2 Saˍmo-eˍlaˆ li‸ 17
17
Aˍhiˆtawˇhpeˍlaˆ ve dawˇ hkʼaˇ hta‸ Huˆshehˇ tawˍ taˍ ve
1Oˇ ve hkʼaw‸ nawˉ, Aˍhiˆtawˇhpeˍlaˆ Aˍbaˆsaˍlonˍ hta‸ kʼoˆ piˇ ve, Ngaˬ chaw teˇ meunˍ nyiˇ hinˇ gʼaˇ hta‸ leuˆ yuˬ leh, ya‸ puiˉ Daˍviˆ hkʼaˇ suh gʼa‸ yuˬ kʼai tuˬ a hkaw-anˬ pe‸ laˇ-oˆ. 2Yawˇ nyi ma luˬ leh heuˬ jaˇ chehˇ ve teˇ yanˇ, ngaˬ yawˇ hta‸ ca bawˆ tuˬ yoˬ. Oˇ htaˇ yawˇ kawˆ jaˇ leh, yawˇ ve chaw hkʼa peu-eˬ gʼuiˇ hpaw-e tuˬ yoˬ. 3Awˬ miˇ ma teˇ gʼaˇ yawˇ ve awˬ hpawˇ geh kʼaw‸ kʼo‸-e chehˇ ve hkʼe, chaw hkʼa peu-eˬ hta‸ ngaˬ nawˬ geh shiˍ hkʼaw‸ veu laˇ tuˬ yoˬ. Nawˬ lehˬ, chaw teˇ gʼaˇ hta‸ ceh tiˉ tiˇ pehˍ gaˇ ve yoˬ. Awˬ nu ve chaw hkʼa peu-eˬ gawˬ lehˍ gʼa chehˇ tuˬ yoˬ, teh‸ yawˇ hta‸ kʼoˆ piˇ ve yoˬ. 4Aˍbaˆsaˍlonˍ leh Iˉsaˍreˍlaˆ chaw awˬ hoˉ awˬ naˬ hkʼa peu-eˬ dawˇ hkʼaˇ chi ve hta‸ nyi ma cawˇ ve yoˬ.
5Oˇ htaˇ Aˍbaˆsaˍlonˍ lehˬ, Huˆshehˇ hta‸ ca kuˬ-o‸. Yawˇ hkʼaˬ hkʼe kʼoˆ laˇ naˍ. Yawˇ hta‸ ka‸ na nyi shaˍ, teh‸ kʼoˆ ve yoˬ. 6Huˆshehˇ gaˬ la ve teˇ yanˇ, Aˍhiˆtawˇhpeˍlaˆ ngaˬ hui hta‸ chi hkʼe te tuˬ dawˇ hkʼaˇ pe‸ laˇ ve yoˬ. Ngaˬ hui te cawˇ laˇ. Nawˬ hkʼaˬ hkʼe dawˇ le, teh‸ Aˍbaˆsaˍlonˍ yawˇ hta‸ na nyi ve yoˬ.
7Oˇ htaˇ Huˆshehˇ kʼoˆ ve, Chi teˇ pawˆ Aˍhiˆtawˇhpeˍlaˆ nawˬ hta‸ piˇ laˇ ve dawˇ hkʼaˇ lehˬ maˇ da‸. 8Nawˬ pa leh yawˇ ve chaw teˇ hpaˍ lehˬ, ma‸ bawˆ cheuˬ jaˇ ve chaw teˇ hpaˍ hpeh‸ ve hta‸ maˇ kʼoˆ, chi beu‸ yawˇ hui heh puiˉ hkʼaw lo awˬ yehˇ ehˉ mehˉ kʼai ve yehˬ miˉ tawˍ hkʼa shuˍ hpeh‸ chehˇ taˍ ve hta‸ maˇ kʼoˆ, nawˬ shiˍ chehˇ ve yoˬ. Nawˬ pa lehˬ ma‸ bawˆ cheuˬ jaˇ ve chaw hpeh‸ leh, mvuhˇ hpeu‸ htaˇ yawˇ ve chaw teˇ hpaˍ geh chehˇ tuˬ ve maˇ heˆ. 9Chi beu‸ yawˇ lehˬ haˉ kʼoˍ teˇ maˬ maˬ hkʼaw ca va‸ chehˇ taˍ tuˬ yoˬ hehˉ. Daˍviˆ lehˬ nawˬ ve ma‸ yaˇ teˇ hpaˍ hta‸ hkʼawˇ bawˆ ve kʼo, awˬ lawn chi hta‸ hkʼa gʼa kaˇ ve chaw hkʼa peu-eˬ nawˬ ve chaw teˇ hpaˍ shonˇ kʼai peuˬ teh‸ kʼoˆ tuˬ yoˬ. 10Oˇ htaˇ, laˇ caˬ shiˉ hkʼa shuˍ ha‸ hanˉ jaˇ ve nawˬ ve ma‸ yaˇ teˇ hpaˍ kawˆ jaˇ tuˬ yoˬ. Awˬ lawn kʼo, nawˬ pa leh yawˇ ve ma‸ yaˇ teˇ hpaˍ lehˬ, cheu‸ jaˇ ve chaw teˇ hpaˍ hpeh‸ ve hta‸ Iˉsaˍreˍlaˆ chaw hkʼa peu-eˬ shiˍ taˍ ve yoˬ. 11Hkʼe te leh, ngaˬ nawˬ hta‸ dawˇ hkʼaˇ chi hkʼe pe‸ laˇ gaˇ ve yoˬ. Iˉsaˍreˍlaˆ mvuhˇmiˬ hkʼaw hkʼa chehˇ ve chaw hkʼa peu-eˬ hta‸ teˇ geh kuˬ hpawnˬ-o‸. Laˇ tsuhˇ gʼuiˬ pfuhˍ lo cawˬ ve shehˇ shiˍ hkʼa shuˍ maˇ jaˇ ve chaw chi teˇ hpaˍ hta‸ nawˬ awˬ to awˬ hoˉ te leh, ma‸ bawˆ kuiˬ lo shiˍ kʼai-o. 12Daˍviˆ hkʼaˬ lo chehˇ taˍ ve hta‸ ngaˬ hui ca hpfuhˆ nyi leh, yawˇ maˇ dawˇ maˇ gaˇ te chehˇ htaˇ ngaˬ hui yawˇ hta‸ lo‸ bawˆ piˇ tuˬ yoˬ. Chi hkʼe te ve kʼo, yawˇ leh yawˇ ve chaw teˇ gʼaˇ ka‸ gʼa ponˬ tuˬ ve maˇ heˆ. 13Yawˇ lehˬ, venˇ teˇ maˬ maˬ hkʼaw gʼuiˇ lo‸-e ve kʼo, ngaˬ hui aˉ caˆ hkeh teˇ gʼaˇ teˇ maˬ yuˬ veu laˇ leh, venˇ oˇ ve hta‸ gʼaw‸ paˆ piˇ tuˬ yoˬ. Oˇ kaˬ lo haˉ pui shiˍ teˇ shiˍ ka‸ cawˬ taˉ tuˬ ve maˇ heˆ, teh‸ kʼoˆ ve yoˬ.
14Oˇ htaˇ Aˍbaˆsaˍlonˍ leh Iˉsaˍreˍlaˆ chaw hkʼa peu-eˬ, Huˆshehˇ piˇ ve dawˇ hkʼaˇ lehˬ, Aˍhiˆtawˇhpeˬlaˆ pe‸ laˇ ve dawˇ hkʼaˇ a‸ kehˉ da‸ ve yoˬ, teh‸ kʼoˆ ve yoˬ. Gʼuiˬsha lehˬ Aˍbaˆsaˍlonˍ hta‸ te luˬ piˇ gaˇ ve pa taw, Aˍhiˆtawˇhpeˍlaˆ piˇ ve dawˇ hkʼaˇ hta‸ shu maˇ na yuˬ tuˬ te piˇ ve yoˬ.
Daˍviˆ gʼuiˇ hpaw-e ve
15Oˇ ve hkʼaw‸ nawˉ, Huˆshehˇ lehˬ paw hkuˇ Zaˍdoˆ leh Aˍbyaˍtaˍ geh kʼai leh, yawˇ Aˍbaˆsaˍlonˍ leh Iˉsaˍreˍlaˆ awˬ hoˉ awˬ naˬ teˇ hpaˍ hta‸ dawˇ hkʼaˇ hkʼaˬ hkʼe piˇ ve awˬ lawn maˇ kʼoˆ, Aˍhiˆtawˇhpeˍlaˆ hkʼaˬ hkʼe kʼoˆ ve awˬ lawn maˇ kʼoˆ, yawˇ huiˉ maˬ hta‸ kʼoˆ piˇ ve yoˬ. 16Peuˬ hkʼaw‸ nawˉ yawˇ kʼoˆ ve, Chi beu‸ chaw hta‸ hpehˇ leh Daˍviˆ leh yawˇ ve chaw teˇ hpaˍ Yawˇdanˍ iˉ kaˆ lawˬ awˬ paˇ lo maˇ gʼa haˉ chehˇ tuˬ leh, yawˇ leh yawˇ ve chaw teˇ hpaˍ teˇ gʼaˇ ka‸ tiˇ pehˍ ve hta‸ maˇ gʼa hkanˍ tuˬ, Yawˇdanˍ iˉ kaˆ lawˬ hta‸ haˆ haˆ hkanˍ tawˆ-e tuˬ ca hto piˇ tcuh-o, teh‸ yawˇ huiˉ maˬ hta‸ kʼoˆ piˇ ve yoˬ.
