Maˍkuˆ li‸ 10
10
Awˬ miˇ ma hta‸ baˬ ve awˬ lawn Yeˍsuˆ maˍ ve
1Yawˇ oˇ kaˬ lo tawˆ kʼai leh, Yawˇdanˍ gʼuiˬ ma coˇ paˉ lo cawˬ ve Yuˇda‸ mvuhˇmiˬ teˇ tawn lo kʼai leh, chaw awˬ moˍ lonˉ teˇ hpaˍ yawˇ geh kʼaw‸ hpawnˬ la ve yoˬ. Yawˇ awˬ liˇ cawˬ taˍ ve hkʼe, yawˇ yawˇ hui hta‸ maˍ piˇ ve yoˬ.
2Oˇ htaˇ yawˇ hta‸ lawˇ nyi tuˬ, Hpaˍriˍ sehˇ teˇ hpaˍ yawˇ geh laˬ leh, Awˬ hpawˇ teˇ gʼaˇ lehˬ, a shu yawˇ ve awˬ miˇ ma hta‸ baˬ hpeh‸-aw laˇ teh‸, yawˇ hta‸ na nyi ve yoˬ.
3Yawˇ kʼaw‸ kʼoˆ ve, Moˉseˍ nawˬ hui hta‸ tawˇ hkʼaˬ hkʼe piˇ taˍ ve le teh‸, yawˇ hui hta‸ na nyi htaˇ,
4Baˬ da‸ ve li‸ teˇ kʼoˆ bvuh‸ piˇ peuˬ kʼo, awˬ miˇ ma hta‸ baˬ hpeh‸-aw teh‸ Moˉseˍ tawˇ piˇ ve yoˬ teh‸, yawˇ hui kʼaw‸ kʼoˆ piˇ ve yoˬ. #Bon 24:1
5Yeˍsuˆ kʼaw‸ kʼoˆ ve, Nawˬ hui nyi ma heh ve pa taw Moˉseˍ nawˬ hui hta‸ tawˇ chi hkʼe piˇ ve yoˬ. 6Ya‸ hkʼaˇ, hkʼa peu-eˬ hta‸ awˬ hkuiˉ puiˍ te hpanˍ htaˇ ka‸, Gʼuiˬsha lehˬ hawˉ hkʼaˆ leh yaˇ miˇ hta‸ te hpanˍ taˍ ve yoˬ. 7Chi hta‸ pa taw hawˉ hkʼaˆ lehˬ, yawˇ ve awˬ pa awˬ e hta‸ hpaˆ da‸ taˉ leh, 8yawˇ huiˉ maˬ teˇ suhˍ teˇ shaˍ tiˉ hpeh‸ la tuˬ yoˬ. Chi hta‸ pa taw, yawˇ huiˉ maˬ nyiˇ gʼaˇ hpeh‸ ve maˇ heˆ, teˇ gʼaˇ tiˉ hpeh‸ la peuˬ. #Ahkp 2:24 9Hkʼe te leh, Gʼuiˬsha caˉ da‸ piˇ taˍ ve hta‸ chaw yaˇ maˇ gʼa yuˬ hpaˆ da‸ piˇ teh‸ kʼoˆ piˇ ve yoˬ.
10Yehˬ awˬ hkʼaw lo chehˇ taˍ ve teˇ yanˇ, awˬ la‸ gʼawˇ teˇ hpaˍ lehˬ, awˬ lawn oˇ ve yawˇ hta‸ kʼaw‸ na nyi ve yoˬ. 11Oˇ htaˇ yawˇ kʼoˆ ve, A shu yawˇ ve awˬ miˇ ma hta‸ baˬ leh awˬ kaˍ awˬ nu yaˇ miˇ hta‸ ca heuˆ ve chaw hkʼaˬ ve teˇ gʼaˇ maˇ kʼoˆ, haˉ chawˇ haˉ paˆ te ve pa taw, yawˇ ve awˬ miˇ ma hta‸ ya‸ ve yoˬ. 12Yaˇ miˇ htawˇ, a shu yawˇ ve awˬ hpawˇ hta‸ baˬ leh awˬ kaˍ awˬ nu hawˉ hkʼaˆ hta‸ ca heuˆ ve kʼo, haˉ chawˇ haˉ paˆ te ve yoˬ teh‸, yawˇ hui hta‸ kʼoˆ piˇ ve yoˬ.
