Oˉ kʼoˍ pui ve li‸ 10
10
Naˍdaˆ leh Aˍbiˇhuˆ venˇbaˆ te ve
1Aˍronˍ ve yaˇ Naˍdaˆ leh Aˍbiˇhuˆ lehˬ, hkehˇ pe le hkʼaw shiˉ gʼeu‸ leh sha hawnˉ keu peuˬ hkʼaw‸ nawˉ, Gʼuiˬsha hta‸ tanˇ piˇ ve yoˬ. Awˬ lawn kʼo, oˇ hkʼe te tuˉ tanˇ tuˬ Gʼuiˬsha yawˇ huiˉ maˬ hta‸ maˇ kʼoˆ piˇ taˍ. 2Hkʼe te leh Gʼuiˬsha lehˬ teˇ cawˬ haˉ aˬ miˍ ce ya‸ la piˇ leh, yawˇ huiˉ maˬ hta‸ to‸ pehˍ piˇ lawˬ ve yoˬ. 3Oˇ htaˇ, Moˉseˍ Aˍronˍ hta‸ chi hkʼe kʼoˆ piˇ ve yoˬ. Chi hkʼe hpeh‸ la ve lehˬ, Ngaˬ da‸ kehˬ ve pa taw ngaˬ ve kanˉ hta‸ te ve chaw teˇ hpaˍ ngaˬ hta‸ gʼa yawˆ yan ve yoˬ. Ngaˬ ve awˬ me‸ awˬ hponˇ chaw yaˇ teˇ hpaˍ hta‸ hpeu‸ maˍ piˇ tuˬ yoˬ, teh‸ Gʼuiˬsha kʼoˆ taˍ ve lehˬ, chi hkʼe ve hta‸ kʼoˆ gaˇ ve yoˬ, teh‸ Aˍronˍ hta‸ kʼoˆ piˇ ve yoˬ. Hkʼe te leh, Aˍronˍ ta‸ iˉ gawˬ lehˍ chehˇ taˍ ve yoˬ.
4Oˇ htaˇ Moˉseˍ lehˬ, Aˍronˍ ve aˉ shuˍ paˍ Awˇzeˍlaˆ ve yaˇ Miˆsheˍlaˆ leh Eˇlaˍsaˍhpanˍ hui hta‸ kuˬ yuˬ leh, yawˇ huiˉ maˬ hta‸ chi hkʼe kʼoˆ piˇ ve yoˬ. Chaw chi nyiˇ gʼaˇ ve awˬ to hta‸ da‸ kehˬ ve aˉ po kʼo hkʼaw yuˬ tawˆ-e leh, ngaˬ hui ve fa la awˬ baˬ hpawˇ lo ca teh taˍ-o‸, teh‸ kʼoˆ piˇ ve yoˬ. 5Hkʼe te leh, yawˇ huiˉ maˬ chaw oˇ ve nyiˇ gʼaˇ hta‸ yuˬ leh, Moˉseˍ kʼoˆ ve hkʼe fa la awˬ baˬ hpawˇ lo yuˬ kʼai ve yoˬ.
6Oˇ ve hkʼaw‸ nawˉ, Moˉseˍ lehˬ Aˍronˍ leh yawˇ ve yaˇ Eˇlaˍsaˍ leh Iˉtaˍmaˍ hui hta‸ chi hkʼe kʼoˆ piˇ ve yoˬ. Nawˬ hui dawˇ haˍ chehˇ ve hta‸ shu maˇ gʼa shiˍ tuˬ, veu‸ kʼaˇ taˇ tzuh‸ suhˍ. Nawˬ hui ve oˉ kʼoˍ hta‸ htawˇ hkʼa deh‸ puiˍ taˍ-o‸. Nawˬ hui dawˇ haˍ ve awˬ heˆ te taˍ ve kʼo, nawˬ hui htawˇ gʼa suh-e leh, Iˉsaˍreˍlaˆ chaw hkʼa peu-eˬ ve hta‸ Gʼuiˬsha nyi ma zuhˆ tuˬyoˬ. Ya‸ hkʼaˇ, Gʼuiˬsha aˬ miˍ to‸ pehˍ piˇ lawˬ ve chaw chi nyiˇ gʼaˇ awˬ pon Iˉsaˍreˍlaˆ chaw teˇ hpaˍ paˆ hawˬ tuˬ yoˬ. 7Nawˬ hui aˉ po kʼo bon yehˬ chi hkʼaw taˇ tawˆ-e. Nawˬ hui tawˆ-e ve kʼo, gʼa suh tuˬ yoˬ. Awˬ lawn kʼo, nawˬ hui lehˬ naˍmanˇ pfuhˍ leh Gʼuiˬsha hta‸ chiˇ a‸ piˇ taˍ peuˬ ve chaw teˇ hpaˍ hpeh‸ ve yoˬ, teh‸ yawˇ huiˉ maˬ hta‸ kʼoˆ piˇ ve yoˬ. Hkʼe te leh, yawˇ huiˉ maˬ lehˬ Moˉseˍ kʼoˆ piˇ ve hkʼe te ve yoˬ.
