Luˉka‸ li‸ 5

Ngaˇ gʼa maˇ jaˇ ve

1Teˇ pawˆ htaˇ, chaw awˬ moˍ lonˉ lehˬ, Gʼuiˬsha ve tawˇ hkawˇ hta‸ na tuˬ Yeˍsuˆ geh buiˆ lo‸ la chehˇ ve yoˬ. Yawˇ lehˬ, Geˍneˍsaˍrehˆ gʼuiˬ po paˇ lo huˉ taˍ leh, 2gʼuiˬ pfuhˍ paˇ lo haw lo‸ kʼoˍ nyiˇ maˬ deh taˍ ve hta‸ yawˇ gʼa mawˬ ve yoˬ. Ngaˇ ca paˍ teˇ hpaˍ lehˬ, haw lo‸ kʼoˍ hkʼaw tawˆ kʼai peuˬ leh, yawˇ hui ve geu‸ teˇ hpaˍ hta‸ tsuhˇ baˬ chehˇ ve yoˬ. 3Siˉmonˍ ve haw lo‸ kʼoˍ teˇ maˬ hkʼaw yawˇ lo‸-e leh, iˉ kaˆ hkʼaw a ciˉ jiˆ kʼai tuˬ Siˉmonˍ hta‸ lawˬ ve yoˬ. Oˇ htaˇ, yawˇ haw lo‸ kʼoˍ hkʼaw mui taˍ leh, chaw awˬ moˍ lonˉ hta‸ maˍ piˇ ve yoˬ.

4Yawˇ maˍ piˇ ve hpehˇ peuˬ hkʼaw‸ nawˉ, Siˉmonˍ hta‸ kʼoˆ piˇ ve, Iˉ kaˆ naˉ kuiˬ lo jiˆ kʼai leh, ngaˇ gʼa tuˬ nawˬ hui ve geu‸ teˇ hpaˍ hta‸ hpehˇ-oˆ teh‸ kʼoˆ piˇ ve yoˬ.

5Siˉmonˍ kʼaw‸ kʼoˆ ve, Jawˇmawˇ-oˬ, ngaˬ hui aˬ miˍ haˉ teˇ haˉ mvuhˇ hkʼa htiˇ gʼaˇ hte‸ te ve htawˇ, teˇ hkeh ka‸ maˇ gʼa. Ya‸ hkʼaˇ, nawˬ ve tawˇ hkawˇ hta‸ pa taw, geu‸ teˇ hpaˍ hta‸ ngaˬ hpehˇ tuˬ yoˬ teh‸ kʼoˆ piˇ ve yoˬ. 6Yawˇ hui oˇ hkʼe te ve teˇ yanˇ, ngaˇ geh maˇ jaˇ ve pa taw, yawˇ hui ve geu‸ teˇ hpaˍ tzuh‸ paˇ neˇ ve yoˬ. 7Oˇ htaˇ, awˬ kaˍ awˬ nu haw lo‸ kʼoˍ hkʼaw chehˇ ve awˬ chawˇ teˇ hpaˍ laˬ ga laˇ tuˬ yawˇ hui la‸ mehˆ muiˬ piˇ ve yoˬ. Awˬ chawˇ teˇ hpaˍ laˬ leh, haw lo‸ kʼoˍ oˇ ve nyiˇ maˬ awˬ hkʼaw lo ngaˇ yuˬ keu ve teˇ yanˇ, ngaˇ hkʼa biˇ cawˬ ve pa taw, haw lo‸ kʼoˍ oˇ ve nyiˇ maˬ aˬ laˬ hkʼe iˉ kaˆ tuˍ sheˬ ve yoˬ. 8Siˉmonˍ Peˍtruˆ oˇ ve hta‸ gʼa mawˬ ve teˇ yanˇ, Yeˍsuˆ hkui paˇ lo yawˇ boˆ sheˬ leh, Jawˇmawˇ-oˬ, ngaˬ geh lo tawˆ kʼai-o. Awˬ lawn kʼo, ngaˬ lehˬ venˇbaˆ uiˍ ve chaw hpeh‸ ve yoˬ teh‸ kʼoˆ piˇ ve yoˬ.

