Oˉ kʼoˍ pui ve li‸ 5
5
Tuˉ tanˇ tuˬ loˍ ve venˇbaˆ
1Awˬ hawˉ lo bvuh‸ taˍ ve awˬ ceuˬ hta‸ te ya‸ ve chaw lehˬ, venˇbaˆ gʼa ponˬ tuˬ tuˉ tanˇ piˇ tuˬ loˍ ve yoˬ.
Chaw teˇ gʼaˇ lehˬ, shaˉ hkiˆ hkanˍ laˇ tuˬ shaˉ nanˉ lo kuˬ yuˬ ve hta‸ gʼa hkanˍ leh, yawˇ mawˬ taˍ ve hkʼe hteˇ lehˍ shaˉ hkiˆ maˇ hkanˍ ve kʼo, yawˇ lehˬ ciˍ yanˍ ve hta‸ gʼa hkanˍ tuˬ yoˬ.
2Chaw teˇ gʼaˇ lehˬ, maˇ da‸ maˇ kehˬ leh suh taˍ ve to nuˇ to shaˆ hta‸ ca htawˇ heuˆ ve kʼo, yawˇ awˬ to cha‸ chiˆ kʼai leh venˇbaˆ cawˬ ve yoˬ.
3Chaw teˇ gʼaˇ lehˬ, chaw yaˇ awˬ hkʼaw tawˆ la ve maˇ da‸ maˇ kehˬ ve awˬ ceuˬ hta‸ ca htawˇ heuˆ ve kʼo, venˇbaˆ cawˬ ve yoˬ.
4Chaw teˇ gʼaˇ lehˬ, hkʼa deh‸ maˇ dawˇ nyi leh hkʼa sha sha-ehˬ ka ti‸ te ve kʼo, venˇbaˆ cawˬ ve yoˬ.
5Chaw teˇ gʼaˇ chi hkʼe ve venˇbaˆ teˇ ceuˬ ceuˬ cawˬ ve kʼo, shu hta‸ yawˇ venˇbaˆ gʼa hpeu‸ maˍ piˇ ve yoˬ. 6Peuˬ hkʼaw‸ nawˉ, yawˇ ve venˇbaˆ gʼa ponˬ tuˬ yawˬ ehˉ awˬ ma maˇ heˆ kʼo, aˉ che‸ teˇ hkeh yuˬ laˬ leh, Gʼuiˬsha hta‸ gʼa tuˉ tanˇ piˇ ve yoˬ. Paw hkuˇ lehˬ, chaw oˇ ve venˇbaˆ awˬ tan Gʼuiˬsha hta‸ gʼa tuˉ tanˇ piˇ ve yoˬ.
7Chaw oˇ ve lehˬ, Gʼuiˬsha hta‸ tuˉ tanˇ piˇ tuˬ ve yawˬ ehˉ leh aˉ che‸ maˇ cawˬ ve kʼo, aˉ pui kʼaˍ nyiˇ hkeh maˇ heˆ kʼo, guˇnyiˇ hkeh gʼa yuˬ laˬ ve yoˬ. Teˇ hkeh hta‸ venˇbaˆ ponˬ tuˬ gʼa tuˉ tanˇ piˇ leh, teˇ hkeh hta‸ aˬ miˍ tuˉ tanˇ piˇ tuˬ awˬ pon gʼa yehˇ ve yoˬ. 8Yawˇ lehˬ oˇ ve teˇ hpaˍ hta‸ paw hkuˇ geh gʼa yuˬ laˬ leh, paw hkuˇ lehˬ venˇbaˆ gʼa ponˬ tuˬ ve tuˉ tanˇ tuˬ hta‸ awˉ lawˉ gʼa tuˉ tanˇ ve yoˬ. Yawˇ lehˬ ngaˆ oˇ ve kʼawˍ peˍ hta‸ shawˆ leh, 9tuˉ tanˇ kuiˬ hta‸ awˬ suhˍ gʼa hpeh‸ pfuhˍ piˇ ve yoˬ. Cawˬ taˍ sheˍ ve awˬ suhˍ hta‸ tuˉ tanˇ kuiˬ awˬ hkuiˉ puiˍ lo gʼa yuˬ baˬ ve yoˬ. Chi ve lehˬ, venˇbaˆ yuˬ baˬ tuˬ ve tuˉ tanˇ tuˬ hpeh‸ ve yoˬ. 10Oˇ hkʼe te peuˬ hkʼaw‸ nawˉ, yawˇ lehˬ ngaˆ nyiˇ hkeh teˇ hkeh hta‸ kʼaw‸ yuˬ leh awˬ liˇ awˬ hkʼaˇ cawˬ ve hkʼe gʼa tuˉ tanˇ piˇ ve yoˬ. Chi ve lehˬ chaw oˇ ve hpaˇ venˇbaˆ gʼa ponˬ tuˬGʼuiˬsha hta‸ tuˉ tanˇ piˇ ve tanˇ tuˬ hpeh‸ leh, Gʼuiˬsha lehˬ yawˇ ve venˇbaˆ hta‸ hpehˇ piˇ tuˬ yoˬ.
