2 Saˍmo-eˍlaˆ li‸ 18
18
Aˍbaˆsaˍlonˍ suh-e ve
1Jawˇmawˇ Daˍviˆ lehˬ, yawˇ ve ma‸ yaˇ hkʼa peu-eˬ hta‸ teˇ geh kuˬ hpawnˬ peuˬ hkʼaw‸ nawˉ, chaw teˇ hinˉ gʼaˇ teˇ moˍ, teˇ ha gʼaˇ teˇ moˍ te leh, yawˇ hui hta‸ uˉ peunˍ tuˬ ma‸ poˍ lonˉ teˇ hpaˍ hta‸ leuˆ teh taˍ ve yoˬ. 2Peuˬ hkʼaw‸ nawˉ, Yaˍbaˆ, Yaˍbaˆ ve awˬ nyi paˍ Aˍbiˆshehˇ leh Gaˍtaˆ venˇ yaˇ Iˆtehˇ hui hta‸ ma‸ yaˇ teˇ gʼaˇ teˇ moˍ shiˍ tawˆ-e tcuh ve yoˬ. Oˇ htaˇ jawˇmawˇ lehˬ, Ngaˬ htawˇ nawˬ hui geh kʼai tuˬ yoˬ, teh‸ yawˇ ve ma‸ yaˇ teˇ hpaˍ hta‸ kʼoˆ piˇ ve yoˬ.
3Yawˇ hui kʼaw‸ yaw hkʼaw‸ leh kʼoˆ ve, Jawˇmawˇ-oˬ, nawˬ ngaˬ hui geh taˇ laˬ. Ngaˬ hui hkʼa peu-eˬ gʼa gʼuiˇ hpaw-e leh ngaˬ hui ve ma‸ yaˇ teˇ hkoˇ hpaˆ suh-e ve htawˇ, canˇ paˍ teˇ hpaˍ te‸ chiˉ dawˇ tuˬ ve maˇ heˆ. Ya‸ hkʼaˇ, nawˬ lehˬ ngaˬ hui teˇ meunˍ gʼaˇ hkʼe taw hpfuhˇ ve yoˬ. Nawˬ choˬ kaˬ venˇ hkʼaw chehˇ taˍ leh, ngaˬ hui hta‸ ga laˇ-oˆ. Chi hkʼe te ve lehˬ leuˉ leh da‸ ve yoˬ, teh‸ yawˇ hta‸ kʼoˆ piˇ ve yoˬ.
4Oˇ htaˇ jawˇmawˇ lehˬ, Nawˬ hui kʼoˆ ve hkʼe ngaˬ te tuˬ yoˬ, teh‸ yawˇ hui hta‸ kʼoˆ piˇ ve yoˬ. Peuˬ hkʼaw‸ nawˉ, yawˇ lehˬ venˇ taˍ meu‸ hpe‸ lo huˉ taˍ leh yawˇ ve ma‸ yaˇ teˇ hpaˍ awˬ moˍ awˬ moˍ te tawˆ-e chehˇ ve hta‸ nyi chehˇ ve yoˬ. 5Oˇ htaˇ jawˇmawˇ lehˬ, Ngaˬ ve mehˆ hpfuhˇ hta‸ nyi leh, Aˍbaˆsaˍlonˍ hta‸ te‸ chiˉ taˇ te piˇ, teh‸Yaˍbaˆ, Aˍbiˆshehˇ leh Iˆtehˇ hui hta‸ kʼoˆ piˇ ve yoˬ. Daˍviˆ yawˇ ve ma‸ poˍ lonˉ teˇ hpaˍ hta‸ chi hkʼe shanˍ piˇ ve awˬ hkawˇ hta‸ ma‸ yaˇ hkʼa peu-eˬ gʼa kaˇ ve yoˬ.
6Daˍviˆ ve ma‸ yaˇ teˇ hpaˍ Iˉsaˍreˍlaˆ chaw hui hta‸ bawˆ da‸ tuˬ tawˆ kʼai leh, Eˇhpaˍrenˍ hteunˍ lonˉ hkʼaw yawˇ hui hta‸ gʼa bawˆ da‸ ve yoˬ. 7Daˍviˆ ve ma‸ yaˇ teˇ hpaˍ Iˉsaˍreˍlaˆ chaw hui hta‸ bawˆ gʼaˇ ve yoˬ. Oˇ ve teˇ nyi tiˉ awˬ hkʼaw lo Iˉsaˍreˍlaˆ ma‸ yaˇ nyiˇ meunˍ gʼaˇ suh-e ve yoˬ. 8Ma‸ bawˆ ve shaˬ te shaˬ jaˇ la leh, bawˆ da‸ kuiˬ lo suh-e ve a‸ kehˉ heh puiˉ hkʼaw lo chaw suh maˇ jaˇ ve yoˬ.