Yaˇ ehˉ teˇ hpaˍ hta‸ Yeˍsuˆ bon na‸ piˇ ve
13Oˇ htaˇ yaˇ ehˉ teˇ hpaˍ hta‸ Yeˍsuˆ htawˇ piˇ tuˬ, yaˇ ehˉ teˇ hpaˍ hta‸ shu yawˇ geh shiˍ laˬ ve teˇ yanˇ, awˬ la‸ gʼawˇ teˇ hpaˍ lehˬ, shiˍ laˬ ve chaw teˇ hpaˍ hta‸ deˇ ve yoˬ. 14Yeˍsuˆ oˇ ve hta‸ gʼa mawˬ htaˇ nyi ma zuhˆ leh, Yaˇ ehˉ teˇ hpaˍ hta‸ ngaˬ geh laˬ piˇ-oˆ. Yawˇ hui hta‸ taˇ tawˍ taˍ. Awˬ lawn kʼo, Gʼuiˬsha ve mvuhˇmiˬ lehˬ, chaw oˇ hkʼe ve mvuhˇmiˬ hpeh‸ ve yoˬ. 15Ngaˬ nawˬ hui hta‸ awˬ tehˬ awˬ na kʼoˆ laˇ ve, yaˇ ehˉ hkʼa shuˍ shuˍ Gʼuiˬsha ve mvuhˇmiˬ hta‸ maˇ ha‸ yuˬ ve chaw hkʼaˬ ve teˇ gʼaˇ maˇ kʼoˆ, Gʼuiˬsha ve mvuhˇmiˬ awˬ hkʼaw lo maˇ gʼa lo‸-e taˬ teh‸, yawˇ hui hta‸ kʼoˆ piˇ ve yoˬ. 16Oˇ htaˇ, yaˇ ehˉ teˇ hpaˍ hta‸ yawˇ chiˇ taˆ taˍ leh, yawˇ hui awˬ hkʼoˆ la‸ sheh taˍ leh bon na‸ piˇ ve yoˬ.
Hkunˉ te ve paw sha ve chaw haˉ paˍ
17Yawˇ ya‸ kʼaw kʼai chehˇ htaˇ, chaw teˇ gʼaˇ yawˇ geh gʼuiˇ laˬ leh yawˇ mehˆ gʼuˇ suhˍ hkui tcuhˉ teh leh, Da‸ ve Saˍ la‸-oˬ, co ti‸ ha ti‸ gʼa tuˬ ngaˬ hkʼaˬ hkʼe gʼa te tuˬ le teh‸, yawˇ hta‸ na nyi ve yoˬ.
18Yeˍsuˆ kʼaw‸ kʼoˆ ve, Aˬ hto‸ ma pa taw nawˬ ngaˬ hta‸ da‸ ve teh‸ kʼoˆ ve le. Gʼuiˬsha maˇ heˆ kʼo, da‸ ve teˇ gʼaˇ ka‸ maˇ cawˬ. 19Awˬliˇtawˇhkawˇ teˇ hpaˍ hta‸ nawˬ shiˍ ve yoˬ. Chaw hta‸ taˇ tiˇ pehˍ, haˉ chawˇ haˉ paˆ taˇ te, shu ve mawˇ hta‸ taˇ hkʼawˇ, shu hta‸ maˇ heˆ heˆ ve shaˉ hkiˆ taˇ hkanˍ, shu ve mawˇ hta‸ taˇ heˍ yuˬ, nawˬ ve awˬ pa awˬ e hta‸ yawˆ yawˆ yan yan te-o teh‸, yawˇ hta‸ kʼoˆ piˇ ve yoˬ. #Bon 5:16-20
20Chaw oˇ ve lehˬ, Saˍ la‸-oˬ, ngaˬ yaˇ nehˬ hpeh‸ ve teˇ yanˇ htaˇ ka‸ tanˬ leh chi hkʼa peu-eˬ hta‸ ngaˬ na yuˬ leh te peuˬ teh‸ Yeˍsuˆ hta‸ kʼaw‸ kʼoˆ piˇ ve yoˬ.