9Yawˇ hui ngaˇ gʼa maˇ jaˇ ve hta‸ pa taw, Siˉmonˍ leh yawˇ geh chehˇ ve chaw hkʼa peu-eˬ anˇ jaˇ ve yoˬ. 10Siˉmonˍ geh teˇ geh kanˉ te ve yawˇ ve awˬ chawˇ, Zeˍbeˍdehˇ ve awˬ yaˇ paˍ Yaˍkoˆ leh Yoˇhanˬ htawˇ, anˇ jaˇ ve yoˬ. Oˇ htaˇ, Yeˍsuˆ Siˉmonˍ hta‸ kʼoˆ piˇ ve, Taˇ kawˆ. Ya‸ nyi hkʼaw‸ nawˉ kʼo, nawˬ lehˬ chaw ca shehˍ hpaˇ hpeh‸ tuˬ yoˬ teh‸ kʼoˆ ve yoˬ.

11Yawˇ hui teˇ hpaˍ lehˬ, gʼuiˬ pfuhˍ paˇ lo haw lo‸ kʼoˍ teˇ hpaˍ hta‸ deh piˇ peuˬ hkʼaw‸ nawˉ, hkʼa peu-eˬ hta‸ baˬ taˉ leh Yeˍsuˆ awˬ hkʼaˇ suh kʼai ve yoˬ.

Yeˍsuˆ hkiˬ tu‸ paˍ hta‸ gu na-e piˇ ve

12Teˇ pawˆ htaˇ, yawˇ venˇ teˇ venˇ awˬ hkʼaw lo chehˇ taˍ ve teˇ yanˇ, awˬ to teˇ to hkʼa peu-eˬ hkiˬ tu‸ keuˆ ve chaw teˇ gʼaˇ cawˬ ve yoˬ. Yawˇ Yeˍsuˆ hta‸ mawˬ ve teˇ yanˇ, mehˆ hpfuhˇ miˬ chaˇ hkʼoˆ boˆ sheˬ leh, Jawˇmawˇ-oˬ, nawˬ te gaˇ ve kʼo, ngaˬ hta‸ da‸ la kehˬ la tuˬ nawˬ te hpeh‸ ve yoˬ teh‸ kʼoˆ leh lawˬ hkawˉ ve yoˬ.

13Yeˍsuˆ la‸ sheh che leh yawˇ hta‸ htawˇ leh kʼoˆ ve, Ngaˬ te gaˇ ve yoˬ. Da‸ la kehˬ la-o teh‸ kʼoˆ piˇ ve yoˬ. Teˇ cawˬ haˉ yawˇ awˬ hkʼaw lo hkiˬ tu‸ a naˍ mehˉ kʼai ve yoˬ. 14Chaw teˇ gʼaˇ hta‸ ka‸ maˇ gʼa hto piˇ tuˬ Yeˍsuˆ yawˇ hta‸ tawˇ piˇ ve yoˬ. Chi hkʼoˆ ka‸ Yeˍsuˆ kʼaw‸ kʼoˆ ve, Nawˬ kʼai leh paw hkuˇ hta‸ nawˬ awˬ to ca maw piˇ-oˆ Shu mehˆ gʼuˇ suhˍ shaˉ hkiˆ hpeh‸ tuˬ, nawˬ da‸ la kehˬ la peuˬ ve awˬ pon Moˉseˍ awˬ liˇ teh taˍ ve hkʼe, tanˇ tuˬ ca tanˇ piˇ-oˆ teh‸ yawˇ hta‸ kʼoˆ piˇ ve yoˬ.

15Ya‸ hkʼaˇ, yawˇ ve awˬ lawn leuˉ leh teˇ kaˬ le le lo bvuhˬ kʼai ve pa taw, chaw awˬ moˍ lonˉ teˇ hpaˍ lehˬ, yawˇ ve hkawˇ hta‸ na tuˬ maˇ kʼoˆ, yawˇ hui ve naˬ ve gawˬ ve teˇ hpaˍ hta‸ gu na-e laˇ tuˬ maˇ kʼoˆ, hpawnˬ la ve yoˬ. 16Ya‸ hkʼaˇ Yeˍsuˆ lehˬ, yawˇ teˇ gʼaˇ tiˉ heh puiˉ hkʼaw lo kʼai leh bon ca lawˬ ve yoˬ.

