Luˉka‸ li‸ 8

Yaˇ miˇ teˇ hpaˍ Yeˍsuˆ hta‸ te caˍ te taw piˇ ve

1Oˇ ve awˬ hkʼaw‸ nawˉ maˇ maw maw, Yeˍsuˆ lehˬ teˇ venˇ peuˬ teˇ venˇ, teˇ hkʼaˆ peuˬ teˇ hkʼaˆ lo kʼai leh, Gʼuiˬsha ve mvuhˇmiˬ awˬ lawn ha lehˬ ve bon hkawˇ hto piˇ maˍ piˇ ve yoˬ. 2Tcuh yaˇ teˇ chi nyiˇ gʼaˇ ka‸ yawˇ geh kʼai ve yoˬ. Haiˬ ve neˇ hta‸ Yeˍsuˆ gʼa‸ kʼoˬ peuˬ leh naˬ ve gawˬ ve teˇ hpaˍ hta‸ yawˇ gu na-e piˇ peuˬ ve yaˇ miˇ teˇ hpaˍ hpaˍ htawˇ yawˇ geh kʼai ve yoˬ. Yawˇ hui teˇ hpaˍ lehˬ, neˇ suhˍ hkeh tawˆ kʼai peuˬ ve Maˍgaˍdaˍlaˆ teh‸ kʼoˆ ve Maˍriˆ, 3Heˍroˆ ve mawˇ ha‸ shaˉ shehˍ hpaˇ Hkuˇsaˆ ve awˬ miˇ ma Yoˇhaˍnaˆ, Suˇsaˍnaˆ hui leh, awˬ kaˍ awˬ nu yaˇ miˇ laiˉ gʼaˇ, a shu yawˇ ve mawˇ jeˬ hta‸ yehˇ leh yawˇ hui hta‸ te caˍ te taw piˇ ve yoˬ.

Awˬ yawˇ sheˍ paˍ awˬ lawn tawˇ pa haˉ te maˍ ve

4Chaw awˬ moˍ lonˉ hpawnˬ la leh, teˇ venˇ le le lo chehˇ ve chaw hui yawˇ geh gaˬ la htaˇ, yawˇ yawˇ hui hta‸ tawˇ pa haˉ te maˍ piˇ ve,

5Awˬ yawˇ sheˍ paˍ teˇ gʼaˇ awˬ yawˇ ca sheˍ ve yoˬ. Yawˇ sheˍ ve teˇ yanˇ, awˬ yawˇ teˇ hpaˍ hpaˍ ya‸ kʼaw hpuiˇ lo ce leh, shu naˆ toˇ leh, mvuhˇ hpe lo poˬ ve ngaˆ teˇ hpaˍ gʼawˆ caˇ sheˬ ve yoˬ. 6Awˬ yawˇ teˇ hpaˍ hpaˍ haˉ pui awˬ hkʼoˆ ce leh yeˬ la ve teˇ yanˇ, miˬ shaˍ goˇ ve pa taw nawˍ kʼai goˇ kʼai ve yoˬ. 7Awˬ yawˇ teˇ hpaˍ hpaˍ aˉ chuˇ de lo ce leh, aˉ chuˇ buiˇ geh yeˬ la ve pa taw, aˉ chuˇ buiˇ lehˬ awˬ yeˬ oˇ ve hta‸ hoˆ sheˬ ve yoˬ. 8Awˬ yawˇ teˇ hpaˍ hpaˍ miˬ hkuiˇ da‸ kuiˬ lo ce leh awˬ yeˬ yeˬ la uiˍ la ve teˇ yanˇ, awˬ shiˍ teˇ ha pun naw‸ maˇ la ve yoˬ.

Yawˇ chi hkʼe kʼoˆ peuˬ hkʼaw‸ nawˉ, Kaˇ tuˬ naˍ paw cawˬ ve chaw hui hkʼa deh‸ na-o teh‸ yawˇ kʼoˆ ve yoˬ.

