Oˉ kʼoˍ pui ve li‸ 9
9
Aˍronˍ Gʼuiˬsha hta‸ tanˇ piˇ ve
1Aˉ yaˇ piˇ ve kanˉ hkʼa peu-eˬ ve hta‸ te peuˬ hkʼaw‸ nawˉ, Moˉseˍ lehˬ Aˍronˍ leh yawˇ ve yaˇ teˇ hpaˍ leh Iˉsaˍreˍlaˆ chaw awˬ hoˉ awˬ naˬ teˇ hpaˍ hta‸ kuˬ hpawnˬ leh, yawˇ hui hta‸ chi hkʼe kʼoˆ piˇ ve yoˬ. 2Te‸ chiˉ awˬ kuiˉ awˬ haiˇ maˇ cawˬ ve nuˇ paˍ teˇ hkeh leh yawˬ ehˉ teˇ hkeh hta‸ yuˬ leh, Gʼuiˬsha hta‸ tuˉ tanˇ piˇ-oˆ. Nuˇ paˍ oˇ ve lehˬ venˇbaˆ hpehˇ ve tuˉ tanˇ tuˬ hpeh‸ leh, yawˬ ehˉ lehˬ aˬ miˍ tuˉ tanˇ tuˬ hpeh‸ ve yoˬ. 3Oˇ hkʼe te peuˬ ve kʼo, Iˉsaˍreˍlaˆ chaw hui hta‸ htawˇ venˇbaˆ hpehˇ ve tuˉ tanˇ tuˬ awˬ pon, te‸ chiˉ awˬ kuiˉ awˬ haiˇ maˇ cawˬ ve aˉ che‸ awˬ paˍ teˇ hkeh leh aˬ miˍ tuˉ tanˇ tuˬ awˬ pon teˇ hkʼaw‸ biˇ peuˬ ve nuˇ teˇ hkeh, yawˬ ehˉ teˇ hkeh, 4awˬ chawˇ te da‸ ve tuˉ tanˇ tuˬ awˬ pon nuˇ paˍ teˇ hkeh leh, yawˬ ehˉ teˇ hkeh yuˬ veu laˇ tuˬ hto piˇ-oˆ. Yawˇ hui lehˬ shaˍlonˍ chu hkaw‸ taˍ ve awˬ shiˍ awˬ nu tuˉ tanˇ tuˬ geh teˇ geh to nuˇ to shaˆ oˇ ve teˇ hpaˍ Gʼuiˬsha hta‸ gʼa tuˉ tanˇ piˇ ve yoˬ. Awˬ lawn kʼo, ya‸ nyi Gʼuiˬsha yawˇ hui geh ya‸ la tuˬ ve pa taw, yawˇ hui chi hkʼe gʼa te ve yoˬ, teh‸ yawˇ hui hta‸ kʼoˆ piˇ ve yoˬ.
5Yawˇ hui lehˬ Moˉseˍ kʼoˆ piˇ ve hkʼe, mawˇ oˇ ve teˇ hpaˍ hta‸ aˉ po kʼo bon yehˬ gʼuˇ suhˍ lo yuˬ laˬ ve yoˬ. Chaw moˍ lonˉ htawˇ Gʼuiˬsha hta‸ oˉ kʼoˍ pui tuˬ oˇ kaˬ lo hpawnˬ chehˇ taˍ ve yoˬ. 6Oˇ htaˇ Moˉseˍ kʼoˆ ve, Gʼuiˬsha ve awˬ gʼeuˆ nawˬ hui hta‸ ba laˇ hpeh‸ tuˬ, nawˬ hui chi hkʼe gʼa te ve yoˬ, teh‸ yawˇ hui hta‸ kʼoˆ piˇ ve yoˬ. 7Aˍronˍ hta‸ htawˇ yawˇ chi hkʼe kʼoˆ piˇ ve yoˬ. Tuˉ tanˇ kuiˬ lo kʼai leh, nawˬve venˇbaˆ leh chaw yaˇ teˇ hpaˍ ve venˇbaˆ hta‸ yuˬ baˬ tuˬ, venˇbaˆ hpehˇ ve tuˉ tanˇ tuˬ leh aˬ miˍ tuˉ tanˇ ve tanˇ tuˬ hta‸ ca tuˉ tanˇ piˇ-oˆ. Gʼuiˬsha kʼoˆ taˍ ve hkʼe, venˇbaˆ gʼa ponˬ tuˬ ca tuˉ tanˇ piˇ-oˆ, teh‸ yawˇ hta‸ kʼoˆ piˇ ve yoˬ.
