2 Saˍmo-eˍlaˆ li‸ 14
14
Aˍbaˆsaˍlonˍ kʼaw‸ la tuˬ Yaˍbaˆ awˬ hkʼaˇ gu ve
1Jawˇmawˇ Daˍviˆ lehˬ, Aˍbaˆsaˍlonˍ hta‸ dawˇ nawˇ jaˇ chehˇ ve hta‸ Yeˍruˆyaˍ ve yaˇ Yaˍbaˆ gʼa shiˍ ve yoˬ. 2Hkʼe te leh, Yaˍbaˆ lehˬTeˍkawˇ venˇ hkʼaw chehˇ ve cuˇ yiˍ cawˬ ve yaˇ miˇ teˇ gʼaˇ hta‸ yawˇ geh kuˬ yuˬ ve yoˬ. Yaˇ miˇ oˇ ve hta‸ yawˇ kʼoˆ piˇ ve, Nawˬ awˬ to dawˇ haˍ jaˇ chehˇ ve yaˇ miˇ teˇ gʼaˇ hkʼe te-o. Dawˇ haˍ htaˇ veu‸ deh ve veu‸ kʼaˇ hta‸ veu‸ deh leh, nawˬ ve oˉ kʼoˍ hta‸ htawˇ taˇ puiˍ. Awˬ yanˇ maw chaweh dawˇ haˍ chehˇ ve yaˇ miˇ hta‸ shuˍ tuˬ, nawˬ ve awˬ to hta‸ hkʼa deh‸ gu taˍ-o‸. 3Chi hkʼe te peuˬ hkʼaw‸ nawˉ, jawˇmawˇ geh kʼai leh ngaˬ nawˬ hta‸ kʼoˆ laˇ tuˬ ve tawˇ chi teˇ hpaˍ yawˇ hta‸ ca hto piˇ-oˆ, teh‸ yaˇ miˇ oˇ ve hta‸ kʼoˆ piˇ ve yoˬ. Hkʼe te leh, yawˇ jawˇmawˇ hta‸ hkʼaˬ hkʼe gʼa ca kʼoˆ piˇ tuˬ ve tawˇ hkʼa peu-eˬ, yaˇ miˇ oˇ ve hta‸ kʼoˆ maˍ piˇ ve yoˬ.
4Yaˇ miˇ oˇ ve jawˇmawˇ geh kʼai leh, yawˇmehˆ gʼuˇ suhˍ boˆ taˍ peuˬ hkʼaw‸ nawˉ, Jawˇmawˇ-oˬ, ngaˬ hta‸ a ciˉ ga laˇ-oˆ, teh‸ yawˇ hta‸ kʼoˆ piˇ ve yoˬ.
5Oˇ htaˇ jawˇmawˇ lehˬ, Nawˬ aˬ hto‸ ma loˍ le, teh‸ yawˇ hta‸ na nyi ve yoˬ.
Yaˇ miˇ oˇ ve kʼaw‸ yaw hkʼaw‸ leh kʼoˆ ve, Ngaˬ lehˬ haˍ gʼawˇ jaˇ ve mehˇchawˇma hpeh‸ ve yoˬ. 6Jawˇmawˇ-oˬ, ngaˬ yaˇ paˍ nyiˇ gʼaˇ cawˬ ve yoˬ. Teˇ nyi htaˇ yawˇ huiˉ maˬ heh puiˉ hkʼaw lo ya‸ da‸ leh, teˇ gʼaˇ lehˬ awˬ nu ve teˇ gʼaˇ hta‸ tiˇ pehˍ ve yoˬ. Yawˇ huiˉ maˬ hta‸ hka piˇ paˍ maˇ cawˬ. 7Hkʼe te leh jawˇmawˇ-oˬ, chi beu‸ ngaˬ ve awˬ ceuˬ awˬ hkʼaˇ hkʼa peu-eˬ ngaˬ hta‸ ga hpoˆ deˇ leh, tiˇ pehˍ shehˍ hpaˇ ngaˬ yaˇ paˍ oˇ ve hta‸ htawˇ kʼaw‸ tiˇ pehˍ tuˬ ngaˬ hta‸ lawˬ laˇ chehˇ ve yoˬ. Yawˇ hui chi hkʼe te laˇ ve kʼo, ngaˬ lehˬ yaˇ teˇ gʼaˇ ka‸ cawˬ taˉ tuˬ ve maˇ heˆ. Yawˇ hui ngaˬ hta‸ nyi ma luˬ suh piˇ lawˬ leh, ngaˬ hpawˇ ve awˬ ceuˬ awˬ hkʼaˇ htawˇ miˬguiˬ hkʼoˆ lo mehˉ kʼai tuˬ ve yoˬ, teh‸ jawˇmawˇ hta‸ kʼoˆ piˇ ve yoˬ.
