Maˍkuˆ li‸ 11

Piˉ laˬ ehˉ hta‸ ciˇ leh Yeˍruˆsaˍlehnˍ venˇ hkʼaw lo‸-e ve

1Yawˇ hui lehˬ, Yeˍruˆsaˍlehnˍ venˇ awˬ paˇ lo, Shaˍlonˍ hkʼaw hta‸ neˇ ve Behˆhpaˍgeˍ hkʼaˆ leh Beˍtaˍniˆ hkʼaˆ lo gaˬ la ve teˇ yanˇ, yawˇ ve awˬ la‸ gʼawˇ nyiˇ gʼaˇ hta‸ kʼai tcuh leh kʼoˆ ve, 2Nawˬ huiˉ maˬ awˬ gʼuˇ suhˍ lo cawˬ ve hkʼaˆ hkʼaw lo kʼai-o. Oˇ kaˬ lo lo‸-e ve teˇ yanˇ, chaw teˇ gʼaˇ ka‸ maˇ ciˇ jaw sheˍ ve piˉ laˬ ehˉ hpeh taˍ ve hta‸ nawˬ huiˉ maˬ teˇ cawˬ haˉ gʼa mawˬ tuˬ yoˬ. 3Hpui leh sheh veu laˇ-oˆ. Nawˬ huiˉ maˬ aˬ hto‸ ma pa taw chi hkʼe te ve le teh‸ chaw teˇ gʼaˇ gʼaˇ na nyi laˇ ve kʼo, Jawˇmawˇ loˍ leh yawˇ teˇ cawˬ haˉ kʼaw‸ hkʼaw‸ veu laˇ tuˬ yoˬ teh‸ kʼoˆ piˇ-oˆ teh‸, yawˇ huiˉ maˬ hta‸ kʼoˆ piˇ ve yoˬ.

4Yawˇ huiˉ maˬ kʼai leh, yehˬ miˉ awˬ baˬ ya‸ kʼaw hpuiˇ lo piˉ laˬ ehˉ hpeh taˍ ve hta‸ gʼa mawˬ htaˇ, piˉ laˬ ehˉ oˇ ve hta‸ hpui ve yoˬ. 5Oˇ kaˬ lo huˉ chehˇ ve chaw teˇ hpaˍ hpaˍ lehˬ, Nawˬ huiˉ maˬ aˬ hto‸ ma pa taw piˉ laˬ ehˉ hta‸ hpui ve le teh‸ yawˇ huiˉ maˬ hta‸ kʼoˆ piˇ ve yoˬ.

6Yeˍsuˆ yawˇ huiˉ maˬ hta‸ kʼoˆ piˇ taˍ ve hkʼe yawˇ huiˉ maˬ kʼaw‸ kʼoˆ piˇ ve teˇ yanˇ, yawˇ hui a hkaw-anˬ piˇ ve yoˬ. 7Oˇ htaˇ yawˇ huiˉ maˬ piˉ laˬ ehˉ oˇ ve hta‸ Yeˍsuˆ geh sheh veu laˇ leh, piˉ laˬ ehˉ awˬ hkʼoˆ hta‸ yawˇ hui ve veu‸ kʼaˇ hkʼawˇ piˇ peuˬ hkʼaw‸ nawˉ Yeˍsuˆ taˆ ciˇ ve yoˬ. 8Chaw maˇ maˇ a shu yawˇ ve veu‸ kʼaˇ hta‸ ya‸ kʼaw hpuiˇ lo hkʼawˇ piˇ leh, teˇ hpaˍ hpaˍ heh jaˇ lo suhˆ hpa‸ chaw leh ya‸ kʼaw hpuiˇ lo hkʼawˇ piˇ ve yoˬ. 9Yawˇ awˬ gʼuˇ suhˍ leh awˬ hkʼaw‸ nawˉ kʼai ve chaw teˇ hpaˍ kuˬ leh kʼoˆ ve, Hoˍsaˍnaˍ, Jawˇmawˇ Gʼuiˬsha ve awˬ meh awˬ hawˉ lo laˬ ve chaw lehˬ, awˬ bon uiˍ piˇ-oˆ. #11:9 Hoˍsaˍnaˍ teh‸ k’oˆ ve tawˇ teˇ hkawˇ leh, Heˍbrehˇ hkawˇ hpeh‸ ve yoˬ. Tcuhˉ kuiˬ lehˬ, Chi beu‸ Htaiˍ hk’aw laˇ-oˆ teh‸ k’oˆ ve yoˬ. 10Laˬ chehˇ ve ngaˬ hui ve awˬ pa Daˍviˆ ve mvuhˇmiˬ lehˬ, awˬ bon uiˍ piˇ-oˆ. Mvuhˇ naw ma lo htawˇ Hoˍsaˍnaˍ hpeh‸ piˇ-oˆ teh‸, yawˇ hui kʼoˆ ve yoˬ.

