Oˉ kʼoˍ pui ve li‸ 7
7
Gʼuiˬsha hta‸ kʼaw‸ hkʼaw‸ piˇ ve tanˇ tuˬ
1Gʼuiˬsha hta‸ kʼaw‸ hkʼaw‸ piˇ ve da‸ kehˬ ve tanˇ tuˬ tanˇ piˇ ve awˬ liˇ awˬ hkʼaˇ chi hkʼe cawˬ ve yoˬ. 2Tanˇ tuˬ chi awˬ pon yuˬ veu laˇ ve to nuˇ to shaˆ hta‸ tuˉ tanˇ kuiˬ awˬ na hpawˇ lo gʼa tiˇ pehˍ leh, tuˉ tanˇ kuiˬ hta‸ awˬ suhˍ gʼa hpeh‸ pfuhˍ piˇ ve yoˬ. 3Awˬ chu hkʼa peu-eˬ, mehˍ tu hkʼoˆ cawˬ ve awˬ chu, awˬ gʼuˬ tehˆ hta‸ ngawˉ taˍ ve awˬ chu, 4awˬ lanˇ shiˍ leh oˇ ve hta‸ ngawˉ taˍ ve awˬ chu leh awˬ shehˍ hta‸ yuˬ leh, 5paw hkuˇ lehˬ tuˉ tanˇ kuiˬ hkʼoˆ lo Gʼuiˬsha hta‸ gʼa tuˉ tanˇ piˇ ve yoˬ. Chi ve leh, Gʼuiˬsha hta‸ kʼaw‸ hkʼaw‸ piˇ ve tuˉ tanˇ tuˬ hpeh‸ ve yoˬ. 6Paw hkuˇ awˬ ceuˬ awˬ hkʼaˇ hawˉ hkʼaˆ paˍ hkʼa peu-eˬ, shaˍ oˇ ve hta‸ caˇ hpeh‸ ve yoˬ. Ya‸ hkʼaˇ, shaˍ oˇ ve lehˬ da‸ kehˬ ve shaˍ hpeh‸ ve pa taw, da‸ kehˬ ve chehˇ kuiˬ hkʼaw lo tiˉ gʼa caˇ ve yoˬ.
7Venˇbaˆ gʼa ponˬ tuˬ tuˉ tanˇ ve leh, Gʼuiˬsha hta‸ kʼaw‸ hkʼaw‸ piˇ ve tanˇ tuˬ tuˉ tanˇ piˇ ve awˬ liˇ awˬ hkʼaˇ lehˬ, hkʼa shuˍ hpeh‸ ve yoˬ. Shaˍ oˇ ve lehˬ tuˉ tanˇ piˇ chehˇ ve paw hkuˇ hta‸ tiˉ caˉ da‸ ve yoˬ. 8Aˬ miˍ tuˉ tanˇ piˇ ve to nuˇ to shaˆ ve awˬ guiˬ kʼuˉ lehˬ, tuˉ tanˇ piˇ chehˇ ve paw hkuˇ hta‸ tiˉ caˉ da‸ ve yoˬ. 9Awˬ shiˍ awˬ nu tuˉ tanˇ piˇ htaˇ yehˇ ve hkaoˍmonˇ hkʼa peu-eˬ htawˇ, tuˉ tanˇ piˇ chehˇ ve paw hkuˇ hta‸ ceh tiˉcaˉ da‸ ve yoˬ. 10Ya‸ hkʼaˇ, maˇ te meh sheˍ ve awˬ shiˍ awˬ nu tuˉ tanˇ tuˬ teˇ hpaˍ lehˬ, shaˍlonˍ chu hkaw‸ taˍ ve maˇ kʼoˆ, maˇ hkaw‸ taˍ ve maˇ kʼoˆ, Aˍronˍ awˬ ceuˬ awˬ hkʼaˇ paw hkuˇ hkʼa peu-eˬ ve hta‸ caˉ da‸ ve yoˬ. Yawˇ hui hkʼa peu-eˬ hkʼa ma-ehˬ gʼa pehˬ caˇ ve yoˬ.
Awˬ chawˇ te da‸ ve tuˉ tanˇ tuˬ
11Awˬ chawˇ te da‸ ve tuˉ tanˇ tuˬ tanˇ piˇ ve awˬ liˇ awˬ hkʼaˇ chi hkʼe cawˬ ve yoˬ. 12Chaw teˇ gʼaˇ bon hta‸ chiˇ mvuh ve tuˉ tanˇ tuˬ Gʼuiˬsha hta‸ tuˉ tanˇ piˇ gaˇ ve kʼo, yawˇ lehˬ tanˇ piˇ tuˬ ve to nuˇ to shaˆ geh teˇ geh shaˍlonˍ chu hkaw‸ taˍ ve hkaoˍmonˇ hta‸ gʼa yuˬ laˬ ve yoˬ. 13Hkaoˍmonˇ oˇ ve lehˬ diˇ hkaw‸ taˍ ve hkaoˍmonˇ maˇ gʼa hpeh‸ piˇ. 14Yawˇ lehˬ, hkaoˍmonˇ teˇ shiˍ yuˬ leh Gʼuiˬsha hta‸ gʼa tanˇ piˇ ve yoˬ. Hkaoˍmonˇ oˇ ve lehˬ, awˬ suhˍ hta‸ yuˬ leh tuˉ tanˇ kuiˬ hta‸ hpeh‸ pfuhˍ piˇ ve paw hkuˇ awˬ pon hpeh‸ ve yoˬ. 15Shaˍ oˇ ve hta‸ tuˉ tanˇ piˇ ve teˇ nyi htaˇ gʼa caˇ peuˬ piˇ ve yoˬ. Mvuhˇ htiˇ la htaˇ hkʼa gaˬ maˇ gʼa teh taˍ.
