Luˉka‸ li‸ 3

Baˆtiˆsaˬ piˇ paˍ Yoˇhanˬ bon maˍ ve

1Kehˉsaˍ Tiˍbeˍriˆ uˉ peunˍ ve teˇ chi ngaˇ hkʼaw‸ gaˬ htaˇ, Yuˇda‸ mvuhˇmiˬ awˬ hkʼaw lo Poˍtiˆ Piˉla‸ jawˇmawˇ lonˉ te chehˇ ve, Gaˍliˍlehˇ mvuhˇ miˬ awˬ hkʼaw lo Heˍroˆ jawˇmawˇ te chehˇ ve, Iˉtuˆrehˇ leh Taˍraˍhkawˇniˆ mvuhˇmiˬ awˬ hkʼaw lo Heˍroˆ ve awˬ nyi paˍ Hpiˇliˇpuˆ jawˇmawˇ te chehˇ ve, Aˍbiˇleˍ mvuhˇmiˬ awˬ hkʼaw lo Luˇsaˍniˆ jawˇmawˇ te chehˇ ve leh, 2Aˍnaˆ leh Kaˍyaˍhpaˆ paw hkuˇ lonˉ te chehˇ ve yoˬ. Oˇ htaˇ, heh puiˉ hkʼaw lo chehˇ taˍ ve Zaˍhkaˍriˆ ve yaˇ paˍ Yoˇhanˬ geh Gʼuiˬsha ve tawˇ hkawˇ gaˬ la ve yoˬ. 3Yawˇ lehˬ Yawˇdanˍ gʼuiˬ ma awˬ paˇ awˬ kui teˇ kaˬ le le lo kʼai leh, venˇbaˆ hpehˇ hkʼa gʼa tuˬ, venˇbaˆ dawˇ hpfuhˆ ve hta‸ caˉ da‸ ve baˆtiˆsaˬ awˬ lawn hta‸ maˍ piˇ ve yoˬ. 4Tcuh kaˍ paˍ Iˉsaˍyaˆ ve li‸ awˬ hkʼaw lo bvuh‸ taˍ ve hkʼe,

Heh puiˉ hkʼaw lo chaw teˇ gʼaˇ kuˬ leh kʼoˆ ve, Jawˇmawˇ Gʼuiˬsha ve ya‸ kʼaw hta‸ gu taˍ loˬ.

Yawˇ ve ya‸ kʼaw teˇ hpaˍ hta‸ hteˇ lehˍ te-o.

5Lawˬ hkʼo‸ teˇ maˬ le le hta‸ gʼa biˇ la piˇ leh,

hkʼaw uiˍ ve i ve teˇ shiˍ le le hta‸ gʼa nehˬ la piˇ tuˬ yoˬ.

Kʼaw‸ ve ya‸ kʼaw teˇ hpaˍ hta‸ gʼa hteˇ la piˇ leh,

mvuh mvuh nehˬ nehˬ cawˬ ve ya‸ kʼaw teˇ hpaˍ hta‸ tawˍ lehˍ leˆ lehˍ gʼa kʼaw‸ gu piˇ tuˬ yoˬ.

