Luˉka‸ li‸ 4
4
Yeˍsuˆ beˬ ve lawˇ ve hta‸ gʼa hkanˍ ve
1Yeˍsuˆ lehˬ, da‸ ve kehˬ ve Awˬ ha hpu hkʼa biˇ cawˬ leh, Yawˇdanˍ gʼuiˬ ma lo tu leh kʼo‸-e ve teˇ yanˇ, Awˬ ha hpu yawˇ hta‸ heh puiˉ hkʼaw lo awˇ chi nyi hkʼa gaˬ shiˍ toˇ leh, neˇhaiˬ beˬ ve lawˇ ve hta‸ yawˇ gʼa hkanˍ ve yoˬ. 2Awˬ nyi awˬ haˉ oˇ ve teˇ hpaˍ awˬ hkʼaw lo yawˇ te‸ chiˉ maˇ caˇ leh, awˬ nyi awˬ haˉ oˇ ve teˇ hpaˍ peuˬ hkʼaw‸ nawˉ, yawˇ awˍ meu‸ la ve yoˬ.
3Oˇ htaˇ neˇhaiˬ kʼoˆ piˇ ve, Nawˬ Gʼuiˬsha ve Yaˇ hpu hpeh‸ ve kʼo, haˉ pui shiˍ chi hta‸ hkaoˍmonˇ hpeh‸ la tuˬ tawˇ piˇ-oˆ teh‸, yawˇ hta‸ kʼoˆ piˇ ve yoˬ.
4Yeˍsuˆ kʼaw‸ kʼoˆ piˇ ve, Li‸ hpu hkʼaw chi hkʼe bvuh‸ taˍ ve, Chaw yaˇ lehˬ hkaoˍmonˇ hta‸ pa taw ceh tiˉ gʼa te‸ ve maˇ heˆ teh‸ kʼoˆ piˇ ve yoˬ. #Bon 8:3
5Teˇ pawˆ neˇhaiˬ lehˬ yawˇ hta‸ shiˍ taˆ-e leh, miˬguiˬ hkʼoˆ hkʼa cawˬ ve mvuhˇmiˬ hkʼa peu-eˬ hta‸ teˇ hkui tiˉ awˬ hkʼaw lo maw piˇ leh kʼoˆ ve, 6Kanˇ paˆ chi hkʼa peu-eˬ leh mvuhˇmiˬ teˇ hpaˍ ve awˬ me‸ awˬ hponˇ ngaˬ nawˬ hta‸ pe‸ laˇ tuˬ yoˬ. Chi teˇ hpaˍ ngaˬ hta‸ chiˇ a‸ laˇ peuˬ ve pa taw, ngaˬ piˇ gaˇ ve chaw hta‸ ngaˬ piˇ hpeh‸ ve yoˬ. 7Hkʼe te leh, nawˬ ngaˬ hta‸ oˉ kʼoˍ pui laˇ ve kʼo, chi hkʼa peu-eˬ nawˬ ve mawˇ hpeh‸ tuˬ yoˬ teh‸ yawˇ hta‸ kʼoˆ piˇ ve yoˬ.
