Luˉka‸ li‸ 9
9
Tcuh yaˇ teˇ chi nyiˇ gʼaˇ hta‸ kʼai tcuh ve
1Oˇ ve hkʼaw‸ nawˉ, tcuh yaˇ teˇ chi nyiˇ gʼaˇ hta‸ yawˇ kuˬ yuˬ leh, neˇ hkʼa peu-eˬ hta‸ gʼaˇ tuˬ maˇ kʼoˆ, naˬ ve gawˬ ve teˇ hpaˍ hta‸ gu na-e piˇ tuˬ maˇ kʼoˆ, yawˇ hui hta‸ kanˇ paˆ piˇ ve yoˬ. 2Gʼuiˬsha ve mvuhˇmiˬ awˬ lawn maˍ piˇ tuˬ maˇ kʼoˆ, chaw naˬ hta‸ gu na-e piˇ tuˬ maˇ kʼoˆ, yawˇ yawˇ hui hta‸ kʼai tcuh ve yoˬ. 3Yawˇ kʼoˆ ve, Ya‸ kʼaw kʼaˉ awˬ pon te‸ chiˉ taˇ yuˬ kʼai. Juˇ fuiˍ, miˉ chaw, hkaoˍmonˇ leh hpu taˇ yuˬ kʼai. 4Yehˬ hkʼaˬ ve teˇ yehˬ awˬ hkʼaw lo nawˬ hui lo‸-e ve maˇ kʼoˆ, venˇ oˇ ve awˬ hkʼaw lo maˇ tawˆ kʼai sheˍ ve ceh ceh, yehˬ oˇ ve awˬ hkʼaw lo chehˇ taˍ-o‸. 5Venˇ oˇ ve awˬ hkʼaw lo nawˬ hui tawˆ kʼai ve teˇ yanˇ, nawˬ hui hta‸ maˇ ha‸ yuˬ ve chaw hui ve awˬ lawn shu hta‸ shaˉ hkiˆ te maˍ piˇ tuˬ, hkui taw kʼaw hta‸ ngawˉ taˍ ve je‸ meu-e hta‸ hpi baˬ taˉ-oˆ teh‸ kʼoˆ piˇ ve yoˬ.
6Hkʼe te leh yawˇ hui tawˆ kʼai leh, teˇ hkʼaˆ peuˬ teˇ hkʼaˆ lo ha lehˬ ve bon hkawˇ ca maˍ piˇ leh, teˇ kaˬ le le lo chaw naˬ teˇ hpaˍ hta‸ gu na-e piˇ ve yoˬ.
Baˆtiˆsaˬ piˇ paˍ Yoˇhanˬ suh ve
7Chi hkʼe hpeh‸ la ve awˬ lawn hkʼa peu-eˬ hta‸ jawˇmawˇ Heˍroˆ gʼa kaˇ htaˇ, yawˇ a ciˉ ka‸ dawˇ maˇ tawˆ ve yoˬ. Awˬ lawn kʼo, chaw teˇ hpaˍ hpaˍ lehˬ, Yoˇhanˬ suh kuiˬ lo kʼaw‸ te‸ tu la peuˬ teh‸ kʼoˆ ve yoˬ. 8Teˇ hpaˍ hpaˍ lehˬ, Eˇliˇya‸ tawˆ la peuˬ teh‸ kʼoˆ ve yoˬ. Awˬ kaˍ awˬ nu teˇ hpaˍ hpaˍ lehˬ, Aˬ sho-eˬ htaˇ ve Gʼuiˬsha ve tcuh kaˍ paˍ teˇ gʼaˇ gʼaˇ kʼaw‸ te‸ la peuˬ teh‸ kʼoˆ ve yoˬ. 9Heˍroˆ kʼoˆ ve, Yoˇhanˬ hta‸ ngaˬ oˉ kʼoˍ tawˆ peuˬ. Chi taw taw te chehˇ ve awˬ lawn hta‸ ngaˬ gʼa kaˇ ve chaw chi teˇ gʼaˇ lehˬ, a shu leh naˍ teh‸ kʼoˆ leh, Yeˍsuˆ hta‸ gʼa mawˬ tuˬ ca ve yoˬ.