9Aˍbaˆsaˍlonˍ leh Daˍviˆ ve ma‸ yaˇ teˇ hpaˍ hta‸ hto‸ da‸ sheˬ ve yoˬ. Aˍbaˆsaˍlonˍ lehˬ, piˉ laˬ ciˇ toˇ chehˇ ve yoˬ. Yawˇ maˉ kuˇ cehˬ hawˉ lo lo‸-e ve teˇ yanˇ, yawˇ ve oˉ kʼoˍ suhˆ buiˇ hkʼaw hkanˉ sheˬ ve yoˬ. Piˉ laˬ oˇ ve gʼuiˇ hpaw-e leh yawˇ lehˬ mvuhˇ hpe lo deu chiˇ sheˬ ve yoˬ. 10Yawˇ oˇ hkʼe hpeh‸ chehˇ ve hta‸ Daˍviˆ ve ma‸ yaˇ teˇ gʼaˇ gʼa mawˬ leh, Jawˇmawˇ-oˬ, Aˍbaˆsaˍlonˍ maˉ kuˇ cehˬ hkʼoˆ lo hpeh chiˇ taˍ ve hta‸ ngaˬ gʼa mawˬ ve yoˬ, teh‸ ca kʼoˆ piˇ ve yoˬ.
11Oˇ htaˇ Yaˍbaˆ lehˬ, Nawˬ yawˇ hta‸ gʼa mawˬ tehˬ ve yoˬ laˇ. Aˬ hto‸ ma pa taw, nawˬ yawˇ hta‸ maˇ tiˇ pehˍ piˇ taˉ ve le. Nawˬ oˇ hkʼe te taˉ ve hkʼe kʼo, ngaˬ nawˬ hta‸ hpu teˇ chi hteh‸ leh haˍ pi caˆ teˇ maˬ pe‸ laˇ tuˬ yoˬ, teh‸ yawˇ hta‸ kʼoˆ piˇ ve yoˬ.
12Ya‸ hkʼaˇ, chaw oˇ ve kʼaw‸ kʼoˆ ve, Nawˬ ngaˬ hta‸ hpu teˇ hinˉ pe‸ laˇ ve htawˇ, jawˇmawˇ ve yaˇ hta‸ ngaˬ maˇ tiˇ pehˍ taˬ. Ngaˬ ve mehˆ hpfuhˇ hta‸ nyi leh Aˍbaˆsaˍlonˍ hta‸ te‸ chiˉ taˇ te piˇ, teh‸ nawˬ awˬ to, Aˍbiˆshehˇ leh Iˆtehˇ hui hta‸ jawˇmawˇ tawˇ shanˍ piˇ taˍ ve awˬ hkawˇ hta‸ ngaˬ gʼa kaˇ taˍ ve yoˬ. 13Ngaˬ jawˇmawˇ ve tawˇ hta‸ ponˬ leuˉ leh, yawˇ hta‸ tiˇ pehˍ piˇ ve kʼo, awˬ lawn chi hta‸ jawˇmawˇ gʼa kaˇ tuˬ yoˬ. Nawˬ ka‸ ngaˬ hta‸ te‸ chiˉ ga laˇ gʼa tuˬ ve maˇ heˆ, teh‸ yawˇ hta‸ kʼoˆ piˇ ve yoˬ.
14Oˇ htaˇ Yaˍbaˆ lehˬ, Ngaˬ nawˬ hta‸ na‸ uˉ te da‸ leh awˬ yanˇ hta‸ hkʼe leˇ te shonˇ piˇ chehˇ tuˬ ve maˇ heˆ, teh‸ kʼoˆ ve yoˬ. Oˇ hkʼe kʼoˆ peuˬ hkʼaw‸ nawˉ, yawˇ gehˇ shehˆ maˬ yuˬ veu leh maˉ kuˇ cehˬ hkʼoˆ lo deu chiˇ chehˇ ve Aˍbaˆsaˍlonˍ ve nyi ma pui hta‸ baˬ hpehˇ ve yoˬ. 15Yaˍbaˆ ve ma‸ yaˇ 10 gʼaˇ oˇ kaˬ lo gaˬ la leh, yawˇ hui Aˍbaˆsaˍlonˍ hta‸ tiˇ pehˍ piˇ ve yoˬ.
