LUKAS 11

Yesus pekatuk neng puyan temameʹ

(Un te neng Matius 6.9-13; 7.7-11)

1Un ca liwai laʹa, Yesus lemameʹ neng ca ukoʹ o kelemameʹ. Lepa ne ia lemameʹ, nai kun ca usa diaʹ bayaʹ katuk ke. Kun dau ue neng ia: “Tuhan, tiga hoʹ pekatuk ameʹ lemameʹ, koʹ baʹan Yaya pekatuk ida diaʹ bayaʹ katuk ke are.”

2Un dau Yesus neng ida: “Buk kem lemameʹ, pekini dau hem:

Amai,

Tekep meʹ nyelama ngadan ncoʹ iaʹ buheʹ.

Nai ne puyan pengaren ncoʹ ngaren ameʹ kelunan.

3Naʹ mameʹ, singket tau ne, penguman iaʹ sukat ke penguman meʹ.

4Ngan sau ne penyalaʹ meʹ,

moʹ ameʹ sau penyalaʹ mung dulu diaʹ un salaʹ neng ameʹ.

Ngan ayen pedayo ameʹ tai sihoʹ pengeten iaʹ bioʹ.”

5Un dau Yesus neng diaʹ bayaʹ katuk ke laʹa: “Buk le pekata ca usa mikem, iaʹ tai palaʹ amin iaʹ tuyang ngkem dalau beluaʹ alem. Un dau hem neng ia: ‘Tuyang, kudaʹ pe ikoʹ lesau akeʹ ading. Naʹ makeʹ saliu telu badang baha, 6moʹ un ca usa diaʹ malai ngan nceʹ nai nyakai akeʹ uʹo re. Abeʹ un ca inu iaʹ akeʹ cuk ia ke uman.’ ” 7Un dau Yesus: “Masaʹ pe tuyang ngkem iaʹ cen dalem amin ina ke mipa ikem: ‘Ayen pebubo akeʹ. Lepa ne ameʹ malet pamen, ngan anak keʹ de pemung ngan nceʹ kaʹ tilung. Temahat kaʹ keʹ kenai beteʹ kenaʹ inu mikoʹ.’ 8Naʹ pia pekina dau ue, un dau heʹ mikem, inu pe ia abeʹ un nai beteʹ naʹ inu mikoʹ moʹ ban tuman ncoʹ tuyang nge, atek kenai te ia beteʹ kenaʹ mikoʹ, kudaʹ kadoʹ iaʹ ikoʹ ubaʹ, buk koʹ abeʹ un saʹe tesep tesep ke nyat te. 9Lan dau heʹ mikem, nyat ne, ina le ikem ke alaʹ a. Mita ne, ina le ikem ke un ne. Megoʹ ne pamen, ina le pamen ke pesik mikem. 10Moʹ singket singket usa diaʹ nyat, ida lete diaʹ ke alaʹ a. Pekina pe diaʹ mita, ida lete ke un ne. Ngan diaʹ megoʹ pamen, mida lete pamen ke pesik.

11“Amai iaʹ mpi neng ahang ikem, buk anak ke nyat atuk, kun ne naʹ ncung ulai mia? 12Buk anak ke nyat tilo iap, kun ne naʹ lipa busung mia? 13Naʹ pia kenuen jaʹat cem, ina hem mencam naʹ inu iaʹ tiga me anak kem lete. Menco te ne laʹa Amai Bioʹ iaʹ kaʹ surga ke naʹ Berua Buheʹ me diaʹ lemuto ke nyat neng ia.”

Yesus ngan Bali Balsibul

(Un te neng Matius 12.22-30; Markus 3.20-27)

14Kun Yesus sau ca bali ameng neng ca usa laki. Nai bali ina kawang, sulo laki ina mencam pisiu. Tai salam seʹ dulu kina. 15Un sepuʹo dau palai mida kina kuma ha: “Kuʹun Balsibul, iaʹ pengebioʹ toʹ bali ne, ina ukoʹ laki ini sukat sau bali.”

16Un palai laʹa diaʹ ubaʹ uyan ca pengeten me Yesus. Seʹ de cuk ia uyan ca puyan nyingan, apan nte tisen buk Allah ubaʹ ia, pekina kaʹ kimet de. 17Moʹ tisen ne Yesus seʹ kimet de, un dau ue neng ida: “Mele lepoʹ iaʹ mpi pe, buk de tai peselepeʹ kimet ke pepatai neng ahang ida, atek ke salai laho lete lepoʹ ina. Pekina pe neng ca pengamin, buk de tai peselepeʹ kimet neng ahang ida loʹ, atek ke kasing laho re neng pengamin ina. 18Moʹ buk dalem pengaren Sitan, iaʹ pengebioʹ bali, un kudaʹ naʹan mpun bali diaʹ muʹo pepatai neng ahang ida selepeʹ, abeʹ nyatan nte ke un pa majan. Un ikem iaʹ kuma ha ban kuʹun bali Balsibul akeʹ sau bali. 19Buk lan ne pekina puyan ne ban nceʹ sau bali, kumpin puyan ne diaʹ bayaʹ katuk kem didai? Moʹ ban kuʹun penyukat inu re sau bali tupe? Lan ne nyahut de sau bali kuʹun penyukat Balsibul. Cen diaʹ pekina, luhaʹ ban ncem salaʹ. 20Di lareʹ iaʹ lan ne, man penyukat Tuhan Allah heʹ pet bali, ina iaʹ ke peluhaʹ ban puyan pengaren Alah nai palaʹ ikem.