9Oˇ htaˇ, yawˇ ve awˬ la‸ gʼawˇ teˇ hpaˍ lehˬ, Tawˇ pa haˉ chi aˬ hto‸ ma tcuhˉ kuiˬ le teh‸, yawˇ hta‸ na nyi htaˇ, yawˇ kʼoˆ ve, 10Gʼuiˬsha ve mvuhˇmiˬ awˬ lawn faˉ taˍ ve awˬ ceuˬ teˇ hpaˍ hta‸ nawˬ hui shiˍ tuˬ a hkaw-anˬ cawˬ ve yoˬ. Ya‸ hkʼaˇ, awˬ kaˍ awˬ nu chaw teˇ hpaˍ lehˬ, nyi ve ka‸ nyi maˇ mawˬ leh, kaˇ ve ka‸ na maˇ gʼa tuˬ yawˇ hui hta‸ tawˇ pa haˉ ceh tiˉ gʼa te maˍ piˇ ve yoˬ.

11Tawˇ pa haˉ ve tcuhˉ kuiˬ lehˬ chi hkʼe yoˬ. Awˬ yawˇ lehˬ, Gʼuiˬsha ve bon hkawˇ hpeh‸ ve yoˬ. 12Ya‸ kʼaw hpuiˇ lo ve chaw teh‸ kʼoˆ ve teˇ hpaˍ lehˬ, bon hkawˇ oˇ ve hta‸ gʼa kaˇ peuˬ hkʼaw‸ nawˉ, hkʼaˬ hkʼe te leh yawˇ hui maˇ gʼa yonˍ leh, htaiˍ hkʼaw‸ ve hta‸ maˇ gʼa tuˬ, neˇhaiˬ laˬ leh yawˇ hui ve nyi ma awˬ hkʼaw lo bon hkawˇ oˇ ve hta‸ yuˬ tawˆ ve yoˬ. 13Haˉ pui hkʼoˆ ve chaw teh‸ kʼoˆ ve teˇ hpaˍ lehˬ, bon hkawˇ oˇ ve hta‸ gʼa kaˇ htaˇ, ha lehˬ ha kʼa ha‸ yuˬ ve chaw teˇ hpaˍ hta‸ kʼoˆ ve yoˬ. Ya‸ hkʼaˇ, yawˇ hui awˬ geu maˇ naw‸ ve hta‸ pa taw, teˇ tcuhˉ teˇ jaw ceh yonˍ leh, beˬ ve lawˇ ve hta‸ gʼa hpuˇ da‸ ve teˇ yanˇ kʼaw‸ luˬ kʼai ve yoˬ. 14Aˉ chuˇ de lo ce ve teˇ hpaˍ lehˬ, yawˇ hui bon hkawˇ hta‸ gʼa kaˇ ve chaw teˇ hpaˍ hpeh‸ ve yoˬ. Ya‸ hkʼaˇ, yawˇ hui miˬguiˬ hkʼoˆ lo a sha‸ te‸ chehˇ ve teˇ yanˇ, dawˇ haˍ gaˇ haˍ ve teˇ hpaˍ, paw sha ve teˇ hpaˍ leh ha lehˬ tuˬ ve awˬ ceuˬ teˇ hpaˍ yawˇ hui hta‸ hoˆ taˍ leh, awˬ shiˍ maˬ la meh la maˇ gʼa. 15Miˬ hkuiˇ da‸ kuiˬ lo ce ve teˇ hpaˍ lehˬ, hteˇ ve leh da‸ ve nyi ma awˬ hkʼaw lo gʼa kaˇ ve chaw teˇ hpaˍ hta‸ kʼoˆ ve yoˬ. Yawˇ hui lehˬ, bon hkawˇ oˇ ve hta‸ vawˆ yeˬ taˍ leh, yeunˇ hkanˍ ve awˬ hkʼaw lo awˬ shiˍ naw‸ la ve yoˬ.