11Oˇ htaˇ, yawˇ Yeˍruˆsaˍlehnˍ venˇ awˬ hkʼaw lo lo‸-e leh bon yehˬ lonˉ awˬ hkʼaw lo kʼai ve yoˬ. Teˇ ceuˬ le le hta‸ yawˇ caw nyi peuˬ hkʼaw‸ nawˉ, mvuhˇ hpeu‸ la ve pa taw tcuh yaˇ teˇ chi nyiˇ gʼaˇ yawˇ geh teˇ geh Beˍtaˍniˆ hkʼaˆ lo kʼai ve yoˬ.

Maˉ nawˆ cehˬ hta‸ hkeu piˇ ve

12Mvuhˇ htiˇ la leh, Beˍtaˍniˆ hkʼaˆ hkʼaw lo yawˇ hui tawˆ la ve teˇ yanˇ, yawˇ awˍ meu‸ ve yoˬ. 13Hkʼe te leh yawˇ vuiˇ kuiˬ lo chehˇ htaˇ ka‸ awˬ hpa‸ cawˬ ve maˉ nawˆ cehˬ teˇ cehˬ hta‸ gʼa mawˬ leh, awˬ cehˬ oˇ ve awˬ shiˍ naw‸ leh naˍ maˇ naw‸ leh naˍ, gʼa mawˬ tuˬ yawˇ ca nyi ve yoˬ. Awˬ paˇ lo yawˇ gaˬ ve teˇ yanˇ, awˬ shiˍ naw‸ ve awˬ yanˇ maˇ heˆ ve pa taw, awˬ hpa‸ hta‸ ceh tiˉ yawˇ gʼa mawˬ ve yoˬ. 14Oˇ htaˇ Yeˍsuˆ lehˬ, Ya‸ nyi hkʼaw‸ nawˉ kʼo, nawˬ ve awˬ shiˍ hta‸ a shu ka‸ taˇ gʼa caˇ piˇ teh‸, maˉ nawˆ cehˬ hta‸ kʼoˆ piˇ ve yoˬ.

Yawˇ oˇ hkʼe kʼoˆ ve hta‸ yawˇ ve awˬ la‸ gʼawˇ teˇ hpaˍ gʼa kaˇ ve yoˬ.

Bon yehˬ lonˉ hta‸ da‸ piˇ kehˬ piˇ ve

15Oˇ htaˇ yawˇ hui Yeˍruˆsaˍlehnˍ venˇ lo gaˬ ve yoˬ. Yawˇ bon yehˬ lonˉ awˬ hkʼaw lo‸-e leh, bon yehˬ lonˉ awˬ hkʼaw lo mawˇ vuiˬ mawˇ hawˇ ve chaw teˇ hpaˍ hta‸ gʼa‸ kʼoˬ leh, hpu pa shehˍ hpaˇ hui ve hpui lawˇ teˇ hpaˍ hta‸ maˇ kʼoˆ, aˉ pui kʼaˍ hawˇ shehˍ hpaˇ hui ve mui hkʼawˇ teˇ hpaˍ hta‸ maˇ kʼoˆ, yawˇ hpfuhˆ baˬ ve yoˬ. 16Mawˇ teˇ ceuˬ ceuˬ yuˬ leh bon yehˬ lonˉ oˇ ve hta‸ hpanˍ kʼai tuˬ, chaw teˇ gʼaˇ hta‸ ka‸ yawˇ a hkaw-anˬ maˇ piˇ. 17Yawˇ yawˇ hui hta‸ maˍ piˇ ve, Ngaˬ ve yehˬ hta‸ chaw teˇ ceuˬ le le awˬ pon bon lawˬ kuiˬ yehˬ gʼa kʼoˆ tuˬ yoˬ teh‸ bvuh‸ taˍ ve htawˇ, nawˬ hui lehˬ, yehˬ chi hta‸ chaw hkʼawˇ chehˇ kuiˬ hpeh‸ la piˇ peuˬ teh‸ kʼoˆ ve yoˬ. #Isy 56:7, Yrm 7:11