21Yeˍsuˆ yawˇ hta‸ nyi leh yawˇ hta‸ ha‸ leh, Nawˬ teˇ ceuˬ loˍ sheˍ ve yoˬ. Nawˬ kʼo‸-e leh hkʼa cawˬ ve mawˇ jeˬ hta‸ hawˇ baˬ leh haˍ yaˇ gʼawˇ yaˇ teˇ hpaˍ hta‸ pehˬ piˇ-oˆ. Mvuhˇ naw ma hkʼoˆ lo awˬ hpfuhˇ hkʼaˆ ve mawˇ nawˬ cawˬ taˍ tuˬ yoˬ. Peuˬ leh, nawˬ kʼaw‸ laˬ leh ngaˬ hkʼaˇ suh laˬ-o‸ teh‸ yawˇ hta‸ kʼoˆ piˇ ve yoˬ. 22Tawˇ hkawˇ chi ve hta‸ yawˇ gʼa kaˇ htaˇ, mehˆ hpfuhˇ nawˍ lehˍ te leh, dawˇ haˍ jaˇ leh kʼo‸-e ve yoˬ. Awˬ lawn kʼo, yawˇ mawˇ jeˬ cawˬ maˇ jaˇ ve yoˬ.
23Yeˍsuˆ lehˬ, yawˇ ve awˬ la‸ gʼawˇ hui hta‸ caw nyi leh kʼoˆ ve, Paw sha ve chaw hui lehˬ, Gʼuiˬsha ve mvuhˇmiˬ awˬ hkʼaw lo lo‸-e tuˬ hkʼaˬ ma haˍ jaˇ ve le.
24Awˬ la‸ gʼawˇ teˇ hpaˍ lehˬ, yawˇ kʼoˆ ve tawˇ hkawˇ hta‸ gʼa kaˇ htaˇ anˇ jaˇ ve yoˬ. Teˇ pawˆ Yeˍsuˆ yawˇ hui hta‸ kʼoˆ piˇ ve, Ngaˬ yaˇ teˇ hpaˍ-oˬ, Gʼuiˬsha ve mvuhˇmiˬ awˬ hkʼaw lo lo‸-e tuˬ hkʼaˬ ma haˍ jaˇ ve le. 25Kaˍ laˍ oˆ teˇ hkeh gʼo‸ naˍ hkʼawˇ awˬ hkʼaw lo‸-e tuˬ ve lehˬ, paw sha ve chaw teˇ gʼaˇ Gʼuiˬsha ve mvuhˇmiˬ awˬ hkʼaw lo lo‸-e tuˬ ve a‸ kehˉ sha ve yoˬ teh‸ kʼoˆ piˇ ve yoˬ.
26Yawˇ hui leuˉ leh anˇ jaˇ leh, Hkʼe te kʼo, htaiˍ hkʼaw‸ ve hta‸ a shu gʼa hpeh‸ tuˬ le teh‸ yawˇ hta‸ kʼoˆ piˇ ve yoˬ.
27Yeˍsuˆ yawˇ hui hta‸ nyi leh, Chaw yaˇ lehˬ chi hta‸ te maˇ gʼa. Ya‸ hkʼaˇ, Gʼuiˬsha te maˇ gʼa ve maˇ heˆ. Awˬ lawn kʼo, Gʼuiˬsha lehˬ hkʼa peu-eˬ hta‸ te gʼa ve yoˬ teh‸, yawˇ hui hta‸ kʼoˆ piˇ ve yoˬ.
28Oˇ htaˇ Peˍtruˆ kʼoˆ ve, Ngaˬ hui lehˬ hkʼa peu-eˬ hta‸ baˬ taˉ leh nawˬ awˬ hkʼaˇ suh laˬ peuˬ teh‸ yawˇ hta‸ kʼoˆ piˇ ve yoˬ.