8Oˇ htaˇ jawˇmawˇ lehˬ, Nawˬ aˉ hkʼaw lo kʼo‸-e loˬ. Kanˉ chi hta‸ ngaˬ nyi leh te laˇ tuˬ yoˬ, teh‸ yaˇ miˇ oˇ ve hta‸ kʼoˆ piˇ ve yoˬ.
9Yaˇ miˇ kʼaw‸ kʼoˆ ve, Jawˇmawˇ-oˬ, nawˬ hkʼaˬ hkʼe te ve maˇ kʼoˆ, ngaˬ leh ngaˬ ve yehˬ yaˇ kʼa yaˇ teˇ hpaˍ lehˬ, shu venˇbaˆ taˍ laˇ ve hta‸ hkanˍ yuˬ tuˬ yoˬ. Nawˬ leh nawˬ ve yehˬ yaˇ kʼa yaˇ teˇ hpaˍ lehˬ, te‸ chiˉ venˇbaˆ taˍ kuiˬ maˇ cawˬ, teh‸ jawˇmawˇ hta‸ kʼaw‸ kʼoˆ piˇ ve yoˬ.
10Oˇ htaˇ jawˇmawˇ lehˬ, Chaw teˇ gʼaˇ gʼaˇ nawˬ hta‸ ca te sho‸ sha‸ la ve kʼo, yawˇ hta‸ ngaˬ geh shiˍ veu laˇ-oˆ. Oˇ hkʼe te ve kʼo, yawˇ nawˬ hta‸ teˇ pawˆ ka‸ kʼaw‸ te sho‸ sha‸ laˇ gʼa tuˬ ve maˇ heˆ, teh‸ yaˇ miˇ hta‸ kʼoˆ piˇ ve yoˬ.
11Yaˇ miˇ kʼaw‸ kʼoˆ ve, Jawˇmawˇ-oˬ, ngaˬ ve yaˇ paˍ hta‸ kʼaw‸ te hkʼaw‸ tuˬ ca chehˇ ve ngaˬ ve awˬ ceuˬ awˬ hkʼaˇ oˇ ve teˇ hpaˍ, ngaˬ yaˇ paˍ hta‸ maˇ gʼa tiˇ pehˍ leh, chi a‸ kehˉ uiˍ ve venˇbaˆ maˇ gʼa te tawˆ la tuˬ, nawˬ ve Jawˇmawˇ Gʼuiˬsha geh bon a ciˉ lawˬ laˇ-oˆ, teh‸ jawˇmawˇ hta‸ kʼoˆ piˇ ve yoˬ.
Oˇ htaˇ Daˍviˆ lehˬ, Nawˬ ve yaˇ paˍ hta‸ te‸ chiˉ maˇ gʼa te piˇ tuˬ, te‸ chehˇ ve Gʼuiˬsha hta‸ cuˇ leh ngaˬ hkanˍ ve yoˬ, teh‸ yaˇ miˇ hta‸ kʼoˆ piˇ ve yoˬ.
12Oˇ htaˇ yaˇ miˇ oˇ ve lehˬ, Jawˇmawˇ-oˬ, ngaˬ hta‸ tawˇ teˇ peu-eˬ ceh kʼaw‸ yaw tuˬ a hkaw-anˬ pe‸ laˇ sheˍ, teh‸ jawˇmawˇ hta‸ kʼoˆ piˇ ve yoˬ.
Jawˇmawˇ htawˇ, Yaw loˬ, teh‸ kʼaw‸ kʼoˆ piˇ ve yoˬ.
