2 Saˍmo-eˍlaˆ li‸ 15
15
Aˍbaˆsaˍlonˍ jawˇmawˇ hta‸ hpfuhˆ ve
1Oˇ ve hkʼaw‸ nawˉ, Aˍbaˆsaˍlonˍ lehˬ yawˇ ciˇ tuˬ ve iˉ mvuhˇ lawˬ teˇ maˬ leh, yawˇ gʼuˇ suhˍ lo gʼuiˇ toˇ tuˬ ve ma‸ yaˇ ngaˇ chi gʼaˇ hta‸ hkʼa deh‸ gu taˍ ve yoˬ. 2Yawˇ mvuhˇ shawˉ teˇ na‸ tu leh, venˇ taˍ meu‸ hpe‸ lo ca huˉ taˍ ve yoˬ. Jawˇmawˇ Daˍviˆ geh suhˉ ca jehˬ la ve chaw hui hta‸ yawˇ kuˬ yuˬ leh, Nawˬ hui hkʼaˬ lo chehˇ ve le, teh‸ na nyi ve yoˬ. Ngaˬ hui lehˬ, Iˉsaˍreˍlaˆ chaw ceuˬ hpeh‸ leh, choˬ kaˬ oˇ kaˬ chehˇ ve yoˬ, teh‸ kʼaw‸ yaw hkʼaw‸ piˇ ve teˇ yanˇ, 3Aˍbaˆsaˍlonˍ lehˬ, Nyi loˬ. Nawˬ lehˬ gʼaˇ ve hpawˇ lo chehˇ taˍ ve yoˬ. Ya‸ hkʼaˇ, nawˬ ve suhˉ hta‸ jehˬ laˇ tuˬ jawˇmawˇ leuˆ yuˬ taˍ ve suhˉ jehˬ paˍ maˇ cawˬ, teh‸ yawˇ hui hta‸ kʼaw‸ kʼoˆ piˇ ve yoˬ. 4Aˍbaˆsaˍlonˍ kʼaw‸ caˉ leh kʼoˆ ve, Ngaˬ suhˉ jehˬ shehˍ hpaˇ hpeh‸ ve kʼo, hkʼaˬ ma da‸ jaˇ tuˬ le. Ngaˬ suhˉ jehˬ paˍ gʼa te ve hkʼe kʼo, ngaˬ lehˬ hteˇ ve cawˇ ve hkʼaw chaw hkʼa peu-eˬ hta‸ suhˉ jehˬ piˇ tuˬ yoˬ, teh‸ kʼoˆ ve yoˬ. 5Chaw oˇ ve teˇ hpaˍ Aˍbaˆsaˍlonˍ mehˆ gʼuˇ suhˍ hkui tcuhˉ teh leh boˆ-a teh‸ te ve teˇ yanˇ, Aˍbaˆsaˍlonˍ yawˇ hui hta‸ kʼuˉ taˍ leh boˆ nu piˇ ve yoˬ. 6Aˍbaˆsaˍlonˍ lehˬ, jawˇmawˇ geh suhˉ ca jehˬ la ve chaw teˇ hpaˍ hta‸ chi hkʼe te piˇ ve pa taw, chaw oˇ ve teˇ hpaˍ yawˇ hta‸ ha‸ ve yoˬ.
7Oˇ ve hkʼaw‸ nawˉ, awˇ hkʼaw‸ gaˬ ve teˇ yanˇ, Aˍbaˆsaˍlonˍ jawˇmawˇ hta‸ kʼoˆ piˇ ve, Jawˇmawˇ-oˬ, ngaˬ Gʼuiˬsha hta‸ ka ti‸ te taˍ peuˬ ve hkʼe, ngaˬ hta‸ Heˍbronˍ venˇ lo a ciˉ kʼai tcuh laˇ-oˆ. 8Ngaˬ Geˍsuˇriˆ mvuhˇmiˬ hkʼaw chehˇ taˍ htaˇ, Gʼuiˬsha ngaˬ hta‸ Yeˍruˆsaˍlehnˍ venˇ lo kʼaw‸ kʼo‸-e tcuh laˇ ve kʼo, ngaˬ yawˇ hta‸ Heˍbronˍ venˇ hkʼaw oˉ kʼoˍ ca kʼaw‸ pui tuˬ yoˬ, teh‸ Gʼuiˬsha hta‸ ngaˬ ka ti‸ te taˍ ve yoˬ, teh‸ yawˇ hta‸ kʼoˆ piˇ ve yoˬ.