Chaw ngaˇ hinˉ gʼaˇ hta‸ caˍ piˇ ve
10Oˇ htaˇ, tcuh yaˇ hui kʼaw‸ gaˬ la leh, yawˇ hui hkʼa te taˍ ve teˇ hpaˍ awˬ lawn Yeˍsuˆ hta‸ kʼaoˍ maˍ piˇ ve yoˬ. Yawˇ lehˬ, yawˇ hui hta‸ ceh tiˉ ta‸ iˉ kuˬ yuˬ leh, Behˇsehˇdaˆ teh‸ kʼoˆ ve venˇ lo kʼai ve yoˬ. 11Chaw awˬ moˍ lonˉ teˇ hpaˍ gʼa shiˍ htaˇ, yawˇ awˬ hkʼaˇ suh kʼai ve yoˬ. Yawˇ yawˇ hui hta‸ ha‸ yuˬ leh, Gʼuiˬsha ve mvuhˇ miˬ awˬ lawn maˍ piˇ leh, gu na-e piˇ tuˬ loˍ ve chaw teˇ hpaˍ hta‸ yawˇ gu na-e piˇ ve yoˬ.
12Mvuhˇ hpeu‸ la htaˇ tcuh yaˇ teˇ chi nyiˇ gʼaˇ yawˇ geh laˬ leh kʼoˆ ve, Chaw awˬ moˍ lonˉ chi lehˬ, awˬ paˇ awˬ kui lo cawˬ ve hkʼaˆ hkʼaw pan hkʼaw lo ca haˉ leh, caˇ tuˬ dawˬ tuˬ ca vuiˬ caˇ-e tuˬ, yawˇ hui hta‸ hpehˇ piˇ-oˆ. Awˬ lawn kʼo, choˬ kaˬ lehˬ heh puiˉ hkʼaw hpeh‸ ve yoˬ teh‸ yawˇ hta‸ kʼoˆ piˇ ve yoˬ.
13Ya‸ hkʼaˇ yawˇ lehˬ, Nawˬ hui teˇ hpaˍ yawˇ hui hta‸ caˍ piˇ-oˆ teh‸, yawˇ hui hta‸ kʼaw‸ kʼoˆ piˇ ve yoˬ.
Yawˇ hui kʼaw‸ kʼoˆ ve, Chaw chi ma ve awˬ pon ngaˬ hui caˇ tuˬ dawˬ tuˬ maˇ ca vuiˬ ve kʼo, ngaˬ hui geh hkaoˍmonˇ ngaˇ diˬ leh ngaˇ nyiˇ hkeh ceh tiˉ cawˬ ve yoˬ teh‸ kʼoˆ piˇ ve yoˬ. 14(Awˬ lawn kʼo, hawˉ hkʼaˆ ceh tiˉ ngaˇ hinˉ gʼaˇ hkʼe cawˬ ve yoˬ.) Oˇ htaˇ Yeˍsuˆ lehˬ, Chaw chi teˇ hpaˍ hta‸, teˇ moˍ ve ngaˇ chi gʼaˇ hkʼe, awˬ moˍ awˬ moˍ te mui tcuh-o teh‸, yawˇ yawˇ ve awˬ la‸ gʼawˇ hui hta‸ kʼoˆ piˇ ve yoˬ.
