Luˉka‸ li‸ 10
10
Awˬ la‸ gʼawˇ suhˍ chi gʼaˇ hta‸ kʼai tcuh ve
1Oˇ ve hkʼaw‸ nawˉ Jawˇmawˇ Yeˍsuˆ lehˬ, awˬ kaˍ awˬ nu awˬ la‸ gʼawˇ suhˍ chi gʼaˇ hta‸ leuˆ yuˬ leh, yawˇ awˬ to kʼai tuˬ ve venˇ hkʼaˆ teˇ kaˬ le le lo nyiˇ gʼaˇ teˇ kaˬ nyiˇ gʼaˇ teˇ kaˬ yawˇ awˬ gʼuˇ suhˍ kʼai tcuh ve yoˬ. 2Yawˇ yawˇ hui hta‸ kʼoˆ piˇ ve, Caˬ gʼeu‸ tuˬ cawˬ maˇ jaˇ ve ka‸, caˬ gʼeu‸ shehˍ hpaˇ hui a ciˉ ceh tiˉ cawˬ ve yoˬ. Hkʼe te leh, yawˇ ve caˬ gʼeu‸ kuiˬ lo caˬ gʼeu‸ shehˍ hpaˇ peu laˇ tuˬ, Awˬ shehˍ hpaˇ geh bon lawˬ-o‸. 3Nawˬ hui kʼai loˬ. Nawˬ hui yawˬ ehˉ hkʼe hpeh‸ leh, veˬ awˬ moˍ awˬ hkʼaw lo ngaˬ nawˬ hui hta‸ kʼai tcuh ve yoˬ. 4Hpu guˉ pi, miˉ chaw leh hkuiˉ nuˆ teˇ hpaˍ hta‸ taˇ pfuhˇ kʼai. Ya‸ kʼaw kʼaˉ lo kʼai chehˇ htaˇ, shu hta‸ hpuˇ da‸ ve teˇ yanˇ tawˇ taˇ yaw. 5Yehˬ hkʼaˬ ve teˇ yehˬ awˬ hkʼaw lo maˇ kʼoˆ, nawˬ hui lo‸-e ve teˇ yanˇ, Yehˬ chi awˬ hkʼaw lo dawˇ sha gaˇ sha ve teˇ ceuˬ cawˬ piˇ-oˆ teh‸ awˉ lawˉ kʼoˆ piˇ-oˆ. 6Yehˬ oˇ ve awˬ hkʼaw lo dawˇ sha gaˇ sha ve yaˇ teˇ gʼaˇ gʼaˇ cawˬ ve kʼo, nawˬ ve dawˇ sha gaˇ sha ve teˇ ceuˬ yawˇ awˬ hkʼoˆ gaˬ tuˬ yoˬ. Maˇ cawˬ ve kʼo, nawˬ hui geh kʼaw‸ kʼaw‸ la tuˬ yoˬ. 7Yehˬ oˇ ve awˬ hkʼaw lo ceh tiˉ chehˇ taˍ leh, yawˇ hui te caˍ te taw laˇ ve caˇ tuˬ dawˬ tuˬ hta‸ caˇ-oˆ. Awˬ lawn kʼo, kanˉ te shehˍ hpaˇ lehˬ, awˬ hpfuhˇ gʼa cawˇ ve yoˬ. Teˇ yehˬ peuˬ teˇ yehˬ lo taˇ jiˆ kʼai. 8Venˇ hkʼaˬ ve teˇ venˇ awˬ hkʼaw lo nawˬ hui lo‸-e ve maˇ kʼoˆ, yawˇ hui nawˬ hui hta‸ ha‸ yuˬ laˇ ve kʼo, nawˬ hui mehˆ gʼuˇ suhˍ hkʼa teh laˇ ve caˇ tuˬ hta‸ caˇ-oˆ. 9Oˇ kaˬ lo naˬ ve gawˬ ve chaw teˇ hpaˍ hta‸ gu na-e piˇ-oˆ. Gʼuiˬsha ve mvuhˇmiˬ lehˬ, nawˬ hui geh gaˬ la paˇ neˇ peuˬ teh‸, yawˇ hui hta‸ kʼoˆ piˇ-oˆ. 10Venˇ hkʼaˬ ve teˇ venˇ awˬ hkʼaw lo nawˬ hui lo‸-e ve maˇ kʼoˆ, yawˇ hui nawˬ hui hta‸ maˇ ha‸ yuˬ laˇ ve kʼo, venˇ oˇ ve ya‸ kʼaw hpuiˇ lo huˉ taˍ leh chi hkʼe kʼoˆ piˇ-oˆ. 11Ngaˬ hui ve hkui taw kʼaw hta‸ ngawˉ taˍ ve, nawˬ hui ve venˇ awˬ hkʼaw ve je‸ meu-e ka‸ nawˬ hui awˬ hkʼoˆ hta‸ gaˬ la tuˬ, ngaˬ hui shiˆ baˬ taˉ ve yoˬ. Ya‸ hkʼaˇ, Gʼuiˬsha ve mvuhˇmiˬ nawˬ hui awˬ paˇ lo gaˬ la peuˬ ve hta‸ shiˍ-o‸ teh‸ yawˇ hui hta‸ kʼoˆ piˇ-oˆ. 12Ngaˬ nawˬ hui hta‸ kʼoˆ laˇ ve, suhˉ jehˬ ve awˬ nyi awˬ hkʼaw lo, venˇ oˇ ve teˇ venˇ lehˬ, Sawˉdonˍ venˇ a‸ kehˉ gʼa hkanˍ tuˬ yoˬ.
