Oˉ kʼoˍ pui ve li‸ 6
6
1Gʼuiˬsha lehˬ awˬ liˇ awˬ hkʼaˇ chi teˇ hpaˍ Moˉseˍ hta‸ kʼaw‸ piˇ ve yoˬ. 2Chaw teˇ gʼaˇ lehˬ, shu geh chiˇ taˍ ngaˍ taˍ ve mawˇ hta‸ maˇ kʼaw‸ hkʼaw‸ piˇ ve, shu ve mawˇ hta‸ hkʼawˇ ve, shu hta‸ heˍ caˇ ve, 3shu ve mawˇ mehˉ kʼai taˍ ve hta‸ mawˬ taˍ ve ka‸, maˇ mawˬ teh‸ kʼoˆ leh hkanˍ ve kʼo, yawˇ lehˬ Gʼuiˬsha hta‸ te ya‸ leh venˇbaˆ chi awˬ pon Gʼuiˬsha hta‸ gʼa tuˉ tanˇ piˇ ve yoˬ. 4Chaw teˇ gʼaˇ awˬ ceuˬ oˇ ve teˇ ceuˬ ceuˬ hta‸ te ya‸ ve kʼo, maˇ hteˇ maˇ cawˇ ve hkʼaw yawˇ ca gʼa taˍ ve mawˇ hkʼa peu-eˬ shu hta‸ gʼa kʼaw‸ hkʼaw‸ piˇ ve yoˬ. 5Yawˇ venˇbaˆ cawˬ ve hta‸ shiˍ la htaˇ gaˬ kʼo, yawˇ lehˬ mawˇ shehˍ hpaˇ hta‸ yawˇ yuˬ taˍ ve mawˇ hkʼa peu-eˬ gʼa kʼaw‸ hkʼaw‸ piˇ leh, awˬ leuˉ htawˇ ngaˇ pun teˇ pun gʼa kʼaw‸ piˇ ve yoˬ. 6Yawˇ venˇbaˆ gʼa ponˬ tuˬ, te‸ chiˉ awˬ kuiˉ awˬ haiˇ maˇ cawˬ ve yawˬ ehˉ awˬ paˍ, maˇ heˆ kʼo aˉ che‸ teˇ hkeh paw hkuˇ geh gʼa yuˬ kʼai ve yoˬ. Yawˬ ehˉ oˇ ve hta‸ nyi leh awˬ hpfuhˇ gʼa kʼoˆ cheˆ piˇ ve yoˬ. 7Paw hkuˇ lehˬ, chaw oˇ ve venˇbaˆ gʼa ponˬ tuˬ, yawˇ tanˇ laˇ ve yawˬ ehˉ hta‸ yuˬ leh Gʼuiˬsha hta‸ gʼa tuˉ tanˇ piˇ ve yoˬ. Oˇ hkʼe te ve kʼo, yawˇ venˇbaˆ gʼa ponˬ tuˬ yoˬ.
Aˬ miˍ tuˉ tanˇ tuˬ
8Gʼuiˬsha lehˬ Moˉseˍ hta‸ teˇ caˉ te leh, 9awˬ liˇ awˬ hkʼaˇ chi teˇ hpaˍ Aˍronˍ leh yawˇ ve yaˇ teˇ hpaˍ hta‸ piˇ taˍ ve yoˬ. Aˬ miˍ tuˉ tanˇ ve tuˉ tanˇ tuˬ teˇ hpaˍ hta‸ teˇ haˉ tanˇ hkuinˇ tuˉ tanˇ kuiˬ hkʼoˆ lo gʼa tanˇ taˍ ve yoˬ. Aˬ miˍ maˇ gʼa suh piˇ. 10Oˇ ve hkʼaw‸ nawˉ, paw hkuˇ lehˬ tuˉ tanˇ kuiˬ hkʼoˆ lo cawˬ ve hkʼaw‸ laˉ teˇ hpaˍ hta‸ toˆ yuˬ leh, tuˉ tanˇ kuiˬ paˇ lo gʼa teh taˍ ve yoˬ. 11Yawˇ lehˬ veu‸ kʼaˇ kʼaw‸ pa leh, hkʼaw‸ laˉ oˇ ve teˇ hpaˍ hta‸ fa la awˬ baˬ hpawˇ lo cawˬ ve da‸ kehˬ ve chehˇ kuiˬ lo gʼa ca yuˬ baˬ ve yoˬ. 12Tuˉ tanˇ kuiˬ hkʼoˆ lo cawˬ ve aˬ miˍ lehˬ, hkʼaˬ htaˆ ka‸ gʼa to‸ chehˇ piˇ lawˬ ve yoˬ. Teˇ pawˆ ka‸ maˇ gʼa suh kʼai piˇ. Teˇshawˉ le le paw hkuˇ teˇ hpaˍ tuˉ tanˇ kuiˬ hkʼoˆ lo suhˆ gʼa gʼawˆ keu piˇ leh, aˬ miˍ tuˉ tanˇ tuˬ awˬ ceuˬ leh, awˬ chawˇ te da‸ ve tanˇ tuˬ awˬ chu teˇ hpaˍ gʼa tuˉ tanˇ piˇ ve yoˬ. 13Tuˉ tanˇ kuiˬ hkʼoˆ lo cawˬ ve aˬ miˍ lehˬ hkʼaˬ htaˆ ka‸ gʼa to‸ chehˇ piˇ leh, teˇ pawˆ ka‸ maˇ gʼa suh kʼai piˇ.