9Oˇ htaˇ jawˇmawˇ lehˬ, gawˬ lehˍ ve hkʼaw kʼai loˬ, teh‸ yawˇ hta‸ kʼaw‸ yaw hkʼaw‸ piˇ ve yoˬ. Hkʼe te leh, Aˍbaˆsaˍlonˍ Heˍbronˍ venˇ lo kʼai ve yoˬ. 10Ya‸ hkʼaˇ, yawˇ Iˉsaˍreˍlaˆ mvuhˇmiˬ hkʼaˬ ti chi ti lo chaw hta‸ hpehˇ peu leh, nawˬ hui behˬ heh ma meuˆ hkawˇ gʼa kaˇ ve teˇ yanˇ, Aˍbaˆsaˍlonˍ lehˬ, Heˍbronˍ venˇ hkʼaw jawˇmawˇ hpeh‸ la peuˬ teh‸ hpoˆ kuˬ-o‸, teh‸ yawˇ hui hta‸ tawˇ shanˍ feu piˇ ve yoˬ. 11Aˍbaˆsaˍlonˍ lehˬ, chaw nyiˇ ha gʼaˇ hta‸ shiˍ veu leh, Yeˍruˆsaˍlehnˍ venˇ hkʼaw tawˆ kʼai ve yoˬ. Yawˇ hui lehˬ, jawˇmawˇ hta‸ kʼaw‸ hpfuhˆ tuˬ awˬ lawn te‸ chiˉ maˇ shiˍ leh yawˇ hkʼaˇ suh gʼa‸ kʼai ve yoˬ. 12Aˍbaˆsaˍlonˍ lehˬ, Gʼuiˬsha hta‸ tuˉ tanˇ piˇ chehˇ ve teˇ yanˇ, Giˇlawˇ venˇ hkʼaw chehˇ ve, Daˍviˆ hta‸ dawˇ hkʼaˇ piˇ shehˍ hpaˇ Aˍhiˆtawˇhpeˍlaˆ hta‸ kuˬ yuˬ ve yoˬ. Jawˇmawˇ hta‸ kʼaw‸ hpfuhˆ tuˬ ve chaw maˇ la leh, Aˍbaˆsaˍlonˍ hpawˇ lo awˬ gʼaˇ shaˬ te shaˬ uiˍ la chehˇ ve yoˬ.
Daˍviˆ Yeˍruˆsaˍlehnˍ venˇ hkʼaw hpaw tawˆ-e ve
13Oˇ htaˇ chaw teˇ gʼaˇ Daˍviˆ geh gʼuiˇ laˬ leh, Iˉsaˍreˍlaˆ chaw teˇ hpaˍ Aˍbaˆsaˍlonˍ hpawˇ lo ca chehˇ kʼai peuˬ, teh‸ Daˍviˆ hta‸ kʼoˆ piˇ ve yoˬ.
14Oˇ htaˇ, Daˍviˆ lehˬ Yeˍruˆsaˍlehnˍ venˇ hkʼaw chehˇ taˍ ve yawˇ ve ma‸ poˍ lonˉ teˇ hpaˍ hta‸ kuˬ yuˬ leh, Aˍbaˆsaˍlonˍ la‸ sheh hkʼaw gʼa ponˬ tuˬ ngaˬ hui choˬ kaˬ lo haˆ gʼa tawˆ kʼai tuˬ yoˬ. Nawˬ hui mawˇ haˆ gu-o. Oˇ hkʼe maˇ te kʼo, Aˍbaˆsaˍlonˍ choˬ kaˬ laˬ leh, venˇ hkʼaw chehˇ ve chaw hkʼa peu-eˬ hta‸ tiˇ pehˍ tuˬ yoˬ, teh‸ yawˇ hui hta‸ kʼoˆ piˇ ve yoˬ.
