Luˉka‸ li‸ 2
2
Yeˍsuˆ paw la ve
1Awˬ nyi awˬ haˉ oˇ ve teˇ hpaˍ awˬ hkʼaw lo, miˬguiˬ yaˇ hkʼa peu-eˬ hta‸ awˬ meh yuˬ tuˬ jawˇmawˇ Kehˉsaˍ Awˇguˇtuˆ tawˇ piˇ ve yoˬ. 2Chi teˇ pawˆ awˬ meh yuˬ ve lehˬ, Suˇriˆ mvuhˇmiˬ awˬ hkʼaw lo Kuˇreˍniˆ jawˇmawˇ lonˉ te chehˇ ve teˇ yanˇ, awˬ meh yuˬ ve awˉ lawˉ peuˇ teˇ pawˆ hpeh‸ ve yoˬ. 3Oˇ htaˇ, chaw hkʼa peu-eˬ awˬ meh keu tuˬ awˬ pon, teˇ gʼaˇ le le a shu yawˇ ve venˇ lo kʼai ve yoˬ.
4Yoˇseh‸ htawˇ, Daˍviˆ ve awˬ ceuˬ awˬ hkʼaˇ hpeh‸ ve pa taw, yawˇ heuˆ taˍ ve yaˇ miˇ Maˍriˆ geh hkʼa geh awˬ meh ca keu tuˬ, 5Gaˍliˍlehˇ mvuhˇmiˬ Naˍzaˍrehˆ venˇ lo tu leh, Yuˇda‸ mvuhˇmiˬ Behˍlehˍhehnˍ teh‸ kʼoˆ ve Daˍviˆ ve venˇ lo kʼai ve yoˬ. Oˇ htaˇ, Maˍriˆ yaˇ hu taˍ ve yoˬ. 6Yawˇ huiˉ maˬ oˇ kaˬ lo chehˇ taˍ ve teˇ yanˇ, yaˇ paw ve awˬ yanˇ gaˬ la ve yoˬ. 7Maˍriˆ lehˬ, yaˇ paˍ awˉ lawˉ teˇ gʼaˇ paw la leh, pehˉ keu htiˆ peuˬ hkʼaw‸ nawˉ, nuˇ lo‸ kʼoˍ hkʼaw yawˇ hta‸ iˉ taˍ ve yoˬ. Awˬ lawn kʼo, hkehˉ chaw yehˬ awˬ hkʼaw lo yawˇ hui awˬ pon chehˇ kuiˬ maˇ cawˬ.
Mvuhˇ naw ma tcuh yaˇ teˇ hpaˍ yawˬ hawˉ shehˍ hpaˇ hui geh laˬ ve
8Mvuhˇmiˬ oˇ ve awˬ hkʼaw lo yawˬ hawˉ shehˍ hpaˇ teˇ hpaˍ lehˬ, heh hkʼaw lo mvuhˇ hpeu‸ htaˇ yawˇ hui ve yawˬ moˍ hta‸ shaw chehˇ ve yoˬ. 9Oˇ htaˇ, Jawˇmawˇ Gʼuiˬsha ve mvuhˇ naw ma tcuh yaˇ teˇ gʼaˇ tawˆ la leh, yawˇ hui awˬ paˇ lo huˉ taˍ ve yoˬ. Jawˇmawˇ Gʼuiˬsha ve awˬ me‸ awˬ hponˇ yawˇ hui hta‸ hkʼa caw zuhˇ ba tawˆ la leh, yawˇ hui kawˆ jaˇ ve yoˬ. 10Mvuhˇ naw ma tcuh yaˇ yawˇ hui hta‸ kʼoˆ piˇ ve, Taˇ kawˆ. Awˬ lawn kʼo, chaw hkʼa peu-eˬ awˬ pon ha lehˬ tuˬ uiˍ jaˇ ve tawˇ hkawˇ nawˬ hui hta‸ hto laˇ tuˬ ngaˬ laˬ ve yoˬ. 11Ya‸ nyi Daˍviˆ ve venˇ awˬ hkʼaw lo nawˬ hui awˬ pon Htaiˍ hkʼaw‸ paˍ paw la peuˬ. 12Yawˇ lehˬ Jawˇmawˇ Hkri‸ yoˬ. Nawˬ hui awˬ pon awˬ heˆ chi hkʼe cawˬ tuˬ yoˬ. Yaˇ ehˉ hta‸ pehˉ keu htiˆ sheˬ leh, nuˇ lo‸ kʼoˍ hkʼaw iˉ taˍ ve hta‸ nawˬ hui gʼa mawˬ tuˬ yoˬ teh‸, yawˇ hui hta‸ kʼoˆ piˇ ve yoˬ.