Yeˍsuˆ lehˬ hkui sheh la‸ sheh suh ve chaw hta‸ gu na-e piˇ ve

17Teˇ nyi htaˇ, yawˇ maˍ piˇ chehˇ ve teˇ yanˇ, Yeˍruˆsaˍlehnˍ venˇ lo leh Gaˍliˍlehˇ mvuhˇ miˬ, Yuˇda‸ mvuhˇmiˬ awˬ hkʼaw cawˬ ve hkʼaˆ teˇ hkʼaˆ le le lo chehˇ ve Hpaˍriˍsehˇ leh awˬliˇtawˇhkawˇ maˍ ve saˍ la‸ teˇ hpaˍ gaˬ la leh mui taˍ ve yoˬ. Naˬ ve chaw hui hta‸ gu na-e piˇ tuˬ Jawˇmawˇ Gʼuiˬsha ve kanˇ paˆ yawˇ geh cawˬ ve yoˬ. 18Oˇ htaˇ chaw teˇ hpaˍ lehˬ, ku-iˍ hkʼoˆ zuh‸ chehˇ ve hkui sheh la‸ sheh suh ve chaw teˇ gʼaˇ hta‸ taˆ veu laˇ ve yoˬ. Yawˇ hta‸ yuˬ lo‸-e leh Yeˍsuˆ mehˆ gʼuˇ suhˍ taˍ tuˬ yawˇ hui ca ve yoˬ. 19Chaw awˬ moˍ lonˉ chehˇ taˍ ve pa taw, yawˇ hta‸ yuˬ lo‸-e tuˬ yawˇ hui ya‸ kʼaw ca maˇ mawˬ ve teˇ yanˇ, yehˬ awˬ hkʼoˆ lo yawˇ hui taˆ-e leh, beh taˍ ve hta‸ hpaˆ pawnˍ peuˬ hkʼaw‸ nawˉ, chaw naˬ oˇ ve leh yawˇ zuh‸ taˍ ve ku-iˍ hta‸ chaw chi ma ve awˬ kʼaw ji lo Yeˍsuˆ mehˆ gʼuˇ suhˍ hpehˇ ya‸-e ve yoˬ. 20Yeˍsuˆ lehˬ, yawˇ hui yonˍ ve nyi ma hta‸ gʼa mawˬ htaˇ, Awˬ chawˇ-oˬ, nawˬ ve venˇ baˆ hpehˇ hkʼa peuˬ teh‸ kʼoˆ piˇ ve yoˬ.

21Oˇ htaˇ, li‸ bvuh‸ paˍ teˇ hpaˍ leh Hpaˍriˍsehˇ teˇ hpaˍ kʼoˆ ve, Gʼuiˬsha hta‸ maˇ shawˍ maˇ caˆ kʼoˆ ve chaw chi teˇ gʼaˇ lehˬ, hkʼaˬ hkʼe ve chaw le. Gʼuiˬsha teˇ gʼaˇ maˇ heˆ kʼo, venˇ baˆ hta‸ a shu hpehˇ hkʼa hpeh‸ tuˬ le teh‸, yawˇ hui dawˇ chehˇ ve yoˬ.

22Yawˇ hui chi hkʼe dawˇ chehˇ ve hta‸ Yeˍsuˆ shiˍ leh yawˇ hui hta‸ kʼoˆ piˇ ve, Nawˬ hui nyi ma hkʼaw aˬ hto‸ ma te chi hkʼe dawˇ chehˇ ve le. 23Tawˇ hkʼaˬ ve teˇ hkawˇ a ciˉ kʼoˆ piˇ sha le. Nawˬ ve venˇbaˆ hpehˇ hkʼa peuˬ teh‸ kʼoˆ piˇ ve sha laˇ. Maˇ heˆ kʼo, Tu leh ya‸ kʼaw toˇ kʼai loˬ teh‸ kʼoˆ piˇ ve sha laˇ. 24Ya‸ hkʼaˇ, chaw yaˇ ve Yaˇ hpu lehˬ, miˬguiˬ hkʼoˆ lo venˇbaˆ hpehˇ hkʼa tu kanˇ paˆ cawˬ ve hta‸ nawˬ hui gʼa shiˍ tuˬ teh‸ kʼoˆ peuˬ leh, hkui sheh la‸ sheh suh ve chaw hta‸ kʼaw‸ kʼoˆ piˇ ve, Ngaˬ nawˬ hta‸ kʼoˆ laˇ ve, tu-o. Nawˬ ve ku-iˍ hta‸ taˆ leh nawˬ ve aˉ hkʼaw lo kʼo‸-e loˬ teh‸, yawˇ hta‸ kʼoˆ piˇ ve yoˬ.