Paw hkuˇ teˇ hpaˍ pon teh taˍ ve awˬ liˇ
8Gʼuiˬsha Aˍronˍ hta‸ chi hkʼe kʼoˆ piˇ ve yoˬ. 9Nawˬ leh nawˬ ve yaˇ teˇ hpaˍ, a pehˉ meuˇ gʼuiˬ maˇ heˆ kʼo tzuhˬ dawˬ leh aˉ po kʼo bon yehˬ hkʼaw maˇ gʼa lo‸-e. Nawˬ hui oˇ hkʼe te ve kʼo gʼa suh tuˬ yoˬ. Nawˬ ve awˬ ceuˬ awˬ hkʼaˇ hkʼa peu-eˬ chi hta‸ hkʼa deh‸ gʼa na yuˬ ve yoˬ. 10Nawˬ hui lehˬ Gʼuiˬsha ve mawˇ leh, awˬ nu ve mawˇ teˇ hpaˍ hta‸ maˇ kʼoˆ, da‸ kehˬ ve awˬ ceuˬ leh maˇ da‸ kehˬ ve awˬ ceuˬ teˇ hpaˍ hta‸ maˇ kʼoˆ, hkʼa deh‸ gʼa fuiˍ gʼa ve yoˬ. 11Ngaˬ Moˉseˍ hta‸ teˇ caˉ te leh piˇ taˍ peuˬ ve awˬliˇtawˇhkawˇ hkʼa peu-eˬ, nawˬ hui Iˉsaˍreˍlaˆ chaw hui hta‸ gʼa kʼoˆ maˍ piˇ ve yoˬ, teh‸ yawˇ hta‸ kʼoˆ piˇ ve yoˬ.
12Moˉseˍ lehˬ, Aˍronˍ leh yawˇ ve yaˇ paˍ Eˇlaˍsaˍ leh Iˉtaˍmaˍ hui hta‸ chi hkʼe kʼoˆ piˇ ve yoˬ. Gʼuiˬsha hta‸ tuˉ tanˇ piˇ ve hkʼaw, awˬ leuˉ cawˬ taˍ sheˬ ve caˬ hkʼa meu-e hta‸ yuˬ leh diˇ maˇ keu ve hkaoˍmonˇ te peuˬ hkʼaw‸ nawˉ, tuˉ tanˇ kuiˬ paˇ lo yuˬ caˇ-oˆ. Awˬ lawn kʼo, tanˇ tuˬ oˇ ve lehˬ da‸ kehˬ jaˇ ve yoˬ. 13Hkaoˍmonˇ oˇ ve hta‸ da‸ kehˬ ve chehˇ kuiˬ lo caˇ-oˆ. Awˬ leuˉ cawˬ taˍ ve caˬ hkʼa meu-e oˇ ve lehˬ, nawˬ leh nawˬ ve yaˇ teˇ hpaˍ awˬ pon hpeh‸ ve yoˬ. Oˇ hkʼe te tuˬ, Gʼuiˬsha ngaˬ hta‸ kʼoˆ laˇ taˍ ve yoˬ. 14Nawˬ leh nawˬ ve yehˬ yaˇ kʼa yaˇ teˇ hpaˍ lehˬ, Gʼuiˬsha hta‸ tanˇ taˍ peuˬ ve nyi ma pui shaˍ leh hkui sheh teˇ hpaˍ hta‸ htawˇ caˇ hpeh‸ ve yoˬ. Ya‸ hkʼaˇ, da‸ kehˬ ve chehˇ kuiˬ lo tiˉ gʼa caˇ ve yoˬ. Iˉsaˍreˍlaˆ chaw teˇ hpaˍ awˬ chawˇ te da‸ ve tanˇ tuˬ ca tanˇ piˇ la htaˇ, shaˍ oˇ ve teˇ hpaˍ nawˬ leh nawˬ ve yaˇ teˇ hpaˍ awˬ pon fuiˍ teh laˇ taˍ ve yoˬ. 15Yawˇ hui Gʼuiˬsha hta‸ ca tuˉ tanˇ la ve teˇ pawˆ le le, nyi ma pui shaˍ leh hkui sheh teˇ hpaˍ hta‸ nawˬ geh yuˬ laˬ tuˬ yoˬ. Gʼuiˬsha kʼoˆ taˍ peuˬ ve hkʼe, shaˍ oˇ ve teˇ hpaˍ lehˬ nawˬ leh nawˬ ve yaˇ teˇ hpaˍ awˬ pon hpeh‸ ve yoˬ, teh‸ yawˇ hui hta‸ kʼoˆ piˇ ve yoˬ.