13Mvuhˇ naw ma tcuh yaˇ oˇ ve teˇ gʼaˇ geh mvuhˇ naw ma tcuh yaˇ awˬ moˍ lonˉ teˇ cawˬ haˉ tawˆ la ve yoˬ. Yawˇ hui Gʼuiˬsha hta‸ chiˇ mvuh leh kʼoˆ ve,
14Mvuh jaˇ kuiˬ lo chehˇ ve Gʼuiˬsha hta‸ awˬ me‸ awˬ hponˇ cawˬ piˇ-oˆ.
Miˬguiˬ hkʼoˆ lo htawˇ, yawˇ nyi ma cawˇ ve chaw hui awˬ hkʼaw lo dawˇ sha gaˇ sha tuˬ cawˬ piˇ-oˆ,
teh‸ kʼoˆ ve yoˬ.
15Mvuhˇ naw ma tcuh yaˇ teˇ hpaˍ mvuhˇ naw ma hkʼoˆ lo kʼaw‸ taˆ kʼo‸-e peuˬ hkʼaw‸ nawˉ, yawˬ hawˉ shehˍ hpaˇ teˇ hpaˍ kʼoˆ ve, Behˍlehˍhehnˍ venˇ lo ngaˬ hui kʼai leh, hpeh‸ la peuˬ ve awˬ lawn chi Jawˇmawˇ Gʼuiˬsha ngaˬ hui hta‸ hto laˇ ve hkʼe ca nyi-a veuˬ teh‸, teˇ gʼaˇ leh teˇ gʼaˇ kʼoˆ da‸ ve yoˬ.
16Hkʼe te leh yawˇ hui haˆ haˆ kʼai leh, Maˍriˆ leh Yoˇseh‸ hta‸ ka‸, nuˇ lo‸ kʼoˍ hkʼaw iˉ taˍ ve yaˇ ehˉ hta‸ ka‸ gʼa mawˬ ve yoˬ. 17Gʼa mawˬ peuˬ hkʼaw‸ nawˉ, yaˇ ehˉ oˇ ve awˬ lawn mvuhˇ naw ma tcuh yaˇ teˇ hpaˍ yawˇ hui hta‸ hto piˇ ve hkʼe, yawˇ hui shu hta‸ kʼaw‸ hto piˇ ve yoˬ. 18Hkʼa gʼa kaˇ ve chaw hkʼa peu-eˬ lehˬ, yawˬ hawˉ paˍ hui hto piˇ ve teˇ hpaˍ hta‸ anˇ ve yoˬ. 19Maˍriˆ lehˬ, awˬ lawn chi hkʼa peu-eˬ hta‸ tawnˇ taˍ leh, yawˇ ve nyi ma hkʼaw dawˇ nyi chehˇ ve yoˬ. 20Yawˬ hawˉ paˍ teˇ hpaˍ lehˬ, yawˇ hui hta‸ kʼoˆ piˇ taˍ ve hkʼa shuˍ shuˍ, hkʼa peu-eˬ hta‸ gʼa kaˇ gʼa mawˬ ve pa taw, Gʼuiˬsha hta‸ chiˇ uiˍ chiˇ mvuh leh kʼo‸-e ve yoˬ.
Bon yehˬ lonˉ awˬ hkʼaw lo Yeˍsuˆ hta‸ chiˇ a‸ piˇ ve
21Hiˉ nyi gaˬ leh yaˇ ehˉ hta‸ awˬ guiˬ meuˇ shoˍ piˇ ve teˇ yanˇ, yawˇ hta‸ Yeˍsuˆ teh‸ meh piˇ ve yoˬ. Awˬ meh chi lehˬ, awˬ e gʼoˇ peˬ hkʼaw maˇ hu sheˍ htaˇ ka‸ mvuhˇ naw ma tcuh yaˇ meh piˇ taˍ ve yoˬ.