15Oˇ htaˇ yawˇ hui lehˬ, Jawˇmawˇ-oˬ, nawˬ kʼoˆ ve hkʼe ngaˬ hui na yuˬ leh te tuˬ yoˬ, teh‸ yawˇ hta‸ kʼaw‸ yaw hkʼaw‸ piˇ ve yoˬ. 16Hkʼe te leh, yawˇ ve miˇ yaˇ teˇ hpaˍ leh yawˇ ve ma‸ poˍ lonˉ teˇ hpaˍ hta‸ shiˍ leh tawˆ kʼai ve yoˬ. Ya‸ hkʼaˇ, yawˇ ve hawˉ yehˬ hta‸ ha‸ shaˉ tuˬ, yawˇ ve awˬ miˇ ma i 10 gʼaˇ hta‸ oˇ kaˬ lo chehˇ tcuh taˉ ve yoˬ.
17Jawˇmawˇ leh yawˇ ve chaw hkʼa peu-eˬ venˇ hkʼaw tawˆ kʼai leh, venˇ jaˇ lo cawˬ ve yehˬ teˇ yehˬ paˇ lo jehˇ taˍ ve yoˬ. 18Hkeˍraˍtiˆ chaw leh Peˍlaˍtiˆ chaw teˇ hpaˍ yawˇ gʼuˇ suhˍ kʼai chehˇ ve teˇ yanˇ, yawˇ ve ma‸ poˍ lonˉ teˇ hpaˍ yawˇ paˇ lo huˉ chehˇ taˍ ve yoˬ. Gaˍtaˆ venˇ lo yawˇ hkʼaˇ suh gʼa‸ toˇ ve ma‸ yaˇ 600 gʼaˇ htawˇ yawˇ gʼuˇ suhˍ kʼai ve yoˬ. 19Oˇ htaˇ jawˇmawˇ lehˬ, yawˇ hui ve awˬ hoˉ Iˆtehˇ hta‸ kʼoˆ piˇ ve, Aˬ hto‸ ma pa taw nawˬ ngaˬ hui geh kʼai toˇ ve le. Venˇ hkʼaw kʼo‸-e leh jawˇmawˇ awˬ suhˉ teˇ gʼaˇ geh ca chehˇ taˍ-o‸. Nawˬ lehˬ, ngaˬ hui ve mvuhˇmiˬ hkʼaw ca chehˇ la taˍ ve hkehˉ chaw teˇ gʼaˇ hpeh‸ ve yoˬ. 20Nawˬ choˬ kaˬ lo ca chehˇ la ve maˇ maw sheˍ. Chi hta‸ pa taw, nawˬ hta‸ ngaˬ geh shiˍ kʼai maˇ hpeh‸. Awˬ lawn kʼo, ngaˬ hkʼaˬ lo gʼa kʼai tuˬ ve hta‸ htawˇ maˇ shiˍ sheˍ. Nawˬ ve chaw teˇ hpaˍ hta‸ shiˍ veu leh kʼo‸-e loˬ. Gʼuiˬsha nawˬ hta‸ ha‸ shaˉ leh awˬ bon na‸ laˇ piˇ-oˆ, teh‸ yawˇ hta‸ kʼoˆ piˇ ve yoˬ.
21Ya‸ hkʼaˇ, Iˆtehˇ kʼaw‸ yaw hkʼaw‸ leh kʼoˆ ve, Jawˇmawˇ-oˬ, te‸ htawˇ suh htawˇ ngaˬ nawˬ geh kʼai tuˬ yoˬ, teh‸ kʼoˆ ve yoˬ.