Kawˆ faiˇ tuˉ leh mu‸ hkʼu tcuhˍ mvuh‸ ve maˇ te jaw

16Kawˆ faiˇ tuˉ leh mu‸ hkʼu tcuhˍ mvuh‸ taˍ ve maˇ kʼoˆ, ku-iˍ hawˉ teh taˍ ve maˇ kʼoˆ, chaw teˇ gʼaˇ ka‸ maˇ te jaw. Hkʼa lo‸ la ve chaw teˇ hpaˍ awˬ gʼeuˆ hta‸ mawˬ hpeh‸ tuˬ, kawˆ faiˇ taˍ kuiˬ awˬ hkʼoˆ lo teh taˍ ve yoˬ. 17Awˬ lawn kʼo, hkʼa faˉ taˍ ve awˬ ceuˬ teˇ hpaˍ hkʼa tawˍ lehˆ tawˆ la tuˬ yoˬ. Shu hta‸ maˇ shiˍ tcuh ve awˬ ceuˬ teˇ hpaˍ htawˇ shu shiˍ la leh, awˬ gʼeuˆ ba kuiˬ lo tawˆ la tuˬ yoˬ.

18Hkʼe te leh, nawˬ hui hkʼa gʼa kaˇ ve teˇ hpaˍ hta‸ shaˍ ti‸ taˍ-o‸. Awˬ lawn kʼo, cawˬ ve chaw hta‸ kʼaw‸ htehˍ piˇ tuˬ yoˬ. Maˇ cawˬ ve chaw geh, yawˇ cawˬ ve teh‸ dawˇ taˍ ve teˇ hpaˍ hta‸ ka‸ kʼaw‸ yuˬ tawˆ sheˬ tuˬ yoˬ teh‸ kʼoˆ ve yoˬ.

Yeˍsuˆ ve awˬ e leh awˬ nyi paˍ teˇ hpaˍ

19Oˇ htaˇ, yawˇ ve awˬ e leh awˬ nyi paˍ teˇ hpaˍ yawˇ geh laˬ ve yoˬ. Ya‸ hkʼaˇ chaw awˬ moˍ lonˉ hpawnˬ chehˇ taˍ ve pa taw, yawˇ geh lo‸-e maˇ hpeh‸. 20Chaw teˇ hpaˍ yawˇ hta‸ kʼoˆ piˇ ve, Nawˬ ve awˬ e leh nawˬ ve awˬ nyi paˍ teˇ hpaˍ nawˬ hta‸ mawˬ gaˇ leh, awˬ baˬ hpawˇ lo huˉ chehˇ taˍ ve yoˬ teh‸ kʼoˆ ve yoˬ.

21Yawˇ yawˇ hui hta‸ kʼaw‸ kʼoˆ piˇ ve, Gʼuiˬ sha ve tawˇ hkawˇ hta‸ kaˇ leh na yuˬ ve chaw teˇ hpaˍ lehˬ, ngaˬ ve awˬ e leh ngaˬ ve awˬ nyi paˍ teˇ hpaˍ hpeh‸ ve yoˬ.

Yeˍsuˆ mvuhˇ haw hta‸ dehˬ piˇ lawˬ ve

22Teˇ nyi htaˇ Yeˍsuˆ lehˬ, yawˇ ve awˬ la‸ gʼawˇ hui geh haw lo‸ kʼoˍ hkʼaw lo‸-e leh, Ngaˬ hui gʼuiˬ po coˇ paˉ hpawˇ lo hkanˍ kʼai-a veuˬ teh‸ yawˇ yawˇ hui hta‸ kʼoˆ piˇ leh, yawˇ hui hkanˍ kʼai ve yoˬ. 23Yawˇ hui hkanˍ kʼai chehˇ ve teˇ yanˇ, Yeˍsuˆ zuh‸ muiˉ kʼa sheˬ ve yoˬ. Oˇ htaˇ, gʼuiˬ po hta‸ mvuhˇ haw lonˉ meuˆ la leh, haw lo‸ kʼoˍ hkʼaw iˉ kaˆ biˇ la chehˇ ve pa taw, yawˇ hui gʼa luˬ la paˇ neˇ ve yoˬ. 24Awˬ la‸ gʼawˇ teˇ hpaˍ yawˇ hta‸ ca nawˍ piˇ leh, Jawˇmawˇ-oˬ, Jawˇmawˇ-oˬ, ngaˬ hui gʼa luˬ la yoˬ teh‸ kʼoˆ piˇ ve yoˬ.