16Chaw teˇ gʼaˇ yawˇ te taˍ ve ka ti‸ hta‸ biˇ la piˇ tuˬ, maˇ heˆ kʼo tanˇ gaˇ ve nyi ma cawˬ leh ca tanˇ la ve kʼo, shaˍ oˇ ve hta‸ tuˉ tanˇ piˇ ve teˇ nyi hkʼaw ceh tiˉ maˇ gʼa caˇ peuˬ piˇ. Shawˉ pawˍ awˬ pon ka‸ gʼa fuiˍ teh taˍ ve yoˬ. 17Shehˆ nyi hkʼa gaˬ teh leuˉ taˍ ve shaˍ hta‸ aˬ miˍ gʼa tuˉ baˬ ve yoˬ. 18Shehˆ nyi hkʼa gaˬ teh taˍ ve shaˍ hta‸ chaw teˇ gʼaˇ yuˬ caˇ ve kʼo, Gʼuiˬsha lehˬ chaw oˇ ve hpaˇ ve tuˉ tanˇ tuˬ hta‸ ha‸ yuˬ piˇ tuˬ ve maˇ heˆ. Yawˇ awˬ bon maˇ gʼa ve awˬ hkʼoˆ, yawˇ awˬ to ka‸ cha‸ chiˆ kʼai leh, shaˍ oˇ ve hta‸ caˇ ve chaw htawˇ ciˍ yanˍ ve hta‸ gʼa hkanˍ tuˬ yoˬ. 19Shaˍ oˇ ve lehˬ, maˇ da‸ ve awˬ ceuˬ hta‸ ca daw‸ ve kʼo, shaˍ oˇ ve hta‸ maˇ gʼa caˇ. Aˬ miˍ gʼa tuˉ baˬ ve yoˬ.
A shu yawˇ awˬ to hta‸ da‸ tuˬ kehˬ tuˬ te taˍ peuˬ ve chaw teˇ hpaˍ lehˬ, shaˍ oˇ ve hta‸ caˇ hpeh‸ ve yoˬ. 20Ya‸ hkʼaˇ, maˇ da‸ maˇ kehˬ ve chaw teˇ gʼaˇ shaˍ oˇ ve hta‸ caˇ ve kʼo, yawˇ hta‸ Gʼuiˬsha ve chaw teh‸ kʼaw‸ shawˍ piˇ tuˬ ve maˇ heˆ. 21Chaw teˇ gʼaˇ maˇ da‸ maˇ kehˬ ve awˬ ceuˬ hta‸ htawˇ peuˬ hkʼaw‸ nawˉ, shaˍ oˇ ve hta‸ caˇ ve kʼo, yawˇ hta‸ ka‸ Gʼuiˬsha ve chaw teh‸ kʼaw‸ shawˍ piˇ tuˬ ve maˇ heˆ.
22Gʼuiˬsha lehˬ, Iˉsaˍreˍlaˆ chaw teˇ hpaˍ awˬ pon Moˉseˍ hta‸ awˬ liˇ chi teˇ hpaˍ kʼaw‸ piˇ ve yoˬ. 23Nuˇ chu, yawˬ ehˉ awˬ chu leh aˉ che‸ awˬ chu hta‸ chaw teˇ gʼaˇ ka‸ maˇ gʼa caˇ. 24Yawˇ hkʼaˇ yawˇ suh-e ve ceˇ teˇ hpaˍ ve awˬ chu, maˇ heˆ kʼo haiˬ ve to nuˇ to shaˆ che‸ caˇ ve ceˇ teˇ hpaˍ ve awˬ chu hta‸ htawˇ maˇ gʼa caˇ. Ya‸ hkʼaˇ, awˬ chu oˇ ve hta‸ laiˉ ceuˬ te yehˇ hpeh‸ ve yoˬ. 25Gʼuiˬsha hta‸ tuˉ tanˇ piˇ tuˬ ve ceˇ teˇ hpaˍ ve awˬ chu hta‸ caˇ ve chaw hta‸, Gʼuiˬsha ve chaw teh‸ kʼaw‸ shawˍ piˇ tuˬ ve maˇ heˆ. 26Iˉsaˍreˍlaˆ chaw teˇ hpaˍ hkʼaˬ lo chehˇ ve htawˇ, ngaˆ suhˍ leh ceˇ teˇ hpaˍ ve awˬ suhˍ hta‸ maˇ gʼa caˇ. 27Awˬ liˇ chi hta‸ te ya‸ ve chaw hta‸ Gʼuiˬsha ve chaw teh‸ kʼaw‸ shawˍ piˇ tuˬ ve maˇ heˆ.