Venˇbaˆ maˇ dawˇ hpfuhˆ ve venˇ teˇ hpaˍ gʼa dawˇ haˍ jaˇ tuˬ ve
13Hkawˇraˍsenˍvenˇ-oˬ, nawˬ gʼa dawˇ haˍ jaˇ tuˬ yoˬ. Behˇsehˇdaˆ venˇ-oˬ, nawˬ htawˇ gʼa dawˇ haˍ jaˇ tuˬ yoˬ. Awˬ lawn kʼo, nawˬ hui awˬ hkʼaw lo te peuˬ ve kanˉ uiˍ ve teˇ hpaˍ lehˬ, Tuˇruˆ venˇ leh Siˉdonˍ venˇ awˬ hkʼaw lo te ve hkʼe kʼo, yawˇ hui lehˬ aˬ sho-eˬ htaˇ ka‸ meh htuˉ pui hpa hta‸ veu‸ deh leh, hkʼaw‸ laˉ hkʼaw mui taˍ leh venˇbaˆ hta‸ dawˇ hpfuhˆ tuˬ yoˬ. 14Suhˉ jehˬ ve teˇ yanˇ, nawˬ hui lehˬ Tuˇruˆ venˇ leh Siˉdonˍ venˇ a‸ kehˉ gʼa hkanˍ tuˬ yoˬ. 15Kaˍpeˍneˍonˍ venˇ-oˬ, nawˬ lehˬ mvuhˇ naw ma lo hkʼa gaˬ chiˇ taˆ-e ve hta‸ gʼa hkanˍ tuˬ teh‸ dawˇ ve laˇ. Nawˬ lehˬ, suh mvuhˇmiˬ hkʼa gaˬ ya‸-e tuˬ yoˬ.
16Nawˬ hui ve tawˇ hkawˇ hta‸ na yuˬ ve chaw lehˬ, ngaˬ ve tawˇ hkawˇ hta‸ na yuˬ ve yoˬ. Nawˬ hui hta‸ chiˇ baˬ ve chaw lehˬ, ngaˬ hta‸ chiˇ baˬ ve yoˬ. Ngaˬ hta‸ chiˇ baˬ ve chaw lehˬ, ngaˬ hta‸ peu laˇ shehˍ hpaˇ hta‸ chiˇ baˬ ve yoˬ teh‸ kʼoˆ piˇ ve yoˬ.
Awˬ la‸ gʼawˇ suhˍ chi gʼaˇ kʼaw‸ la ve
17Awˬ la‸ gʼawˇ oˇ ve suhˍ chi gʼaˇ ha lehˬ ha kʼa kʼaw‸ gaˬ la leh, Jawˇmawˇ-oˬ, nawˬ ve awˬ meh hta‸ cuˇ ve awˬ hkʼaw lo neˇ teˇ hpaˍ hta‸ ka‸ ngaˬ hui gʼaˇ ve yoˬ teh‸ kʼoˆ piˇ ve yoˬ.