25Teˇ cawˬ haˉ yawˇ hui mehˆ gʼuˇ suhˍ yawˇ tu leh, yawˇ ve zuh‸ kuiˬ hta‸ taˆ peuˬ hkʼaw‸ nawˉ, Gʼuiˬsha hta‸ chiˇ uiˍ chiˇ mvuh ve awˬ hkʼaw lo yawˇ ve aˉ hkʼaw lo kʼo‸-e ve yoˬ. 26Chaw hkʼa peu-eˬ anˇ jaˇ leh Gʼuiˬsha hta‸ chiˇ uiˍ chiˇ mvuh piˇ ve yoˬ. Yawˇ hui kawˆ jaˇ ve awˬ hkʼaw lo, Ngaˬ hui maˇ dawˇ nyi jaw ve awˬ ceuˬ teˇ hpaˍ hta‸ ya‸ nyi gʼa mawˬ peuˬ teh‸ kʼoˆ ve yoˬ.

Yeˍsuˆ Leˍviˆ hta‸ kuˬ yuˬ ve

27Oˇ ve awˬ hkʼaw‸ nawˉ Yeˍsuˆ tawˆ kʼai leh, Leˍviˆ meh ve awˬ hkawnˍ shaw paˍ teˇ gʼaˇ awˬ hkawnˍ shaw kuiˬ yehˬ awˬ hkʼaw lo mui chehˇ ve hta‸ gʼa mawˬ htaˇ, Ngaˬ hkʼaˇ suh laˬ-o‸ teh‸, yawˇ hta‸ kʼoˆ piˇ ve yoˬ. 28Yawˇ lehˬ, hkʼa cawˬ ve hkʼa peu-eˬ hta‸ baˬ taˉ leh, tu leh Yeˍsuˆ awˬ hkʼaˇ suh kʼai ve yoˬ.

29Oˇ htaˇ, Leˍviˆ lehˬ yawˇ ve aˉ hkʼaw lo Yeˍsuˆ awˬ pon hti caˇ hti dawˬ ve pawehˇ lonˉ te ve yoˬ. Awˬ hkawnˍ shaw paˍ teˇ hpaˍ leh awˬ kaˍ awˬ nu chaw maˇ maˇ, yawˇ hui geh teˇ geh hpui lawˇ paˇ lo mui caˇ chehˇ ve yoˬ. 30Hpaˍriˍsehˇ teˇ hpaˍ leh yawˇ hui ve li‸ bvuh‸ paˍ teˇ hpaˍ lehˬ, Yeˍsuˆ ve awˬ la‸ gʼawˇ hui hta‸ ca beu ca hkʼaiˉ leh kʼoˆ ve, Naw hui aˬ hto‸ ma pa taw awˬ hkawnˍ shaw paˍ leh venˇbaˆ yaˇ hui geh hkʼa geh hti caˇ hti dawˬ ve le teh‸ na nyi ve yoˬ.

31Yeˍsuˆ yawˇ hui hta‸ kʼaw‸ kʼoˆ piˇ ve, Chehˇ sha ve chaw hui naˆ tsuhˇ shehˍ hpaˇ hta‸ maˇ loˍ. Naˬ ve chaw hui ceh tiˉ loˍ ve yoˬ. 32Hteˇ ve cawˇ ve chaw hui hta‸ kuˬ yuˬ tuˬ ngaˬ laˬ ve maˇ heˆ. Venˇbaˆ yaˇ teˇ hpaˍ, a shu yawˇ ve venˇbaˆ hta‸ dawˇ hpfuhˆ tuˬ awˬ pon kuˬ yuˬ tuˬ ngaˬ laˬ ve yoˬ teh‸ kʼoˆ piˇ ve yoˬ.