Awˬ shiˍ awˬ nu tuˉ tanˇ tuˬ
14Awˬ shiˍ awˬ nu teˇ hpaˍ hta‸ tuˉ tanˇ ve awˬ liˇ awˬ hkʼaˇ chi hkʼe cawˬ ve yoˬ. Aˍronˍ awˬ ceuˬ awˬ hkʼaˇ paw hkuˇ lehˬ, tuˉ tanˇ kuiˬ gʼuˇ suhˍ lo awˬ shiˍ awˬ nu teˇ hpaˍ yuˬ leh, Gʼuiˬsha hta‸ gʼa tuˉ tanˇ piˇ ve yoˬ. 15Yawˇ lehˬ caˬ hkʼa meu-e teˇ kaˆ, shaˍlonˍ chu leh sha hawnˉ hta‸ yuˬ leh, Gʼuiˬsha hta‸ gʼa tuˉ tanˇ piˇ ve yoˬ. Chi ve lehˬ awˬ shaˉ hawnˉ leh, Gʼuiˬsha nyi ma cawˇ ve tuˉ tanˇ tuˬ hpeh‸ ve yoˬ. 16Awˬ nu ve hkʼa peu-eˬ ve hta‸ paw hkuˇ teˇ hpaˍ caˇ hpeh‸ ve yoˬ. Yawˇ hui lehˬ, caˬ hkʼa meu-e oˇ ve hta‸ hkaoˍmonˇ te leh aˉ po kʼo bon yehˬ hkʼaw cawˬ ve da‸ kehˬ ve chehˇ kuiˬ lo caˇ hpeh‸ ve yoˬ. Ya‸ hkʼaˇ, diˇ maˇ gʼa hkaw‸. 17Gʼuiˬsha lehˬ caˇ tuˬ oˇ ve hta‸ caˇ tuˬ paw hkuˇ teˇ hpaˍ hta‸ a hkaw-anˬ piˇ taˍ ve yoˬ. Caˇ tuˬ oˇ ve lehˬ, venˇbaˆ ponˬ tuˬ tanˇ piˇ ve tanˇ tuˬ leh Gʼuiˬsha hta‸ kʼaw‸ hkʼaw‸ piˇ ve tanˇ tuˬ hkʼa shuˍ da‸ kehˬ ve yoˬ. 18Aˍronˍ awˬ ceuˬ awˬ hkʼaˇ hawˉ hkʼaˆ paˍ hkʼa peu-eˬ, teˇ co peuˬ teˇ co caˇ tuˬ oˇ ve hta‸ caˇ hpeh‸ ve yoˬ. Awˬ nu ve chaw hkʼaˬ ve teˇ gʼaˇ maˇ kʼoˆ, caˇ tuˬ oˇ ve hta‸ htawˇ ve kʼo, ciˍ yanˍ ve hta‸ gʼa hkanˍ ve yoˬ.