22Moˉseˍ awˬliˇtawˇhkawˇ piˇ taˍ ve hkʼe, yawˇ hui awˬ pon da‸ tuˬ kehˬ tuˬ te ve awˬ nyi biˇ la ve teˇ yanˇ, 23Yaˇ kaoˬ hawˉ hkʼaˆ hkʼa paw la ve teˇ gʼaˇ le le lehˬ, Jawˇmawˇ Gʼuiˬsha awˬ pon gʼa fuiˍ teh taˍ ve yoˬ teh‸, yawˇ ve awˬliˇtawˇhkawˇ awˬ hkʼaw lo bvuh‸ taˍ ve hkʼa shuˍ shuˍ, yaˇ ehˉ oˇ ve Jawˇmawˇ Gʼuiˬsha hta‸ chiˇ a‸ piˇ tuˬ awˬ pon maˇ kʼoˆ, #Taw 13:2 24aˉ pui kʼaˍ teˇ ceh, maˇ heˆ kʼo guˇ ehˉ nyiˇ hkeh hta‸ tanˇ piˇ tuˬ Jawˇmawˇ Gʼuiˬsha ve awˬliˇtawˇhkawˇ awˬ hkʼaw lo kʼoˆ taˍ ve hkʼe gʼa tanˇ piˇ tuˬ awˬ pon maˇ kʼoˆ, yawˇ huiˉ maˬ yaˇ ehˉ hta‸ Yeˍruˆsaˍlehnˍ venˇ lo yuˬ kʼai ve yoˬ. #Okʼo 12:8
25Oˇ htaˇ, Suˉmonˍ meh ve chaw teˇ gʼaˇ Yeˍruˆsaˍlehnˍ venˇ hkʼaw lo chehˇ ve yoˬ. Yawˇ lehˬ, hteˇ ve cawˇ ve chaw hpeh‸ leh, Gʼuiˬsha hta‸ yawˆ yan ve chaw teˇ gʼaˇ hpeh‸ ve yoˬ. Iˉsaˍreˍlaˆ chaw hui dawˇ sha gaˇ sha ve hta‸ gʼa tuˬ yawˇ dawˇ law tcuhˉ taˍ leh, da‸ ve kehˬ ve Awˬ ha hpu yawˇ awˬ hkʼaw lo chehˇ taˍ ve yoˬ. 26Yawˇ lehˬ, Jawˇmawˇ Gʼuiˬsha ve Hkri‸ hta‸ maˇ gʼa mawˬ sheˍ ve ceh ceh maˇ gʼa suh teh‸, da‸ ve kehˬ ve Awˬ ha hpu yawˇ hta‸ hpeu‸ maˍ piˇ taˍ ve yoˬ. 27Oˇ htaˇ, Awˬ ha hpu yawˇ hta‸ dawˇ pawnˍ piˇ ve hta‸ pa taw, yawˇ bon yehˬ lonˉ awˬ hkʼaw lo kʼai ve yoˬ. Awˬ pa awˬ e lehˬ, awˬliˇtawˇhkawˇ cawˬ taˍ ve hkʼe yaˇ paˍ ehˉ Yeˍsuˆ hta‸ te piˇ tuˬ, yawˇ hta‸ bon yehˬ lonˉ awˬ hkʼaw lo yuˬ kʼai ve teˇ yanˇ, 28Suˉmonˍ lehˬ, yawˇ ve la‸ sheh hkʼaw lo yaˇ ehˉ hta‸ chiˇ taˆ taˍ leh, Gʼuiˬsha hta‸ chiˇ mvuh leh kʼoˆ ve,
29Hkʼa peu-eˬ awˬ hkʼoˆ uiˍ ve Jawˇmawˇ-oˬ, nawˬ ve tawˇ hkawˇ cawˬ taˍ ve hkʼe,
nawˬ ve awˬ ceˬ dawˇ sha ve awˬ hkʼaw lo gʼa kʼo‸-e tuˬ, chi beu‸ a hkaw-anˬ a ciˉ pe‸ laˇ-oˆ.
30Awˬ lawn kʼo, nawˬ ve htaiˍ hkʼaw‸ ve teˇ ceuˬ hta‸ ngaˬ ve mehˆ shiˍ gʼa mawˬ peuˬ.
31Chaw ceuˬ hkʼa peu-eˬ mehˆ gʼuˇ suhˍ lo htaiˍ hkʼaw‸ ve oˇ ve hta‸ nawˬ gu taˍ ve yoˬ.
32Htaiˍ hkʼaw‸ ve oˇ ve lehˬ, buiˇshaˆaˉnaˆ chaw hui hta‸ ba piˇ tuˬ ve awˬ gʼeuˆ hpeh‸ leh,
nawˬ ve chaw ceuˬ Iˉsaˍreˍlaˆ chaw hui awˬ pon awˬ me‸ awˬ hponˇ hpeh‸ ve yoˬ,
teh‸ kʼoˆ ve yoˬ.