11Chaw teˇ gʼaˇ lehˬ, aˉ pui kʼaˍ nyiˇ hkeh maˇ heˆ kʼo, guˇ nyiˇ hkeh ka‸ maˇ cawˬ ve kʼo, yawˇ ve venˇbaˆ gʼa ponˬ tuˬ awˬ pon caˬ hkʼa meu-e teˇ panˇ gʼa yuˬ laˬ ve yoˬ. Chi ve lehˬ, venˇbaˆ gʼa ponˬ tuˬ tuˉ tanˇ piˇ ve tanˇ tuˬ hpeh‸ ve pa taw, caˬ hkʼa meu-e chi ve hta‸ shaˍlonˍ chu maˇ kʼoˆ, sha hawnˉ maˇ kʼoˆ, maˇ gʼa hkaw‸. 12Yawˇ lehˬ, caˬ hkʼa meu-e oˇ ve hta‸ paw hkuˇ geh gʼa yuˬ laˬ leh, paw hkuˇ lehˬ caˬ hkʼa meu-e teˇ kaˆ hta‸ hkaˆ yuˬ peuˬ hkʼaw‸ nawˉ, tuˉ tanˇ kuiˬ hkʼoˆ lo Gʼuiˬsha hta‸ gʼa tuˉ tanˇpiˇ ve yoˬ. Chi ve lehˬ, venˇbaˆ gʼa ponˬ tuˬ tuˉ tanˇ piˇ ve tanˇ tuˬ hpeh‸ ve yoˬ. 13Paw hkuˇ chi hkʼe te tuˉ tanˇ piˇ ve kʼo, Gʼuiˬsha lehˬ chaw oˇ ve venˇbaˆ hta‸ hpehˇ piˇ tuˬ yoˬ. Cawˬ taˍ sheˬ ve caˬ hkʼa meu-e lehˬ, paw hkuˇ awˬ pon hpeh‸ ve yoˬ.
Gʼuiˬsha hta‸ kʼaw‸ hkʼaw‸ piˇ ve tanˇ tuˬ
14Gʼuiˬsha lehˬ, awˬ liˇ awˬ hkʼaˇ chi teˇ hpaˍ Moˉseˍ hta‸ kʼaw‸ kʼoˆ maˍ piˇ ve yoˬ. 15Chaw teˇ gʼaˇ maˇ shiˍ maˇ nawˇ ve hkʼaw, Gʼuiˬsha hta‸ piˇ keunˍ piˇ cawˇ ve da‸ kehˬ ve mawˇ teˇ hpaˍ maˇ gʼa tanˇ piˇ sheˍ ve kʼo, yawˇ lehˬ te‸ chiˉ awˬ kuiˉ awˬ haiˇ maˇ cawˬ ve yawˬ ehˉ awˬ paˍ, maˇ heˆ kʼo aˉ che‸ teˇ hkeh Gʼuiˬsha hta‸ gʼa tanˇ piˇ ve yoˬ. Yawˬ ehˉ ve awˬ hpfuhˇ hta‸ nyi leh gʼa kʼoˆ cheˆ ve yoˬ. 16Yawˇ lehˬ maˇ gʼa piˇ sheˍ ve mawˇ oˇ ve Gʼuiˬsha hta‸ gʼa kʼaw‸ tanˇ piˇ leh, awˬ leuˉ htawˇ ngaˇ pun teˇ pun gʼa kʼaw‸ tanˇ piˇ ve yoˬ. Yawˇ lehˬ mawˇ oˇ ve paw hkuˇ hta‸ gʼa chiˇ a‸ piˇ leh, paw hkuˇ lehˬ yawˇ tanˇ laˇ ve yawˬ ehˉ oˇ ve hta‸ yawˇ venˇbaˆ gʼa ponˬ tuˬ, Gʼuiˬsha hta‸ gʼa tuˉ tanˇ piˇ ve yoˬ. Oˇ hkʼe te ve kʼo, Gʼuiˬsha yawˇ ve venˇbaˆ hta‸ hpehˇ piˇ tuˬ yoˬ.
17Chaw teˇ gʼaˇ maˇ shiˍ maˇ nawˇ ve hkʼaw, Gʼuiˬsha ve awˬliˇtawˇhkawˇ hta‸ te ya‸ ve kʼo, yawˇ lehˬ venˇbaˆ cawˬ leh ciˍ yanˍ ve hta‸ gʼa hkanˍ ve yoˬ. 18Yawˇ lehˬ te‸ chiˉ awˬ kuiˉ awˬ haiˇ maˇ cawˬ ve yawˬ ehˉ awˬ paˍ, maˇ heˆ kʼo aˉ che‸ teˇ hkeh paw hkuˇ geh gʼa yuˬ laˬ ve yoˬ. Yawˬ ehˉ oˇ ve hta‸ nyi leh awˬ hpfuhˇ gʼa kʼoˆ cheˆ piˇ ve yoˬ. Paw hkuˇ lehˬ, chaw oˇ ve venˇbaˆ gʼa ponˬ tuˬ yawˇ tanˇ laˇ ve yawˬ ehˉ hta‸ yuˬ leh, Gʼuiˬsha hta‸ gʼa tuˉ tanˇ piˇ ve yoˬ. Chi hkʼe te ve kʼo, Gʼuiˬsha yawˇ ve venˇbaˆ hta‸ hpehˇ piˇ tuˬ yoˬ. 19Oˇ ve lehˬ, yawˇ Gʼuiˬsha hta‸ te ya‸ ve awˬ pon Gʼuiˬsha hta‸ kʼaw‸ hkʼaw‸ piˇ ve tanˇ tuˬ hpeh‸ ve yoˬ.
Currently Selected:
Oˉ kʼoˍ pui ve li‸ 5: LHBE
Highlight
Share
Copy
Want to have your highlights saved across all your devices? Sign up or sign in
Lahu Bible Edited © Thailand Bible Society and Bible Society of Myanmar, 2010, 2020.