16Oˇ ve hkʼaw‸ nawˉ, Yaˍbaˆbehˬ heh ma meuˆ leh yawˇ ve ma‸ yaˇ teˇ hpaˍ ma‸ bawˆ da‸ chehˇ kuiˬ lo kʼaw‸ hpfuhˆ kʼaw‸ la ve yoˬ. 17Yawˇ hui Aˍbaˆsaˍlonˍ ve awˬ to hta‸ yuˬ leh, heh puiˉ hkʼaw lo cawˬ ve miˬ kʼoˍ teˇ maˬ hkʼaw baˬ keu peuˬ hkʼaw‸ nawˉ, oˇ ve awˬ hkʼoˆ lo haˉ pui teˇ hpoˆ lonˉ gʼawˆ hpoˆ piˇ taˉ ve yoˬ. Iˉsaˍreˍlaˆ chaw hkʼa peu-eˬ a shu yawˇ ve chehˇ kuiˬ lo gʼuiˇ kʼo‸-e ve yoˬ.
18Aˍbaˆsaˍlonˍ lehˬ, yaˇ paˍ teˇ gʼaˇ ka‸ maˇ cawˬ ve pa taw, Jawˇmawˇ ve lawˬ hkʼo‸ teh‸ kʼoˆ ve chehˇ kuiˬ lo, yawˇ hta‸ dawˇ nawˇ tuˬ haˉ pui hkuiˉ daw teˇ maˬ duˇ ti taˍve yoˬ. Ya‸ nyi hkʼa gaˬ chehˇ kuiˬoˇ ve hta‸ Aˍbaˆsaˍlonˍ hta‸ dawˇ nawˇ ve chehˇ kuiˬ teh‸ meh taˍ ve yoˬ.
Aˍbaˆsaˍlonˍ suh peuˬ ve hta‸ Daˍviˆ gʼa shiˍ ve
19Oˇ htaˇ, Zaˍdoˆ ve yaˇ paˍ Aˍhiˆmaˆ lehˬ, Ya‸ nyi Gʼuiˬsha yawˇ hta‸ canˇ paˍ teˇ hpaˍ ve la‸ sheh hkʼaw ponˬ piˇ ve ha lehˬ tuˬ uiˍ ve tawˇ chi, ngaˬ jawˇmawˇ hta‸ ca hto piˇ tuˬ a hkaw-anˬ pe‸ laˇ-oˆ, teh‸ Yaˍbaˆ hta‸ kʼoˆ piˇ ve yoˬ.
20Ya‸ hkʼaˇ, Yaˍbaˆ kʼaw‸ yaw hkʼaw‸ leh kʼoˆ ve, Ya‸ nyi lehˬ jawˇmawˇ ve yaˇ suh-e ve awˬ nyi hpeh‸ ve pa taw, ha lehˬ tuˬ ve tawˇ hkawˇchi jawˇmawˇ hta‸ taˇ ca hto piˇ sheˬ. Awˬ hkʼaw‸ nawˉ teˇ nyi heh‸ nawˬ ca hto piˇ hpeh‸ ve yoˬ, teh‸ kʼoˆ ve yoˬ. 21Oˇ ve hkʼaw‸ nawˉ, Suˍdanˍ mvuhˇmiˬ lo laˬ ve yawˇ ve awˬ ceˬ hta‸ kuˬ yuˬ leh, Nawˬ gʼa mawˬ gʼa shiˍ peuˬ ve awˬ ceuˬ chi teˇ hpaˍ jawˇmawˇ hta‸ ca hto piˇ-oˆ, teh‸ yawˇ hta‸ kʼoˆ piˇ ve yoˬ. Hkʼe te leh awˬ ceˬ oˇ ve oˇ kaˬ lo tawˆ kʼai ve yoˬ.
22Oˇ htaˇ Aˍhiˆmaˆ lehˬ, Hkʼaˬ hkʼe hpeh‸ htawˇ yaˬ piˇ. Ngaˬ htawˇ awˬ lawn chi teˇ hpaˍ jawˇmawˇ hta‸ ca kʼaw‸ hto piˇ tuˬ a hkaw-anˬ pe‸ laˇ-oˆ, teh‸ kʼoˆ ve yoˬ.