8Oˇ htaˇ Yeˍsuˆ yawˇ hta‸ kʼaw‸ kʼoˆ piˇ ve Li‸ hpu hkʼaw chi hkʼe bvuh‸ taˍ ve, Nawˬ ve jawˇmawˇ Gʼuiˬsha hta‸ nawˬ oˉ kʼoˍ gʼa pui leh, yawˇ ve kanˉ hta‸ ceh tiˉ nawˬ gʼa te ve yoˬ, teh‸ kʼoˆ piˇ ve yoˬ. #Bon 6:13
9Teˇ pawˆ neˇhaiˬ lehˬ, yawˇ hta‸ Yeˍruˆsaˍlehnˍ venˇ lo shiˍ kʼai leh, bon yehˬ lonˉ ve awˬ hkʼoˇ meuˇ lo yawˇ hta‸ teh taˍ leh kʼoˆ piˇ ve, Nawˬ Gʼuiˬsha ve Yaˇ hpu hpeh‸ ve kʼo, pawˆ ce hkʼa. 10Awˬ lawn kʼo, Li‸ hpu hkʼaw chi hkʼe bvuh‸ taˍ ve, Nawˬ hta‸ ha‸ shaˉ tuˬ, nawˬ awˬ pon yawˇ ve mvuhˇ naw ma tcuh yaˇ teˇ hpaˍ hta‸ yawˇ maˍ piˇ taˍ ve yoˬ. 11Nawˬ ve hkui sheh haˉ pui shiˍ hta‸ maˇ gʼa heuˆ tuˬ, yawˇ hui ve la‸ sheh nawˬ hta‸ chiˇ taˆ tuˬ yoˬ teh‸ kʼoˆ piˇ ve yoˬ, #Chi 91:11-12
12Yeˍsuˆ kʼaw‸ kʼoˆ piˇ ve, Li‸ hpu hkʼaw chi hkʼe bvuh‸ taˍ ve, Nawˬ ve Jawˇmawˇ Gʼuiˬsha hta‸ nawˬ maˇ gʼa beˬ maˇ gʼa lawˇ teh‸ yawˇ hta‸ kʼoˆ piˇ ve yoˬ. #Bon 6:16
13Neˇhaiˬ lehˬ, yawˇ hta‸ teˇ ceuˬ le le beˬ peuˬ hkʼaw‸ nawˉ, yawˇ geh tawˆ kʼai leh, teˇ tcuhˉ teˇ yanˇ hpaˆ da‸ chehˇ taˍ ve yoˬ.
Yeˍsuˆ kanˉ tanˬ te ve
14Yeˍsuˆ lehˬ, Awˬ ha hpu ve kanˇ paˆ awˬ hkʼaw lo Gaˍliˍlehˇ mvuhˇmiˬ lo kʼaw‸ kʼo‸-e leh, awˬ paˇ awˬ kui ve mvuhˇmiˬ awˬ hkʼaw lo teˇ kaˬ le le yawˇ ve awˬ lawn bvuhˬ kʼai ve yoˬ. 15Yawˇ hui ve bon yehˬ teˇ hpaˍ awˬ hkʼaw lo yawˇ maˍ piˇ leh, chaw hkʼa peu-eˬ yawˇ hta‸ chiˇ uiˍ chiˇ mvuh piˇ ve yoˬ.
Naˍzaˍrehˆ chaw hui Yeˍsuˆ hta‸ maˇ ha‸ yuˬ
16Yawˇ uiˍ la kuiˬ Naˍzaˍrehˆ venˇ lo kʼaw‸ gaˬ la leh, yawˇ awˬ liˇ cawˬ taˍ ve hkʼe shinˉ nyi htaˇ bon yehˬ taˆ-e ve yoˬ. Li‸ hpu hta‸ gʼaw tuˬ yawˇ tu ve yoˬ. 17Oˇ htaˇ, shu yawˇ hta‸ tcuh kaˍ paˍ Iˉsaˍyaˆ ve li‸ piˇ leh, li‸ oˇ ve hta‸ yawˇ hpeu‸ ve teˇ yanˇ, chi hkʼe bvuh‸ taˍ ve teˇ kaˬ hta‸ ca mawˬ ve yoˬ.
18Jawˇmawˇ Gʼuiˬsha ve Awˬ ha hpu ngaˬ awˬ hkʼoˆ cawˬ taˍ ve yoˬ.
Awˬ lawn kʼo, haˍ ve gʼawˇ ve chaw hui hta‸
ha lehˬ ve bon hkawˇ maˍ piˇ tuˬ yawˇ ngaˬ hta‸ naˍ manˇ shehˍ laˇ peuˬ.
Yawˇ ngaˬ hta‸ peu laˇ ve lehˬ,
hpeh taˍ ve chaw teˇ hpaˍ hta‸ hpehˇ piˇ tuˬ ve awˬ lawn maˇ kʼoˆ,
mehˆ cuˉ ve chaw teˇ hpaˍ mehˆ kʼaw‸ mawˬ la tuˬ ve awˬ lawn maˇ kʼoˆ,
maˍ piˇ hto piˇ tuˬ awˬ pon ngaˬ hta‸ peu laˇ ve yoˬ.