22Oˇ htaˇ Daˍviˆ lehˬ, Hkʼe yoˬ kʼo da‸-aˬ. Gʼuˇ suhˍ kʼai-o, teh‸ yawˇ hta‸ kʼoˆ piˇ ve yoˬ. Hkʼe te leh, Iˆtehˇ lehˬ yawˇ ve chaw hkʼa peu-eˬ hta‸ shiˍ veu leh tawˆ kʼai ve yoˬ. 23Daˍviˆ leh yawˇ ve chaw teˇ hpaˍ tawˆ kʼai ve teˇ yanˇ, venˇ yaˇ teˇ hpaˍ gʼaˇ hte‸ kuˬ hawˬ ve yoˬ. Jawˇmawˇ leh yawˇ ve ma‸ yaˇ teˇ hpaˍ Kiˇdronˍ iˉ kaˆ lawˬ hta‸ hkanˍ tawˆ-e leh, heh puiˉ hkʼaw lo kʼai ve yoˬ.
24Gʼuiˬsha ve ka ti‸ shaˉ caˆ ta kʼoˍ hta‸ taˆ taˍ ve Leˍviˆ chaw teˇ hpaˍ lehˬ, paw hkuˇ Zaˍdoˆ geh teˇ geh oˇ kaˬ lo chehˇ taˍ ve yoˬ. Yawˇ hui lehˬ, chaw hkʼa peu-eˬ venˇ hkʼaw tawˆ kʼai peuˬ htaˇ hkʼa gaˬ ta kʼoˍ oˇ ve hta‸ miˬ chaˇ hkʼoˆ lo teh taˍ ve yoˬ. Aˍbyaˍtaˍ htawˇ oˇ kaˬ lo chehˇ taˍ ve yoˬ. 25Oˇ htaˇ, jawˇmawˇ paw hkuˇ Zaˍdoˆ hta‸ kʼoˆ piˇ ve, Ka ti‸ shaˉ caˆ ta kʼoˍ hta‸ venˇ hkʼaw lo kʼaw‸ yuˬ kʼo‸-e loˬ. Gʼuiˬsha ngaˬ hta‸ nyi ma cawˇ ve kʼo, ka ti‸ shaˉ caˆ ta kʼoˍ chi ve hta‸ teˇ nyi kʼo yawˇ ngaˬ hta‸ kʼaw‸ mawˬ tcuh laˇ tuˬ sheˍ ve yoˬ. 26Ya‸ hkʼaˇ, yawˇ ngaˬ hta‸ nyi ma maˇ cawˇ ve kʼo, yawˇ te gaˇ ve hkʼe te piˇ-oˆ, teh‸ yawˇ hta‸ kʼoˆ piˇ ve yoˬ. 27Peuˬ hkʼaw‸ nawˉ, yawˇ Zaˍdoˆ hta‸ kʼaw‸ caˉ leh kʼoˆ piˇ ve, Nyi loˬ. Nawˬ yaˇ paˍ Aˍhiˆmaˆ leh Aˍbyaˍtaˍ ve yaˇ paˍ Yawˇnaˆtanˍ hta‸ shiˍ veu leh, gawˬ lehˍ ve hkʼaw venˇ hkʼaw kʼo‸-e loˬ. 28Ngaˬ nawˬ geh lo awˬ lawn teˇ ceuˬ ceuˬ gʼa kaˇ htaˇ hkʼa gaˬ, heh puiˉ hkʼaw lo law taˍ tuˬ yoˬ, teh‸ yawˇ hta‸ kʼoˆ piˇ ve yoˬ. 29Hkʼe te leh, Zaˍdoˆ leh Aˍbyaˍtaˍ ka ti‸ shaˉ caˆ ta kʼoˍ hta‸ Yeˍruˆsaˍlehnˍ venˇ lo kʼaw‸ yuˬ kʼo‸-e leh oˇ kaˬ lo chehˇ taˍ ve yoˬ.