Ngaˬ yaˇ paˍ-oˬ, aˬ hto‸ ma pa taw nawˬ chi hkʼe te gaˇ ve le. Nawˬ chi hkʼe te ve pa taw, la‸ shawn te‸ chiˉ gʼa tuˬ ve maˇ heˆ, teh‸ Yaˍbaˆ yawˇ hta‸ kʼaw‸ kʼoˆ piˇ ve yoˬ. 23Oˇ htaˇ Aˍhiˆmaˆ lehˬ, Hkʼaˬ hkʼe hpeh‸ ka‸ yaˬ piˇ. Ngaˬ kʼai gaˇ ve yoˬ, teh‸ kʼoˆ ve yoˬ.
Hkʼe yoˬ kʼo kʼai loˬ, teh‸ Yaˍbaˆ yawˇ hta‸ kʼoˆ piˇ ve yoˬ. Hkʼe te leh, yawˇ lehˬ Yawˇdanˍ lawˬ hkʼo‸ hta‸ gʼuiˇ hpanˍ kʼai leh, Suˍdanˍ awˬ ceˬ oˇ ve gʼuˇ suhˍ gʼuiˇ kʼo‸-e ve yoˬ.
24Daˍviˆ lehˬ, venˇ taˍ meu‸ nyiˇ maˬ awˬ kaˍ lo mui chehˇ taˍ ve yoˬ. Venˇ hta‸ shaw shehˍ hpaˇ lehˬ, lanˇ venˇ hkʼoˆ lo huˉ chehˇ ve yoˬ. Yawˇ chiˇ nyi leh chaw teˇ gʼaˇ gʼuiˇ kʼaw‸ la chehˇ ve hta‸ gʼa mawˬ ve yoˬ. 25Hkʼe te leh, yawˇ jawˇmawˇ hta‸ hto piˇ ve yoˬ. Oˇ htaˇ jawˇmawˇ lehˬ, Yawˇ teˇ gʼaˇ tiˉ kʼaw‸ la chehˇ ve kʼo, yawˇ lehˬ da‸ ve awˬ lawn sha tanˇ ca kʼaw‸ hto la chehˇ ve yoˬ, teh‸ kʼoˆ ve yoˬ. Chaw oˇ ve lehˬ, shaˬ te shaˬ venˇ hta‸ neˇ la chehˇ ve yoˬ.
26Oˇ ve hkʼaw‸ nawˉ, shaw shehˍ hpaˇ lehˬ aw nu ve chaw teˇ gʼaˇ kʼaw‸ gʼuiˇ kʼaw‸ la chehˇ ve hta‸ gʼa kʼaw‸ mawˬ ve yoˬ. Hkʼe te leh yawˇ lehˬ, Nyi loˬ. Awˬ nu ve chaw teˇ gʼaˇ kʼaw‸ gʼuiˇ kʼaw‸ la chehˇ ve yoˬ, teh‸ yehˬ miˉ shaw shehˍ hpaˇ hta‸ kʼoˆ piˇ ve yoˬ.
Oˇ htaˇ jawˇmawˇ lehˬ, Chi ve hpaˇ htawˇ da‸ ve awˬ lawn sha tanˇ ca kʼaw‸ hto la chehˇ ve yoˬ, teh‸ kʼoˆ ve yoˬ
27Venˇ shaw shehˍ hpaˇ kʼoˆ ve, Awˉ lawˉ peuˇ ve chaw oˇ ve teˇ gʼaˇ lehˬ, Aˍhiˆmaˆ hta‸ shuˍ ve yoˬ, teh‸ kʼoˆ ve yoˬ.
Yawˇ lehˬ da‸ ve chaw teˇ gʼaˇ hpeh‸ leh, da‸ ve awˬ lawn sha tanˇ ca kʼaw‸ hto la chehˇ ve yoˬ, teh‸ jawˇmawˇ kʼoˆ ve yoˬ.