13Aˬ hto‸ ma pa taw, nawˬ Gʼuiˬsha ve chaw teˇ hpaˍ hta‸ te ya‸ ve le. Nawˬ lehˬ shu ve mvuhˇmiˬ hkʼaw ca chehˇ taˍ ve nawˬ ve yaˇ paˍ hta‸ kʼaw‸ la tuˬ a hkaw-anˬ maˇ piˇ. Chi hta‸ pa taw, ya‸ sheh nawˬ kʼoˆ taˍ ve tawˇ oˇ ve teˇ hpaˍ nawˬ hta‸ venˇbaˆ kʼaw‸ taˍ chehˇ ve yoˬ. 14Ngaˬ hui hkʼa peu-eˬ gʼa suh-e tuˬ ve yoˬ. Ngaˬ hui lehˬ, miˬ chaˇ hkʼoˆ sheˆ kʼai leh te geh kʼaw‸ shaw hpoˆ tuˬ te maˇ gʼa ve iˉ kaˆ hkʼa shuˍ hpeh‸ ve yoˬ. Gʼuiˬsha awˬ to htawˇ, suh taˍ peuˬ ve chaw hta‸ maˇ kʼaw‸ te‸ tu la piˇ. Ya‸ hkʼaˇ, jawˇmawˇ lehˬ, shu mvuhˇmiˬ hkʼaw chehˇ taˍ ve chaw teˇ gʼaˇ hta‸ a shu yawˇ ve mvuhˇmiˬ lo kʼaw‸ la hpeh‸ tuˬ awˬ hkʼaˇ gu piˇ hpeh‸ ve yoˬ. 15Jawˇmawˇ-oˬ, ngaˬ chi beu‸ nawˬ mehˆ gʼuˇ suhˍ lo laˬ leh tawˇ ca yaw la ve lehˬ, chaw yaˇ teˇ hpaˍ ngaˬ hta‸ nyiˉ te tcuh laˇ ve pa taw yoˬ. Chi hta‸ pa taw, ngaˬ nawˬ geh laˬ leh nawˬ hta‸ tawˇ ca yaw la ve yoˬ. Ngaˬ kʼoˆ ve hkʼe nawˬ te tuˬ ve hta‸ ka‸ ngaˬ dawˇ law jaˇ ve yoˬ. 16Nawˬ lehˬ ngaˬ ve tawˇ hta‸ na yuˬ leh, ngaˬ hui hta‸ chaw oˇ ve teˇ hpaˍ ve la‸ sheh hkʼaw pon laˇ tuˬ yoˬ, teh‸ ngaˬ dawˇ taˍ ve yoˬ. Awˬ lawn kʼo, yawˇ hui lehˬ ngaˬ leh ngaˬ yaˇ paˍ hta‸ tiˇ pehˍ leh, Gʼuiˬsha yawˇ ve chaw teˇ hpaˍ hta‸ piˇ taˍ ve mvuhˇmiˬ hkʼaw, ngaˬ hui hta‸ yuˬ baˬ tuˬ coˇ caˇ chehˇ ve yoˬ. 17Jawˇmawˇ-oˬ, nawˬ lehˬ Gʼuiˬsha ve mvuhˇ naw ma tcuh yaˇ hkʼa shuˍ hpeh‸ leh, teˇ ceuˬ le le hta‸ shiˍ ve pa taw, nawˬ ve ka ti‸ tawˇ hkawˇ oˇ ve teˇ hpaˍ ngaˬ hta‸ ponˬ laˇ tuˬ yoˬ, teh‸ ngaˬ dawˇ taˍ ve yoˬ. Nawˬ ve Gʼuiˬsha nawˬ geh chehˇ piˇ-oˆ, teh‸ jawˇmawˇ hta‸ kʼoˆ piˇ ve yoˬ.
18Oˇ htaˇ jawˇmawˇ lehˬ, Ngaˬ nawˬ hta‸ teˇ ceuˬ na nyi shaˍ. Ngaˬ hta‸ hteˇ lehˍ kʼaw‸ yaw hkʼaw‸ laˇ-oˆ, teh‸ yaˇ miˇ oˇ ve hta‸ kʼoˆ piˇ ve yoˬ.
Nawˬ na nyi gaˇ ve hkʼe na nyi laˇ-oˆ, teh‸ yaˇ miˇ yawˇ hta‸ kʼaw‸ yaw hkʼaw‸ piˇ ve yoˬ.
19Yaˍbaˆ nawˬ hta‸ chi hkʼe kʼoˆ tcuh laˇ ve laˇ, teh‸ yaˇ miˇ hta‸ na nyi ve yoˬ.