Oˇ htaˇ, yawˇ nawˇ la leh, mvuhˇ haw leh gʼuiˬ baˇ teˇ hpaˍ hta‸ deˇ piˇ htaˇ, mvuhˇ haw leh gʼuiˬ baˇ teˇ hpaˍ dehˬ sheˬ leh ta‸ iˉ gawˬ lehˍ hpeh‸ sheˬ ve yoˬ. 25Oˇ htaˇ Yeˍsuˆ kʼoˆ ve, Nawˬ hui yonˍ ve nyi ma hkʼaˬ lo cawˬ le teh‸, yawˇ hui hta‸ na nyi ve yoˬ.

Yawˇ hui kawˆ jaˇ anˇ jaˇ leh, teˇ gʼaˇ leh teˇ gʼaˇ kʼoˆ da‸ ve, Chi hpaˇ a shu le. Mvuhˇ haw leh iˉ kaˆ ka‸ yawˇ tawˇ piˇ ve hkawˇ hta‸ na yuˬ ve law teh‸ kʼoˆ ve yoˬ.

Neˇ geh ve Geˍraˍtaˆ chaw hta‸ gu na-e piˇ ve

26Oˇ htaˇ yawˇ hui lehˬ, Gaˍliˍlehˇ mvuhˇmiˬ hta‸ tawˍ da‸ taˍ ve Geˍraˍtaˆ mvuhˇmiˬ lo gaˬ ve yoˬ. 27Yawˇ miˬguiˬ hkʼoˆ lo gaˬ la ve teˇ yanˇ, venˇ oˇ ve awˬ hkʼaw lo neˇ geh ve chaw teˇ gʼaˇ yawˇ hta‸ ca ha‸ la ve yoˬ. Chaw oˇ ve lehˬ, awˬ yanˇ maw chaweh ve awˬ hkʼaw lo veu‸ kʼaˇ maˇ veu‸ leh, yehˬ awˬ hkʼaw lo ka‸ maˇ chehˇ. Chaw tuˍ hpfuh teˇ hpaˍ cawˬ kuiˬ lo tiˉ chehˇ taˍ ve yoˬ. 28Chaw oˇ ve Yeˍsuˆ hta‸ gʼa mawˬ htaˇ kuˬ leh, yawˇ mehˆ gʼuˇ suhˍ boˆ sheˬ leh, Mvuh jaˇ ve Gʼuiˬsha ve Yaˇ hpu Yeˍsuˆ-oˬ, nawˬ ngaˬ hta‸ hkʼaˬ hkʼe caˉ da‸ le. Nawˬ ngaˬ hta‸ maˇ gʼa fawˉ mehˍ tuˬ ngaˬ nawˬ hta‸ lawˬ hkawˉ ve yoˬ teh‸, awˬ hkawˇ bvuhˬ chaweh kuˬ leh kʼoˆ piˇ ve yoˬ. 29Awˬ lawn kʼo, yawˇ awˬ hkʼaw lo tawˆ kʼai tuˬ, neˇ cha‸ chiˆ oˇ ve hta‸ Yeˍsuˆ tawˇ piˇ taˍ ve yoˬ. Ponˬ laˬ htaˇ neˇ oˇ ve lehˬ, yawˇ hta‸ laiˉ pawˆ yuˬ tiˍ taˍ ve pa taw, shu yawˇ hta‸ hkʼa deh‸ yuˬ haw taˍ leh, sho caˆ leh sho kawˬ hta‸ yuˬ hpeh tiˍ taˍ ve htawˇ, hpeh taˍ ve oˇ ve teˇ hpaˍ hta‸ yawˇ gʼawˬ cheˆ leh, neˇ oˇ ve yawˇ hta‸ heh puiˉ hkʼaw lo gʼa‸ kʼai ve yoˬ.