28Gʼuiˬsha lehˬ, Iˉsaˍreˍlaˆ chaw teˇ hpaˍ awˬ pon awˬ liˇ chi teˇ hpaˍ kʼaw‸ piˇ ve yoˬ. 29Chaw hkʼaˬ ve teˇ gʼaˇ maˇ kʼoˆ, awˬ chawˇ te da‸ ve tuˉ tanˇ tuˬ ca tanˇ la ve kʼo, Gʼuiˬsha hta‸ tanˇ piˇ tuˬ ve la‸ shawnˍ teˇ ceuˬ ceuˬ gʼa yuˬ laˬ ve yoˬ. 30Yawˇ lehˬ, awˬ chu leh nyi ma pui shaˍ hta‸ yuˬ laˬ leh, Gʼuiˬsha hta‸ gʼa tanˇ piˇ ve yoˬ. 31Paw hkuˇ lehˬ, awˬ chu oˇ ve hta‸ tuˉ tanˇ kuiˬ hkʼoˆ lo gʼa tuˉ tanˇ piˇ ve yoˬ. Nyi ma pui shaˍ lehˬ, paw hkuˇ awˬ pon hpeh‸ ve yoˬ. 32La‸ sha paˉ ve hkui sheh lehˬ, 33awˬ suhˍ yuˬ hpeh‸ pfuhˍ piˇ ve paw hkuˇ hta‸ gʼa piˇ ve yoˬ. 34Nyi ma pui shaˍ lehˬ la‸ shawnˍ hpeh‸ leh, la‸ sha paˉ ve hkui sheh lehˬ paw hkuˇ teˇ hpaˍ awˬ pon Gʼuiˬsha Iˉsaˍreˍlaˆ chaw hui geh lawˬ yuˬ taˍve mawˇ hpeh‸ve yoˬ. Iˉsaˍreˍlaˆ chaw teˇ co peuˬ teˇ co mawˇ chi teˇ hpaˍ paw hkuˇ teˇ hpaˍ hta‸ gʼa piˇ ve yoˬ. 35Chi ve lehˬ, Aˍronˍ leh yawˇ ve yaˇ teˇ hpaˍ hta‸ aˉ yaˇ piˇ ve teˇ nyi htaˇ, Gʼuiˬsha yawˇ hui awˬ pon fuiˍ teh taˍ piˇ ve caˇ tuˬ hpeh‸ ve yoˬ. 36Oˇ ve teˇ nyi htaˇ, Gʼuiˬsha Iˉsaˍreˍlaˆ chaw hui hta‸ caˇ tuˬ oˇ ve teˇ hpaˍ yuˬ laˬ piˇ tuˬ tawˇ piˇ ve yoˬ. Iˉsaˍreˍlaˆ chaw teˇ co peuˬ teˇ co awˬ liˇ chi hta‸ hkʼa deh‸ gʼa na yuˬ ve yoˬ.
37Chi teˇ hpaˍ lehˬ aˬmiˍ tuˉ tanˇ tuˬ, awˬ shiˍ awˬ nu tuˉ tanˇ tuˬ, venˇbaˆ hpehˇ ve tuˉ tanˇ tuˬ, Gʼuiˬsha hta‸ kʼaw‸ hkʼaw‸ piˇ ve tuˉ tanˇ tuˬ, aˉ yaˇ piˇ ve tuˉ tanˇ tuˬ leh, awˬ chawˇ te da‸ ve tuˉ tanˇ tuˬ chi teˇ hpaˍ hta‸ tuˉ tanˇ piˇ htaˇ, hkʼaˬ hkʼe gʼa te tuˬ beˆ maˍ piˇ taˍ ve awˬ liˇ awˬ hkʼaˇ teˇ hpaˍ hpeh‸ ve yoˬ. 38Iˉsaˍreˍlaˆ chaw teˇ hpaˍ heh puiˉ hkʼaw lo, Gʼuiˬsha hta‸ hkʼaˬ hkʼe gʼa te tuˉ tanˇ piˇ tuˬ Gʼuiˬsha lehˬ awˬ liˇ awˬ hkʼaˇ chi teˇ hpaˍ Siˉnaˆ hkʼaw hkʼoˆ lo Moˉseˍ hta‸ kʼoˆ maˍ piˇ taˍ ve yoˬ.
Currently Selected:
Oˉ kʼoˍ pui ve li‸ 7: LHBE
Highlight
Share
Copy
Want to have your highlights saved across all your devices? Sign up or sign in
Lahu Bible Edited © Thailand Bible Society and Bible Society of Myanmar, 2010, 2020.
