2 Saˍmo-eˍlaˆ li‸ 19
19
Yaˍbaˆ Daˍviˆ hta‸ deˇ piˇ ve
1Daˍviˆ lehˬ, yawˇ yaˇ paˍ Aˍbaˆsaˍlonˍ awˬ pon dawˇ haˍ leh hawˬ chehˇ ve awˬ lawn hta‸ Yaˍbaˆ gʼa kaˇ ve yoˬ. 2Daˍviˆ ve ma‸ yaˇ hkʼa peu-eˬ htawˇ Daˍviˆ chi hkʼe dawˇ haˍ chehˇ ve awˬ hkawˇ gʼa kaˇ ve teˇ yanˇ, ma‸ bawˆ gʼaˇ leh ha lehˬ ha kʼa te cawˇ ve awˬ tan, yawˇ hui hkʼa peu-eˬ htawˇ hpeh‸ bawˬ leh dawˇ haˍ jaˇ ve yoˬ. 3Hkʼe te leh, yawˇ hui lehˬ ma‸ bawˆ shonˇ ve pa taw ya‸ taw leh a shu yawˇ ve chehˇ kuiˬ lo hpaw kʼaw‸ la chehˇ ve ma‸ yaˇ teˇ hpaˍ hkʼa shuˍ, venˇ hkʼaw lo ta‸ iˉ gawˬ lehˍ kʼaw‸ la ve yoˬ. 4Jawˇmawˇ lehˬ yawˇ ve mehˆ hpfuhˇ hta‸ beh taˍ leh, Ngaˬ yaˇ paˍ-oˬ, ngaˬ yaˇ paˍ Aˍbaˆsaˍlonˍ-oˬ, teh‸ gʼaˇ hte‸ kuˬ hawˬ chehˇ ve yoˬ.
5Yaˍbaˆ jawˇmawˇ ve yehˬ lo kʼai leh yawˇ hta‸ kʼoˆ piˇ ve, Ya‸ nyi nawˬ lehˬ, nawˬ awˬ to leh nawˬ ve miˇ yaˇ teˇ hpaˍ ve a sha‸ hta‸ ponˬ laˇ ve nawˬ ve ma‸ yaˇ teˇ hpaˍ hta‸ nyi ma luˬ tuˬ te piˇ ve yoˬ. 6Nawˬ hta‸ ha‸ ve chaw teˇ hpaˍ hta‸ nawˬ tawˍ taˍ leh, nawˬ hta‸ canˇ ve chaw teˇ hpaˍ hta‸ nawˬ awˬ gʼaˇ piˇ chehˇ ve yoˬ. Nawˬ te ve kanˉ chi lehˬ, nawˬ ve ma‸ poˍ ma‸ yaˇ teˇ hpaˍ hta‸ te‸ chiˉ tcuhˉ kuiˬ maˇ cawˬ ve chaw hkʼe hpeh‸ piˇ lawˬ ve yoˬ. Ya‸ nyi ngaˬ hui hkʼa peu-eˬ suh-e leh, Aˍbaˆsaˍlonˍ te‸ chehˇ sheˍ ve hkʼe kʼo, nawˬ leuˉ leh ha lehˬ jaˇ tuˬ ve hta‸ ngaˬ dawˇ mawˬ ve yoˬ. 7Chi beu‸ kʼai leh nawˬ ve ma‸ yaˇ teˇ hpaˍ hta‸ awˬ gʼaˇ ca piˇ-oˆ. Nawˬ oˇ hkʼe maˇ te ve kʼo, shawˉ pawˍ mvuhˇ htiˇ la ve teˇ yanˇ, yawˇ hui teˇ gʼaˇ ka‸ nawˬ geh lo chehˇ taˍ tuˬ ve maˇ heˆ, teh‸ Gʼuiˬsha ve awˬ meh hta‸ cuˇ leh ngaˬ hkanˍ ve yoˬ. Chi lehˬ, nawˬ a sha‸ te‸ chehˇ teˇ co-e nawˬ gʼa hpuˇ gʼa hkanˍ jaw ve awˬ ceuˬ a‸ kehˉ hkanˍ haˍ jaˇ ve awˬ ceuˬ hpeh‸ tuˬ yoˬ, teh‸ jawˇmawˇ hta‸ kʼoˆ piˇ ve yoˬ. 8Hkʼe te leh jawˇmawˇ tu la leh, venˇ taˍ meu‸ hpe‸ paˇ lo ca kʼaw‸ mui taˍ ve yoˬ. Yawˇ oˇ kaˬ lo mui chehˇ ve hta‸ yawˇ ve ma‸ yaˇ teˇ hpaˍ gʼa shiˍ ve teˇ yanˇ, yawˇ hui yawˇ geh hpawnˬ laˬ ve yoˬ.