15Yawˇ hui htawˇ oˇ hkʼe te leh, chaw hkʼa peu-eˬ hta‸ mui tcuh ve yoˬ. 16Yeˍsuˆ lehˬ hkaoˍmonˇ oˇ ve ngaˇ diˬ leh ngaˇ oˇ ve nyiˇ hkeh hta‸ yuˬ peuˬ hkʼaw‸ nawˉ, mvuhˇ naw ma lo chiˇ nyi leh bon hta‸ chiˇ mvuh ve yoˬ. Oˇ ve teˇ hpaˍ hta‸ yawˇ hkʼeh‸ sheˬ leh, chaw chi ma ve mehˆ gʼuˇ suhˍ ca teh piˇ tuˬ, awˬ la‸ gʼawˇ teˇ hpaˍ hta‸ piˇ ve yoˬ. 17Oˇ htaˇ, chaw hkʼa peu-eˬ hkʼa bvuhˆ gʼa caˇ ve yoˬ. Yawˇ hui caˇ leuˉ ve teˇ hpaˍ hta‸ kʼaw‸ gʼawˆ ve teˇ yanˇ, teˇ chi nyiˇ hkʼawˍ lawˇ gʼa ve yoˬ.
Yeˍsuˆ awˬ lawn Peˍtruˆ shaˉ hkiˆ hkanˍ ve
18Teˇ pawˆ htaˇ, Yeˍsuˆ teˇ gʼaˇ tiˉ bon lawˬ chehˇ ve teˇ yanˇ, awˬ la‸ gʼawˇ teˇ hpaˍ htawˇ yawˇ geh chehˇ taˍ ve yoˬ. Oˇ htaˇ, yawˇ yawˇ hui hta‸ na nyi ve, Chaw chi ma ve ngaˬ hta‸ a shu hpeh‸ ve teh‸ kʼoˆ ve le.
19Yawˇ hui kʼaw‸ kʼoˆ ve, Chaw teˇ hpaˍ hpaˍ nawˬ hta‸ baˆtiˆsaˬ piˇ paˍ Yoˇhanˬ yoˬ teh‸ kʼoˆ ve, teˇ hpaˍ hpaˍ Eˇliˇya‸ yoˬ teh‸ kʼoˆ ve, peuˬ leh teˇ hpaˍ hpaˍ aˬ sho-eˬ htaˇ ve Gʼuiˬsha ve tcuh kaˍ paˍ teˇ gʼaˇ gʼaˇ kʼaw‸ te‸ tu la ve teh‸ nawˬ hta‸ kʼoˆ ve yoˬ.
20Oˇ htaˇ Yeˍsuˆ lehˬ, Nawˬ hui teˇ hpaˍ ngaˬ hta‸ a shu hpeh‸ ve teh‸ kʼoˆ ve le teh‸, yawˇ hui hta‸ na nyi ve teˇ yanˇ,
Nawˬ lehˬ Gʼuiˬsha ve Hkri‸ hpeh‸ ve yoˬ teh‸ Peˍtruˆ kʼaw‸ kʼoˆ piˇ ve yoˬ.
21Awˬ lawn chi chaw teˇ gʼaˇ hta‸ ka‸ maˇ gʼa hto piˇ tuˬ, yawˇ yawˇ hui hta‸ kʼoˆ piˇ leh, tawˇ hehnˇ chaweh piˇ taˍ ve yoˬ. 22Peuˬ leh yawˇ kʼoˆ ve, Chaw yaˇ ve Yaˇ hpu lehˬ, laiˉ ceuˬ gʼa tu‸ gʼa hkanˍ tuˬ yoˬ. Awˬ hoˉ chaw mawˇ teˇ hpaˍ, paw hkuˇ lonˉ teˇ hpaˍ leh, li‸ bvuh‸ paˍ teˇ hpaˍ yawˇ hta‸ chiˇ baˬ leh tiˇ pehˍ tuˬ yoˬ. Shehˆ nyi teˇ nyi gaˬ kʼo, yawˇ kʼaw‸ te‸ tu la tuˬ yoˬ teh‸ kʼoˆ piˇ ve yoˬ.