29Yeˍsuˆ kʼoˆ ve, Ngaˬ nawˬ hui hta‸ awˬ tehˬ awˬ na kʼoˆ laˇ ve, ngaˬ awˬ pon leh ha lehˬ ve bon hkawˇ awˬ pon, a shu yawˇ ve yehˬ, a shu yawˇ ve awˬ viˉ awˬ nyi, a shu yawˇ ve awˬ pa awˬ e, a shu yawˇ ve awˬ yaˇ awˬ duˬ leh a shu yawˇ ve ti mi teˇ hpaˍ hta‸ baˬ taˉ ve chaw hkʼaˬ ve teˇ gʼaˇ maˇ kʼoˆ, 30chi teˇ ca‸ na‸ awˬ hkʼaw lo yehˬ, awˬ viˉ awˬ nyi, awˬ e, awˬ yaˇ awˬ duˬ leh ti mi teˇ hpaˍ hta‸ teˇ ha pun gʼa ve yoˬ. Chi teˇ hpaˍ geh teˇ geh tu‸ ve hkanˍ ve hta‸ htawˇ gʼa ve yoˬ. Awˬ hkʼaw‸ nawˉ teˇ ca‸ na‸ awˬ hkʼaw lo co ti‸ ha ti‸ hta‸ htawˇ gʼa ve yoˬ. 31Ya‸ hkʼaˇ, shu awˬ gʼuˇ suhˍ chehˇ ve chaw maˇ maˇ, shu awˬ hkʼaw‸ nawˉ gʼa kʼaw‸ chehˇ tuˬ yoˬ. Shu awˬ hkʼaw‸ nawˉ chehˇ ve chaw maˇ maˇ, shu awˬ gʼuˇ suhˍ gʼa kʼaw‸ chehˇ tuˬ yoˬ teh‸ kʼoˆ piˇ ve yoˬ.
Yeˍsuˆ yawˇ gʼa suh tuˬ ve awˬ lawn teˇ pawˆ kʼaw‸ hto piˇ ve
32Oˇ ve awˬ hkʼaw‸ nawˉ, yawˇ hui Yeˍruˆsaˍlehnˍ venˇ lo kʼai chehˇ htaˇ, ya‸ kʼaw kʼaˉ lo Yeˍsuˆ lehˬ yawˇ hui awˬ gʼuˇ suhˍ kʼai ve yoˬ. Yawˇ hui anˇ jaˇ leh, yawˇ hui awˬ hkʼaˇ suh kʼai ve chaw teˇ hpaˍ htawˇ kawˆ ve yoˬ. Oˇ htaˇ tcuh yaˇ teˇ chi nyiˇ gʼaˇ hta‸ yawˇ kʼaw‸ kuˬ yuˬ leh, yawˇ hkʼaˬ hkʼe gʼa hkanˍ tuˬ ve awˬ lawn teˇ hpaˍ yawˇ hui hta‸ hto piˇ ve, 33Ngaˬ hui Yeˍruˆsaˍlehnˍ venˇ lo kʼai chehˇ ve yoˬ. Chaw yaˇ ve Yaˇ hpu lehˬ, paw hkuˇ lonˉ hui leh li‸ bvuh‸ paˍ hui ve la‸ sheh awˬ hkʼaw lo chiˇ a‸ ve hta‸ gʼa hkanˍ tuˬ yoˬ. Yawˇ gʼa suh tuˬ ve yawˇ hui yawˇ hta‸ suhˉ taˆ leh, buiˇshaˆaˉnaˆ chaw hui ve la‸ sheh awˬ hkʼaw lo chiˇ a‸ piˇ tuˬ yoˬ. 34Yawˇ hui yawˇ hta‸ maˇ shawˍ maˇ caˆ te leh, ciˉ gʼuiˇ hpe‸ pfuhˍ leh, yawˇ hta‸ jaw‸ peuˬ hkʼaw‸ nawˉ yawˇ hta‸ tiˇ pehˍ tuˬ yoˬ. Peuˬ leh shehˆ nyi teˇ nyi gaˬ kʼo, yawˇ kʼaw‸ te‸ tu la tuˬ yoˬ teh‸ kʼoˆ ve yoˬ.
Yaˍkoˆ leh Yoˇhanˬ daˬ ve mui kuiˬ hta‸ lawˬ ve
35Oˇ htaˇ, Zeˍbeˍdehˇ ve awˬ yaˇ paˍ Yaˍkoˆ leh Yoˇhanˬ yawˇ geh laˬ leh, Saˍ la‸-oˬ, ngaˬ huiˉ maˬ lawˬ ve hkʼe nawˬ te laˇ tuˬ ngaˬ huiˉ maˬ heuˆ gaˇ ve yoˬ teh‸ yawˇ hta‸ kʼoˆ piˇ ve yoˬ.