Daˍviˆ Yeˍruˆsaˍlehnˍ venˇ lo kʼaw‸ kʼo‸-e ve
9Awˬ yanˇ oˇ ve awˬ hkʼaw lo, Iˉsaˍreˍlaˆ chaw hkʼa peu-eˬ a shu yawˇ ve chehˇ kuiˬ lo hpaw kʼo‸-e peuˬ ve yoˬ. Iˉsaˍreˍlaˆ mvuhˇmiˬ hkʼaˬ ti chi ti lo, Iˉsaˍreˍlaˆ chaw teˇ hpaˍ teˇ gʼaˇ hta‸ teˇ gʼaˇ deˇ da‸ leh kʼoˆ ve, Jawˇmawˇ Daˍviˆ lehˬ canˇ paˍ teˇ hpaˍ ve la‸ sheh hkʼaw lo ngaˬ hui hta‸ ponˬ laˇ taˍ ve yoˬ. Yawˇ lehˬ, ngaˬ hui hta‸ Hpiˇliˇtiˆ chaw hui ve la‸ sheh hkʼaw ponˬ laˇ ve yoˬ. Ya‸ hkʼaˇ, yawˇ chi beu‸ Aˍbaˆsaˍlonˍ hta‸ kawˆ leh mvuhˇmiˬ hkʼaw hpaw tawˆ kʼai taˍ ve yoˬ. 10Ngaˬ hui lehˬ, Aˍbaˆsaˍlonˍ hta‸ naˍ manˇ pfuhˍ piˇ leh ngaˬ hui ve jawˇmawˇ te tcuh taˍ ve yoˬ. Ya‸ hkʼaˇ, chi beu‸ yawˇ ma‸ bawˆ kuiˬ lo suh kʼai peuˬ. Chi beu‸ ngaˬ hui jawˇmawˇ Daˍviˆ hta‸ ca kʼaw‸ shiˍ hkʼaw‸ cawˇ ve maˇ heˆ laˇ, teh‸ kʼoˆ ve yoˬ.
11Iˉsaˍreˍlaˆ chaw teˇ hpaˍ oˇ hkʼe kʼoˆ da‸ chehˇ ve awˬ hkawˇ hta‸ jawˇmawˇ Daˍviˆ gʼa kaˇ ve yoˬ. Hkʼe te leh, yawˇ paw hkuˇ Zaˍdoˆ leh Aˍbyaˍtaˍ hui hta‸ Yuˇda‸ chaw hui ve awˬ hoˉ awˬ naˬ teˇ hpaˍ geh kʼai tcuh leh, yawˇ hui hta‸ chi hkʼe ca kʼoˆ piˇ tcuh ve yoˬ. Aˬ hto‸ ma pa taw, nawˬ hui lehˬ jawˇmawˇ hta‸ yawˇ ve hawˉ yehˬ lo kʼaw‸ shiˍ kʼo‸-e piˇ tuˬ te‸ chiˉ awˬ hkʼaˇ maˇ gu leh maˇ dawˇ maˇ gaˇ te chehˇ ve le. 12Nawˬ hui lehˬ, ngaˬ ve awˬ suhˍ awˬ shaˍ kʼaw da‸ taˍ ve ngaˬ ve awˬ ceuˬ awˬ hkʼaˇ teˇ hpaˍ hpeh‸ ve yoˬ. Aˬ hto‸ ma pa taw, nawˬ hui ngaˬ hta‸ ca shiˍ hkʼaw‸ la tuˬ te‸ chiˉ awˬ hkʼaˇ maˇ gu leh maˇ dawˇ maˇ gaˇ te