2 Saˍmo-eˍlaˆ li‸ 16
16
Daˍviˆ leh Ziˇbaˍ
1Daˍviˆ hkʼaw‸ hkʼoˆ lo teˇ tawn hkʼe juˇ kʼai peuˬ ve teˇ yanˇ, yawˇ Meˍfiˆboˍshehˆ ve awˬ ceˬ paˍ Ziˇbaˍ hta‸ gʼa mawˬ ve yoˬ. Yawˇ lehˬ piˉ laˬ teˇ hpaˍ hta‸ gʼa‸ toˇ chehˇ ve yoˬ. Piˉ laˬ oˇ ve teˇ hpaˍ awˬ hkʼoˆ lo, hkaoˍ monˉ nyiˇ ha shiˍ, a pehˉ meuˇ shiˍ awˬ goˇ teˇ ha kʼoˍ, iˉ shiˍ teˇ ha shiˍ leh a pehˉ meuˇ gʼuiˬ teˇ punˇ taˆ taˍ ve yoˬ. 2Oˇ htaˇ jawˇmawˇ Daˍviˆ lehˬ, Nawˬ aˬ hto‸ ma te toˇ ve le, teh‸ yawˇ hta‸ na nyi ve yoˬ.
Ziˇbaˍ kʼaw‸ yaw hkʼaw‸ leh kʼoˆ ve, Piˉ laˬ chi teˇ hpaˍ lehˬ, nawˬ leh nawˬ ve yehˬ yaˇ kʼa yaˇ teˇ hpaˍ ciˇ tuˬ awˬ pon hpeh‸ ve yoˬ. Caˇ tuˬ dawˬ tuˬ chi teˇ hpaˍ htawˇ, nawˬ ve chaw teˇ hpaˍ heh puiˉ hkʼaw lo awˍ meu‸ la htaˇ caˇ tuˬ awˬ pon hpeh‸ ve yoˬ, teh‸ kʼoˆ piˇ ve yoˬ. 3Oˇ htaˇ jawˇmawˇ lehˬ, Nawˬ ve awˬ shehˍ hpaˇ Sawˉlu‸ ve awˬ hawehˍ, Meˍfiˆboˍshehˆ hkʼaˬ lo le, teh‸ yawˇ hta‸ kʼaw‸ na nyi ve yoˬ.
Ziˇbaˍ kʼoˆ ve, Yawˇ Yeˍruˆsaˍlehnˍ venˇ hkʼaw chehˇ taˉ ve yoˬ. Chi beu‸ Iˉsaˍreˍlaˆ chaw teˇ hpaˍ lehˬ, yawˇ awˬ puˍ Sawˉlu‸ ve mvuhˇmiˬ yawˇ hta‸ kʼaw‸ hkʼaw‸ piˇ laˇ tuˬ ve hta‸ yonˍ chehˇ ve yoˬ, teh‸ Daˍviˆ hta‸ kʼoˆ piˇ ve yoˬ.
4Oˇ htaˇ Daˍviˆ lehˬ, Meˍfiˆboˍshehˆ ve mawˇ jeˬ hkʼa peu-eˬ nawˬ ve mawˇ hpeh‸ ve yoˬ, teh‸ Ziˇbaˍ hta‸ kʼoˆ piˇ ve yoˬ.
Ziˉbaˍ kʼaw‸ kʼoˆ ve, Ngaˬ lehˬ nawˬ ve awˬ ceˬ hpeh‸ ve yoˬ. Ngaˬ lehˬ, hkʼaˬ htaˆ ka‸ nawˬ nyi ma cawˇ ve chaw hpeh‸ la piˇ-oˆ, teh‸ kʼoˆ ve yoˬ.
