Oˉ kʼoˍ pui ve li‸ 8
8
Aˍronˍ leh yawˇ ve yaˇ teˇ hpaˍ hta‸ aˉ yaˇ piˇ ve
1Gʼuiˬsha Moˉseˍ hta‸ chi hkʼe kʼoˆ piˇ ve yoˬ. 2Aˍronˍ leh yawˇ ve yaˇ teˇ hpaˍ hta‸ aˉ po kʼo bon yehˬ yehˬmiˉhpe‸ lo shiˍ kʼai leh, paw hkuˇ ve veu‸ kʼaˇ teˇ hpaˍ, shaˍlonˍ chu, leh venˇbaˆ hpehˇ ve tuˉ tanˇ tuˬ awˬ pon nuˇ paˍ haˉ teˇ hkeh, yawˬ ehˉ nyiˇ hkeh leh diˇ maˇ keu ve hkaoˍmonˇ teˇ hkʼawˍ lawˇ yuˬ laˬ-o‸. 3Oˇ hkʼe te peuˬ hkʼaw‸ nawˉ, Iˉsaˍreˍlaˆ chaw hkʼa peu-eˬ ve hta‸ oˇ kaˬ lo kuˬ hpawnˬ-o‸, teh‸ Moˉseˍ hta‸ kʼoˆ piˇ ve yoˬ.
4Moˉseˍ lehˬ Gʼuiˬsha kʼoˆ ve hkʼe chaw moˍ lonˉ hta‸ kuˬ hpawnˬ leh, 5Chi beu‸ ngaˬ te tuˬ ve kanˉ chi lehˬ, Gʼuiˬsha ngaˬ hta‸ kʼoˆ laˇ taˍ ve kanˉ hpeh‸ ve yoˬ, teh‸ yawˇ hui hta‸ kʼoˆ piˇ ve yoˬ.
6Moˉseˍ lehˬ, Aˍronˍ leh yawˇ ve yaˇ teˇ hpaˍ hta‸ yawˇ hui gʼuˇ suhˍ lo shiˍ laˬ leh, yawˇ hui hta‸ iˉ kaˆ hehˉ tcuh ve yoˬ. 7Oˇ hkʼe te tcuh peuˬ hkʼaw‸ nawˉ, yawˇ Aˍronˍ hta‸ paw hkuˇ ve veu‸ kʼaˇ feuˉ piˇ leh, haˍ pi tsuh‸ piˇ ve yoˬ. 8Yawˇ ve nyi ma pui hkʼoˆ lo nyi ma pui beh tuˬ hta‸ hpeh piˇ leh, uˉrenˍ leh tuˇmenˍ yuˬ keu piˇ ve yoˬ. 9Yawˇ ve oˉ kʼoˍ hkʼoˆ lo uˉ nyiˉ nyiˉ piˇ leh, Gʼuiˬsha kʼoˆ taˍ ve hkʼe uˉ nyi oˇ ve awˬ hkʼoˆ lo da‸ kehˬ ve shi baˉ yuˬ hpeh piˇ taˍ ve yoˬ.
10Oˇ hkʼe te peuˬ hkʼaw‸ nawˉ, Moˉseˍ lehˬ naˍmanˇ pfuhˍ piˇ tuˬ ve shaˍlonˍ chu hta‸ yuˬ leh aˉ po kʼo bon yehˬ hkʼaw lo Gʼuiˬsha hta‸ chiˇ a‸ piˇ ve yoˬ. 11Yawˇ lehˬ shaˍlonˍ chu hta‸ yuˬ leh tuˉ tanˇ kuiˬ, hkehˇ pe le leh awˬ nu ve mawˇ teˇ hpaˍ hta‸ suhˍ pawˆ hkʼa gaˬ hpeh‸ pfuhˍ piˇ ve yoˬ. 12Yawˇ lehˬ, Aˍronˍ ve oˉ kʼoˍ hkʼoˆ lo naˍ manˇ ngeuˍ pfuhˍ leh, yawˇ hta‸ aˉ yaˇ piˇ ve yoˬ. 13Oˇ ve hkʼaw‸ nawˉ, yawˇ lehˬ Aˍronˍ ve yaˇ teˇ hpaˍ hta‸ veu‸ kʼaˇ kʼaw‸ feuˉ piˇ leh, Gʼuiˬsha kʼoˆ taˍ ve hkʼe yawˇ hui hta‸ uˉ tcuhˍ hkʼawˆ piˇ ve yoˬ.
14Oˇ hkʼe te peuˬ hkʼaw‸ nawˉ, Moˉseˍ lehˬ Gʼuiˬsha hta‸ tuˉ tanˇ piˇ tuˬ ve nuˇ paˍ lonˉ hta‸ yuˬ leh, Aˍronˍ leh yawˇ ve yaˇ teˇ hpaˍ lehˬ nuˇ paˍ oˇ ve oˉ kʼoˍ hkʼoˆ lo a shu yawˇ ve la‸ sheh taˍ ve yoˬ. 15Moˉseˍ lehˬ nuˇ oˇ ve hta‸ tiˇ pehˍ leh, awˬ suhˍ hkʼaw yawˇ ve la‸ naw tuˍ keu peuˬ hkʼaw‸ nawˉ, tuˉ tanˇ kuiˬ hkʼoˆ lo cawˬ ve awˬ hkaw teˇ hpaˍ hta‸ hpeh‸ pfuhˍ piˇ ve yoˬ. Yawˇ lehˬ cawˬ taˍ sheˍ ve awˬ suhˍ hta‸ tuˉ tanˇ kuiˬ awˬ hkuiˉ puiˍ lo ngeuˍ baˬ ve yoˬ. Oˇ hkʼe te ve hkʼaw, yawˇ lehˬ tuˉ tanˇ kuiˬ hta‸ da‸ piˇ kehˬ piˇ ve yoˬ. 16Moˉseˍ lehˬ, awˬ gʼuˬ tehˆ hta‸ ngawˉ taˍ ve awˬ chu hkʼa peu-eˬ, nuˇ shehˍ, awˬ lanˇ shiˍ leh oˇ ve hta‸ ngawˉ taˍve awˬ chu hkʼa peu-eˬ hta‸ tuˉ tanˇ kuiˬ hkʼoˆ lo teh leh tuˉ tanˇ piˇ ve yoˬ. 17Yawˇ lehˬ cawˬ taˍ ve nuˇ shaˍ, nuˇ guiˬ kʼuˉ, awˬ gʼuˬ tehˆ chi teˇ hpaˍ hta‸ Gʼuiˬsha kʼoˆ taˍ ve hkʼe, yawˇ hui ve fa la awˬ baˬ hpawˇ lo yuˬ kʼai leh aˬ miˍ tuˉ baˬ ve yoˬ.
18Oˇ ve hkʼaw‸ nawˉ, Moˉseˍ lehˬ Gʼuiˬsha hta‸ tuˉ tanˇ piˇ tuˬ ve yawˬ ehˉ hta‸ kʼaw‸ yuˬ laˬ leh, Aˍronˍ leh yawˇ ve yaˇ teˇ hpaˍ lehˬ, yawˬ ehˉ oˇ ve oˉ kʼoˍ hkʼoˆ lo yawˇ hui ve la‸ sheh taˍ ve yoˬ. 19Moˉseˍ lehˬ yawˬ ehˉ oˇ ve hta‸ tiˇ pehˍ leh awˬ suhˍ hkʼaw yawˇ ve la‸ naw tuˍ keu peuˬ hkʼaw‸ nawˉ, tuˉ tanˇ kuiˬ hta‸ hpeh‸ pfuhˍ piˇ ve yoˬ. 20Yawˇ lehˬ yawˬ ehˉ oˇ ve hta‸ tawˆ hpoˆ leh, awˬ gʼuˬ tehˆ leh hkui sheh teˇ hpaˍ hta‸ tsuhˇ baˬ ve yoˬ. Oˇ hkʼe te peuˬ hkʼaw‸ nawˉ, Gʼuiˬsha kʼoˆ taˍ ve hkʼe, oˉ kʼoˍ shiˍ, awˬ chu leh awˬ shaˍ hkʼa peu-eˬ ve hta‸ tuˉ tanˇ kuiˬ hkʼoˆ lo tuˉ tanˇ piˇ ve yoˬ. 21Chi hkʼe ve tuˉ tanˇ tuˬ lehˬ awˬ shaˉ hawnˉ leh, Gʼuiˬsha nyi ma cawˇ ve tuˉ tanˇ tuˬ hpeh‸ ve yoˬ.