chehˇ sheˍ ve le, teh‸ yawˇ hui hta‸ ca kʼoˆ piˇ tcuh ve yoˬ. 13Daˍviˆ lehˬ, Aˍmaˍsaˍ hta‸ htawˇ chi hkʼe ca kʼoˆ piˇ tcuh ve yoˬ. Nawˬ lehˬ, ngaˬ ve awˬ ceuˬ awˬ hkʼaˇ hpeh‸ ve yoˬ. Ya‸ nyi hta‸ tanˬ leh, ngaˬ nawˬ hta‸ Yaˍbaˆ awˬ tan ngaˬ ve ma‸ poˍ lonˉ te tcuh laˇ tuˬ yoˬ. Ngaˬ oˇ hkʼe maˇ te laˇ ve kʼo, Gʼuiˬsha ngaˬ hta‸ tiˇ pehˍ laˇ piˇ-oˆ, teh‸ ca kʼoˆ piˇ tcuh ve yoˬ. 14Daˍviˆ kʼoˆ feu piˇ ve tawˇ chi teˇ hpaˍ hta‸ Yuˇda‸ chaw hkʼa peu-eˬ nyi ma cawˇ leh ha‸ yuˬ ve yoˬ. Hkʼe te leh, Daˍviˆ lehˬ yawˇ ve ma‸ yaˇ hkʼa peu-eˬ hta‸ kʼaw‸ shiˍ kʼaw‸ la tuˬ, yawˇ hui Daˍviˆ geh tawˇ kʼaw‸ shanˍ feu piˇ ve yoˬ.
15Jawˇmawˇ lehˬ, Yeˍruˆsaˍlehnˍ venˇ lo kʼaw‸ la chehˇ ve teˇ yanˇ, Yuˇda‸ mvuhˇmiˬ hkʼaw chehˇ ve chaw teˇ hpaˍ hpaˍ yawˇ hta‸ Yawˇdanˍ iˉ kaˆ lawˬ hta‸ shiˍ hkanˍ piˇ tuˬ awˬ pon, Giˇlaˍgaˍ venˇ lo gaˬ la ve yoˬ. 16Oˇ htaˇ, Baˍhuˆrenˍ venˇ hkʼaw chehˇ ve Beˍyaˍmenˍ awˬ ceuˬ awˬ hkʼaˇ Geˍraˆ ve yaˇ paˍ Sheˍmiˆ jawˇmawˇ hta‸ hpuˇ da‸ tuˬ, Yawˇdanˍ iˉ kaˆ lawˬ lo gʼuiˇ ya‸ la ve yoˬ. 17Yawˇ lehˬ, Beˍyaˍmenˍ awˬ ceuˬ awˬ hkʼaˇ teˇ hinˉ gʼaˇ hta‸ shiˍ laˬ ve yoˬ. Sawˉlu‸ ve yehˬ yaˇ kʼa yaˇ teˇ hpaˍ ve awˬ ceˬ te chehˇ ve Ziˇbaˍ htawˇ, yawˇ ve yaˇ paˍ 15 gʼaˇ leh awˬ ceˬ paˍ nyiˇ chi gʼaˇ hta‸ shiˍ veu laˇ leh, Yawˇdanˍ iˉ kaˆ lawˬ lo jawˇmawˇ geh gaˬ la ve yoˬ. 18Yawˇ hui lehˬ, jawˇmawˇ leh yawˇ ve chaw teˇ hpaˍ hta‸ iˉ kaˆ shiˍ hkanˍ piˇ leh, jawˇmawˇ hkʼa loˍ ve awˬ ceuˬ hkʼa peu-eˬ hta‸ te piˇ ga piˇ ve yoˬ.