18Yeˍsuˆ kʼaw‸ kʼoˆ ve, Saˍtanˍ lehˬ mvuhˇ tiˉ po-e‸ hkʼa shuˍ shuˍ mvuhˇ naw ma lo ce la ve hta‸ ngaˬ gʼa mawˬ ve yoˬ. 19Nawˬ hui lehˬ, vuiˬ leh aˉ ci ku taw‸ ma teˇ hpaˍ hta‸ naˆ tiˍ taˍ gʼa tuˬ leh, canˇ paˍ ve kanˇ paˆ hkʼa peu-eˬ hta‸ gʼaˇ tuˬ, ngaˬ nawˬ hui hta‸ kanˇ paˆ piˇ taˍ ve yoˬ. Aˬ hto‸ ma teˇ ceuˬ maˇ kʼoˆ, nawˬ hui hta‸ naˬ tuˬ te maˇ gʼa. 20Ya‸ hkʼaˇ, neˇ teˇ hpaˍ hta‸ nawˬ hui gʼaˇ ve pa taw taˇ ha lehˬ. Mvuhˇ naw ma hkʼoˆ lo nawˬ hui ve awˬ meh bvuh‸ taˍ ve hta‸ ha lehˬ chehˇ-oˆ teh‸, yawˇ yawˇ hui hta‸ kʼoˆ piˇ ve yoˬ.
Yeˍsuˆ ha lehˬ ve
21Oˇ ve teˇ yanˇ Yeˍsuˆ lehˬ, da‸ ve kehˬ ve Awˬ ha hpu awˬ hkʼaw lo ha lehˬ leh kʼoˆ ve, Mvuhˇ naw ma leh miˬ naˆ ma hta‸ uˉ peunˍ shehˍ hpaˇ A pa-oˬ, cuˇ yiˍ cawˬ ve chaw leh shiˍ puiˉ ve chaw hui lehˬ, awˬ lawn chi teˇ hpaˍ hta‸ yawˇ hui maˇ gʼa shiˍ tuˬ nawˬ faˉ taˍ leh, yaˇ ehˉ teˇ hpaˍ hta‸ nawˬ hpeu‸ maˍ piˇ ve pa taw, ngaˬ nawˬ hta‸ chiˇ mvuh ve yoˬ. A pa-oˬ, chi hkʼe te tuˬ nawˬ nyi ma cawˇ ve yoˬ.
22Ngaˬ ve Awˬ pa lehˬ, awˬ ceuˬ hkʼa peu-eˬ ngaˬ hta‸ chiˇ a‸ laˇ peuˬ. Awˬ pa maˇ heˆ kʼo, Yaˇ hpu a shu leh naˍ teh‸, teˇ gʼaˇ ka‸ maˇ shiˍ. Yaˇ hpu leh Yaˇ hpu hpeu‸ maˍ piˇ gaˇ ve chaw maˇ heˆ kʼo, Awˬ pa a shu leh naˍ teh‸, teˇ gʼaˇ ka‸ maˇ shiˍ teh‸ kʼoˆ ve yoˬ.
23Oˇ htaˇ, awˬ la‸ gʼawˇ hui hpawˇ lo yawˇ hpfuhˆ nyi leh, yawˇ hui hta‸ ceh tiˉ kʼoˆ piˇ ve, Chi teˇ hpaˍ hta‸ nawˬ hui gʼa mawˬ ve pa taw, nawˬ hui ve mehˆ shiˍ lehˬ awˬ bon uiˍ ve yoˬ. 24Awˬ lawn kʼo, ngaˬ nawˬ hui hta‸ kʼoˆ laˇ ve, nawˬ hui gʼa mawˬ ve teˇ hpaˍ hta‸ Gʼuiˬsha ve tcuh kaˍ paˍ laiˉ gʼaˇ leh hkunˉ hawˉ hkanˇ laiˉ gʼaˇ mawˬ gaˇ ve htawˇ, maˇ gʼa mawˬ. Nawˬ hui gʼa kaˇ ve teˇ hpaˍ hta‸ yawˇ hui kaˇ gaˇ ve htawˇ maˇ gʼa kaˇ teh‸ kʼoˆ piˇ ve yoˬ.
Da‸ ve Saˍmaˍriˆ chaw teˇ gʼaˇ awˬ lawn
25Oˇ htaˇ, awˬliˇtawˇhkawˇ shiˍ paˍ teˇ gʼaˇ yawˇ hta‸ lawˇ nyi tuˬ tu la leh, Saˍ la‸-oˬ, co ti‸ ha ti‸ gʼa tuˬ ngaˬ hkʼaˬ hkʼe gʼa te tuˬ le teh‸ na nyi ve yoˬ.