18Paw hkuˇ lonˉ teˇ hpaˍ leh li‸ bvuh‸ paˍ teˇ hpaˍ tawˇ hkawˇ oˇ ve hta‸ gʼa kaˇ htaˇ, yawˇ hta‸ tiˇ pehˍ tuˬ awˬ hkʼaˇ ca ve yoˬ. Awˬ lawn kʼo, chaw hkʼa peu-eˬ yawˇ maˍ piˇ ve hta‸ anˇ jaˇ ve pa taw, paw hkuˇ lonˉ hui leh li‸ bvuh‸ paˍ teˇ hpaˍ yawˇ hta‸ kawˆ ve yoˬ.

19Mvuhˇ hpeu‸ la ve teˇ yanˇ yawˇ hui venˇ awˬ baˬ lo tawˆ kʼai ve yoˬ.

Maˉ nawˆ cehˬ nawˍ kʼai goˇ kʼai ve hta‸ gʼa mawˬ ve

20Awˬ hkʼaw‸ nawˉ teˇ shawˉ yawˇ hui ya‸ kʼaw oˇ ve hta‸ kʼaw‸ kʼai htaˇ, maˉ nawˆ cehˬ oˇ ve lehˬ, awˬ geu hkʼa gaˬ nawˍ kʼai goˇ kʼai ve hta‸ yawˇ hui gʼa mawˬ ve yoˬ. 21Oˇ htaˇ Peˍtruˆ dawˇ nawˇ la leh, Jawˇmawˇ-oˬ, nyi sheˍ. Nawˬ hkeu piˇ taˉ ve maˉ nawˆ cehˬ lehˬ, nawˍ kʼai goˇ kʼai peuˬ law leˇ teh‸, yawˇ hta‸ kʼoˆ piˇ ve yoˬ.

22Yeˍsuˆ yawˇ hui hta‸ kʼaw‸ kʼoˆ piˇ ve, Gʼuiˬsha hta‸ yonˍ loˬ. 23Ngaˬ nawˬ hui hta‸ awˬ teh‸ awˬ na kʼoˆ laˇ ve, chaw hkʼaˬ ve teˇ gʼaˇ maˇ kʼoˆ, yawˇ kʼoˆ ve hkʼe hpeh‸ la tuˬ yoˬ teh‸ yonˍ leh, nyi ma htawˇdawˇnawˬdawˇ maˇ te ve kʼo, hkʼaw chi teˇ shiˍhta‸, Jiˆ tawˆ-e leh laˇ tsuhˇ gʼuiˬ awˬ hkʼaw lo ca ce lo‸-e loˬ teh‸ kʼoˆ ve teˇ yanˇ, yawˇ awˬ pon hpeh‸ la tuˬ yoˬ. 24Hkʼe te leh, ngaˬ nawˬ hui hta‸ kʼoˆ laˇ ve, nawˬ hui bon lawˬ ve awˬ hkʼaw lo hkʼa lawˬ ve hkʼa peu-eˬ hta‸ gʼa tuˬ yoˬ teh‸ yonˍ loˬ. Oˇ hkʼe yonˍ ve kʼo, nawˬ hui gʼa tuˬ yoˬ. 25Nawˬ hui huˉ taˍ leh bon lawˬ chehˇ ve teˇ yanˇ, chaw teˇ gʼaˇ gʼaˇ awˬ hkʼoˆ hta‸ nawˬ venˇbaˆ taˍ ve kʼo, venˇbaˆ oˇ ve hta‸ hpehˇ hkʼa-o. Oˇ hkʼe te ve kʼo, mvuhˇ naw ma hkʼoˆ chehˇ ve nawˬ hui ve Awˬ pa lehˬ, nawˬ hui ve venˇbaˆ hta‸ htawˇ hpehˇ hkʼa laˇ tuˬ yoˬ teh‸ kʼoˆ ve yoˬ.#11:25 Li‸ hpu teˇ hpaˍ hpaˍ awˬ hkʼaw lo ka nanˉ ehˉ chi teˇ maˬ cawˬ ve yoˬ. -26 Nawˬ hui lehˬ shu ve venˇbaˆ hta‸ maˇ hpehˇ piˇ ve kʼo, mvuhˇ naw ma hkʼoˆ chehˇ ve nawˬ hui ve Awˬ pa htawˇ nawˬ hui ve venˇbaˆ hta‸ maˇ hpehˇ laˇ.