6Chaw hkʼa peu-eˬ lehˬ, Gʼuiˬsha ve htaiˍ hkʼaw‸ ve hta‸ gʼa mawˬ tuˬ yoˬ,

teh‸ bvuh‸ taˍ ve yoˬ. #Isy 40:3-5

7Hkʼe te leh, yawˇ la‸ hkʼaw lo baˆtiˆsaˬ hkanˍ tuˬ laˬ ve chaw awˬ moˍ lonˉ hta‸ Yoˇhanˬ kʼoˆ piˇ ve, Vuiˬ haiˬ awˬ yaˇ teˇ hpaˍ-oˬ, gaˬ la tuˬ ve nyi ma zuhˆ ve hta‸ gʼa ponˬ tuˬ, a shu nawˬ hui hta‸ hto laˇ ve le. 8Venˇbaˆ dawˇ hpfuhˆ ve hta‸ keunˍ da‸ ve awˬ shiˍ naw‸ la-o. Aˍbraˍhanˍ lehˬ ngaˬ hui ve awˬ pa hpeh‸ ve yoˬ teh‸, nawˬ hui a shu yawˇ ve nyi ma hkʼaw taˇ ca dawˇ. Awˬ lawn kʼo, Gʼuiˬsha lehˬ haˉ pui shiˍ chi teˇ hpaˍ awˬ hkʼaw lo Aˍbraˍhanˍ ve awˬ yaˇ awˬ duˬ teˇ hpaˍ hta‸ te tawˆ la hpeh‸ ve yoˬ teh‸, ngaˬ nawˬ hui hta‸ kʼoˆ laˇ ve yoˬ. 9Chi beu‸ ka‸, suhˆ cehˬ awˬ hkuiˉ puiˍ lo ceˉ ceˇ teh taˍ peuˬ. Hkʼe te leh, da‸ ve awˬ shiˍ maˇ naw‸ ve awˬ cehˬ teˇ cehˬ le le hta‸ htu baˬ leh, aˬ miˍ awˬ hkʼaw lo baˬ keu ve yoˬ teh‸ kʼoˆ ve yoˬ.

10Oˇ htaˇ, chaw awˬ moˍ lonˉ kʼoˆ ve, Hkʼe te kʼo, ngaˬ hui hkʼaˬ hkʼe gʼa te tuˬ le teh‸ yawˇ hta‸ na nyi ve yoˬ.

11Yawˇ yawˇ hui hta‸ kʼaw‸ kʼoˆ piˇ ve, Aˉ po‸ nyiˇ hkʼoˆ cawˬ ve chaw lehˬ, aˉ po‸ maˇ cawˬ ve chaw hta‸ pehˬ piˇ-oˆ. Caˇ tuˬ cawˬ ve chaw htawˇ, oˇ ve hkʼa shuˍ shuˍ te-o teh‸ kʼoˆ ve yoˬ.

12Awˬ hkawnˍ shaw paˍ teˇ hpaˍ htawˇ baˆtiˆsaˬ hkanˍ yuˬ tuˬ yawˇ geh laˬ leh, Saˍ la‸-oˬ, ngaˬ hui hkʼaˬ hkʼe gʼa te tuˬ le teh‸ yawˇ hta‸ na nyi ve yoˬ.

13Nawˬ hui awˬ hkawnˍ shaw keunˍ ve awˬ hkʼoˆ awˬ leuˉ taˇ ca shaw teh‸, yawˇ yawˇ hui hta‸ kʼoˆ piˇ ve yoˬ.

14Ma‸ yaˇ teˇ hpaˍ htawˇ, Ngaˬ hui lehˬ, hkʼaˬ hkʼe gʼa te tuˬ le teh‸ yawˇ hta‸ na nyi ve teˇ yanˇ, A shu ve mawˇ hta‸ ka‸ taˇ ca hiˉ yuˬ. Shu hta‸ maˇ heˆ heˆ ve ca kʼoˆ leh heˍ caˇ ve teˇ ceuˬ ka‸ taˇ te. Nawˬ hui gʼa ve ha pa hpfuhˇ hta‸ nyi hkʼaˇ suh chehˇ-oˆ teh‸, yawˇ yawˇ hui hta‸ kʼaw‸ kʼoˆ piˇ ve yoˬ.