26Yeˍsuˆ kʼaw‸ kʼoˆ piˇ ve, Awˬliˇtawˇhkawˇ awˬ hkʼaw lo hkʼaˬ hkʼe bvuh‸ taˍ ve le. Nawˬ gʼaw ve hkʼaˬ hkʼe gʼa shiˍ le teh‸ yawˇ hta‸ na nyi ve yoˬ.
27Yawˇ kʼaw‸ kʼoˆ ve, Nawˬ ve nyi ma hkʼa peu-eˬ, nawˬ ve co ha hkʼa peu-eˬ, nawˬ ve awˬ gʼaˇ awˬ shaˉ hkʼa peu-eˬ leh nawˬ ve dawˇ hkʼaˇ hkʼa peu-eˬ nawˬ ve Jawˇmawˇ Gʼuiˬsha hta‸ gʼa ha‸ ve yoˬ. Nawˬ awˬ to hta‸ ha‸ ve hkʼe, nawˬ awˬ paˇ awˬ kui chehˇ ve chaw hta‸ gʼa ha‸ ve yoˬ teh‸ kʼoˆ piˇ ve yoˬ. #Bon 6:5, Okʼo 19:18
28Yeˍsuˆ kʼaw‸ kʼoˆ ve, Nawˬ yaw hkʼaw‸ laˇ ve lehˬ cawˇ ve yoˬ. Nawˬ oˇ hkʼe te-o. Oˇ hkʼe te ve kʼo, nawˬ co ha gʼa te‸ tuˬ yoˬ teh‸ yawˇ hta‸ kʼoˆ piˇ ve yoˬ.
29Ya‸ hkʼaˇ, chaw oˇ ve lehˬ yawˇ awˬ to hta‸ hteˇ ve cawˇ ve chaw hpeh‸ ve teh‸ shawˍ taˍ gaˇ leh, Ngaˬ awˬ paˇ awˬ kui chehˇ ve chaw a shu le teh‸ Yeˍsuˆ hta‸ na nyi ve yoˬ.
30Yeˍsuˆ kʼaw‸ kʼoˆ ve, Chaw teˇ gʼaˇ Yeˍruˆsaˍlehnˍ venˇ lo tu leh Yeˍriˆhkoˇ venˇ lo ya‸-e ve teˇ yanˇ, chaw hkʼawˇ teˇ hpaˍ hta‸ gʼa hpuˇ ve yoˬ. Chaw hkʼawˇ oˇ ve teˇ hpaˍ lehˬ, yawˇ ve veu‸ kʼaˇ hta‸ kʼehˆ baˬ leh, yawˇ hta‸ gʼaˇ hte‸ dawˆ peuˬ hkʼaw‸ nawˉ, yawˇ suh paˇ neˇ ve teˇ yanˇ yawˇ hta‸ baˬ taˉ leh kʼai ve yoˬ. 31Oˇ htaˇ, paw hkuˇ teˇ gʼaˇ ya‸ kʼaw oˇ ve teˇ caˆ hta‸ kʼai cawˇ leh chaw oˇ ve hta‸ gʼa mawˬ ve teˇ yanˇ, ya‸ kʼaw jaˇ lo yawˇ jaw kʼai ve yoˬ. 32Oˇ ve hkʼa shuˍ shuˍ, Leˍviˆ chaw teˇ gʼaˇ htawˇ oˇ kaˬ lo gaˬ la leh chaw oˇ ve hta‸ gʼa mawˬ ve teˇ yanˇ, ya‸ kʼaw jaˇ lo jaw kʼai ve yoˬ. 33Ya‸ hkʼaˇ, Saˍmaˍriˆ chaw teˇ gʼaˇ ya‸ kʼaw oˇ ve teˇ caˆ hta‸ kʼai ve teˇ yanˇ, chaw oˇ ve geh gaˬ leh, yawˇ hta‸ gʼa mawˬ htaˇ ha kʼaˉ jaˇ ve yoˬ. 34Yawˇ geh kʼai leh, yawˇ ve naˬ kuiˬ awˬ hkʼaw teˇ hpaˍ hta‸ naˍ manˇ leh a pehˉ meuˇ gʼuiˬ keu leh peh piˇ ve yoˬ. Oˇ ve hkʼaw‸ nawˉ Saˍmaˍriˆ chaw lehˬ, yawˇ ve piˉ laˬ awˬ hkʼoˆ chaw naˬ oˇ ve hta‸ chiˇ taˍ peuˬ leh, hkehˉ chaw yehˬ teˇ yehˬ lo yuˬ kʼai leh yawˇ hta‸ ha‸ shaˉ piˇ ve yoˬ. 35Shawˉ pawˍ teˇ nyi hkʼe htaˇ yawˇ hpu nyiˇ hteh‸ yuˬ tawˆ leh, yehˬ shehˍ hpaˇ hta‸ piˇ leh kʼoˆ piˇ ve, Chaw chi hta‸ hkʼa deh‸ ha‸ shaˉ-oˆ. Chi awˬ hkʼoˆ nawˬ hkʼa peuˬ ve teˇ hpaˍ ngaˬ kʼaw‸ la htaˇ nawˬ hta‸ kʼaw‸ shaiˍ laˇ tuˬ yoˬ teh‸ kʼoˆ piˇ taˉ ve yoˬ.