Yeˍsuˆ kanˇ paˆ gʼa ve awˬ lawn shu yawˇ hta‸ na nyi ve

27Yawˇ hui Yeˍruˆsaˍlehnˍ venˇ lo teˇ pawˆ kʼaw‸ gaˬ la ve yoˬ. Yawˇ bon yehˬ lonˉ awˬ hkʼaw lo toˇ kʼai chehˇ ve teˇ yanˇ, paw hkuˇ lonˉ teˇ hpaˍ, li‸ bvuh‸ paˍ teˇ hpaˍ leh awˬ hoˉ chaw mawˇ teˇ hpaˍ yawˇ geh laˬ leh kʼoˆ ve, 28Nawˬ hkʼaˬ hkʼe ve kanˇ paˆ gʼa leh chi teˇ hpaˍ hta‸ te ve le. Kanˇ paˆ chi a shu nawˬ hta‸ pe‸ laˇ ve le teh‸ yawˇ hta‸ na nyi ve yoˬ.

29Yeˍsuˆ kʼaw‸ kʼoˆ piˇ ve, Ngaˬ htawˇ nawˬ hui hta‸ tawˇ teˇ hkawˇ na nyi shaˍ. Nawˬ hui yaw hkʼaw‸ laˇ ve kʼo, ngaˬ hkʼaˬ hkʼe ve kanˇ paˆ gʼa leh chi teˇ hpaˍ hta‸ te ve awˬ lawn nawˬ hui hta‸ hto laˇ tuˬ yoˬ. 30Yoˇhanˬ yawˇ baˆtiˆsaˬ piˇ ve teˇ ceuˬ lehˬ, mvuhˇ naw ma lo gʼa ve laˇ, maˇ heˆ kʼo chaw yaˇ hui geh lo gʼa ve laˇ. Ngaˬ hta‸ kʼaw‸ hto laˇ-oˆ teh‸, yawˇ hui hta‸ kʼoˆ piˇ ve yoˬ.

31Yawˇ hui teˇ gʼaˇ leh teˇ gʼaˇ jehˬ da‸ leh kʼoˆ ve, Mvuhˇ naw ma lo gʼa ve teh‸ ngaˬ hui kʼoˆ ve kʼo, Hkʼe te leh, nawˬ hui aˬ hto‸ ma te yawˇ hta‸ maˇ yonˍ ve le teh‸, yawˇ ngaˬ hui hta‸ kʼaw‸ kʼoˆ laˇ tuˬ yoˬ. 32Ya‸ hkʼaˇ, chaw yaˇ hui geh gʼa ve teh‸ kʼoˆ ve kʼo, maˇ hpeh‸ teh‸ yawˇ hui kʼoˆ da‸ ve yoˬ. Awˬ lawn kʼo, Yoˇhanˬ lehˬ Gʼuiˬsha ve tcuh kaˍ paˍ hpeh‸ ve yoˬ teh‸, chaw hkʼa peu-eˬ shawˍ taˍ ve pa taw, chaw chi ma ve hta‸ yawˇ hui kawˆ ve yoˬ. 33Hkʼe te leh, Ngaˬ hui maˇ shiˍ teh‸, yawˇ hui Yeˍsuˆ hta‸ kʼaw‸ kʼoˆ piˇ ve yoˬ.

Yeˍsuˆ htawˇ, Chi hkʼa shuˍ shuˍ ngaˬ hkʼaˬ hkʼe ve kanˇ paˆ gʼa leh chi teˇ hpaˍ hta‸ te ve, ngaˬ nawˬ hui hta‸ maˇ hto laˇ teh‸, yawˇ hui hta‸ kʼaw‸ kʼoˆ piˇ ve yoˬ.

Currently Selected:

Maˍkuˆ li‸ 11: LHBE

Highlight

Copy