30Daˍviˆ gʼaˇ hte‸ hawˬ leh Shaˍlonˍ hkʼaw hkʼoˆ taˆ-e ve yoˬ. Yawˇ lehˬ hkuiˉ nuˆ kʼehˆ baˬ leh, dawˇ haˍ ve hkʼaw yawˇ ve oˉ kʼoˍ hta‸ beh taˍ ve yoˬ. Yawˇ geh kʼai ve chaw hkʼa peu-eˬ htawˇ, gʼaˇ hte‸ hawˬ leh a shu yawˇ ve oˉ kʼoˍ hta‸ beh taˍ ve yoˬ. 31Aˍhiˆtawˇhpeˍlaˆ lehˬ, Aˍbaˆsaˍlonˍ hpawˇ chehˇ kʼai peuˬ ve awˬ lawn hta‸ Daˍviˆ gʼa kaˇ ve teˇ yanˇ, yawˇ Gʼuiˬsha hta‸kʼoˆ piˇ ve, Gʼuiˬsha-oˬ, Aˍhiˆtawˇhpeˍlaˆ ve dawˇ hkʼaˇ lehˬ, hkʼe leˇ hpeh‸ kʼai piˇ-oˆ, teh‸ kʼoˆ ve yoˬ.
32Daˍviˆ hkʼaw hkʼoˆ taˆ-e leh, Gʼuiˬsha hta‸ oˉ kʼoˍ pui kuiˬ lo gaˬ ve teˇ yanˇ, yawˇ yonˍ hpeh‸ ve awˬ chawˇ Aˍhkiˆ chaw Huˆshehˇ lehˬ, yawˇ ve veu‸ kʼaˇ hta‸ tzuh‸ suhˍ leh yawˇ ve oˉ kʼoˍ hkʼoˆ lo je‸ meu-eˬ hkaˆ pfuhˍ peuˬ hkʼaw‸ nawˇ, Daˍviˆ geh laˬ ve yoˬ. 33Oˇ htaˇ Daˍviˆ yawˇ hta‸ kʼoˆ piˇ ve, Nawˬ ngaˬ geh laˬ ve htawˇ, nawˬ ngaˬ hta‸ te‸ chiˉ ga laˇ gʼa tuˬ ve maˇ heˆ. 34Chi hta‸ pa taw, nawˬ venˇ hkʼaw kʼo‸-e leh Aˍhiˆtawˇhpeˍlaˆ ve dawˇ hkʼaˇ hta‸ Aˍbaˆsaˍ lonˍ maˇ gʼa na yuˬ tuˬ, Aˍbaˆsaˍlonˍ hta‸ chi hkʼe ca kʼaw‸ kʼoˆ piˇ-oˆ. Jawˇmawˇ-oˬ, nawˬ pa ve awˬ ceˬ te jaw ve hkʼe, chi beu‸ ngaˬ nawˬ ve awˬ ceˬ te laˇ tuˬ yoˬ, teh‸ ca kʼoˆ piˇ-oˆ. 35Paw hkuˇ Zaˍdoˆ leh Aˍbyaˍtaˍ hui htawˇ oˇ kaˬ lo chehˇ taˍ ve yoˬ. Nawˬ jawˇmawˇ ve hawˉ yehˬ hkʼaw hkʼa gʼa kaˇ ve tawˇ teˇ hpaˍ yawˇ huiˉ maˬ hta‸ hto piˇ-oˆ. 36Yawˇ huiˉ maˬ ve yaˇ Aˍhiˆmaˆ leh Yawˇnaˆtanˍ htawˇ, yawˇ hui geh chehˇ taˍ ve yoˬ. Nawˬ hkʼa gʼa kaˇ ve awˬ lawn teˇ hpaˍ, yawˇ huiˉ maˬ hta‸ hpehˇ leh ngaˬ hta‸ ca kʼaw‸ hto laˇ tcuh-o, teh‸ yawˇ hta‸ kʼoˆ piˇ ve yoˬ.
37Hkʼe te leh, Daˍviˆ ve awˬ chawˇ Huˆshehˇ venˇ hkʼaw kʼaw‸ kʼo‸-e ve yoˬ. Aˍbaˆsaˍlonˍ htawˇ oˇ ve teˇ hkui venˇ hkʼaw lo‸ la ve yoˬ.
Currently Selected:
2 Saˍmo-eˍlaˆ li‸ 15: LHBE
Highlight
Share
Copy
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fen.png&w=128&q=75)
Want to have your highlights saved across all your devices? Sign up or sign in
Lahu Bible Edited © Thailand Bible Society and Bible Society of Myanmar, 2010, 2020.