36Yawˇ lehˬ, Nawˬ huiˉ maˬ awˬ pon ngaˬ hta‸ aˬ hto‸ ma te tcuh laˇ gaˇ ve le teh‸, yawˇ huiˉ maˬ hta‸ kʼoˆ piˇ ve yoˬ.
37Yawˇ huiˉ maˬ lehˬ, Nawˬ awˬ me‸ awˬ hponˇ gʼa htaˇ, nawˬ la‸ sha paˉ teˇ gʼaˇ, la‸ mehˍ paˉ teˇ gʼaˇ, ngaˬ huiˉ maˬ hta‸ mui tcuh laˇ-oˆ teh‸, yawˇ hta‸ kʼoˆ piˇ ve yoˬ.
38Yeˍsuˆ kʼoˆ ve, Nawˬ huiˉ maˬ aˬ hto‸ ma hta‸ lawˬ ve, nawˬ huiˉ maˬ maˇ shiˍ. Ngaˬ dawˬ ve kawˆ hta‸ nawˬ huiˉ maˬ dawˬ hpeh‸-aw laˇ. Ngaˬ hkanˍ ve baˆtiˆsaˬ hta‸ nawˬ huiˉ maˬ hkanˍ hpeh‸-aw laˇ teh‸, yawˇ huiˉ maˬ hta‸ kʼoˆ piˇ ve yoˬ.
39Hkanˍ hpeh‸ ve yoˬ teh‸, yawˇ huiˉ maˬ kʼaw‸ kʼoˆ piˇ ve teˇ yanˇ, Yeˍsuˆ kʼaw‸ kʼoˆ ve, Ngaˬ dawˬ ve kawˆ hta‸ nawˬ huiˉ maˬ gʼa dawˬ tuˬ yoˬ. Ngaˬ hkanˍ ve baˆtiˆsaˬ hta‸ nawˬ huiˉ maˬ gʼa hkanˍ tuˬ yoˬ. 40Ya‸ hkʼaˇ, ngaˬ ve la‸ sha paˉ la‸ mehˍ paˉ gʼa mui tuˬ, ngaˬ pe‸ laˇ maˇ hpeh‸. Yawˇ hui awˬ pon gu taˍ piˇ ve chaw teˇ hpaˍ ceh tiˉ oˇ kaˬ lo gʼa mui ve yoˬ teh‸, yawˇ huiˉ maˬ hta‸ kʼoˆ piˇ ve yoˬ.
41Awˬ lawn chi hta‸ awˬ kaˍ awˬ nu tcuh yaˇ teˇ chi gʼaˇ gʼa kaˇ htaˇ, Yaˍkoˆ leh Yoˇhanˬ hta‸ yawˇ hui nyi ma zuhˆ ve yoˬ. 42Oˇ htaˇ, Yeˍsuˆ yawˇ hui hta‸ kuˬ yuˬ leh kʼoˆ piˇ ve, Buiˇ shaˆ aˉ naˆ chaw hui awˬ hkʼoˆ hta‸ jawˇmawˇ te tuˬ aˉ yaˇ gʼa ve chaw teˇ hpaˍ lehˬ, yawˇ hui hta‸ uˉ peunˍ leh, yawˇ hui ve chaw uiˍ teˇ hpaˍ lehˬ, yawˇ hui hta‸ nyiˉ te ve hta‸ nawˬ hui shiˍ ve yoˬ. 43Ya‸ hkʼaˇ, nawˬ hui awˬ hkʼaw lo chi hkʼe maˇ gʼa te. Nawˬ hui awˬ hkʼaw lo chaw uiˍ hpeh‸ gaˇ ve chaw hkʼaˬ ve teˇ gʼaˇ maˇ kʼoˆ, yawˇ nawˬ hui ve awˬ ceˬ gʼa te ve yoˬ. 44Nawˬ hui awˬ hkʼaw lo awˬ hoˉ te gaˇ ve chaw hkʼaˬ ve teˇ gʼaˇ maˇ kʼoˆ, hkʼa peu-eˬ awˬ pon yawˇ lehˬ vuiˬ taˍ ve awˬ ceˬ gʼa hpeh‸ ve yoˬ. 45Awˬ lawn kʼo, chaw yaˇ ve Yaˇ hpu lehˬ, shu yawˇ awˬ pon kanˉ te tuˬ laˬ ve maˇ heˆ. Yawˇ shu awˬ pon kanˉ te tuˬ laˬ leh, chaw maˇ maˇ hta‸ htaiˍ hkʼaw‸ tuˬ, yawˇ ve a sha‸ piˇ tuˬ awˬ pon laˬ ve yoˬ teh‸ kʼoˆ ve yoˬ.