Chi hkʼoˆ ka‸, fawˉ mehˍ ve hta‸
gʼa hkanˍ ve chaw teˇ hpaˍ hta‸ ponˬ piˇ tuˬ maˇ kʼoˆ,
19Jawˇmawˇ Gʼuiˬsha awˬ bon te piˇ tuˬ ve
awˬ hkʼaw‸ teˇ hkʼaw‸ awˬ lawn maˍ piˇ hto piˇ tuˬ maˇ kʼoˆ, ngaˬ hta‸ peu laˇ peuˬ,
teh‸ kʼoˆ ve yoˬ. #Isy 61:1-2
20Li‸ oˇ ve hta‸ yawˇ lo‸ leh bon yehˬ ha‸ shaˉ shehˍ hpaˇ hta‸ kʼaw‸ piˇ peuˬ hkʼaw‸ nawˉ, yawˇ mui taˍ ve yoˬ. Bon yehˬ hkʼaw chehˇ ve chaw hkʼa peu-eˬ yawˇ hta‸ hkʼa deh‸ nyi chehˇ htaˇ, 21yawˇ yawˇ hui hta‸ tanˬ maˍ leh kʼoˆ ve, Nawˬ hui gʼa kaˇ ve Li‸ hpu tawˇ hkawˇ chi lehˬ, ya‸ nyi nawˬ hui mehˆ gʼuˇ suhˍ biˇ la peuˬ teh‸ kʼoˆ piˇ ve yoˬ.
22Chaw hkʼa peu-eˬ yawˇ hta‸ chiˇ mvuh leh, yawˇ ve maw‸ kʼaw hkʼaw tawˆ la ve na sha jaˇ ve tawˇ hkawˇ teˇ hpaˍ hta‸ anˇ leh, Chaw chi lehˬ, Yoˇseh‸ ve yaˇ paˍ maˇ heˆ laˇ teh‸, yawˇ hui kʼoˆ da‸ ve yoˬ.
23Yeˍsuˆ yawˇ hui hta‸ kʼoˆ piˇ ve, Nawˬ hui lehˬ, tawˇ pa haˉ yehˇ leh, Naˆ tsuhˇ shehˍ hpaˇ-oˬ, a shu yawˇ ve a naˍ hta‸ gu na-e loˬ, Ngaˬ hui gʼa kaˇ ve hkʼe, Kaˍpeˍneˍonˍ venˇ awˬ hkʼaw lo nawˬ te ve kanˉ teˇ hpaˍ hta‸ a shu yawˇ ve chehˇ kuiˬ awˬ hkʼaw lo htawˇ te-o teh‸, nawˬ hui ngaˬ hta‸ kʼoˆ laˇ tuˬ ve hta‸ ngaˬ shiˍ ve yoˬ. 24Ngaˬ nawˬ hui hta‸ awˬ tehˬ awˬ na kʼoˆ laˇ ve, Gʼuiˬsha ve tcuh kaˍ paˍ hkʼaˬ ve teˇ gʼaˇ maˇ kʼoˆ, a shu yawˇ ve chehˇ kuiˬ awˬ hkʼaw lo awˬ me‸ awˬ hponˇ maˇ cawˬ.
25Ngaˬ nawˬ hui hta‸ hteˇ lehˍ kʼoˆ laˇ ve, Eˇliˇya‸ ve awˬ co-e htaˇ, shehˆ hkʼaw‸ leh ha pa hkaw‸ maˬ hkʼa gaˬ mvuhˇ yeˬ maˇ laˬ leh, mvuhˇmiˬ hkʼa peu-eˬ meu‸ lonˉ kaˆ lonˉ cawˬ la ve teˇ yanˇ, Iˉsaˍreˍlaˆ chaw ceuˬ awˬ hkʼaw lo mehˇchawˇma cawˬ maˇ ve yoˬ. 26Ya‸ hkʼaˇ, Gʼuiˬsha Eˇliˇya‸ hta‸ yawˇ hui teˇ gʼaˇ geh ka‸ maˇ kʼai tcuh. Siˉdonˍ mvuhˇ miˬ Saˍraˍtaˆ venˇ hkʼaw chehˇ ve mehˇ chawˇ ma teˇ gʼaˇ geh ceh tiˉ yawˇ hta‸ kʼai tcuh ve yoˬ. 27Tcuh kaˍ paˍ Eˇliˇshehˇ ve awˬ co-e htaˇ htawˇ, Iˉsaˍreˍlaˆ chaw ceuˬ awˬ hkaw lo hkiˬ tu‸ keuˆ ve chaw cawˬ maˇ ve yoˬ. Ya‸ hkʼaˇ, yawˇ hui awˬ hkʼaw lo teˇ gʼaˇ hta‸ ka‸ da‸ la kehˬ la piˇ ve maˇ cawˬ. Suˇriˆ chaw Neˍmanˍ teˇ gʼaˇ hta‸ ceh tiˉ da‸ la kehˬ la piˇ ve yoˬ teh‸ kʼoˆ piˇ ve yoˬ.