A shu yawˇ ve la‸ ka gʼa taˆ ve awˬ lawn
23Chi hkʼoˆ ka‸, yawˇ hui hkʼa peu-eˬ hta‸ yawˇ kʼoˆ piˇ ve, Chaw teˇ gʼaˇ gʼaˇ ngaˬ hkʼaˇ suh laˬ gaˇ ve kʼo, a shu yawˇ ve a loˍ hta‸ baˬ taˉ leh, teˇ nyi le le a shu yawˇ ve la‸ ka hta‸ taˆ leh ngaˬ hkʼaˇ suh laˬ-o‸. 24Awˬ lawn kʼo, hkʼaˬ ve chaw teˇ gʼaˇ maˇ kʼoˆ, a shu yawˇ ve a sha‸ hta‸ ponˬ piˇ gaˇ ve kʼo, yawˇ ve a sha‸ shonˇ tuˬ yoˬ. Ya‸ hkʼaˇ, hkʼaˬ ve chaw teˇ gʼaˇ maˇ kʼoˆ, ngaˬ awˬ pon a sha‸ shonˇ ve kʼo, yawˇ ve a sha‸ hta‸ ponˬ piˇ tuˬ yoˬ. 25Chaw teˇ gʼaˇ gʼaˇ miˬguiˬ hkʼa peu-eˬ hta‸ gʼa htawˇ, yawˇ ve a sha‸ luˬ kʼai shonˇ kʼai ve kʼo, aˬ hto‸ ma awˬ bon cawˬ le. 26Awˬ lawn kʼo, chaw hkʼaˬ ve teˇ gʼaˇ maˇ kʼoˆ, ngaˬ hta‸ leh ngaˬ ve tawˇ hkawˇ hta‸ ya‸ taw ve kʼo, chaw yaˇ ve Yaˇ hpu lehˬ yawˇ ve awˬ me‸ awˬ hponˇ, Awˬ pa ve awˬ me‸ awˬ hponˇ leh da‸ kehˬ ve mvuhˇ naw ma tcuh yaˇ hui ve awˬ me‸ awˬ hponˇ awˬ hkʼaw lo laˬ ve teˇ yanˇ, chaw oˇ ve hta‸ ya‸ taw tuˬ yoˬ. 27Ngaˬ nawˬ hui hta‸ awˬ tehˬ awˬ na kʼoˆ laˇ ve, choˬ kaˬ lo huˉ chehˇ ve chaw teˇ hpaˍ hpaˍ lehˬ, Gʼuiˬsha ve mvuhˇmiˬ hta‸ maˇ gʼa mawˬ sheˍ ve ceh ceh, maˇ gʼa suh teh‸ yawˇ kʼoˆ piˇ ve yoˬ.
Yeˍsuˆ awˬ ho‸ awˬ han pa ve
28Yeˍsuˆ oˇ hkʼe kʼoˆ peuˬ hkʼaw‸ nawˉ, hiˉ nyi hkʼe gaˬ la leh, yawˇ lehˬ Peˍtruˆ, Yoˇhanˬ leh Yaˍkoˆ hui hta‸ shiˍ veu leh bon lawˬ tuˬ hkʼaw pui hkʼoˆ lo taˆ-e ve yoˬ. 29Yawˇ bon lawˬ chehˇ ve teˇ yanˇ, yawˇ ve mehˆ hpfuhˇ awˬ ho‸ awˬ han pa leh, yawˇ ve veu‸ kʼaˇ htawˇ, hpu jaˇ leh awˬ gʼeuˆ ba jaˇ ve yoˬ. 30Oˇ htaˇ, Moˉseˍ leh Eˇliˇya‸ lehˬ, awˬ me‸ awˬ hponˇ awˬ hkʼaw lo tawˆ la leh, 31Yeˍruˆsaˍlehnˍ venˇ awˬ hkʼaw lo Yeˍsuˆ yawˇ gʼa suh tuˬ ve awˬ lawn yawˇ geh na‸ uˉ te da‸ ve yoˬ. 32Peˍtruˆ leh yawˇ ve awˬ chawˇ nyiˇ gʼaˇ zuh‸ muiˉ geu‸ jaˇ leh zuh‸ muiˉ jo ve yoˬ. Ya‸ hkʼaˇ, yawˇ hui hkʼa deh‸ kʼaw‸ nawˇ la leh, Yeˍsuˆ ve awˬ me‸ awˬ hponˇ leh, yawˇ geh huˉ taˍ ve chaw nyiˇ gʼaˇ hta‸ gʼa mawˬ ve yoˬ. 33Chaw oˇ ve nyiˇ gʼaˇ Yeˍsuˆ hta‸ hpaˆ da‸ kʼai chehˇ ve teˇ yanˇ, Peˍtruˆ yawˇ hta‸ kʼoˆ piˇ ve, Jawˇmawˇ-oˬ, ngaˬ hui choˬ kaˬ chehˇ ve lehˬ, da‸ ve yoˬ. Ngaˬ hui aˉ po kʼo shehˆ shiˍ te tuˬ yoˬ. Nawˬ awˬ pon teˇ shiˍ, Moˉseˍ awˬ pon teˇ shiˍ leh Eˇliˇya‸ awˬ pon teˇ shiˍ te tuˬ yoˬ teh‸, maˇ nawˇ maˇ hteh hpeh‸ ve awˬ hkʼaw lo kʼoˆ ve yoˬ.
34Yawˇ chi hkʼe kʼoˆ chehˇ ve teˇ yanˇ, moˬ yawˇ hui hta‸ hoˆ taˍ beh taˍ ve yoˬ. Moˬ yawˇ hui hta‸ hoˆ taˍ ve teˇ yanˇ, yawˇ hui kawˆ jaˇ ve yoˬ. 35Moˬ oˇ ve awˬ hkʼaw lo awˬ hkawˇ bvuhˬ la leh kʼoˆ ve, Chaw chi lehˬ, ngaˬ leuˆ yuˬ taˍ ve ngaˬ ve Yaˇ hpu hpeh‸ ve yoˬ. Yawˇ ve tawˇ hkawˇ hta‸ na yuˬ-o‸ teh‸ kʼoˆ ve yoˬ.
36Awˬ hkawˇ oˇ ve bvuhˬ la ve teˇ yanˇ, Yeˍsuˆ teˇ gʼaˇ tiˉ chehˇ taˍ ve hta‸ yawˇ hui gʼa mawˬ ve yoˬ. yawˇ hui ta‸ iˉ chehˇ taˍ leh, yawˇ hui gʼa mawˬ ve teˇ hpaˍ awˬ lawn, awˬ nyi awˬ haˉ oˇ ve teˇ hpaˍ awˬ hkʼaw lo chaw teˇ gʼaˇ hta‸ ka‸ yawˇ hui maˇ hto piˇ.
Paw‸ hpeuˆ ve yaˇ paˍ ehˉ teˇ gʼaˇ hta‸ Yeˍsuˆ gu na-e piˇ ve
37Awˬ hkʼaw‸ nawˉ teˇ nyi yawˇ hui hkʼaw pui hkʼoˆ lo ya‸ la htaˇ, chaw awˬ moˍ lonˉ yawˇ hta‸ ca ha‸ la ve yoˬ. 38Oˇ htaˇ, chaw awˬ moˍ lonˉ awˬ hkʼaw lo chehˇ ve chaw teˇ gʼaˇ kuˬ leh kʼoˆ ve, Saˍ la‸-oˬ, ngaˬ ve yaˇ paˍ hta‸ nyi laˇ tuˬ, ngaˬ nawˬ hta‸ lawˬ hkawˉ ve yoˬ. Awˬ lawn kʼo, yawˇ lehˬ ngaˬ ve yaˇ tiˍ hpeh‸ ve yoˬ. 39Yawˇ neˇ geh leh, neˇ yawˇ hta‸ yuˬ tiˍ taˍ ve teˇ yanˇ, yawˇ teˇ cawˬ haˉ kuˬ leh, paw‸ hpeuˆ leh awˬ fuˇ tawˆ la ve yoˬ. Yaˇ ehˉ naˬ jaˇ htaˇ hkʼa gaˬ gʼaˇ hte‸ fawˉ mehˍ piˇ peuˬ htaˇ heh‸ tawˆ kʼai ve yoˬ. 40Neˇ oˇ ve hta‸ gʼa‸ kʼoˬ tuˬ nawˬ ve awˬ la‸ gʼawˇ hui hta‸ ngaˬ lawˬ hkawˉ ve htawˇ, yawˇ hui te maˇ gʼa teh‸ yawˇ kʼoˆ ve yoˬ.