30Nawˬ aˬ hto‸ ma meh le teh‸ Yeˍsuˆ yawˇ hta‸ na nyi htaˇ, Ngaˬ ve awˬ meh lehˬ Leˍjonˍ yoˬ teh‸, yawˇ kʼaw‸ kʼoˆ piˇ ve yoˬ. Awˬ lawn kʼo, yawˇ awˬ hkʼaw lo neˇ maˇ maˇ chehˇ ve yoˬ. 31Naˉ jaˇ ve teˇ kaˬ lo lo‸-e loˬ teh‸ Yeˍsuˆ yawˇ hui hta‸ tawˇ maˇ gʼa piˇ tuˬ, neˇ oˇ ve teˇ hpaˍ Yeˍsuˆ hta‸ lawˬ hkawˉ ve yoˬ.

32Hkʼaw oˇ ve awˬ hkʼoˆ lo va‸ awˬ moˍ lonˉ kʼaˆ caˇ chehˇ ve yoˬ. Va‸ oˇ ve teˇ hpaˍ awˬ hkʼaw lo yawˇ hui gʼa geh tuˬ, yawˇ hta‸ lawˬ hkawˉ htaˇ, yawˇ yawˇ hui hta‸ a hkaw-anˬ piˇ ve yoˬ. 33Hkʼe te leh, neˇ teˇ hpaˍ chaw oˇ ve awˬ hkʼaw lo tawˆ-e leh, va‸ teˇ hpaˍ awˬ hkʼaw lo lo‸-e ve yoˬ. Oˇ htaˇ, va‸ awˬ moˍ lonˉ lehˬ, miˬ haˍ kuiˬ lo gʼaˇ hte‸ gʼuiˇ ya‸-e leh, gʼuiˬ po hkʼaw lo lo‸-e leh kʼa suh peuˬ sheˬ ve yoˬ.

34Va‸ hawˉ paˍ teˇ hpaˍ chi hkʼe hpeh‸ la ve hta‸ gʼa mawˬ htaˇ, yawˇ hui gʼuiˇ kʼo‸-e leh, awˬ lawn oˇ ve hta‸ venˇ hkʼaˆ teˇ hpaˍ awˬ hkʼaw lo ca hto piˇ ve yoˬ. 35Hkʼe te leh, hkʼaˬ hkʼe hpeh‸ la ve awˬ lawn hta‸ gʼa shiˍ tuˬ, chaw teˇ hpaˍ ca nyi ve yoˬ. Yawˇ hui Yeˍsuˆ geh gaˬ la htaˇ, neˇ teˇ hpaˍ tawˆ kʼai peuˬ ve chaw teˇ gʼaˇ lehˬ, veu‸ kʼaˇ veu‸ deh leh, nyi ma awˉ lawˉ htaˇ hkʼa shuˍ shuˍ kʼaw‸ da‸ la leh Yeˍsuˆ hkui paˇ lo mui chehˇ ve hta‸ gʼa mawˬ ve teˇ yanˇ, yawˇ hui kawˆ jaˇ ve yoˬ. 36Gʼa mawˬ taˍ ve chaw teˇ hpaˍ lehˬ, neˇ geh ve chaw oˇ ve teˇ gʼaˇ hkʼaˬ hkʼe te kʼaw‸ na-e la ve awˬ lawn yawˇ hui hta‸ hto piˇ ve yoˬ. 37Oˇ htaˇ, Geˍraˍtaˆ mvuhˇmiˬ teˇ tawn awˬ hkʼaw lo hkʼa chehˇ ve chaw hkʼa peu-eˬ maˇ maˇ kawˆ jaˇ ve pa taw, Yeˍsuˆ yawˇ hui geh lo tawˆ kʼai tuˬ yawˇ hta‸ lawˬ hkawˉ ve yoˬ. Hkʼe te leh, Yeˍsuˆ haw lo‸ kʼoˍ hkʼaw lo‸-e leh kʼo‸-e ve yoˬ. 38Neˇ teˇ hpaˍ tawˆ kʼai peuˬ ve chaw lehˬ, yawˇ geh teˇ geh chehˇ tuˬ Yeˍsuˆ hta‸ lawˬ hkawˉ ve yoˬ.