22Oˇ ve hkʼaw‸ nawˉ, Moˉseˍ lehˬ yawˬ ehˉ nyiˇ hkeh teˇ hkeh hta‸ kʼaw‸ yuˬ laˬ leh, Aˍronˍ leh yawˇ ve yaˇ teˇ hpaˍ lehˬ yawˬ ehˉ oˇ ve oˉ kʼoˍ hkʼoˆ lo a shu yawˇ ve la‸ sheh taˍ ve yoˬ. Yawˬ ehˉ chi ve lehˬ, paw hkuˇ teˇ hpaˍ hta‸ aˉ yaˇ piˇ tuˬ ve awˬ pon yoˬ. 23Moˉseˍ lehˬ, yawˬ ehˉ oˇ ve hta‸ tiˇ pehˍ peuˬ hkʼaw‸ nawˉ, awˬ suhˍ hta‸ yuˬ leh Aˍronˍ ve la‸ sha paˉ naˍ paw, la‸ sha paˉ ve la‸ ma peuˍ, leh la‸ sha paˉ ve hkui ma peuˍ hta‸ shehˆ piˇ ve yoˬ. 24Oˇ ve hkʼaw‸ nawˉ, yawˇ lehˬ Aˍronˍ ve yaˇ teˇ hpaˍ hta‸ kʼaw‸ shiˍ laˬ leh, yawˇ hui ve la‸ sha paˉ naˍ paw, la‸ sha paˉ ve la‸ ma peuˍ, la‸ sha paˉ ve hkui ma peuˍ hta‸ yawˬ ehˉ awˬ suhˍ shehˆ piˇ ve yoˬ. Yawˇ lehˬ cawˬ taˍsheˍ ve awˬ suhˍ hta‸ tuˉ tanˇ kuiˬ hta‸ hpeh‸ pfuhˍ piˇ ve yoˬ. 25Yawˇ lehˬ yawˬ ehˉ awˬ chu, awˬ mehˍ tu, awˬ gʼuˬ tehˆ hta‸ ngawˉ taˍ ve awˬ chu, awˬ shehˍ, awˬ lanˇ shiˍ leh oˇ ve hta‸ ngawˉ taˍ ve awˬ chu hkʼa peu-eˬ leh la‸ sha paˉ ve hkui sheh hta‸ yuˬ ve yoˬ. 26Oˇ ve hkʼaw‸ nawˉ, yawˇ lehˬ hkʼawˍ lawˇ hkʼaw keu taˍ ve diˇ maˇ keu ve hkaoˍmonˇ teˇ shiˍ leh shawˆ taˍ ve hkaoˍmonˇ teˇ baˉ hta‸ yuˬ leh, yawˬ ehˉ awˬ chu leh la‸ sha paˉ ve hkui sheh awˬ hkʼoˆ lo teh taˍ ve yoˬ. 27Yawˇ lehˬ caˇ tuˬ oˇ ve teˇ hpaˍ, Aˍronˍ leh yawˇ ve yaˇ teˇ hpaˍ ve la‸ sheh hkʼaw lo chiˇ a‸ piˇ ve yoˬ. Yawˇ hui teˇ caˉ Gʼuiˬsha hta‸ kʼaw‸ tanˇ piˇ ve yoˬ. 28Oˇ hkʼe te peuˬ hkʼaw‸ nawˉ, Moˉseˍ lehˬ caˇ tuˬ oˇ ve teˇ hpaˍ hta‸ yawˇ hui geh kʼaw‸ yuˬ hkʼaw‸ leh, tuˉ tanˇ kuiˬ hkʼoˆ lo tuˉ tanˇ piˇ ve yoˬ. Chi ve lehˬ, aˉ yaˇ piˇ ve tuˉ tanˇ tuˬ hpeh‸ ve yoˬ. Chi hkʼe te ve lehˬ, awˬ shaˉ hawnˉ leh Gʼuiˬsha nyi ma cawˇ ve tuˉ tanˇ tuˬ hpeh‸ ve yoˬ. 29Oˇ ve hkʼaw‸ nawˉ, Moˉseˍ lehˬ yawˬ ehˉ ve nyi ma pui shaˍ hta‸ yuˬ leh, Gʼuiˬsha hta‸ tanˇ piˇ ve yoˬ. Chi ve lehˬ, Moˉseˍ gʼa te cawˇ ve aˉ yaˇ piˇ ve kanˉ hpeh‸ ve yoˬ. Moˉseˍ lehˬ Gʼuiˬsha kʼoˆ piˇ taˍ ve hkʼe hkʼa deh‸ na yuˬ leh te ve yoˬ.