8Aˍronˍ tuˉ tanˇ kuiˬ lo kʼai leh yawˇ ve venˇbaˆ awˬ pon nuˇ paˍ teˇ hkeh hta‸ tiˇ pehˍ ve yoˬ. 9Yawˇ ve yaˇ teˇ hpaˍ lehˬ yawˇ geh lo awˬ suhˍ yuˬ veu laˇ piˇ ve yoˬ. Yawˇ lehˬ awˬ suhˍ hkʼaw lo la‸ naw tuˍ keu peuˬ hkʼaw‸ nawˉ, tuˉ tanˇ kuiˬ hkʼoˆ lo cawˬ ve awˬ hkaw teˇ hpaˍ hta‸ hpeh‸ pfuhˍ piˇ ve yoˬ. Cawˬ taˍ sheˍ ve awˬ suhˍ hta‸ tuˉ tanˇ kuiˬ awˬ hkuiˉ puiˍ lo ngeuˍ baˬ ve yoˬ. 10Oˇ hkʼe te peuˬ hkʼaw‸ nawˉ, yawˇ lehˬ awˬ chu, awˬ lanˇ shiˍ, awˬ shehˍ chi teˇ hpaˍ hta‸ yuˬ leh Gʼuiˬsha kʼoˆ ve hkʼe tuˉ tanˇ piˇ ve yoˬ. 11Nuˇ shaˍ leh awˬ guiˬ kʼuˉ hta‸ fa la awˬ baˬ hpawˇ lo yuˬ kʼai leh, aˬ miˍ tuˉ baˬ ve yoˬ.
12Yawˇ lehˬ, yawˇ awˬ to pon aˬ miˍ tuˉ tanˇ piˇ tuˬ ve to nuˇ to shaˆ hta‸ htawˇ kʼaw‸ tiˇ pehˍ ve yoˬ. Yawˇ ve yaˇ teˇ hpaˍ lehˬ, yawˇ geh lo awˬ suhˍ yuˬ veu laˇ piˇ leh, yawˇ ve la‸ naw awˬ suhˍ hkʼaw tuˍ keu peuˬ hkʼaw‸ nawˉ tuˉ tanˇ kuiˬ hta‸ hpeh‸ pfuhˍ piˇ ve yoˬ. 13Yawˇ hui yawˇ hta‸ oˉ kʼoˍ shiˍ leh awˬ shaˍ teˇ hpaˍ kʼaw‸ yuˬ piˇ leh, yawˇ lehˬ oˇ ve teˇ hpaˍ hta‸ tuˉ tanˇ kuiˬ hkʼoˆ lo tuˉ tanˇ piˇ ve yoˬ. 14Peuˬ hkʼaw‸ nawˉ, yawˇ lehˬ awˬ gʼuˬ tehˆ leh hkui sheh teˇ hpaˍ hta‸ tsuhˇ baˬ leh, tuˉ tanˇ kuiˬ hkʼoˆ lo kʼaw‸ tuˉ tanˇ piˇ ve yoˬ.