41Yeˍsuˆ kʼaw‸ kʼoˆ ve, Yonˍ ve maˇ cawˬ leh nyi ma hpfuhˆ puiˉ ve chaw chi teˇ co-e, ngaˬ nawˬ hui geh hkʼaˬ maw gʼa chehˇ leh gʼa yeunˇ hkanˍ tuˬ sheˍ le. Nawˬ ve yaˇ paˍ hta‸ choˬ kaˬ yuˬ laˬ-o‸ teh‸ kʼoˆ piˇ ve yoˬ.
42Yaˇ paˍ oˇ ve laˬ chehˇ ve teˇ yanˇ ka‸, neˇ yawˇ hta‸ ca‸ baˬ leh paw‸ hpeuˆ piˇ lawˬ ve yoˬ. Yeˍsuˆ lehˬ, neˇ cha‸ chiˆ oˇ ve hta‸ deˇ leh, yaˇ ehˉ hta‸ gu na-e piˇ peuˬ hkʼaw‸ nawˉ, awˬ pa hta‸ kʼaw‸ chiˇ a‸ piˇ ve yoˬ. 43Oˇ htaˇ chaw hkʼa peu-eˬ lehˬ, Gʼuiˬsha ve uiˍ jaˇ mvuh jaˇ ve kanˇ paˆ hta‸ gʼa mawˬ leh anˇ ve yoˬ.
Yeˍsuˆ yawˇ gʼa suh tuˬ ve awˬ lawn teˇ pawˆ kʼaw‸ hto piˇ ve
44Yawˇ hkʼa te ve kanˉ teˇ hpaˍ hta‸ chaw hkʼa peu-eˬ anˇ chehˇ ve teˇ yanˇ, yawˇ ve awˬ la‸ gʼawˇ teˇ hpaˍ hta‸ yawˇ kʼoˆ piˇ ve, Tawˇ hkawˇ chi teˇ hpaˍ hta‸ hkʼa deh‸ na leh tawnˇ taˍ-o‸. Chaw yaˇ ve Yaˇ hpu lehˬ, chaw yaˇ hui ve la‸ sheh awˬ hkʼaw lo chiˇ a‸ ve hta‸ gʼa hkanˍ ve awˬ yanˇ neˇ la peuˬ teh‸ kʼoˆ ve yoˬ. 45Tawˇ hkawˇ oˇ ve hta‸ yawˇ hui na maˇ gʼa. Yawˇ hui na maˇ gʼa tuˬ faˉ taˍ ve yoˬ. Ya‸ hkʼaˇ awˬ lawn oˇ ve hta‸ yawˇ hui na nyi maˇ haˆ.