Baˍtiˆmehˇ meh ve mehˆ cuˉ paˍ mehˆ kʼaw‸ mawˬ la ve
46Oˇ htaˇ, yawˇ hui Yeˍriˆhkoˇ venˇ lo gaˬ la ve yoˬ. Yeˍsuˆ lehˬ, yawˇ ve awˬ la‸ gʼawˇ hui leh chaw awˬ moˍ lonˉ geh Yeˍriˆhkoˇ venˇ awˬ hkʼaw lo tawˆ kʼai chehˇ ve teˇ yanˇ, Tiˆmehˇ ve yaˇ paˍ Baˍtiˆmehˇ meh ve mehˆ cuˉ ve lawˬ leh‸ paˍ teˇ gʼaˇ ya‸ kʼaw paˇ lo mui chehˇ ve yoˬ. 47Naˍzaˍrehˆ chaw Yeˍsuˆ yoˬ teh‸, yawˇ gʼa kaˇ htaˇ yawˇ kʼoˆ ve, Daˍviˆ ve Yaˇ hpu Yeˍsuˆ-oˬ, ngaˬ hta‸ ha kʼaˉ laˇ-oˆ teh‸ kuˬ ve yoˬ.
48Chaw laiˉ gʼaˇ lehˬ, Ta‸ iˉ chehˇ-oˆ teh‸ yawˇ hta‸ deˇ piˇ ve htawˇ, yawˇ lehˬ, Daˍviˆ ve Yaˇ hpu-oˬ, ngaˬ hta‸ ha kʼaˉ laˇ-oˆ teh‸, leuˉ leh gʼaˇ hte‸ kʼaw‸ kuˬ ve yoˬ.
49Yeˍsuˆ huˉ taˍ leh, Yawˇ hta‸ kuˬ laˬ-o‸ teh‸ kʼoˆ piˇ ve yoˬ.
Yawˇ hui mehˆ cuˉ paˍ oˇ ve hta‸ kuˬ leh, Ha lehˬ chehˇ-oˆ. Tu loˬ. Yawˇ nawˬ hta‸ kuˬ chehˇ ve yoˬ teh‸ kʼoˆ piˇ ve yoˬ. 50Chaw oˇ ve lehˬ, yawˇ ve aˉ po‸ zuhˬ ma hta‸ kʼehˆ teh taˉ leh, pawˆ tu leh Yeˍsuˆ geh laˬ ve yoˬ.
51Oˇ htaˇ, Yeˍsuˆ yawˇ hta‸ kʼoˆ piˇ ve, Nawˬ awˬ pon ngaˬ hta‸ aˬ hto‸ ma te tcuh laˇ gaˇ ve le teh‸ na nyi htaˇ, Jawˇmawˇ-oˬ, ngaˬ mehˆ mawˬ la tuˬ nawˬ hta‸ te tcuh laˇ gaˇ ve yoˬ teh‸, yawˇ hta‸ kʼaw‸ kʼoˆ piˇ ve yoˬ.
52Yeˍsuˆ lehˬ, Kʼai loˬ. Nawˬ yonˍ ve teˇ ceuˬ lehˬ nawˬ hta‸ na-e la piˇ peuˬ teh‸, yawˇ hta‸ kʼoˆ piˇ ve yoˬ.
Chaw oˇ ve teˇ cawˬ haˉ mehˆ mawˬ la leh Yeˍsuˆ awˬ hkʼaˇ suh kʼai ve yoˬ.
Currently Selected:
Maˍkuˆ li‸ 10: LHBE
Highlight
Share
Copy
Want to have your highlights saved across all your devices? Sign up or sign in
Lahu Bible Edited © Thailand Bible Society and Bible Society of Myanmar, 2010, 2020.