15Oˇ hkʼe te peuˬ hkʼaw‸ nawˉ, yawˇ lehˬ chaw yaˇ teˇ hpaˍ yuˬveu laˇ ve tuˉ tanˇ tuˬ hta‸ tuˉ tanˇ piˇ ve yoˬ. Chaw yaˇ teˇ hpaˍ venˇbaˆ gʼa ponˬ tuˬ yuˬ veu laˇ ve aˉ che‸ hta‸ yawˇ tiˇ pehˍ leh, tuˉ tanˇ piˇ ve yoˬ. 16Aˬ miˍ tuˉ tanˇ piˇ tuˬ ve to nuˇ to shaˆ hta‸ htawˇ yuˬ laˬ leh, awˬ liˇ awˬ hkʼaˇ cawˬ ve hkʼe tuˉ tanˇ piˇ ve yoˬ. 17Awˬ shiˍ awˬ nu tuˉ tanˇ tuˬ awˬ pon caˬ hkʼa meu-eˬ teˇ kaˆ hta‸ yuˬ leh tuˉ tanˇ kuiˬ hkʼoˆ lo gʼa tuˉ tanˇ piˇ ve yoˬ. (Chi lehˬ teˇ nyi le le gʼa te ve kanˉ maˇ heˆ) 18Yawˇ lehˬ, awˬ chawˇ te da‸ ve tuˉ tanˇ tuˬ awˬ pon chaw yaˇ teˇ hpaˍ yuˬ veu laˇ ve nuˇ leh yawˬ ehˉ hta‸ htawˇ tiˇ pehˍ leh, tuˉ tanˇ piˇ ve yoˬ. Yawˇ ve yaˇ teˇ hpaˍ yawˇ geh lo awˬ suhˍ yuˬ veu laˇ piˇ leh, tuˉ tanˉ kuiˬ hta‸ hpeh‸ pfuhˍ piˇ ve yoˬ. 19Aˍronˍ lehˬ nuˇ chu leh yawˬ ehˉ awˬ chu hta‸ yuˬ leh, 20nyi ma pui shaˍ hkʼoˆ taˍ peuˬ hkʼaw‸ nawˉ, tuˉ tanˇ kuiˬ lo yuˬ kʼai ve yoˬ. Yawˇ lehˬ awˬ chu oˇ ve teˇ hpaˍ hta‸ tuˉ tanˇ kuiˬ hkʼoˆ lo tuˉ tanˇ piˇ leh, 21nyi ma pui shaˍ leh la‸ sha paˉ ve hkui sheh hta‸ Moˉseˍ kʼoˆ taˍ ve hkʼe, paw hkuˇ teˇ hpaˍ hta‸ caˍ piˇ tuˬ awˬ pon Gʼuiˬsha hta‸ chiˇ a‸ piˇ ve yoˬ.
22Aˍronˍ lehˬ tuˉ tanˇ tuˬ oˇ ve hkʼa peu-eˬ ve hta‸ tuˉ tanˇ piˇ peuˬ hkʼaw‸ nawˉ, yawˇ ve la‸sheh chiˇ leh chaw yaˇ teˇ hpaˍ hta‸ bon na‸ piˇ ve yoˬ. Oˇ ve hkʼaw‸ nawˉ, yawˇ ya‸ la ve yoˬ. 23Moˉseˍ leh Aˍronˍ yawˇ huiˉ maˬ aˉ po kʼo bon yehˬ hkʼaw lo‸-e leh kʼaw‸ tawˆ la ve teˇ yanˇ, yawˇ huiˉ maˬ chaw yaˇ teˇ hpaˍ hta‸ bon kʼaw‸ na‸ piˇ ve yoˬ. Oˇ htaˇ, Gʼuiˬsha ve awˬ gʼeuˆ yawˇ hui hkʼa peu-eˬ awˬ hkʼoˆ lo ba la ve yoˬ. 24Gʼuiˬsha lehˬ, teˇ cawˬ haˉ aˬ miˍ hta‸ ce ya‸ la piˇ leh, tuˉ tanˇ kuiˬ hkʼoˆ lo cawˬ ve tanˇ tuˬ teˇ hpaˍ hta‸ to‸ baˬ piˇ lawˬ ve yoˬ. Oˇ hkʼe hpeh‸ la ve hta‸ chaw yaˇ teˇ hpaˍ gʼa mawˬ ve teˇ yanˇ, yawˇ hui hpoˆ kuˬ leh miˬ chaˇ hkʼoˆ lo boˆ taˍ ve yoˬ.
Currently Selected:
Oˉ kʼoˍ pui ve li‸ 9: LHBE
Highlight
Share
Copy
Want to have your highlights saved across all your devices? Sign up or sign in
Lahu Bible Edited © Thailand Bible Society and Bible Society of Myanmar, 2010, 2020.