19Aˍronˍ ve awˬ ceuˬ awˬ hkʼaˇ teˇ hpaˍ hta‸ aˉ yaˇ piˇ ve awˬ hkʼaˇ hta‸ caˉ da‸ leh, 20Gʼuiˬsha Moˉseˍ hta‸ chi hkʼe kʼoˆ piˇ ve yoˬ. Aˉ yaˇ piˇ tuˬ ve awˬ nyi gaˬ htaˇ, yawˇ lehˬ Gʼuiˬsha hta‸ caˬ hkʼa meu-e teˇ panˇ gʼa tanˇ piˇ ve yoˬ. Caˬ hkʼa meu-e oˇ ve teˇ hkoˇ hta‸ mvuhˇ shawˉ htaˇ gʼa tanˇ piˇ leh, awˬ nu ve teˇ hkoˇ hta‸ mvuhˇ hpeu‸ hpawˇ gʼa tanˇ piˇ ve yoˬ. 21Caˬ hkʼa meu-e oˇ ve hta‸ shaˍ chu hkaw‸ leh sho baˉ hkʼoˆ chiˆ peuˬ hkʼaw‸ nawˉ, hkʼeh‸ leh gʼa tuˉ tanˇ piˇ ve yoˬ. Chi ve lehˬ, awˬ shaˉ hawnˉ leh Gʼuiˬsha nyi ma cawˇ ve tuˉ tanˇ tuˬ hpeh‸ ve yoˬ. 22Teˇ co peuˬ teˇ co paw hkuˇ te tuˬ ve Aˍronˍ ve awˬ ceuˬ awˬ hkʼaˇ teˇ hpaˍ, chi hkʼe gʼa te tuˉ tanˇ piˇ ve yoˬ. 23Paw hkuˇ awˬ to te taˍ ve awˬ shiˍ awˬ nu tuˉ tanˇ tuˬ hta‸ chaw teˇ gʼaˇ ka‸ maˇ gʼa caˇ. Hkʼa peu-eˬ ve hta‸ aˬ miˍ gʼa tuˉ tanˇ ve yoˬ.
Venˇbaˆ hpehˇ ve tuˉ tanˇ tuˬ
24Venˇbaˆ hpehˇ ve tuˉ tanˇ tuˬ hta‸ caˉ da‸ leh, Gʼuiˬsha Moˉseˍ hta‸ cuˇ leh, 25Aˍronˍ leh yawˇ ve yaˇ teˇ hpaˍ hta‸ chi hkʼe kʼoˆ piˇ taˍ ve yoˬ. Venˇbaˆ hpehˇ ve tuˉ tanˇ tuˬ awˬ pon yuˬ laˬ ve to nuˇ to shaˆ hta‸ tuˉ tanˇ kuiˬ awˬ na hpawˇ lo gʼa tiˇ pehˍ ve yoˬ. Oˇ ve lehˬ, da‸ kehˬ jaˇ ve chehˇ kuiˬ hpeh‸ ve yoˬ. 26To nuˇ to shaˆ oˇ ve hta‸ tuˉ tanˇ piˇ chehˇ ve paw hkuˇ lehˬ, aˉ po kʼo bon yehˬ hkʼaw cawˬ ve da‸ kehˬ ve chehˇ kuiˬ hkʼaw, shaˍ oˇ ve hta‸ caˇ hpeh‸ ve yoˬ. 27Shaˍ oˇ ve hta‸ hkʼa htawˇ ve awˬ nu ve chaw hkʼa peu-eˬ ciˍ yanˍ ve hta‸ gʼa hkanˍ tuˬ yoˬ. Veu‸ deh taˍ ve veu‸ kʼaˇ hta‸ awˬ suhˍ oˇ ve ngawˉ ve kʼo, da‸ kehˬ ve chehˇ kuiˬ lo gʼa tsuhˇ baˬ ve yoˬ. 28Shaˍ oˇ ve hta‸ keu caˉ ve je‸ mu‸ hkʼu hta‸ gʼa dawˆ hkoˇ ve yoˬ. Shaˍ oˇ ve hta‸ sho yuˬ te taˍ ve mu‸ hkʼu hkʼaw keu caˉ ve kʼo, mu‸ hkʼu oˇ ve hta‸ hkʼa deh‸ gʼa tsuhˇ baˬ ve yoˬ. 29Paw hkuˇ awˬ ceuˬ awˬ hkʼaˇ hawˉ hkʼaˆ paˍ hkʼa peu-eˬ, shaˍ oˇ ve hta‸ caˇ hpeh‸ ve yoˬ. Caˇ tuˬ oˇ ve lehˬ da‸ kehˬ ve caˇ tuˬ hpeh‸ ve yoˬ. 30Ya‸ hkʼaˇ, venˇbaˆ yuˬ baˬ tuˬ awˬ suhˍ hta‸ aˉ po kʼo bon yehˬ hkʼaw yuˬ laˬ leh yehˇ ve kʼo, shaˍ oˇ ve hta‸ maˇ gʼa caˇ. Hkʼa peu-eˬ ve hta‸ aˬ miˍ gʼa tuˉ baˬ ve yoˬ.
Currently Selected:
Oˉ kʼoˍ pui ve li‸ 6: LHBE
Highlight
Share
Copy
Want to have your highlights saved across all your devices? Sign up or sign in
Lahu Bible Edited © Thailand Bible Society and Bible Society of Myanmar, 2010, 2020.