16Moˉseˍ lehˬ, venˇbaˆ gʼa ponˬ tuˬ tuˉ tanˇ piˇ tuˬ ve aˉ che‸ awˬ lawn na nyi htaˇ, aˉ che‸ oˇ ve hta‸ aˬ miˍ tuˉ tanˇ piˇpeuˬ ve hta‸ yawˇ gʼa shiˍ ve yoˬ. Hkʼe te leh, yawˇ Eˇlaˍsaˍ leh Iˉtaˍmaˍ hui hta‸ nyi ma zuhˆ leh, 17Aˬ hto‸ ma pa taw, nawˬ hui venˇbaˆ gʼa ponˬ tuˬ tuˉ tanˇ piˇ ve aˉ che‸ awˬ shaˍ hta‸ da‸ kehˬ ve chehˇ kuiˬ lo maˇ yuˬ caˇ ve le. Tanˇ tuˬ oˇ ve lehˬ da‸ kehˬ jaˇ ve yoˬ. Chaw yaˇ teˇ hpaˍ venˇbaˆ gʼa ponˬ tuˬ aˉ che‸ oˇ ve Gʼuiˬsha nawˬ hui hta‸ piˇ laˇ taˍ ve yoˬ. 18Aˉ che‸ oˇ ve awˬ suhˍ hta‸ aˉ po kʼo bon yehˬ hkʼaw maˇ yuˬ laˬ ve pa taw, ngaˬ kʼoˆ piˇ taˍ peuˬve hkʼe shaˍ oˇ ve hta‸ nawˬ hui caˇ cawˇ ve yoˬ, teh‸ yawˇ hui hta‸ kʼoˆ piˇ ve yoˬ.
19Aˍronˍ kʼaw‸ yaw hkʼaw‸ leh kʼoˆ ve, Ya‸ nyi ngaˬ venˇbaˆ hpehˇ ve tuˉ tanˇ tuˬ hta‸ yuˬ caˇ ve kʼo, hkʼaˬ hkʼe te tuˬ le. Oˇ hkʼe te ve pa taw, Gʼuiˬsha hta‸ ha lehˬ piˇ lawˬ gʼa tuˬ ve laˇ. Chaw yaˇ teˇ hpaˍ ya‸ nyi venˇbaˆ gʼa ponˬ tuˬ ca tuˉ tanˇ la ve yoˬ. Yawˇ hui lehˬ aˬ miˍ tuˉ tanˇ piˇ tuˬ ve awˬ ceuˬ hta‸ htawˇ yuˬ laˬ ve yoˬ. Ya‸ hkʼaˇ, kawˆ tuˬ uiˍ ve awˬ ceuˬ ngaˬ hkʼoˆ lo gaˬ la chehˇ sheˍ ve yoˬ, teh‸ Moˉseˍ hta‸ kʼoˆ piˇ ve yoˬ. 20Tawˇ oˇ ve hta‸ Moˉseˍ gʼa kaˇ htaˇ yawˇ nyi hkʼaˇ suh ve yoˬ.
Currently Selected:
Oˉ kʼoˍ pui ve li‸ 10: LHBE
Highlight
Share
Copy
Want to have your highlights saved across all your devices? Sign up or sign in
Lahu Bible Edited © Thailand Bible Society and Bible Society of Myanmar, 2010, 2020.