30Moˉseˍ lehˬ, naˍmanˇ leh tuˉ tanˇ kuiˬ hkʼoˆ lo teh taˍ ve awˬ suhˍ hta‸ yuˬ leh, Aˍronˍ leh yawˇ ve yaˇ teˇ hpaˍ hta‸ hpeh‸ pfuhˍ piˇ ve yoˬ. Chi hkʼe te ve lehˬ, yawˇ hui hta‸ Gʼuiˬsha ve la‸ sheh hkʼaw chiˇ a‸ piˇ ve awˬ heˆ hpeh‸ ve yoˬ.
31Oˇ hkʼe te piˇ peuˬ hkʼaw‸ nawˉ, Moˉseˍ lehˬAˍronˍ leh yawˇ ve yaˇ teˇ hpaˍ hta‸ chi hkʼe kʼoˆ piˇ ve yoˬ. Shaˍ chi teˇ hpaˍ hta‸ aˉ po kʼo bon yehˬ yehˬmiˉhpe‸ lo yuˬ kʼai leh, Gʼuiˬsha kʼoˆ taˍ ve hkʼe oˇ kaˬ lo mu‸ hkʼu hkʼaw keu caˉ caˇ-oˆ. Aˉ yaˇ piˇ htaˇ hkʼawˍ lawˇ hkʼaw keu tanˇ taˍ ve hkaoˍmonˇ oˇ ve teˇ hpaˍ hta‸ htawˇ yuˬ caˇ-oˆ. 32Caˇ maˇ peuˬ leh cawˬ taˉ ve shaˍ leh hkaoˍmonˇ teˇ hpaˍ hta‸ aˬ miˍ tuˉ baˬ-o‸. 33Nawˬ hui lehˬ suhˍ nyi hkʼa gaˬ, bon yehˬ hkʼaw maˇ gʼa tawˆ kʼai. Nawˬ hui hta‸ aˉ yaˇ piˇ ve kanˉ chi peuˬ htaˇ hkʼa gaˬ, oˇ kaˬ lo gʼa chehˇ taˍ ve yoˬ. 34Nawˬ hui ve venˇbaˆ hta‸ yuˬ baˬ tuˬ, Gʼuiˬsha ngaˬ hui hta‸ chi hkʼe te tcuh laˇ taˍ ve yoˬ. 35Nawˬ hui lehˬ suhˍ nyi hkʼa gaˬ, teˇ shawˉ teˇ haˉ le aˉ po kʼo bon yehˬ yehˬmiˉhpe‸ lo gʼa chehˇ taˍ leh, Gʼuiˬsha kʼoˆ ve kanˉ hta‸ gʼa te chehˇ taˍ ve yoˬ. Nawˬ hui oˇ hkʼe maˇ te kʼo gʼa suh tuˬ yoˬ. Chi hkʼe te tuˬ Gʼuiˬsha ngaˬ hta‸ kʼoˆ laˇ taˍ ve yoˬ, teh‸ yawˇ hui hta‸ kʼoˆ piˇ ve yoˬ. 36Aˍronˍ leh yawˇ ve yaˇ teˇ hpaˍ lehˬ, Gʼuiˬsha Moˉseˍ hta‸ cuˇ leh kʼoˆ piˇ taˍ ve tawˇ oˇ ve hkʼa peu-eˬ hta‸ hkʼa deh‸ na yuˬ ve yoˬ.
Currently Selected:
Oˉ kʼoˍ pui ve li‸ 8: LHBE
Highlight
Share
Copy
Want to have your highlights saved across all your devices? Sign up or sign in
Lahu Bible Edited © Thailand Bible Society and Bible Society of Myanmar, 2010, 2020.