28Aˍhiˆmaˆ gʼuiˇ kʼaw‸ la leh jawˇmawˇ mehˆ gʼuˇ suhˍ boˆ taˍ ve yoˬ. Yawˇ kʼoˆ ve, Nawˬ ve canˇ paˍ teˇ hpaˍ hta‸ nawˬ ve la‸ sheh hkʼaw lo chiˇ a‸ laˇ ve jawˇmawˇ Gʼuiˬsha hta‸ chiˇ mvuh-o, teh‸ jawˇmawˇ hta‸ kʼoˆ piˇ ve yoˬ.
29Oˇ htaˇ jawˇmawˇ lehˬ, Aˍbaˆsaˍlonˍ hkʼaˬ hkʼe kʼai le. Yawˇ chehˇ sha chehˇ-aw laˇ, teh‸ yawˇ hta‸ na nyi ve yoˬ.
Aˍhiˆmaˆ kʼaw‸ yaw hkʼaw‸ leh kʼoˆ ve, Jawˇmawˇ-oˬ, nawˬ ve ma‸ poˍ lonˉ Yaˍbaˆ ngaˬ hta‸ kʼo‸-e tcuh laˇ ve teˇ yanˇ, oˇ kaˬ lo duiˆ-ehˍ shaˇ-eh‸ hpeh‸ chehˇ ve yoˬ. Ya‸ hkʼaˇ, aˬ hto‸ ma hpeh‸ ve hta‸ ngaˬ maˇ shiˍ, teh‸ jawˇmawˇ hta‸ kʼoˆ piˇ ve yoˬ.
30Oˇ htaˇ jawˇmawˇ lehˬ, Nawˬ oˇ kaˬ lo huˉ taˍ-o‸, teh‸ yawˇ hta‸ kʼoˆ piˇ leh, yawˇ oˇ kaˬ lo huˉ taˍ ve yoˬ.
31Oˇ ve hkʼaw‸ nawˉ, Suˍdanˍ awˬ ceˬ paˍ oˇ ve kʼaw‸ gaˬ la leh, Jawˇmawˇ-oˬ, da‸ ve awˬ lawn sha tanˇ ngaˬ nawˬ hta‸ ca kʼaw‸ hto la ve yoˬ. Gʼuiˬsha lehˬ, ya‸ nyi nawˬ hta‸ kʼaw‸ hpfuhˆ ve chaw hui hta‸ nawˬ ve la‸ sheh hkʼaw chiˇ a‸ laˇ peuˬ, teh‸ jawˇmawˇ hta‸ kʼoˆ piˇ ve yoˬ.
32Oˇ htaˇ jawˇmawˇ lehˬ, Aˍbaˆsaˍlonˍ hkʼaˬ hkʼe kʼai le. Yawˇ chehˇ sha chehˇ-aw laˇ, teh‸ yawˇ hta‸ kʼaw‸ na nyi ve yoˬ.
Awˬ ceˬ oˇ ve kʼaw‸ yaw hkʼaw‸ leh kʼoˆ ve, Jawˇmawˇ-oˬ, nawˬ hta‸ kʼaw‸ hpfuhˆ ve chaw teˇ hpaˍ hkʼaˬ hkʼe hpeh‸ kʼai kʼo, yawˇ htawˇ oˇ hkʼe hpeh‸ kʼai piˇ-oˆ, teh‸ jawˇmawˇ hta‸ kʼoˆ piˇ ve yoˬ.
33Oˇ htaˇ jawˇmawˇ dawˇ haˍ jaˇ ve yoˬ. Yawˇ bawehˇ hkʼaw lo kʼaw‸ kʼo‸-e leh gʼaˇ hte‸ hawˬ ve yoˬ. Yawˇ kʼo‸-e chehˇ ve teˇ yanˇ, Ngaˬ yaˇ paˍ-oˬ, ngaˬ yaˇ paˍ Aˍbaˆsaˍlonˍ-oˬ, ngaˬ yaˇ paˍ Aˍbaˆsaˍlonˍ-oˬ, nawˬ awˬ tan ngaˬ gʼa suh ve hkʼe kʼo, hkʼaˬ ma da‸ jaˇ tuˬ le. Ngaˬ yaˇ paˍ Aˍbaˆsaˍlonˍ-oˬ, teh‸ kʼoˆ leh gʼaˇ hte‸ hawˬ ve yoˬ.
Currently Selected:
2 Saˍmo-eˍlaˆ li‸ 18: LHBE
Highlight
Share
Copy
Want to have your highlights saved across all your devices? Sign up or sign in
Lahu Bible Edited © Thailand Bible Society and Bible Society of Myanmar, 2010, 2020.