28Bon yehˬ hkʼaw chehˇ ve chaw teˇ hpaˍ tawˇ hkawˇ oˇ ve hta‸ gʼa kaˇ htaˇ, yawˇ hui hkʼa peu-eˬ nyi ma zuhˆ jaˇ ve yoˬ. 29Yawˇ hui tu la leh venˇ awˬ baˬ lo Yeˍsuˆ hta‸ gʼa‸ tawˆ leh, yawˇ hui ve venˇ te taˍ ve hkʼaw teˇ shiˍ awˬ hkʼoˇ meuˇ lo ca‸ ce piˇ tuˬ yawˇ hta‸ shiˍ kʼai ve yoˬ. 30Yawˇ lehˬ, yawˇ hui awˬ kʼaw ji lo hpanˍ kʼai leh, oˇ kaˬ lo tawˆ kʼai ve yoˬ.
Neˇ cha‸ chiˆ geh ve chaw awˬ lawn
31Oˇ htaˇ, Gaˍliˍlehˇ mvuhˇmiˬ Kaˍpeˍ neˍonˍ venˇ lo yawˇ ya‸ la leh, shinˉ nyi htaˇ yawˇ yawˇ hui hta‸ maˍ piˇ ve yoˬ. 32Yawˇ maˍ piˇ ve hta‸ yawˇ hui anˇ jaˇ ve yoˬ. Awˬ lawn kʼo, yawˇ kanˇ paˆ cawˬ ve awˬ hkʼaw lo maˍ piˇ ve hta‸ pa taw yoˬ. 33Bon yehˬ oˇ ve awˬ hkʼaw lo neˇ cha‸ chiˆ geh ve chaw teˇ gʼaˇ cawˬ ve yoˬ. Yawˇ awˬ hkawˇ bvuhˬ chaweh kuˬ leh kʼoˆ ve, 34Aˇ yoˇ, Naˍzaˍrehˆ chaw Yeˍsuˆ-oˬ, nawˬ ngaˬ hui hta‸ hkʼaˬ hkʼe caˉ da‸ le. Ngaˬ hui hta‸ te luˬ laˇ tuˬ nawˬ laˬ ve laˇ. Nawˬ hta‸ ngaˬ shiˍ taˍ ve yoˬ. Nawˬ lehˬ Gʼuiˬ sha ve da‸ kehˬ ve chaw hpeh‸ ve yoˬ teh‸ yawˇ kʼoˆ ve yoˬ.
35Oˇ htaˇ, Yeˍsuˆ yawˇ hta‸ deˇ leh kʼoˆ ve, Ta‸ iˉ chehˇ-oˆ. Yawˇ awˬ hkʼaw lo tawˆ kʼai-o teh‸ kʼoˆ piˇ ve teˇ yanˇ, neˇ oˇ ve lehˬ, chaw oˇ ve teˇ gʼaˇ hta‸ yawˇ hui awˬ kʼaw ji lo ca‸ baˬ sheˬ leh, yawˇ hta‸ naˬ tuˬ te‸ chiˉ maˇ te leh tawˆ kʼai ve yoˬ.
36Yawˇ hui hkʼa peu-eˬ anˇ jaˇ leh, teˇ gʼaˇ leh teˇ gʼaˇ kʼoˆ da‸ ve, Tawˇ hkawˇ chi hkʼaˬ hkʼe ve tawˇ hkawˇ le. Awˬ me‸ awˬ hponˇ leh kanˇ paˆ awˬ hkʼaw lo neˇ cha‸ chiˆ teˇ hpaˍ hta‸ yawˇ tawˇ piˇ leh, yawˇ hui tawˆ kʼai ve yoˬ teh‸ kʼoˆ ve yoˬ. 37Mvuhˇmiˬ oˇ ve awˬ paˇ awˬ kui teˇ kaˬ le le lo yawˇ ve awˬ lawn bvuhˬ kʼai ve yoˬ.