15Chaw hkʼa peu-eˬ dawˇ law chehˇ ve awˬ hkʼaw lo, Yoˇhanˬ lehˬ Hkri‸ yoˬ leh naˍ, maˇ heˆ leh naˍ, yawˇ hui a shu yawˇ ve nyi ma hkʼaw dawˇ nyi chehˇ ve teˇ yanˇ, 16yawˇ hui hkʼa peu-eˬ hta‸ Yoˇhanˬ kʼoˆ piˇ ve, Ngaˬ lehˬ nawˬ hui hta‸ iˉ kaˆ awˬ hkʼaw lo baˆtiˆsaˬ pe‸ laˇ ve yoˬ. Ya‸ hkʼaˇ, ngaˬ a‸ kehˉ kanˇ paˆ uiˍ ve teˇ gʼaˇ laˬ chehˇ ve yoˬ. Yawˇ ve hkuiˉ nuˆ caˆ hta‸ hpui tuˬ ve ceh ka‸ ngaˬ te maˇ keunˍ. Yawˇ lehˬ, da‸ ve kehˬ ve Awˬ ha hpu awˬ hkʼaw lo maˇ kʼoˆ, aˬ miˍ awˬ hkʼaw lo maˇ kʼoˆ, nawˬ hui hta‸ baˆtiˆsaˬ pe‸ laˇ tuˬ yoˬ. 17Yawˇ ve la‸ sheh awˬ hkʼaw lo caˬ hpeuˇ tuˬ vawˆ taˍ ve yoˬ. Yawˇ ve caˬ jaw‸ kuiˬ hta‸ kehˬ lehˍ shiˆ baˬ peuˬ hkʼaw‸ nawˉ, caˬ shiˍ hta‸ caˬ ciˇ yehˬ awˬ hkʼaw lo shaw pfuhˇ keu tuˬ yoˬ. Ya‸ hkʼaˇ, caˬ cuˉ hta‸ lehˬ maˇ suh puiˉ ve aˬ miˍ awˬ hkʼaw lo tuˉ baˬ tuˬ yoˬ teh‸, Yoˇhanˬ kʼoˆ ve yoˬ.

18Chi hkʼoˆ ka‸, yawˇ lehˬ awˬ kaˍ awˬ nu laiˉ ceuˬ kʼoˆ ve awˬ hkʼaw lo, chaw chi ma ve hta‸ awˬ gʼaˇ piˇ leh ha lehˬ ve bon hkawˇ maˍ piˇ ve yoˬ. 19Ya‸ hkʼaˇ, jawˇmawˇ Heˍroˆ lehˬ, yawˇ awˬ nyi paˍ ve awˬ miˇ ma Heˍroˍdiˆ hta‸ heuˆ ve awˬ lawn maˇ kʼoˆ, yawˇ te ve awˬ haiˬ hkʼa peu-eˬ aw lawn maˇ kʼoˆ, Yoˇhanˬ yawˇ hta‸ deˇ maˍ piˇ ve pa taw, 20yawˇ Yoˇhanˬ hta‸ htawnˍ hkʼaw yuˬ keu ve yoˬ. Heˍroˆ lehˬ, ponˬ laˬ htaˇ yawˇ te ya‸ ve hkʼa peu-eˬ awˬ hkʼoˆ, awˬ haiˬ chi teˇ ceuˬ hta‸ ka‸ yawˇ kʼaw‸ te ve yoˬ.

Yeˍsuˆ baˆtiˆsaˬ hkanˍ yuˬ ve

21Chaw hkʼa peu-eˬ baˆtiˆsaˬ hkanˍ yuˬ peuˬ hkʼaw‸ nawˉ, Yeˍsuˆ htawˇ baˆtiˆsaˬ hkanˍ yuˬ leh bon lawˬ chehˇ ve teˇ yanˇ, 22mvuhˇ naw ma hpaw la leh, da‸ ve kehˬ ve Awˬ ha hpu lehˬ, awˬ ho‸ awˬ han aˉ pui kʼaˍ awˬ to hkʼe yawˇ awˬ hkʼoˆ ya‸ la ve yoˬ. Mvuhˇ naw ma hkʼoˆ lo awˬ hkawˇ bvuhˬ la leh kʼoˆ ve, Nawˬ lehˬ ngaˬ ha‸ jaˇ ve Yaˇ hpu yoˬ. Nawˬ hta‸ ngaˬ nyi hkʼaˇ suh jaˇ ve yoˬ teh‸ kʼoˆ ve yoˬ.