Daˍviˆ leh Sheˍmiˆ
5Jawˇmawˇ Daˍviˆ lehˬ, Baˍhuˆrenˍ venˇ lo gaˬ la ve teˇ yanˇ, Sawˉlu‸ ve awˬ ceuˬ awˬ hkʼaˇ Geˍraˆ ve yaˇ Sheˍmiˆ lehˬ, Daˍviˆ hta‸ gʼaˇ hte‸ deˇ hkaˬ leh tawˆ la ve yoˬ. 6Daˍviˆ paˇ lo yawˇ ve ma‸ yaˇ teˇ hpaˍ hkʼa caw zuhˇ chehˇ taˍ ve htawˇ, Sheˍmiˆ lehˬ Daˍviˆ leh yawˇ ve ma‸ poˍ lonˉ teˇ hpaˍ hta‸ haˉ pui gʼawˆ baˬ ve yoˬ. 7Sheˍmiˆ Daˍviˆ hta‸ deˇ leh kʼoˆ ve, Chaw hta‸ tiˇ pehˍ shehˍ hpaˇ-oˬ, choˬ kaˬ lo tawˆ kʼai loˬ. 8Nawˬ lehˬ Sawˉlu‸ ve mvuhˇmiˬ hta‸ hiˉ yuˬ leh, Sawˉlu‸ ve yehˬ yaˇ kʼa yaˇ teˇ hpaˍ hta‸ tiˇ pehˍ piˇ ve pa taw, Gʼuiˬsha nawˬ hta‸ ciˍ yanˍ laˇ chehˇ ve yoˬ. Chi beu‸ Gʼuiˬsha lehˬ nawˬ ve mvuhˇmiˬ, nawˬ yaˇ paˍ Aˍbaˆsaˍlonˍ hta‸ piˇ taˍ peuˬ. Chaw hta‸ tiˇ pehˍ shehˍ hpaˇ-oˬ, chi beu‸ nawˬ gʼa luˬ gʼa sheˆ tuˬ yoˬ, teh‸ kʼoˆ ve yoˬ.
9Oˇ htaˇ Zeˍruˆyaˍ ve yaˇ Aˍbiˇshehˇ Daˍviˆ hta‸ kʼoˆ piˇ ve, Jawˇmawˇ-oˬ, aˬ hto‸ ma pa taw hpuiˇ chi nawˬ hta‸ deˇ piˇ lawˬ chehˇ ve le. Ngaˬ yawˇ geh kʼai leh yawˇ ve oˉ kʼoˍ hta‸ tawˆ cheˆ piˇ tuˬ, ngaˬ hta‸ a hkaw-anˬ pe‸ laˇ-oˆ, teh‸ kʼoˆ ve yoˬ.
10Oˇ htaˇ jawˇmawˇ lehˬ, Chi nawˬ huiˉ maˬ hta‸ a ciˉ ka‸ maˇ caˉ da‸. Ngaˬ hta‸ chi hkʼe te deˇ laˇ tuˬ Gʼuiˬsha yawˇ hta‸ kʼoˆ piˇ taˍ ve kʼo, Aˬ hto‸ ma pa taw nawˬ chi hkʼe te ve le, teh‸ a shu teˇ gʼaˇ yawˇ hta‸ kʼaw‸ na nyi hpeh‸ tuˬ ve le, teh‸ Aˍbiˇshehˆ leh Yaˍbaˆ hui hta‸ kʼoˆ piˇ ve yoˬ. 11Oˇ ve hkʼaw‸ nawˉ, yawˇ Aˍbiˇshehˇ leh yawˇ ve ma‸ poˍ lonˉ teˇ hpaˍ hta‸ kʼoˆ piˇ ve, Ngaˬ ve yaˇ paˍ ngaˬ hta‸ tiˇ pehˍ tuˬ gʼa‸ ca chehˇ ve yoˬ. Aˬ hto‸ ma pa taw, nawˬ hui Beˍyaˍmenˍ chaw chi hpaˇ kʼoˆ ve tawˇ hta‸ anˇ chehˇ ve le. Yaˬ piˇ. Yawˇ hkʼaˇ yawˇ hkeu chehˇ piˇ. Awˬ lawn kʼo, chi hkʼe te tuˬ Gʼuiˬsha yawˇ hta‸ kʼoˆ piˇ taˍ ve yoˬ. 12Chaw chi hpaˇ ngaˬ hta‸ hkeu laˇ ve awˬ tan, Gʼuiˬsha lehˬ ngaˬ hkʼaˬ ma gʼa tu‸ gʼa hkanˍ chehˇ ve hta‸ mawˬ leh, ngaˬ hta‸ awˬ bon kʼaw‸ na‸ laˇ tuˬ leh naˍ maˇ shiˍ, teh‸ yawˇ hui hta‸ kʼoˆ piˇ ve yoˬ. 13Hkʼe te leh, Daˍviˆ leh yawˇ ve chaw teˇ hpaˍ awˬ gʼuˇ suhˍ kʼaw‸ kʼai ve yoˬ. Sheˍmiˆ lehˬ yawˇ hui hkʼaˇ suh gʼa‸ kʼai leh, yawˇ hta‸ haˉ pui gʼawˆ baˬ chehˇ ve yoˬ. 14Jawˇmawˇ leh yawˇ ve chaw teˇ hpaˍ Yawˇdanˍ iˉ kaˆ lawˬ lo gaˬ ve teˇ yanˇ, heuˬ jaˇ leh oˇ kaˬ lo jehˇ taˍ ve yoˬ.