Hkʼaˬ ve teˇ gʼaˇ shu a‸ kehˉ uiˍ ve le
46Oˇ htaˇ, yawˇ hui awˬ hkʼaw lo hkʼaˬ ve teˇ gʼaˇ shu a‸ kehˉ uiˍ ve le teh‸, teˇ gʼaˇ leh teˬ gʼaˇ tawˇ gʼawˬ da‸ ve yoˬ. 47Yeˍsuˆ lehˬ, yawˇ hui ve nyi ma hkʼaw dawˇ taˍ ve teˇ hpaˍ hta‸ shiˍ ve teˇ yanˇ, yaˇ ehˉ teˇ gʼaˇ hta‸ yawˇ yuˬ leh, yawˇ awˬ paˇ lo huˉ tcuh taˍ peuˬ hkʼaw‸ nawˉ yawˇ hui hta‸ kʼoˆ piˇ ve, 48Yaˇ ehˉ chi hta‸ ngaˬ ve awˬ meh awˬ hkʼaw lo ha‸ yuˬ ve chaw hkʼaˬ ve teˇ gʼaˇ maˇ kʼoˆ, ngaˬ hta‸ ha‸ yuˬ ve yoˬ. Ngaˬ hta‸ ha‸ yuˬ ve chaw lehˬ ngaˬ hta‸ peu laˇ shehˍ hpaˇ hta‸ ha‸ yuˬ ve yoˬ. Awˬ lawn kʼo, nawˬ hui awˬ hkʼaw lo shu a‸ kehˉ i ve chaw teˇ gʼaˇ lehˬ, shu a‸ kehˉ uiˍ ve chaw teˇ gʼaˇ hpeh‸ ve yoˬ teh‸ kʼoˆ ve yoˬ.
Canˇ paˍ hpawˇ maˇ chehˇ ve chaw ngaˬ hui hpawˇ chehˇ ve
49Oˇ htaˇ Yoˇhanˬ kʼaw‸ kʼoˆ ve, Jawˇ mawˇ-oˬ, chaw teˇ gʼaˇ nawˬ ve awˬ meh hta‸ cuˇ leh neˇ teˇ hpaˍ hta‸ gʼa‸ kʼoˬ chehˇ ve hta‸ ngaˬ hui gʼa mawˬ ve yoˬ. Yawˇ ngaˬ hui geh teˇ geh laˬ ve chaw maˇ heˆ ve pa taw, ngaˬ hui yawˇ hta‸ tawˍ taˍ ve yoˬ teh‸ kʼoˆ piˇ ve yoˬ.
50Yeˍsuˆ kʼaw‸ kʼoˆ ve, Yawˇ hta‸ taˇ tawˍ taˍ. Nawˬ hui ve canˇ paˍ hpawˇ maˇ chehˇ ve chaw teˇ gʼaˇ lehˬ, nawˬ hui hpawˇ chehˇ ve chaw hpeh‸ ve yoˬ teh‸ yawˇ hta‸ kʼoˆ piˇ ve yoˬ.
Yaˍkoˆ leh Yoˇhanˬ hta‸ Yeˍsuˆ deˇ ve
51Mvuhˇ naw ma lo yawˇ hta‸ chiˇ taˆ-e ve awˬ nyi awˬ haˉ neˇ la ve teˇ yanˇ, Yeˍruˆsaˍlehnˍ venˇ lo kʼai tuˬ yawˇ dawˇ cheˆ taˍ leh kʼai ve yoˬ. 52Yawˇ awˬ gʼuˇ suhˍ tcuh yaˇ teˇ hpaˍ hta‸ kʼai tcuh leh, yawˇ awˬ pon gu taˍ tuˬ, Saˍmaˍriˆ chaw hui ve hkʼaˆ teˇ hkʼaˆ awˬ hkʼaw lo yawˇ hui lo‸-e ve yoˬ. 53Yawˇ Yeˍruˆsaˍlehnˍ venˇ lo kʼai chehˇ ve hta‸ pa taw, chaw oˇ ve teˇ hpaˍ yawˇ hta‸ maˇ ha‸ yuˬ. 54Yawˇ ve awˬ la‸ gʼawˇ Yaˍkoˆ leh Yoˇhanˬ chi hta‸ gʼa mawˬ ve teˇ yanˇ, Jawˇmawˇ-oˬ, mvuhˇ naw ma lo aˬ miˍ ce la leh yawˇ hui hta‸ to‸ baˬ tuˬ, nawˬ ngaˬ huiˉ maˬ hta‸ te tcuh laˇ gaˇ leh laˇ teh‸ kʼoˆ piˇ ve yoˬ.