36Hkʼe te leh, nawˬ hkʼaˬ hkʼe dawˇ ve le. Chaw chi shehˆ gʼaˇ awˬ hkʼaw lo, chaw hkʼawˇ hta‸ gʼa hpuˇ ve teˇ gʼaˇ hta‸ awˬ paˇ awˬ kui chehˇ ve chaw hpeh‸ ve hkʼaˬ ve teˇ gʼaˇ le teh‸, Yeˍsuˆ yawˇ hta‸ na nyi ve yoˬ.
37Yawˇ kʼaw‸ kʼoˆ ve, Yawˇ hta‸ ha kʼaˉ piˇ ve chaw teˇ gʼaˇ yoˬ teh‸, yaw hkʼaw‸ piˇ ve teˇ yanˇ, Nawˬ htawˇ kʼai leh oˇ hkʼe ca te-o teh‸, Yeˍsuˆ yawˇ hta‸ kʼaw‸ kʼoˆ piˇ ve yoˬ.
Maˍhtaˆ leh Maˍriˆ geh Yeˍsuˆ ca guiˇ kʼai ve
38Yawˇ hui ya‸ kʼaw kʼai ve teˇ yanˇ, hkʼaˆ teˇ hkʼaˆ awˬ hkʼaw lo yawˇ lo‸-e leh, Maˍhtaˆ meh ve yaˇ miˇ teˇ gʼaˇ yawˇ ve aˉ hkʼaw lo yawˇ hta‸ ha‸ yuˬ ve yoˬ. 39Yaˇ miˇ oˇ ve lehˬ, Maˍriˆ meh ve awˬ nyi ma teˇ gʼaˇ cawˬ ve yoˬ. Maˍriˆ lehˬ, Jawˇ mawˇ Yeˍsuˆ ve hkui paˇ lo mui taˍ leh yawˇ ve tawˇ hkawˇ hta‸ na chehˇ ve yoˬ. 40Maˍhtaˆ lehˬ, te caˍ te taw ve kanˉ maˇ jaˇ leh, nyi ma sho‸ sha‸ ve yoˬ. Yawˇ Yeˍsuˆ geh kʼai leh, Jawˇmawˇ-oˬ, ngaˬ awˬ nyi ma lehˬ, te caˍ te taw piˇ ve kanˉ te tuˬ ngaˬ hta‸ ceh tiˉ teh taˍ laˇ ve hta‸ nawˬ te‸ chiˉ maˇ dawˇ leh laˇ. Ngaˬ hta‸ ga laˇ tuˬ yawˇ hta‸ hto piˇ-oˆ teh‸ kʼoˆ piˇ ve yoˬ.
41Jawˇmawˇ Yeˍsuˆ kʼaw‸ kʼoˆ ve, Maˍhtaˆ-oˬ, Maˍhtaˆ-oˬ, nawˬ lehˬ laiˉ ceuˬ hta‸ dawˇ haˍ dawˇ hkiˉ chehˇ ve yoˬ. 42Ya‸ hkʼaˇ, teˇ ceuˬ hta‸ ceh tiˉ loˍ ve yoˬ. Maˍriˆ lehˬ, da‸ ve oˇ ve teˇ ceuˬ hta‸ leuˆ yuˬ peuˬ. Oˇ ve teˇ ceuˬ yawˇ geh shu hiˉ yuˬ maˇ gʼa teh‸ yawˇ hta‸ kʼoˆ piˇ ve yoˬ.
Currently Selected:
Luˉka‸ li‸ 10: LHBE
Highlight
Share
Copy
Want to have your highlights saved across all your devices? Sign up or sign in
Lahu Bible Edited © Thailand Bible Society and Bible Society of Myanmar, 2010, 2020.