Aˍbaˆsaˍlonˍ Yeˍruˆsaˍlehnˍ venˇ hkʼaw gaˬ la ve
15Aˍbaˆsaˍlonˍ leh yawˇ geh chehˇ taˍ ve Iˉsaˍreˍlaˆ chaw hkʼa peu-eˬ Yeˍruˆsaˍlehnˍ venˇ hkʼaw lo‸ la ve yoˬ. Aˍhiˆtawˇhpeˍlaˆ htawˇ, yawˇ hui geh chehˇ taˍ ve yoˬ. 16Daˍviˆ ve awˬ chawˇ Huˆshehˇ lehˬ, Aˍbaˆsaˍlonˍ hta‸ gʼa mawˬ ve teˇ yanˇ, Jawˇmawˇ co zuhˬ ha zuhˬ cawˬ piˇ-oˆ, teh‸ kʼoˆ ve yoˬ.
17Oˇ htaˇ Aˍbaˆsaˍlonˍ lehˬ, Nawˬ ve awˬ chawˇ hta‸ nawˬ ka ti‸ te taˍ ve hkʼaˬ hkʼe kʼai le. Aˬ hto‸ ma pa taw, nawˬ yawˇ geh maˇ kʼai ve le, teh‸ yawˇ hta‸ na nyi ve yoˬ.
18Huˆshehˇ kʼaw‸ yaw hkʼaw‸ leh kʼoˆ ve, Ngaˬ hkʼaˬ hkʼe te kʼai hpeh‸ tuˬ le. Ngaˬ lehˬ Gʼuiˬsha leh yawˇ ve Iˉsaˍreˍlaˆ chaw teˇ hpaˍ leuˆ yuˬ taˍ ve chaw hpawˇ lo chehˇ tuˬ yoˬ. Chi pa taw, ngaˬ nawˬ geh chehˇ tuˬ yoˬ. 19Ngaˬ ve awˬ shehˍ hpaˇ ve yaˇ paˍ awˬ pon maˇ heˆ kʼo, ngaˬ a shu ve awˬ ceˬ gʼa te tuˬ ve le. Ngaˬ lehˬ nawˬ pa ve awˬ ceˬ te piˇ ve hkʼe, chi beu‸ nawˬ ve awˬ ceˬ te laˇ tuˬ yoˬ, teh‸ yawˇ hta‸ kʼoˆ piˇ ve yoˬ.
20Oˇ htaˇ, Aˍbaˆsaˍlonˍ lehˬ Aˍhiˆtawˇhpeˍlaˆ hpawˇ lo hpfuhˆ leh, Ngaˬ hkʼaˬ hkʼe te cawˇ ve le. Ngaˬ hta‸ dawˇ hkʼaˇ a ciˉ pe‸ laˇ-oˆ, teh‸ yawˇ hta‸ kʼoˆ piˇ ve yoˬ.
21Aˍhiˆtawˇhpeˍlaˆ kʼoˆ ve, Nawˬ pa ve awˬ miˇ ma i teˇ hpaˍ geh kʼai leh, yawˇ hui geh ca zuh‸-o‸. Oˇ hkʼe te ve kʼo, nawˬ ve chaw teˇ hpaˍ awˬ gʼaˇ uiˍ la tuˬ yoˬ, teh‸ yawˇ hta‸ kʼoˆ piˇ ve yoˬ. 22Hkʼe te leh, yawˇ hui Aˍbaˆsaˍlonˍ awˬ pon hawˉ yehˬ hkʼoˆ lo aˉ po kʼo ehˉ teˇ maˬ te piˇ leh, Aˍbaˆsaˍlonˍ lehˬ Iˉsaˍreˍlaˆ chaw chi ma gʼuˇ suhˍ lo yawˇ awˬ pa ve awˬ miˇ i teˇ hpaˍ geh zuh‸ ve yoˬ.
23Awˬ yanˇ oˇ ve hkʼaw, Aˍhiˆtawˇhpeˍlaˆ piˇ ve dawˇ hkʼaˇ lehˬ Gʼuiˬsha ve tawˇ hkʼa shuˍ shawˍ taˍ leh hkʼa deh‸ na yuˬ ve yoˬ. Daˍviˆ leh Aˍbaˆsaˍlonˍ lehˬ, Aˍhiˆtawˇhpeˍlaˆ kʼoˆ ve hkʼe na yuˬ leh te chehˇ taˍ ve yoˬ.
Currently Selected:
2 Saˍmo-eˍlaˆ li‸ 16: LHBE
Highlight
Share
Copy
Want to have your highlights saved across all your devices? Sign up or sign in
Lahu Bible Edited © Thailand Bible Society and Bible Society of Myanmar, 2010, 2020.
