹ kem ke taʹan akeʹ pa hem ke kuma: ‘Allah iaʹ naʹ peniga me ia iaʹ nai dalem ngadan Tuhan.’ ”

Currently Selected:

LUKAS 13: KNT

Highlight

Copy