17Yawˇnaˆtanˍ leh Aˍhiˆmaˆ hui lehˬ, venˇ hkʼaw lo‸-e maˇ haˆ ve pa taw, Enˍyawˇgeˍlaˆ venˇ hkʼaw chehˇ taˍ ve yoˬ. Awˬ ceˬ ma teˇ gʼaˇ lehˬ, hpeh‸ la chehˇ ve awˬ ceuˬ teˇ hpaˍ yawˇ huiˉ maˬ hta‸ ca kʼoˆ piˇ la chehˇ leh, yawˇ huiˉ maˬ teˇ caˉ Daˍviˆ hta‸ ca kʼaw‸ hto maˍ piˇ chehˇ ve yoˬ. 18Ya‸ hkʼaˇ, chi teˇ pawˆ yaˇ paˍ teˇ gʼaˇ yawˇ huiˉ maˬ hta‸ mawˬ taˉ leh, Aˍbaˆsaˍlonˍ hta‸ ca kʼoˆ piˇ ve yoˬ. Hkʼe te leh Aˍbaˆsaˍlonˍ ve ma‸ yaˇ teˇ hpaˍ Baˍhuˆrenˍ venˇ hkʼaw cawˬ ve yehˬ teˇ yehˬ lo kʼai ve yoˬ. Yehˬ oˇ ve awˬ paˇ lo nanˬ bawˍ teˇ maˬ cawˬ leh, yawˇ huiˉ maˬ nanˬ bawˍ oˇ ve hkʼaw ca lo‸ mui taˍ ve yoˬ. 19Yehˬ shehˍ ma oˇ ve lehˬ, nanˬ bawˍ oˇ ve hta‸ teˇ ceuˬ ceuˬ yuˬ beh taˍ leh, oˇ ve awˬ hkʼoˆ lo caˬ shiˍ huˉ taˍ ve yoˬ. Hkʼe te leh, chaw teˇ gʼaˇ ka‸ oˇ ve hta‸ te‸ chiˉ maˇ dawˇ. 20Aˍbaˆsaˍlonˍ ve ma‸ yaˇ teˇ hpaˍ yehˬ hkʼaw lo‸ la leh, Aˍhiˆmaˆ leh Yawˇnaˆtanˍ hkʼaˬ lo le, teh‸ yehˬ shehˍ ma hta‸ na nyi ve yoˬ.
Yawˇ huiˉ maˬ iˉ kaˆ hkanˍ leh coˇ paˉ tawˆ-e peuˬ, teh‸ kʼaw‸ yaw hkʼaw‸ piˇ ve yoˬ.
Ma‸ yaˇ oˇ ve teˇ hpaˍ lehˬ, yawˇ huiˉ maˬ hta‸ ca hpfuhˆ nyi ve htawˇ, ca maˇ mawˬ leh Yeˍruˆsaˍlehnˍ venˇ lo kʼaw‸ kʼo‸-e ve yoˬ. 21Yawˇ hui kʼo‸-e peuˬ hkʼaw‸ nawˉ, Aˍhiˆmaˆ leh Yawˇnaˆtanˍ nanˬ bawˍ hkʼaw tawˆ la leh, jawˇmawˇ Daˍviˆ geh kʼai ve yoˬ. Aˍhiˆtawˇhpeˍlaˆ hkʼaˬ hkʼe te tuˬ dawˇ chehˇ ve awˬ lawn yawˇ huiˉ maˬ Daˍviˆ hta‸ kʼoˆ piˇ leh, iˉ kaˆ lawˬ coˇ paˉ lo haˆ haˆ hkanˍ tawˆ-e tuˬ kʼoˆ piˇ ve yoˬ. 22Hkʼe te leh, Daˍviˆ lehˬ yawˇ ve chaw teˇ hpaˍ hta‸ shiˍ veu leh iˉ kaˆ lawˬ coˇ paˉ lo hkanˍ tawˆ-e ve yoˬ. Mvuhˇ htiˇ la htaˇ, yawˇ hui iˉ kaˆ lawˬ coˇ paˉ lo gaˬ peuˬ ve yoˬ.