Jawˇmawˇ iˉ kaˆ lawˬ hta‸ hkanˍ-a teh‸ te chehˇ ve teˇ yanˇ, Sheˍmiˆ jawˇmawˇ gʼuˇ suhˍ lo boˆ taˍ leh kʼoˆ ve, 19Jawˇmawˇ-oˬ, nawˬ Yeˍruˆsaˍlehnˍ venˇ hkʼaw tawˆ kʼai chehˇ ve teˇ yanˇ, ngaˬ nawˬ hta‸ te ya‸ ve venˇbaˆ oˇ ve teˇ hpaˍ hta‸ a ciˉ hpehˇ laˇ-oˆ. 20Ngaˬ te ya‸ jaˇ peuˬ ve hta‸ ngaˬ shiˍ ve yoˬ. Chi hta‸ pa taw, awˬ na hpawˇ lo chehˇ ve Iˉsaˍreˍlaˆ chaw ceuˬ teˇ hpaˍ awˬ hkʼaw lo, ngaˬ lehˬ shu a‸ kehˉ awˉ lawˉ peuˇ nawˬ hta‸ ca ha‸ yuˬ la ve yoˬ, teh‸ yawˇ hta‸ kʼoˆ piˇ ve yoˬ.
21Oˇ htaˇ Zeˍruˇyaˍ ve yaˇ Aˍbiˆshehˇ lehˬ, Sheˍmiˆ hta‸ tiˇ pehˍ cawˇ ve yoˬ. Awˬ lawn kʼo, yawˇ lehˬ Gʼuiˬsha leuˆ yuˬ taˍ ve jawˇmawˇ hta‸ hkeu piˇ ve pa taw yoˬ, teh‸ kʼoˆ ve yoˬ.
22Ya‸ hkʼaˇ Daˍviˆ lehˬ, A shu teˇ gʼaˇ nawˬ huiˉ maˬ geh dawˇ hkʼaˇ lawˬ ve le. Nawˬ huiˉ maˬ ngaˬ hta‸ te sho‸ sha‸ laˇ gaˇ ve laˇ. Chi beu‸ ngaˬ lehˬ, Iˉsaˍ reˍ laˆ ve jawˇmawˇ hpeh‸ ve yoˬ. Ya‸ nyi Iˉsaˍreˍlaˆ chaw teˇ gʼaˇ hta‸ ka‸ maˇ gʼa tiˇ pehˍ, teh‸ Aˍbiˆshehˇ leh yawˇ ve awˬ viˉ paˍ Yaˍbaˆ hta‸ kʼoˆ piˇ ve yoˬ. 23Peuˬ hkʼaw‸ nawˉ yawˇ lehˬ, Nawˬ gʼa suh tuˬ ve maˇ heˆ, teh‸ Sheˍmiˆ hta‸ kʼoˆ piˇ ve yoˬ.
24Oˇ ve hkʼaw‸ nawˉ, Sawˉlu‸ ve awˬ hawehˍ Meˍfiˆboˍshehˆ jawˇmawˇ geh laˬ ve yoˬ. Yawˇ lehˬ, jawˇmawˇ Yeˍruˆsaˍlehnˍ venˇ hkʼaw tawˆ kʼai ve teˇ nyi hta‸ te leh, yawˇ kʼaw‸ la htaˇ hkʼa gaˬ, yawˇ ve hkui sheh maˇ tsuhˇ, paˇ tcuhˆ maˇ chiˇ leh, yawˇ ve veu‸ kʼaˇ hta‸ htawˇ maˇ kʼehˆ tsuhˇ ve yoˬ. 25Meˍfiˆboˍshehˆ Yeˍruˆsaˍlehnˍ venˇ hkʼaw tu leh jawˇmawˇ geh gaˬ la ve teˇ yanˇ Daˍviˆ kʼoˆ ve, Meˍfiˆboˍshehˆ-oˬ, aˬ hto‸ ma pa taw ngaˬ hkʼaˇ suh maˇ laˬ ve le, teh‸ yawˇ hta‸ na nyi piˇ ve yoˬ.