Yeˍsuˆ ve awˬ ceuˬ awˬ hkʼaˇ teˇ hpaˍ

23Yeˍsuˆ lehˬ kanˉ tanˬ te ve teˇ yanˇ, a sha‸ shehˆ chi hkʼaw‸ hkʼe gaˬ ve yoˬ. Yawˇ ve awˬ pa lehˬ, Yoˇseh‸ yoˬ teh‸ chaw yaˇ hui dawˇ taˍ ve yoˬ. Yoˇseh‸ ve awˬ pa lehˬ Eˇliˆ yoˬ. 24Eˇliˆ ve awˬ pa lehˬ Maˍsaˆ yoˬ. Maˍsaˆ ve awˬ pa lehˬ Leˍviˆ yoˬ. Leˍviˆ ve awˬ pa lehˬ Meˍlaˍhkiˆ yoˬ. Meˍlaˍhkiˆ ve awˬ pa lehˬ Yaˍnaˆ yoˬ. Yaˍnaˆ ve awˬ pa lehˬ Yoˇseh‸ yoˬ. 25Yoˇseh‸ ve awˬ pa lehˬ Maˍtaˍhtiˆ yoˬ. Maˍtaˍhtiˆ ve awˬ pa lehˬ Aˍmoˆ yoˬ. Aˍmoˆ ve awˬ pa lehˬ Naˍhonˍ yoˬ. Naˍhonˍ ve awˬ pa lehˬ Eˇsaˍliˆ yoˬ. Eˇsaˍliˆ ve awˬ pa lehˬ Naˍgehˇ yoˬ. 26Naˍgehˇ ve awˬ pa lehˬ Maˍaˆ yoˬ. Maˍaˆ ve awˬ pa lehˬ Maˍtaˍhtiˆ yoˬ. Maˍtaˍhtiˆ ve awˬ pa lehˬ Seˍmiˆ yoˬ. Seˍmiˆ ve awˬ pa lehˬ Yoˇseh‸ yoˬ. Yoˇseh‸ ve awˬ pa lehˬ Yuˇda‸ yoˬ. 27Yuˇda‸ ve awˬ pa lehˬ Yoˇhaˍnaˆ yoˬ. Yoˇhaˍnaˆ ve awˬ pa lehˬ Reˍsaˆ yoˬ. Reˍsaˆ ve awˬ pa lehˬ Seˍruˇbeˍlaˆ yoˬ. Seˍruˇbeˍlaˆ ve awˬ pa lehˬ Saˍlaˍteˍlaˆ yoˬ. 28Saˍlaˍteˍlaˆ ve awˬ pa lehˬ Neˍriˆ yoˬ. Neˍriˆ ve awˬ pa lehˬ Meˍlaˍhkiˆ yoˬ. Meˍlaˍhkiˆ ve awˬ pa lehˬ Aˇdiˆ yoˬ. Aˇdiˆ ve awˬ pa lehˬ Kawˇsanˍ yoˬ. Kawˇsanˍ ve awˬ pa lehˬ Eˇlaˍmawˇdaˆ yoˬ. Eˇlaˍmawˇdaˆ ve awˬ pa lehˬ Eˇraˆ yoˬ. Eˇraˆ ve awˬ pa lehˬ Yoˇseˍ yoˬ. 29Yoˇseˍ ve awˬ pa lehˬ Eˇleˍsaˍ yoˬ. Eˇleˍsaˍ ve awˬ pa lehˬ Yoˇrenˍ yoˬ. Yoˇrenˍ ve awˬ pa lehˬ Maˍsaˆ yoˬ. Maˍsaˆ ve awˬ pa lehˬ Leˍviˆ yoˬ. 30Leˍviˆ ve awˬ pa lehˬ Suˉmonˍ yoˬ. Suˉmonˍ ve awˬ pa lehˬ Yuˇda‸ yoˬ. Yuˇda‸ ve awˬ pa lehˬ Yoˇseh‸ yoˬ. Yoˇseh‸ ve awˬ pa lehˬ Yoˇnanˍ yoˬ. Yoˇnanˍ ve awˬ pa lehˬ Eˇlaˍkenˍ yoˬ. 31Eˇlaˍkenˍ ve awˬ pa lehˬ Meˍleˍ yoˬ. Meˍleˍ ve aw pa lehˬ Mehˇnaˍ yoˬ. Mehˇnaˍ ve awˬ pa lehˬ Maˍtaˍhtaˆ yoˬ. Maˍtaˍhtaˆ ve awˬ pa lehˬ Naˍtanˍ yoˬ. Naˍtanˍ ve awˬ pa lehˬ Daˍviˆ yoˬ. 32Daˍviˆ ve awˬ pa lehˬ Yeˍsehˇ yoˬ. Yeˍsehˇ ve awˬ pa lehˬ Awˇbehˆ yoˬ. Awˇbehˆ ve awˬ pa lehˬ Bawˇzaˆ yoˬ. Bawˇzaˆ ve awˬ pa lehˬ Saˍlaˍmonˍ yoˬ. Saˍlaˍmonˍ ve awˬ pa lehˬ Naˍsonˍ yoˬ. 33Naˍsonˍ ve awˬ pa lehˬ Aˍmiˆnaˍdaˆ yoˬ. Aˍmiˆnaˍdaˆ ve awˬ pa lehˬ Aˍranˍ yoˬ. Aˍranˍ ve awˬ pa lehˬ, Heˍsaˍronˍ yoˬ. Heˍsaˍronˍ ve awˬ pa lehˬ Hpaˍrehˆ yoˬ. Hpaˍrehˆ ve awˬ pa lehˬ Yuˇda‸ yoˬ. 34Yuˇda‸ ve awˬ pa lehˬ Yaˍkoˆ yoˬ. Yaˍkoˆ ve awˬ pa lehˬ Iˉcaˆ yoˬ. Iˉcaˆ ve awˬ pa lehˬ Aˍbraˍhanˍ yoˬ. Aˍbraˍhanˍ ve awˬ pa lehˬ Teˍraˆ yoˬ. 35Teˍraˆ ve awˬ pa lehˬ Naˍhkawˍ yoˬ. Naˍhkawˍ ve awˬ pa lehˬ Seˍroˆ yoˬ. Seˍroˆ ve awˬ pa lehˬ Raˍgawˇ yoˬ. Raˍgawˇ ve awˬ pa lehˬ Hpaˍlehˆ yoˬ. Hpaˍlehˆ ve awˬ pa lehˬ Heˍbaˆ yoˬ. Heˍbaˆ ve awˬ pa lehˬ Saˍlaˆ yoˬ. 36Saˍlaˆ ve awˬ pa lehˬ Kaˍiˇnanˍ yoˬ. Kaˍiˇnanˍ ve awˬ pa lehˬ Aˍhpaˍyaˆ yoˬ. Aˍhpaˍyaˆ ve awˬ pa lehˬ Seˍmaˆ yoˬ. Seˍmaˆ ve awˬ pa lehˬ Noˉa‸ yoˬ. Noˉa‸ ve awˬ pa lehˬ Laˍmehˆ yoˬ. 37Laˍmehˆ ve awˬ pa lehˬ Maˍtuˍsaˍlaˆ yoˬ. Maˍtuˍsaˍlaˆ ve awˬ pa lehˬ Eˇnawˆ yoˬ. Eˇnawˆ ve awˬ pa lehˬ Yaˍrehˆ yoˬ. Yaˍrehˆ ve awˬ pa lehˬ Maˍhaˍleˍlaˆ yoˬ. 38Maˍhaˍleˍlaˆ ve awˬ pa lehˬ Kaˍiˇnanˍ yoˬ. Kaˍiˇnanˍ ve awˬ pa lehˬ Eˇnoˆ yoˬ. Eˇnoˆ ve awˬ pa lehˬ Sheˍtaˆ yoˬ. Sheˍtaˆ ve awˬ pa lehˬ Aˍdanˍ yoˬ. Aˍdanˍ ve awˬ pa lehˬ Gʼuiˬsha yoˬ.

Currently Selected:

Luˉka‸ li‸ 3: LHBE

Highlight

Copy