23Aˍhiˆtawˇhpeˍlaˆ lehˬ, yawˇ piˇ ve dawˇ hkʼaˇ hta‸ jawˇmawˇ maˇ ha‸ yuˬ piˇ ve hta‸ gʼa shiˍ ve teˇ yanˇ, piˉ laˬ ciˇ leh yawˇ ve chehˇ kuiˬ lo kʼo‸-e ve yoˬ. Yehˬ hkʼaw lo te tuˬ cawˬ ve kanˉ hkʼa peu-eˬ hta‸ te peuˬ hkʼaw‸ nawˉ, yawˇ hkʼaˇ yawˇ kʼawˍ peˍ nyiˉ pehˍ ve yoˬ. Shu yawˇ hta‸ yawˇ awˬ pa ve tuˍ hpfuh paˇ lo ca tuˍ piˇ ve yoˬ.
24Aˍbaˆsaˍlonˍ leh yawˇ ve ma‸ yaˇ teˇ hpaˍ, Yawˇdanˍ iˉ kaˆ lawˬ hta‸ hkanˍ tawˆ la htaˇ, Daˍviˆ lehˬ Maˍhaˍnenˍ venˇ lo gaˬ peuˬ ve yoˬ. 25(Aˍbaˆsaˍlonˍ lehˬ, Yaˍhaˆ awˬ tan Aˍmaˍsaˍ hta‸ yawˇ ve ma‸ poˍ lonˉ te tcuh taˍ ve yoˬ. Aˍmaˍsaˍ lehˬ Iˉshaˍmeˍlaˆ awˬ ceuˬ awˬ hkʼaˇ Yeˍtaˍ ve yaˇ hpeh‸ ve yoˬ. Yawˇ ve awˬ e lehˬ, Yaˍbaˆ awˬ e Yeˍruˆyaˍ ve awˬ nyi ma Naˍhaˆ yaˇ miˇ Aˍbiˆgeˍlaˆ hpeh‸ ve yoˬ.) 26Aˍbaˆsaˍlonˍ lehˬ, yawˇ ve ma‸ yaˇ teˇ hpaˍ hta‸ Giˇlaˆ mvuhˇmiˬ hkʼaw deh tcuh taˍ ve yoˬ.
27Daˍviˆ Maˍhaˍnenˍ venˇ hkʼaw gaˬ la htaˇ, Aˍmonˍ mvuhˇmiˬ Raˍbaˆ venˇ yaˇ Naˍhaˆ ve yaˇ paˍ Shawˇbiˆ, Lawˍdeˍbaˍ venˇ yaˇ Aˍmeˍlaˆ ve yaˇ paˍ Maˍhkiˇ raˆ leh Giˇlaˆ mvuhˇmiˬ Yawˉgeˍlenˍ venˇ yaˇ Baˍziˆlehˇ, yawˇ hui shehˆ gʼaˇ Daˍviˆ geh laˬ ve yoˬ. 28Daˍviˆ leh yawˇ ve chaw teˇ hpaˍ heh puiˉ hkʼaw lo meu‸ jehˇ kaˆ jehˇ leh heuˬ jaˇ peuˬ ve hta‸ yawˇ hui shiˍ leh, yawˇ hui awˬ pon iˉ kaˆ kawˆ, je‸ mu‸ hkʼu leh zuh‸ hpui teˇ hpaˍ yuˬ veu laˇ piˇ ve yoˬ. 29Chi awˬ hkʼoˆ, yawˇ hui lehˬ Daˍviˆ leh yawˇ ve chaw teˇ hpaˍ awˬ pon caˬ hkʼa, sha ma hu taˍ ve, nawˆ shiˍ, miˬ nawˆ shiˍ, pehˇ gʼuiˬ leh yawˬ ehˉ teˇ hpaˍ yuˬ veu laˇ piˇ ve yoˬ.
Currently Selected:
2 Saˍmo-eˍlaˆ li‸ 17: LHBE
Highlight
Share
Copy
Want to have your highlights saved across all your devices? Sign up or sign in
Lahu Bible Edited © Thailand Bible Society and Bible Society of Myanmar, 2010, 2020.