Ya‸ hkʼaˇ Yeˍsuˆ kʼoˆ piˇ ve, 39Nawˬ ve aˉ hkʼaw lo kʼo‸-e leh, Gʼuiˬsha nawˬ hta‸ hkʼaˬ ma ga laˇ peuˬ ve awˬ lawn ca hto piˇ-oˆ teh‸ kʼoˆ leh, yawˇ hta‸ kʼo‸-e tcuh ve yoˬ. Hkʼe te leh yawˇ tawˆ kʼai leh, Yeˍsuˆ yawˇ hta‸ hkʼaˬ ma ga laˇ peuˬ ve awˬ lawn oˇ ve teˇ venˇ hkʼa peu-eˬ awˬ hkʼaw lo ca hto piˇ ve yoˬ.

Yaˍiˉruˆ ve yaˇ miˇ leh Yeˍsuˆ ve aˉ po‸ hta‸ htawˇ ve yaˇ miˇ

40Yeˍsuˆ kʼaw‸ gaˬ la ve teˇ yanˇ, chaw awˬ moˍ lonˉ yawˇ hta‸ dawˇ law chehˇ ve pa taw, ha lehˬ ha kʼa yawˇ hta‸ ha‸ yuˬ ve yoˬ. 41Oˇ htaˇ, Yaˍiˉruˆ meh ve bon yehˬ awˬ hoˉ teˇ gʼaˇ laˬ ve yoˬ. Yawˇ lehˬ, Yeˍsuˆ hkui paˇ lo boˆ sheˬ leh, yawˇ ve aˉ hkʼaw lo laˬ tuˬ, Yeˍsuˆ hta‸ gʼaˇ hte‸ lawˬ hkawˉ ve yoˬ. 42Awˬ lawn kʼo, a sha‸ teˇ chi nyiˇ hkʼaw‸ hkʼe gaˬ ve yawˇ ve yaˇ miˇ tiˍ suh la paˇ neˇ ve yoˬ.

Yeˍsuˆ kʼai chehˇ ve teˇ yanˇ chaw awˬ moˍ lonˉ yawˇ hta‸ buiˆ heuˆ ca‸ heuˆ chehˇ ve yoˬ. 43Oˇ htaˇ, teˇ chi nyiˇ hkʼaw‸ hkʼa gaˬ awˬ suhˍ ya‸ la leh naˬ chehˇ ve yaˇ miˇ teˇ gʼaˇ cawˬ ve yoˬ. Chaw teˇ gʼaˇ ka‸ yawˇ hta‸ gu na-e piˇ maˇ gʼa. 44Yawˇ lehˬ Yeˍsuˆ awˬ hkʼaw‸ nawˉ hpawˇ lo laˬ leh, yawˇ ve aˉ po‸ awˬ caˍ hta‸ htawˇ ve teˇ yanˇ, yawˇ awˬ suhˍ ya‸ la ve teˇ cawˬ haˉ cheh sheˬ ve yoˬ. 45Yeˍsuˆ lehˬ, Ngaˬ hta‸ a shu htawˇ ve le teh‸ na nyi ve yoˬ.

Chaw chi ma ve lehˬ, Teˇ gʼaˇ ka‸ maˇ htawˇ teh‸ gʼawˬ chehˇ ve teˇ yanˇ, Peˍtruˆ kʼoˆ ve, Jawˇmawˇ-oˬ, chaw awˬ moˍ lonˉ nawˬ hta‸ buiˆ heuˆ ca‸ heuˆ chehˇ leh cehˍ cehˍ nuˆ nuˆ te chehˇ ve maˇ heˆ laˇ teh‸ kʼoˆ piˇ ve yoˬ.

46Yeˍsuˆ lehˬ, Chaw teˇ gʼaˇ gʼaˇ ngaˬ hta‸ htawˇ ve yoˬ. Awˬ lawn kʼo, ngaˬ awˬ hkʼaw lo kanˇ paˆ tawˆ kʼai peuˬ ve hta‸ ngaˬ shiˍ ve yoˬ teh‸ kʼoˆ ve yoˬ. 47Yaˇ miˇ oˇ ve lehˬ, va‸ taˍ maˇ hpeh‸ ve hta‸ shiˍ ve teˇ yanˇ, cheˇ ve awˬ hkʼaw lo Yeˍsuˆ mehˆ gʼuˇ suhˍ boˆ sheˬ leh, aˬ hto‸ ma pa taw yawˇ hta‸ htawˇ ve maˇ kʼoˆ, oˇ teˇ hkui awˬ hkʼaw lo yawˇ hkʼaˬ hkʼe te na-e la ve awˬ lawn maˇ kʼoˆ, chaw chi ma ve mehˆ gʼuˇ suhˍ yawˇ hta‸ kʼoˆ piˇ ve yoˬ. 48Yeˍsuˆ lehˬ, Yaˇ miˇ-oˬ, nawˬ yonˍ ve teˇ ceuˬ lehˬ nawˬ hta‸ na-e la piˇ peuˬ. Dawˇ sha ve awˬ hkʼaw lo kʼo‸-e loˬ teh‸, yawˇ hta‸ kʼoˆ piˇ ve yoˬ.

49Yawˇ oˇ hkʼe kʼoˆ chehˇ htaˇ, bon yehˬ awˬ hoˉ teˇ gʼaˇ ve yehˬ lo laˬ ve chaw teˇ gʼaˇ kʼoˆ ve, Nawˬ ve yaˇ miˇ suh peuˬ. Saˍ la‸ hta‸ taˇ kʼaw‸ sho‸ sha‸ piˇ loˬ teh‸ kʼoˆ piˇ ve yoˬ.

50Tawˇ hkawˇ oˇ ve hta‸ Yeˍsuˆ gʼa kaˇ htaˇ, bon yehˬ awˬ hoˉ teˇ gʼaˇ hta‸, Taˇ kawˆ. Yonˍ ve tiˉ te-o. Yawˇ na-e la tuˬ yoˬ teh‸ kʼoˆ piˇ ve yoˬ.

51Yehˬ lo yawˇ gaˬ la ve teˇ yanˇ, Peˍtruˆ, Yoˇhanˬ, Yaˍkoˆ leh, yaˇ miˇ ve awˬ pa awˬ e hta‸ maˇ heˆ kʼo, yawˇ geh teˇ geh yehˬ hkʼaw lo teˇ gʼaˇ hta‸ ka‸ maˇ lo‸-e tcuh. 52Yaˇ miˇ hta‸ pa taw chaw hkʼa peu-eˬ hawˬ leh paˆ hawˬ chehˇ ve yoˬ. Yeˍsuˆ lehˬ, Taˇ hawˬ. Yawˇ suh ve maˇ heˆ. Zuh‸ muiˉ kʼa chehˇ ve yoˬ teh‸ kʼoˆ ve yoˬ.

53Yaˇ miˇ oˇ ve suh peuˬ ve hta‸ yawˇ hui shiˍ ve pa taw, yawˇ hui hta‸ gʼuiˬ ve yoˬ. 54Yaˇ miˇ ehˉ ve la‸ sheh hta‸ yawˇ vawˆ leh, Yaˇ miˇ ehˉ-oˬ, tu la-o teh‸ kuˬ leh kʼoˆ piˇ ve yoˬ. 55Oˇ htaˇ, yawˇ ve co ha kʼaw‸ la leh, teˇ cawˬ haˉ yawˇ tu la ve yoˬ. Yawˇ hta‸ caˇ tuˬ caˍ piˇ-oˆ teh‸, Yeˍsuˆ kʼoˆ piˇ ve yoˬ. 56Yaˇ ehˉ ve awˬ pa awˬ e lehˬ, anˇ jaˇ ve yoˬ. Hpeh‸ la ve awˬ lawn chi, chaw teˇ gʼaˇ hta‸ ka‸ maˇ gʼa hto piˇ tuˬ, yawˇ yawˇ huiˉ maˬ hta‸ tawˇ piˇ taˍ ve yoˬ.

Currently Selected:

Luˉka‸ li‸ 8: LHBE

Highlight

Copy