26Yawˇ kʼaw‸ yaw hkʼaw‸ leh kʼoˆ ve, Jawˇmawˇ-oˬ, nawˬ shiˍ taˍ ve hkʼe ngaˬ lehˬ hkui kʼaw‸ paˍ hpeh‸ ve yoˬ. Nawˬ hkʼaˇ suh gʼa‸ laˬ tuˬ, ngaˬ ve awˬ ceˬ paˍ hta‸ piˉ laˬ awˬ an tcuhˉ tcuh ve htawˇ yawˇ maˇ te law. 27Ngaˬ ve awˬ lawn maˇ heˆ heˆ ve teˇ hpaˍ yawˇ nawˬ hta‸ ca kʼoˆ piˇ ve law. Ya‸ hkʼaˇ, nawˬ lehˬ Gʼuiˬsha ve mvuhˇ naw tcuh yaˇ hkʼa shuˍ hpeh‸ ve pa taw, nawˬ te gaˇ ve hkʼe ngaˬ hta‸ te laˇ-oˆ. 28Ngaˬ pa ve yehˬ yaˇ kʼa yaˇ hkʼa peu-eˬ ve lehˬ, nawˬ tiˇ pehˍ ve hta‸ hkanˍ keunˍ ve chaw teˇ hpaˍ hpeh‸ ve yoˬ. Ya‸ hkʼaˇ, nawˬ lehˬ ngaˬ hta‸ hkʼaˬ htaˆ ka‸ nawˬ geh mui caˇ tcuh laˇ taˍ ve yoˬ. Ngaˬ nawˬ geh kʼaw‸ lawˬ htehˍ tuˬ ve awˬ kaˍ awˬ nu awˬ lawn te‸ chiˉ maˇ cawˬ, teh‸ jawˇmawˇ hta‸ kʼoˆ piˇ ve yoˬ.
29Oˇ htaˇ, jawˇmawˇ lehˬ, Nawˬ te‸ chiˉ kʼaw‸ caˉ kʼoˆ tuˬ maˇ loˍ. Ziˇbaˍ nawˬ huiˉ maˬ Sawˉlu‸ ve mawˇ hta‸ hkʼa ma-ehˬ pehˬ yuˬ tuˬ ngaˬ dawˇ cheˆ taˍ peuˬ, teh‸ yawˇ hta‸ kʼoˆ piˇ ve yoˬ.
30Sawˉlu‸ ve mawˇ hkʼa peu-eˬ yawˇ heuˆ piˇ-oˆ. Nawˬ ha lehˬ ha kʼa kʼaw‸ gaˬ la ve lehˬ, ngaˬ awˬ pon da‸ jaˇ taˍ peuˬ, teh‸ Meˍfiˆboˍshehˆ yawˇ hta‸ kʼaw‸ kʼoˆ piˇ ve yoˬ.
31Giˇlaˆ mvuhˇmiˬ Yawˇbeˍlenˍ venˇ hkʼaw chehˇ ve Baˍziˆlehˇ htawˇ, jawˇmawˇ hta‸ iˉ kaˆ shiˍ hkanˍ piˇ tuˬ, Yawˇdanˍ iˉ kaˆ lawˬ lo gaˬ la ve yoˬ. 32Baˍziˆlehˇ lehˬ a sha‸ 80 hkʼaw‸ gaˬ peuˬ leh mawˇ jaˇ peuˬ ve yoˬ. Yawˇ lehˬ, paw sha jaˇ ve chaw hpeh‸ leh, jawˇmawˇ Maˍhaˍnenˍ venˇ hkʼaw chehˇ taˍ htaˇ, yawˇ hta‸ caˇ tuˬ dawˬ tuˬ teˇ hpaˍ hkʼa deh‸ ga piˇ chehˇ ve yoˬ. 33Oˇ htaˇ jawˇmawˇ lehˬ, Nawˬ ngaˬ geh Yeˍruˆsaˍlehnˍ venˇ lo laˬ-o‸. Ngaˬ nawˬ hta‸ nyi ha‸ shaˉ laˇ tuˬ yoˬ, teh‸ yawˇ hta‸ kʼoˆ piˇ ve yoˬ.