Caˇ tuˬ ce ve awˬ lawn shu na nyi ve

33Oˇ htaˇ, yawˇ hui yawˇ hta‸ kʼaw‸ kʼoˆ piˇ ve, Yoˇhanˬ ve awˬ la‸ gʼawˇ teˇ hpaˍ lehˬ, teˇ hkui teˇ hkui caˇ tuˬ ce leh bon lawˬ ve yoˬ. Hpaˍriˍsehˇ ve awˬ la‸ gʼawˇ teˇ hpaˍ htawˇ oˇ hkʼe te chehˇ ve yoˬ. Ya‸ hkʼaˇ, nawˬ ve awˬ la‸ gʼawˇ teˇ hpaˍ lehˬ, caˇ chehˇ dawˬ chehˇ ve yoˬ.

34Yeˍsuˆ yawˇ hui hta‸ kʼaw‸ kʼoˆ piˇ ve, Awˬ miˇ ma heuˆ shehˍ hpaˇ lehˬ, hkehˉ caˇ la ve chaw hui geh chehˇ htaˇ, nawˬ hui yawˇ hui hta‸ caˇ tuˬ ce piˇ lawˬ gʼa tuˬ leh laˇ. 35Ya‸ hkʼaˇ, awˬ miˇ ma heuˆ shehˍ hpaˇ hta‸ hkehˉ caˇ la ve chaw teˇ hpaˍ geh yuˬ hpaˆ piˇ ve awˬ nyi gaˬ la tuˬ yoˬ. Awˬ yanˇ oˇ ve awˬ hkʼaw lo yawˇ hui caˇ tuˬ ce tuˬ yoˬ teh‸, yawˇ hui hta‸ kʼoˆ piˇ ve yoˬ.

36Chi hkʼoˆ ka‸, yawˇ yawˇ hui hta‸ tawˇ pa haˉ te maˍ leh kʼoˆ piˇ ve, Veu‸ kʼaˇ awˬ suhˉ teˇ hkʼoˆ awˬ hkʼaw lo teˇ peˆ tzuh‸ sheˬ leh, veu‸ kʼaˇ awˬ piˍ hta‸ a shu ka‸ maˇ nehˉ jaw. Oˇ hkʼe nehˉ ve kʼo, veu‸ kʼaˇ awˬ suhˉ hta‸ tzuh‸ ve awˬ hkʼoˆ ka‸, veu‸ kʼaˇ awˬ suhˉ ve hpa peˆ lehˬ, veu‸ kʼaˇ awˬ piˍ hta‸ maˇ hawˍ da‸. 37Chi hkʼoˆ ka‸, shaˍ guiˬ htuˉ pui awˬ piˍ awˬ hkʼaw lo a pehˉ meuˇ gʼuiˬ awˬ suhˉ a shu ka‸ maˇ keu jaw. Oˇ hkʼe keu ve kʼo, a pehˉ meuˇ gʼuiˬ awˬ suhˉ lehˬ, shaˍ guiˬ htuˉ pui hta‸ te hkoˇ ve pa taw, a pehˉ meuˇ gʼuiˬ sheˆ leh, shaˍ guiˬ htuˉ pui htawˇ luˬ kʼai ve yoˬ. 38A pehˉ meuˇ gʼuiˬ awˬ suhˉ hta‸ shaˍ guiˬ htuˉ pui awˬ suhˉ awˬ hkʼaw lo gʼa keu ve yoˬ. 39A pehˉ meuˇ gʼuiˬ awˬ piˍ hta‸ dawˬ peuˬ ve chaw hkʼaˬ ve teˇ gʼaˇ maˇ kʼoˆ, awˬ suhˉ hta‸ maˇ dawˬ gaˇ. Awˬ lawn kʼo, Awˬ piˍ lehˬ da‸ ve yoˬ, teh‸ yawˇ kʼoˆ ve yoˬ.

Currently Selected:

Luˉka‸ li‸ 5: LHBE

Highlight

Copy