33Yaˇ ehˉ awˬ lawn yawˇ oˇ hkʼe kʼoˆ ve hta‸ awˬ pa awˬ e anˇ ve yoˬ. 34Suˉmonˍ lehˬ, yawˇ hui hta‸ bon na‸ piˇ leh, awˬ e Maˍriˆ hta‸ kʼoˆ piˇ ve, Yaˇ ehˉ chi hta‸ pa taw, Iˉsaˍreˍlaˆ chaw laiˉ gʼaˇ paiˍ leh laiˉ gʼaˇ tu la tuˬ yoˬ. Yawˇ lehˬ, shu maˇ shawˍ maˇ caˆ kʼoˆ tuˬ ve awˬ heˆ hpeh‸ tuˬ yoˬ. 35Chi hkʼoˆ ka‸, chaw laiˉ gʼaˇ nyi ma hkʼaw dawˇ taˍ ve teˇ hpaˍ hta‸ yawˇ hpeu‸ tawˆ la piˇ tuˬ yoˬ. Aˉ htaw lehˬ, nawˬ ve nyi ma hta‸ juˆ pawnˍ laˇ ve hkʼe ˬ nawˬ gʼa dawˇ haˍ jaˇ tuˬ yoˬ teh‸ kʼoˆ piˇ ve yoˬ.
36Aˍsaˍ ve awˬ ceuˬ awˬ hkʼaˇ, Hpaˍnoˍeˍlaˆ ve awˬ yaˇ miˇ Aˍnaˆ meh ve tcuh kaˍ ma teˇ gʼaˇ cawˬ ve yoˬ. Yawˇ lehˬ mawˇ jaˇ peuˬ. Yawˇ awˬ hpawˇ heuˆ peuˬ hkʼaw‸ nawˉ, awˬ hpawˇ geh suhˍ hkʼaw‸ ceh tiˉ gʼa chehˇ leh, 37hiˉ chi awˇ hkʼaw‸ hkʼa gaˬ mehˇchawˇma hpeh‸ chehˇ ve yoˬ. Yawˇ lehˬ, bon yehˬ lonˉ awˬ hkʼaw lo ceh tiˉ chehˇ taˍ leh, tanˇ hkuinˇ tanˇ vanˇ caˇ tuˬ ce leh bon lawˬ ve awˬ hkʼaw lo Gʼuiˬsha hta‸ oˉ kʼoˍ pui chehˇ ve yoˬ. 38Awˬ yanˇ oˇ ve awˬ hkʼaw lo yawˇ laˬ leh Gʼuiˬsha hta‸ chiˇ mvuh ve yoˬ. Peuˬ leh, Yeˍruˆsaˍlehnˍ venˇ hta‸ htaiˍ hkʼaw‸ ve te ceuˬ hta‸ dawˇ law chehˇ ve chaw hkʼa peu-eˬ hta‸ yaˇ ehˉ oˇ ve awˬ lawn yawˇ kʼaoˍ maˍ piˇ ve yoˬ.
Naˍzaˍrehˆ venˇ lo kʼaw‸ kʼo‸-e ve
39Awˬ pa awˬ e lehˬ, Jawˇmawˇ Gʼuiˬsha ve awˬliˇtawˇhkawˇ cawˬ taˍ ve hkʼa shuˍ shuˍ hkʼa peu-eˬ hta‸ te peuˬ hkʼaw‸ nawˉ, yawˇ huiˉ maˬ ve chehˇ kuiˬ Gaˍliˍlehˇ mvuhˇmiˬ Naˍzaˍrehˆ venˇ lo kʼaw‸ kʼo‸-e ve yoˬ. 40Yaˇ ehˉ oˇ ve uiˍ la leh, awˬ gʼaˇ awˇ shaˉ uiˍ la ve yoˬ. Cuˇ yiˍ maˍ yiˍ hkʼa biˇ cawˬ la leh, Gʼuiˬsha ve awˬ bon yawˇ awˬ hkʼoˆ lo cawˬ ve yoˬ.