Yeˍsuˆ Peˍtruˆ awˬ miˇ ma ve awˬ e hta‸ gu na-e piˇ ve
38Bon yehˬ awˬ hkʼaw lo yawˇ tawˆ kʼai leh, Siˉmonˍ ve yehˬ hkʼaw lo‸-e ve yoˬ. Siˉmonˍ awˬ miˇ ma ve awˬ e kaˆ naˬ jaˇ leh, yawˇ awˬ pon yawˇ hui Yeˍsuˆ hta‸ lawˬ hkawˉ ve yoˬ. 39Yaˇ miˇ oˇ ve awˬ paˇ lo Yeˍsuˆ huˉ taˍ leh, kaˆ naˬ ve oˇ ve hta‸ yawˇ deˇ ve teˇ yanˇ, kaˆ naˬ ve oˇ ve na-e la ve yoˬ. Yaˇ miˇ oˇ ve teˇ cawˬ haˉ tu la leh yawˇ hui hta‸ te caˍ te taw piˇ ve yoˬ.
Mehˆ muiˉ naˆ la htaˇ, chaw naˬ laiˉ gʼaˇ hta‸ gu na-e piˇ ve
40Mvuhˇ nyi kʼehˬ ve teˇ yanˇ, a naˍ laiˉ ceuˬ naˬ chehˇ ve chaw naˬ teˇ hpaˍ hta‸ hkʼa shiˍ veu laˇ ve chaw hkʼa peu-eˬ lehˬ, chaw naˬ oˇ ve teˇ hpaˍ hta‸ Yeˍsuˆ geh shiˍ kʼai ve yoˬ. Yawˇ lehˬ, yawˇ hui teˇ gʼaˇ le le awˬ hkʼoˆ hta‸ la‸ sheh taˍ leh yawˇ hui hta‸ gu na-e piˇ ve yoˬ. 41Neˇ teˇ hpaˍ htawˇ, Nawˬ lehˬ Gʼuiˬsha ve Yaˇ hpu yoˬ teh‸ kuˬ leh, chaw laiˉ gʼaˇ awˬ hkʼaw lo tawˆ kʼai ve yoˬ.
Yawˇ Hkri‸ hpeh‸ ve hta‸ yawˇ hui shiˍ ve pa taw, yawˇ yawˇ hui hta‸ deˇ leh tawˇ maˇ yaw tcuh.
Yeˍsuˆ bon ca maˍ ve
42Mvuhˇ htiˇ la ve teˇ yanˇ, yawˇ oˇ kaˬ lo tawˆ kʼai leh heh puiˉ hkʼaw lo kʼai ve yoˬ. Chaw awˬ moˍ lonˉ teˇ hpaˍ yawˇ hta‸ ca leh yawˇ geh gaˬ la ve teˇ yanˇ, yawˇ hui hta‸ maˇ gʼa hpaˆ kʼai tuˬ yawˇ hui yawˇ hta‸ tawˍ taˍ ve yoˬ. 43Ya‸ hkʼaˇ yawˇ kʼaw‸ kʼoˆ ve, Gʼuiˬsha ve mvuhˇmiˬawˬ lawn ha lehˬ ve bon hkawˇ hta‸ awˬ kaˍ awˬ nu venˇ hkʼaˆ teˇ hpaˍ awˬ hkʼaw lo htawˇ ngaˬ gʼa ca maˍ piˇ tuˬ yoˬ. Awˬ lawn kʼo, chi hkʼe te tuˬ awˬ pon Gʼuiˬsha ngaˬ hta‸ peu laˇ ve yoˬ teh‸, yawˇ hui hta‸ kʼoˆ piˇ ve yoˬ.
44Oˇ htaˇ, Yuˇda‸ mvuhˇmiˬ lo cawˬ ve bon yehˬ teˇ hpaˍ awˬ hkʼaw lo yawˇ bon ca maˍ piˇ ve yoˬ.
Currently Selected:
Luˉka‸ li‸ 4: LHBE
Highlight
Share
Copy
Want to have your highlights saved across all your devices? Sign up or sign in
Lahu Bible Edited © Thailand Bible Society and Bible Society of Myanmar, 2010, 2020.