21“Buk ca usa kelunan diaʹ pali, iaʹ lepa petenup ngan gelam pepatai ie ke mengau amin ne, mung inu ue ke lelum tiga lete ʹo. 22Buk nai ca usa diaʹ lapa pali ke nyudup ngan pesupeʹ ia, atek ia ke magang mung senganan pepatai ie, iaʹ ia nebelum cen kena, penco laki iaʹ lapa pali ina ke matu tampan ne.

23“Aheʹ iaʹ abeʹ un ubaʹ ke mayo dau heʹ, iaʹ lan ne ia iaʹ nyakat akeʹ. Ngan aheʹ iaʹ abeʹ un mepo ke kelimpun ngan nceʹ, iaʹ lan ne ia iaʹ lemurat te.”

Kenai bali jaʹat ngeliwet

(Un te neng Matius 12.43-45)

24Un dau Yesus laʹa: “Dalau ketai bali kelap neng ca usa, tai ie masat neng iaʹ lenga ngan megang, mita ukoʹ o ke ngelineʹ. Abeʹ e taʹan ukoʹ o. Un dau ue kata ha tengen: ‘Ubaʹ keʹ tai uleʹ kaʹ amin nceʹ, iaʹ akeʹ lepa mecin idai.’ 25Pekina kenai ie ngeliwet laʹa. Kun ne taʹan amin ina are, lepa buheʹ ngan dengkep seʹ e. 26Uʹo ina tai kun ne alaʹ tujoʹ de bali pit ia, diaʹ pelapa jaʹat neng ia laʹa. Kenai re mudip pemung ngan ne kina. Cen ban puyan nte pekina, un ne puyan kelunan iaʹ ukoʹ tai re ina, kebayaʹ a tai pelapa jaʹat neng ʹo iaʹ cen kena are.”

Iaʹ atek bangen saheʹ

27Uʹo Yesus pekina dau, un ca leto neng ahang diaʹ kadoʹ dina iaʹ bioʹ dau ue pisiu ia, kun ne: “Bangen saheʹ ne leto iaʹ ban nganak ikoʹ, ngan iaʹ iteʹ ikoʹ.”

28Penco dau Yesus mipa: “Abeʹ e pekina, bang diaʹ ngeringa tiraʹ Allah ngan kanan ne, ida le iaʹ ke bangen saheʹ.”

Dulu nyat tedanaʹ nyingan

(Un te neng Matius 12.38-42)

29Kenai dulu diaʹ kadoʹ pedudun kata Yesus, sulo ho pisiu pekini dau ue: “Dulu diaʹ mudip ngajan ini, sematu jaʹat de. Kun nte nyat akeʹ uyan nyingan, tedanaʹ iaʹ ban akeʹ nai cen Allah. Un sepuʹo, abeʹ un tedanaʹ nyingan iaʹ akeʹ peluhaʹ mida, bang tedanaʹ nyingan pegawa Yunus le. 30Koʹ baʹan puyan Yunus ke tenuyan ca tedanaʹ nyingan tai kaʹ lepoʹ Niniwe, pekina lete Anak Sio ini ke nuyan ca tedanaʹ me dulu ngajan ini. 31Tegoʹ Tau Ukum Bioʹ ʹo kenai laja leto cen tanaʹ tahaʹ kabing asat tau, kenai ie beteʹ ke mekem salaʹ me diaʹ mudip ngajan ini. Moʹ nai ie masat cen coʹ, ubaʹ ke ngeringa dau penudi katuk Suliman are. Lan dau heʹ mikem, kaʹ ini un ca iaʹ lapa bioʹ neng ʹo Suliman. 32Tegoʹ Tau Ukum Bioʹ ʹo, kenai lepoʹ Niniwe ke beteʹ ke mekem salaʹ mikem, moʹ cen naʹaʹ ida diaʹ ban nyepuleʹ kimet de cen penyalaʹ de, tegoʹ de kenahan dau Yunus penco katuk. Lan dau heʹ mikem, kaʹ ini un ca iaʹ lapa bioʹ neng ʹo Yunus puʹo.”

Serema me usa le

(Un te neng Matius 5.15; 6.22-23)

33Sulo dau Yesus laʹa: “Abeʹ un aheʹ iaʹ pejiget titiu penco tai nyuhuk ke. Ngan abeʹ pe ia naʹ a kentaʹ ca tukaʹ pe, bang kaʹ usun padung titiu le, idi buk dulu nai kedalem, ida taʹan seʹ dema ha. 34Un mata hem koʹ baʹan titiu neng usa hem. Buk mata hem tiga, ketoʹ usa hem dema. Un sepuʹo buk mata hem jaʹat, ketoʹ usa hem mentem lete puʹo. 35Cen diaʹ pekina, jagaʹ ne tiga le, apan ne are tai pataʹ dema iaʹ kedalem usa hem ne. 36Buk lan ne usa hem sangan kuʹun dema, ngan abeʹ un ca inu iaʹ ke ngentem me, atek ke dema mung usa hem, koʹ baʹan seʹ ca titiu iaʹ ke nyerema ikem.”