Yaˇ paˍ ehˉ Yeˍsuˆ bon yehˬ lonˉ lo taˆ-e ve
41Paˍsaˍhkaˍ pawehˇ te ve awˬ yanˇ gaˬ htaˇ, yawˇ ve awˬ pa awˬ e lehˬ, teˇ hkʼaw‸ le le Yeˍruˆsaˍlehnˍ venˇ lo kʼai ve yoˬ. 42Yawˇ a sha‸ teˇ chi nyiˇ hkʼaw‸ gaˬ ve teˇ yanˇ, yawˇ hui awˬ liˇ cawˬ ve hkʼe, Yeˍruˆsaˍlehnˍ venˇ lo taˆ-e ve yoˬ. 43Pawehˇ te ve awˬ nyi awˬ haˉ teˇ hpaˍ peuˬ leh, yawˇ hui kʼo‸-e htaˇ, yaˇ paˍ ehˉ Yeˍsuˆ lehˬ Yeˍruˆsaˍlehnˍ venˇ hkʼaw lo chehˇ taˉ ve yoˬ. Ya‸ hkʼaˇ, awˬ pa awˬ e maˇ shiˍ. 44Awˬ moˍ lonˉ awˬ hkʼaw lo awˬ chawˇ teˇ hpaˍ geh yawˇ kʼo‸-e peuˬ hehˉ teh‸ dawˇ leh, yawˇ huiˉ maˬ teˇ nyi ya‸ kʼaw kʼo‸-e ve yoˬ. Oˇ htaˇ, awˬ ceuˬ awˬ hkʼaˇ leh awˬ chawˇ teˇ hpaˍ geh yawˇ hta‸ ca nyi ve yoˬ. 45Maˇ mawˬ ve teˇ yanˇ, yawˇ huiˉ maˬ Yeˍruˆsaˍlehnˍ venˇ lo kʼaw‸ kʼai leh yawˇ hta‸ ca ve yoˬ. 46Shehˆ nyi gaˬ ve teˇ yanˇ, yaˇ ehˉ hta‸ bon yehˬ lonˉ awˬ hkʼaw lo gʼa mawˬ ve yoˬ. Yawˇ lehˬ, saˍ la‸ teˇ hpaˍ awˬ kʼaw ji lo mui taˍ leh, yawˇ hui ve tawˇ hkawˇ hta‸ na leh yawˇ hui hta‸ na nyi chehˇ ve yoˬ. 47Yawˇ ve tawˇ hkawˇ hta‸ gʼa kaˇ ve chaw hkʼa peu-eˬ lehˬ, yawˇ dawˇ shiˍ puiˉ ve hta‸ maˇ kʼoˆ, yawˇ yaw hkʼaw‸ ve teˇ hpaˍ hta‸ maˇ kʼoˆ, anˇ ve yoˬ. 48Yawˇ huiˉ maˬ yawˇ hta‸ gʼa mawˬ htaˇ anˇ jaˇ leh, yawˇ ve awˬ e yawˇ hta‸ kʼoˆ piˇ ve, Yaˇ paˍ-oˬ, aˬ hto‸ ma te nawˬ ngaˬ huiˉ maˬ hta‸ chi hkʼe te laˇ ve le. Nawˬ pa ngaˬ huiˉ maˬ dawˇ haˍ jaˇ ve awˬ hkʼaw lo nawˬ hta‸ ca chehˇ ve yoˬ teh‸ kʼoˆ piˇ ve yoˬ.
49Yawˇ kʼaw‸ kʼoˆ ve, Aˬ hto‸ ma pa taw nawˬ huiˉ maˬ ngaˬ hta‸ ca ve le. Ngaˬ Awˬ pa ve yehˬ hkʼaw lo ngaˬ gʼa chehˇ ve hta‸ nawˬ huiˉ maˬ maˇ shiˍ laˇ teh‸, yawˇ huiˉ maˬ hta‸ kʼoˆ piˇ ve yoˬ. 50Ya‸ hkʼaˇ, yawˇ kʼoˆ ve tawˇ hkawˇ hta‸ yawˇ huiˉ maˬ na maˇ gʼa.
51Yawˇ lehˬ, yawˇ huiˉ maˬ geh Naˍzaˍ rehˆ venˇ lo kʼo‸-e leh, yawˇ huiˉ maˬ ve tawˇ hkawˇ hta‸ hkʼa deh‸ na yuˬ chehˇ ve yoˬ. Yawˇ ve awˬ e lehˬ, awˬ ceuˬ oˇ ve hkʼa peu-eˬ hta‸ nyi ma hkʼaw lo tawnˇ taˍ ve yoˬ. 52Yeˍsuˆ lehˬ, cuˇ yiˍ maˍ yiˍ maˇ kʼoˆ, awˬ to maˇ kʼoˆ, uiˍ la leh, Gʼuiˬsha ka‸ chaw yaˇ ka‸ yawˇ hta‸ nyi ma cawˇ ve yoˬ.
Currently Selected:
Luˉka‸ li‸ 2: LHBE
Highlight
Share
Copy
Want to have your highlights saved across all your devices? Sign up or sign in
Lahu Bible Edited © Thailand Bible Society and Bible Society of Myanmar, 2010, 2020.