34Ya‸ hkʼaˇ, Baˍziˆlehˇ kʼaw‸ yaw hkʼaw‸ leh kʼoˆ ve, Jawˇmawˇ-oˬ, ngaˬ maw maw gʼa te‸ chehˇ tuˬ ve maˇ heˆ. Aˬ hto‸ ma pa taw, ngaˬ nawˬ geh Yeˍruˆsaˍlehnˍ venˇ lo gʼa kʼai tuˬ ve le. 35Chi beu‸ ngaˬ lehˬ 80 hkʼaw‸ gaˬ peuˬ. Aˬ hto‸ ma teˇ ceuˬ hta‸ maˇ kʼoˆ, ngaˬ sheˉ lai ve nyi ma maˇ cawˬ-o. Caˇ tuˬ dawˬ tuˬ hkʼaˬ ve teˇ ceuˬ hta‸ maˇ kʼoˆ, ngaˬ caˇ leh mehˬ hkawˇ maˇ shiˍ-o. Shu kʼa muiˬ chehˇ ve awˬ hkawˇ hta‸ htawˇ ngaˬ maˇ kaˇ puiˉ-o. Ngaˬ nawˬ geh kʼai ve ka‸, nawˬ hta‸ ca te tu‸ laˇ ve hkʼe hpeh‸ tuˬ yoˬ. 36Ngaˬ lehˬ, chi taw taw uiˍ ve awˬ bon hta‸ ha‸ yuˬ maˇ keunˍ. Chi hta‸ pa taw, ngaˬ nawˬ hkʼaˇ suh teˇ tawn ceh ga gʼa‸ kʼai laˇ tuˬ yoˬ. 37Ngaˬ hta‸ aˉ hkʼaw lo kʼaw‸ kʼo‸-e tcuh laˇ leh, oˇ kaˬ ngaˬ pa ngaˬ e ve tuˍ hpfuh paˇ lo ngaˬ hta‸ suh-e tcuh laˇ-oˆ. Choˬ kaˬ lo ngaˬ ve awˬ ceˬ paˍ Hkiˇmaˍhanˍ chehˇ taˍ ve yoˬ. Jawˇmawˇ-oˬ, nawˬ yawˇ hta‸ shiˍ kʼai leh, yawˇ hta‸ te piˇ gaˇ ve hkʼe te piˇ-oˆ, teh‸ jawˇmawˇ hta‸ kʼoˆ piˇ ve yoˬ.
38Oˇ htaˇ jawˇmawˇ lehˬ, Ngaˬ yawˇ hta‸ shiˍ kʼai leh, nawˬ heuˆ gaˇ ve hkʼe ngaˬ yawˇ hta‸ te piˇ tuˬ yoˬ. Nawˬ hkʼa lawˬ ve awˬ ceuˬ teˇ ceuˬ le le ve hta‸ ngaˬ te laˇ tuˬ yoˬ, teh‸ yawˇ hta‸ kʼaw‸ kʼoˆ piˇ ve yoˬ. 39Oˇ ve hkʼaw‸ nawˉ, Daˍviˆ leh yawˇ ve chaw hkʼa peu-eˬ Yawˇdanˍ iˉ kaˆ lawˬ coˇ paˉ lo hkanˍ tawˆ-e ve yoˬ. Yawˇ Baˍziˆlehˇ hta‸ boˆ nu piˇ leh, yawˇ hta‸bon na‸ piˇ ve yoˬ. Peuˬ hkʼaw‸ nawˉ, Baˍziˆlehˇ yawˇ ve yehˬ lo kʼaw‸ kʼo‸-e ve yoˬ.