Yaˇ miˇ kʼaw‸ yaw hkʼaw‸ leh kʼoˆ ve, Jawˇmawˇ-oˬ, da‸ kehˬ ve awˬ ceuˬ hkʼa peu-eˬ hta‸ cuˇ leh ngaˬ hkanˍ ve yoˬ. Nawˬ na nyi ve hkawˇ hta‸ jaw kʼai tuˬ ve awˬ kaˍ awˬ nu ya‸ kʼaw maˇ cawˬ. Ngaˬ hkʼaˬ hkʼe gʼa kʼoˆ gʼa yaw tuˬ, nawˬ ve ma‸ poˍ lonˉ Yaˍbaˆ ngaˬ hta‸ awˬ hkʼaˇ beˆ maˍ laˇ ve yoˬ. 20Kanˉ chi hkʼa peu-eˬ hta‸ kʼaw‸ gu kʼaw‸ pa tuˬ, yawˇ chi hkʼe te taˍ ve yoˬ. Jawˇmawˇ nawˬ lehˬ, Gʼuiˬsha ve mvuhˇ naw tcuh yaˇ hkʼa shuˍ cuˇ yiˍ cawˬ leh, hpeh‸ la peuˬ ve awˬ ceuˬ hkʼa peu-eˬ hta‸ shiˍ chehˇ ve yoˬ, teh‸ jawˇmawˇ hta‸ kʼoˆ piˇ ve yoˬ.
21Oˇ ve hkʼaw‸ nawˉ jawˇmawˇ Yaˍbaˆ hta‸ kʼoˆ piˇ ve, Nawˬ te tcuh laˇ gaˇ ve hkʼe te tuˬ, ngaˬ dawˇ cheˆ taˍ peuˬ. Nawˬ kʼai leh Aˍbaˆsaˍlonˍ hta‸ choˬ kaˬ lo kʼaw‸ shiˍ hkʼaw‸ veu laˇ-oˆ, teh‸ yawˇ hta‸ kʼoˆ piˇ ve yoˬ.
22Oˇ htaˇ, Yaˍbaˆ Daˍviˆ gʼuˇ suhˍ lo boˆ taˍ leh kʼoˆ ve, Jawˇmawˇ-oˬ, Gʼuiˬsha nawˬ hta‸ awˬ bon na‸ laˇ piˇ-oˆ. Nawˬ lehˬ ngaˬ lawˬ ve hkʼe na yuˬ leh te laˇ ve pa taw, chi beu‸ nawˬ ngaˬ hta‸ nyi ma cawˇ peuˬ ve hta‸ ngaˬ gʼa shiˍ peuˬ, teh‸ yawˇ hta‸ kʼoˆ piˇ ve yoˬ. 23Oˇ ve hkʼaw‸ nawˉ, yawˇ Geˍsuˇraˆ mvuhˇmiˬ lo kʼai leh Aˍbaˆsaˍlonˍ hta‸ Yeˍruˆsaˍlehnˍ venˇ lo shiˍ kʼaw‸ la ve yoˬ. 24Ya‸ hkʼaˇ, jawˇmawˇ lehˬ Aˍbaˆsaˍlonˍ hta‸ hawˉ yehˬ hkʼaw chehˇ tuˬ a hkaw-anˬ maˇ piˇ. Ngaˬ yawˇ hta‸ maˇ mawˬ gaˇ, teh‸ jawˇmawˇ Daˍviˆ kʼoˆ ve yoˬ. Aˍbaˆsaˍlonˍ yawˇ ve yehˬ hkʼaw ceh chehˇ taˍ leh, jawˇmawˇ geh teˇ pawˆ ka‸ maˇ kʼai.
Aˍbaˆsaˍlonˍ leh Daˍviˆ kʼaw‸ cawˇ da‸ ve
25Iˉsaˍreˍlaˆ mvuhˇmiˬ hkʼaw lo Aˍbaˆsaˍlonˍ hkʼe taw awˬ hkiˇ awˬ naˬ da‸ ve chaw teˇ gʼaˇ ka‸ maˇ cawˬ. Yawˇ ve oˉ kʼoˍ hta‸ te leh hkui naw meuˇ lo hkʼa gaˬ, awˬ kuiˉ awˬ haiˇ teˇ maˬ ka‸ maˇ cawˬ. 26Yawˇ ve uˉ hkeh mvuh htawˇ da‸ jaˇ, nyi sha jaˇ ve yoˬ. Yawˇ ve uˉ hkeh mvuh zuhˬ leh chehˇ haˍ la ve teˇ yanˇ, uˉ hkeh mvuh hta‸ teˇ hkʼaw‸ teˇ pawˆ nuˆ baˬ ve yoˬ. Yawˇ uˉ hkeh mvuh teˇ pawˆ nuˆ baˬ ve nyiˇ cawehˬ hkʼe cawˬ ve yoˬ. 27Aˍbaˆsaˍlonˍ lehˬ, yaˇ paˍ shehˆ gʼaˇ leh Taˍmaˍ teh‸ kʼoˆ ve yaˇ miˇ teˇ gʼaˇ cawˬ ve yoˬ. Yawˇ ve yaˇ miˇ chi htawˇ, awˬ hkiˇ awˬ naˬ da‸ jaˇ ve yoˬ.