55Yeˍsuˆ kʼaw‸ hpfuhˆ nyi leh yawˇ huiˉ maˬ hta‸ deˇ ve yoˬ. 56Peuˬ leh yawˇ hui awˬ kaˍ awˬ nu teˇ hkʼaˆ lo kʼai ve yoˬ.
Yeˍsuˆ hkʼaˇ suh kʼai gaˇ ve chaw teˇ hpaˍ
57Yawˇ hui ya‸ kʼaw kʼaˉ lo kʼai chehˇ htaˇ, chaw teˇ gʼaˇ lehˬ, Nawˬ hkʼaˬ lo kʼai ve maˇ kʼoˆ, nawˬ hkʼaˇ suh ngaˬ kʼai tuˬ yoˬ teh‸ yawˇ hta‸ kʼoˆ piˇ ve yoˬ.
58Yeˍsuˆ kʼoˆ ve, Heh hpuiˇ teˇ hpaˍ lehˬ, awˬ kʼoˍ cawˬ ve yoˬ. Mvuhˇ hpe lo poˬ ve ngaˆ teˇ hpaˍ htawˇ, zuh‸ kuiˬ cawˬ ve yoˬ. Ya‸ hkʼaˇ, chaw yaˇ ve Yaˇ hpu lehˬ, oˉ kʼoˍ taˍ kuiˬ ka‸ maˇ cawˬ teh‸ yawˇ hta‸ kʼoˆ piˇ ve yoˬ.
59Awˬ kaˍ awˬ nu chaw teˇ gʼaˇ hta‸, Ngaˬ hkʼaˇ suh laˬ-o‸ teh‸ yawˇ kʼoˆ piˇ ve teˇ yanˇ,
chaw oˇ ve lehˬ, Ngaˬ ve awˬ pa hta‸ awˉ lawˉ ca tuˍ piˇ tuˬ a hkaw-anˬ a ciˉ pe‸ laˇ sheˍ teh‸ kʼoˆ piˇ ve yoˬ.
60Yeˍsuˆ kʼaw‸ kʼoˆ ve, Chaw suh teˇ hpaˍ lehˬ, yawˇ hui hkʼaˇ yawˇ hui chaw suh hta‸ tuˍ piˇ lawˬ-o‸. Ya‸ hkʼaˇ nawˬ awˍ hkʼe kʼai leh, Gʼuiˬsha ve mvuhˇmiˬ awˬ lawn ca maˍ piˇ-oˆ teh‸, yawˇ hta‸ kʼoˆ piˇ ve yoˬ.
61Awˬ kaˍ awˬ nu chaw teˇ gʼaˇ lehˬ, Jawˇ mawˇ-oˬ, nawˬ hkʼaˇ suh ngaˬ kʼai tuˬ yoˬ. Ya‸ hkʼaˇ, awˉ lawˉ htaˇ ngaˬ yehˬ hkʼaw ve chaw teˇ hpaˍ hta‸ ca hto piˇ taˉ tuˬ a hkaw-anˬ a ciˉ pe‸ laˇ sheˍ teh‸ kʼoˆ ve yoˬ.
62Yeˍsuˆ kʼoˆ ve, Laˇ hpuiˇ tuˇ hta‸ vawˆ taˍ leh hkʼaw‸ nawˉ hpfuhˆ nyi ve chaw lehˬ, Gʼuiˬsha ve mvuhˇmiˬ hta‸ maˇ keunˍ teh‸ yawˇ hta‸ kʼoˆ piˇ ve yoˬ.
Currently Selected:
Luˉka‸ li‸ 9: LHBE
Highlight
Share
Copy
Want to have your highlights saved across all your devices? Sign up or sign in
Lahu Bible Edited © Thailand Bible Society and Bible Society of Myanmar, 2010, 2020.