Yesus badaʹ dau salaʹ diaʹ Perisi ngan guru Adet Yahudi

(Un te neng Matius 23.1-36; Markus 12.38-40)

37Lepa ne Yesus pisiu, nai kun ca usa Perisi mengin Yesus uman ngan ne. Tai kun Yesus kedalem amin ne, penco madung ngan uman. 38Salam tekaʹ Perisi ina taʹan seʹ Yesus, moʹ abeʹ e muheʹ ujoʹ o bayaʹ seʹ adet Yahudi kena re ke uman. 39Ina ukoʹ Tuhan Yesus pisiu ia: “Ikem Perisi, lan te ikem muheʹ sawan ngan kiut cem, bang seʹ e kawang tuaʹ le, un sepuʹo dalem kimet cem sangan kuʹun puyan iaʹ keti jaʹat mentung menco puyan jaʹat. 40Moʹ inu mabi ngan untau kimet cem? Moʹ abeʹ Allah iaʹ uyan tahaʹ awang, ia te uyan iaʹ tahaʹ dalem pe? 41Di lareʹ mencai ne inu iaʹ un dalem sawan ngan kiut cem me diaʹ taru mudip, ina le ketoʹ o buheʹ neng ikem.

42“Siʹau ne ikem Perisi. Ikem naʹ ca tulat puloʹ penalan ncem me Allah, koʹ baʹan bekai, kuaʹ lia, ngan lesayat, pekina pe kujau diaʹ ca. Abeʹ sepe ikem nyingo puyan teneng me dulu, ngan puyan ncem ke malaʹ Allah. Idi iaʹ tekep ikem ke uyan: mencai lete ca tulat puloʹ penalan ncem, ngan ayen nekeloʹ lingo neng diaʹ ca didai.

43“Siʹau pe ikem Perisi. Ikem diaʹ malaʹ seʹ ke madung neng adan paren kedalem amin sebayang Yahudi, pekina pe ikem ubaʹ dulu ke nyelama ikem kaʹ pasen.

44“Siʹau pe ikem. Un seʹ kem koʹ baʹan ca liang iaʹ are un tedanaʹ a laʹa. Ketai dulu masat, abeʹ de tisen ban tai re cut te.”

45Kun ca guru Adet Yahudi mipa, kun dau ue: “Ahaʹ guru, ban dau tiraʹ koʹ pekina, dau hoʹ pejaʹat ameʹ lete.”

46Un dau Yesus mipa: “Siʹau pe ikem guru Adet Yahudi, moʹ ikem iaʹ ngebahat dulu kuʹun kadoʹ palan adet iaʹ ke pesuʹo neng ida. Un sepuʹo ikem tengen, pabeʹ kem abeʹ un mepo ngan mengkung buaʹ ujoʹ kem kidi pe.

47“Siʹau ne ikem. Ikem iaʹ petubo liang pegawa. Idi ie tepun ncem iaʹ ban lematai ida cen naʹaʹ. 48Cen diaʹ pekina, luhaʹ ban ncem payo ngan tepun ncem. Ida diaʹ lematai pegawa, ngan ikem diaʹ uyan liang mida. 49Ina ukoʹ penudi Allah kuma ha: ‘Akeʹ cuk pegawa ngan lawa heʹ tai palaʹ ida. Ida ke lematai palai ngan nyakit palai mida ʹo.’ 50Moʹ ban pekina, puyan ketoʹ pegawa diaʹ dulu lematai cen tading usun tanaʹ ini are, kelunan diaʹ mudip naʹkini ke sihoʹ ukum me ʹo, suaʹ ban nte lematai pegawa dina are, 51ban cen puyan nte lematai Habil, pabeʹ puyan nte lematai Sakaria iaʹ ida lematai neng ahang padung liwa ngan amin palan iaʹ atek buheʹ. Lan dau heʹ mikem, dulu diaʹ mudip naʹkini iaʹ ke sihoʹ ukum suaʹ ida mung.

52“Siʹau pe ikem guru Adet Yahudi. Ikem diaʹ mampin penyalet iaʹ sukat ke mesik amin penisen me dulu. Ikem tengen pe abeʹ un ubaʹ tai kedalem me. Un dulu diaʹ ten ketai kedalem me, ikem mempeng nte.”

53Lepa ne Yesus nai kawang cen ina, buseʹ laleʹ le diaʹ guru Adet Yahudi ngan Perisi, sulo naten dau re kepaseʹ ngan ne. Kun nte lemutu kadoʹ naʹan puyan neng ia, 54moʹ de ten ke menat isiu ue, apan nte ke tisen badaʹ salaʹ a ʹo.

Currently Selected:

LUKAS 11: KNT

Highlight

Copy