28Aˍbaˆsaˍlonˍ Yeˍruˆsaˍlehnˍ venˇ hkʼaw chehˇ taˍ ve nyiˇ hkʼaw‸ gaˬ peuˬ htawˇ, jawˇmawˇ hta‸ teˇ pawˆ ka‸ maˇ gʼa hpuˇ da‸ sheˍ. 29Hkʼe te leh, yawˇ Yaˍbaˆ hta‸ ca kuˬ tcuh leh, yawˇ awˬ tan jawˇmawˇ geh kʼai tcuh tuˬ dawˇ taˍ ve yoˬ. Ya‸ hkʼaˇ, Yaˍbaˆ maˇ laˬ. Yawˇ nyiˇ pawˆ teˇ pawˆ Yaˍbaˆ hta‸ ca kʼaw‸ kuˬ tcuh ve yoˬ. Ya‸ hkʼaˇ, Yaˍbaˆ maˇ laˬ. 30Oˇ htaˇ yawˇ lehˬ, Nyi loˬ. Yaˍbaˆ ve ti mi lehˬ, ngaˬ ve ti mi paˇ lo cawˬ leh, oˇ kaˬ lo caˬ ti taˍ ve yoˬ. Nawˬ hui kʼai leh yawˇ ve ti miˬ hta‸ ca tuˉ baˬ-o‸, teh‸ yawˇ ve awˬ ceˬ teˇ hpaˍ hta‸ kʼoˆ piˇ ve yoˬ. Hkʼe te leh, yawˇ hui tawˆ kʼai leh Yaˍbaˆ ve ti mi hta‸ ca tuˉ baˬ piˇ ve yoˬ.
31Oˇ htaˇ, Yaˍbaˆ Aˍbaˆsaˍlonˍ geh laˬ leh, Aˬ hto‸ ma pa taw nawˬ ve awˬ ceˬ teˇ hpaˍ ngaˬ ve ti mi hta‸ tuˉ baˬ ve le, teh‸ yawˇ hta‸ kʼoˆ piˇ ve yoˬ.
32Aˍbaˆ saˍlonˍ kʼaw‸ yaw hkʼaw‸ leh kʼoˆ ve, Aˬ hto‸ ma pa taw, ngaˬ Geˍsuˇraˆ mvuhˇmiˬ hkʼaw tawˆ la leh choˬ kaˬ lo gʼa ca chehˇ la ve le. Ngaˬ oˇ kaˬ lo ceh tiˉ gʼa chehˇ taˍ ve hkʼe kʼo, leuˉ leh da‸ jaˇ ve yoˬ, teh‸ jawˇmawˇ hta‸ ca kʼoˆ piˇ tcuh gaˇ ve pa taw, ngaˬ nawˬ hta‸ kuˬ ve yoˬ. Ngaˬ jawˇmawˇ hta‸ hpuˇ da‸ hpeh‸ tuˬ, ngaˬ nawˬ hta‸ awˬ hkʼaˇ gu laˇ piˇ lawˬ gaˇ ve yoˬ. Ngaˬ venˇbaˆ cawˬ ve kʼo, yawˇ ngaˬ hta‸ tiˇ pehˍ laˇ piˇ, teh‸ Yaˍbaˆ hta‸ kʼoˆ piˇ ve yoˬ.
33Hkʼe te leh, Yaˍbaˆ jawˇmawˇ geh kʼai leh awˬ lawn oˇ ve hkʼa peu-eˬ yawˇ hta‸ ca kʼoˆ piˇ ve yoˬ. Oˇ htaˇ, jawˇmawˇ Daˍviˆ Aˍbaˆsaˍlonˍ hta‸ kuˬ ve yoˬ. Aˍbaˆsaˍlonˍ kʼai leh, jawˇmawˇ mehˆ gʼuˇ suhˍ boˆ taˍ ve yoˬ. Jawˇmawˇ yawˇ hta‸ boˆ nu piˇ leh, ha lehˬ ha kʼa ha‸ yuˬ piˇ ve yoˬ.
Currently Selected:
2 Saˍmo-eˍlaˆ li‸ 14: LHBE
Highlight
Share
Copy
Want to have your highlights saved across all your devices? Sign up or sign in
Lahu Bible Edited © Thailand Bible Society and Bible Society of Myanmar, 2010, 2020.