Yuˇda‸ chaw leh Iˉsaˍreˍlaˆ chaw hui jawˇmawˇ awˬ lawn tawˇ gʼawˬ da‸ ve
40Yuˇda‸ chaw hkʼa peu-eˬ leh Iˉsaˍreˍlaˆ chaw teˇ hkoˇ lehˬ, jawˇmawˇ hta‸ iˉ kaˆ shiˍ hkanˍ piˇ peuˬ hkʼaw‸ nawˉ, jawˇmawˇ lehˬ Giˇlaˍgaˍ venˇ lo kʼai ve yoˬ. 41Oˇ htaˇ, Iˉsaˍreˍlaˆ chaw hkʼa peu-eˬ jawˇmawˇ geh laˬ leh, Jawˇmawˇ-oˬ, aˬ hto‸ ma pa taw ngaˬ hui ve awˬ viˉ awˬ nyi Yuˇda‸ chaw teˇ hpaˍ nawˬ awˬ to, nawˬ ve miˇ yaˇ leh nawˬ ve chaw teˇ hpaˍ hta‸ iˉ kaˆ shiˍ hkanˍ laˇ ve le, teh‸ yawˇ hta‸ kʼoˆ piˇ ve yoˬ.
42Oˇ htaˇ, Yuˇda‸ chaw teˇ hpaˍ kʼaw‸ yaw hkʼaw‸ leh kʼoˆ ve, Jawˇmawˇ lehˬ, ngaˬ hui ve awˬ ceuˬ awˬ hkʼaˇ cawˇ ve pa taw, ngaˬ hui chi hkʼe te ve yoˬ. Ngaˬ hui chi hkʼe te ve hta‸ aˬ hto‸ ma pa taw nawˬ hui nyi ma zuhˆ ve le. Ngaˬ hui yawˇ hta‸ caˍ piˇ taw piˇ ve caˇ tuˬ teˇ hpaˍ awˬ pon, yawˇ ngaˬ hui hta‸ awˬ hpfuhˇ kʼaw‸ shaiˍ laˇ leh laˇ. Maˇ heˆ kʼo, yawˇ ngaˬ hui hta‸ teˇ ceuˬ ceuˬ pe‸ laˇ leh laˇ, teh‸ kʼoˆ ve yoˬ.
43Oˇ htaˇ, Iˉsaˍreˍlaˆ chaw teˇ hpaˍ kʼaw‸ kʼoˆ ve, Jawˇmawˇ Daˍviˆ lehˬ, nawˬ hui ve awˬ ceuˬ awˬ hkʼaˇ hpeh‸ ve yoˬ teh‸ kʼoˆ ve htawˇ, jawˇmawˇ Daˍviˆ hta‸ caˉ da‸ leh nawˬ hui kʼoˆ ve hkʼe gʼa‸ shawˍ gʼa‸ kʼoˆ ve kʼo, nawˬ hui a‸ kehˉ ngaˬ hui teˇ chi pun kʼoˆ tuˬ cawˬ ve yoˬ. Aˬ hto‸ ma pa taw, nawˬ hui teˇ hpaˍ ngaˬ hui hta‸ taˍ nehˬ laˇ ve le. Awˬ tehˬ awˬ na kʼoˆ ve kʼo, jawˇmawˇ hta‸ ca shiˍ hkʼaw‸ tuˬ awˉ lawˉ tanˬ jehˬ da‸ ve lehˬ, ngaˬ hui teˇ hpaˍ yoˬ, teh‸ yawˇ hui hta‸ kʼoˆ piˇ ve yoˬ.
Ya‸ hkʼaˇ, Iˉsaˍreˍlaˆ chaw hui kʼoˆ ve tawˇ a‸ kehˉ Yuˇda‸ chaw hui kʼoˆ ve tawˇ lehˬ, leuˉ leh hehnˇ jaˇ ve yoˬ.
Currently Selected:
2 Saˍmo-eˍlaˆ li‸ 19: LHBE
Highlight
Share
Copy
Want to have your highlights saved across all your devices? Sign up or sign in
Lahu Bible Edited © Thailand Bible Society and Bible Society of Myanmar, 2010, 2020.