1 Saˍmo-eˍlaˆ li‸ 3
3
Gʼuiˬsha Saˍmo-eˍlaˆ geh laˬ ve
1Yaˇ paˍ Saˍmo-eˍlaˆ lehˬ, paw hkuˇ Eˇliˆ awˬ hawˉ chehˇ leh, Gʼuiˬsha ve kanˉ te chehˇ taˍ ve yoˬ. Awˬ yanˇ oˇ ve hkʼaw chaw yaˇ teˇ hpaˍ lehˬ, Gʼuiˬsha ve tawˇ hta‸ teˇ hkui teˇ hkui maˇ gʼa kaˇ. Awˬ ha hkʼaw lo htawˇ maˇ gʼa mawˬ. 2Teˇ haˉ htaˇ, Eˇliˆ yawˇ ve bawehˇ hkʼaw zuh‸ chehˇ taˍ ve yoˬ. Yawˇ lehˬ mawˇ jaˇ peuˬ leh, mehˆ ka‸ hkʼa deh‸ maˇ mawˬ-o. 3Saˍmo-eˍlaˆ lehˬ, Gʼuiˬsha ve ka ti‸ shaˉ caˆ ta kʼoˍ teh taˍ kuiˬ bon yehˬ hkʼaw zuh‸ chehˇ ve yoˬ. Oˇ kaˬ lo tuˉ taˍ ve kawˆ faiˇ htawˇ awˬ gʼeuˆ ba chehˇ sheˍ ve yoˬ. 4Oˇ htaˇ, Gʼuiˬsha Saˍmo-eˍlaˆ hta‸ kuˬ ve yoˬ. Saˍmo-eˍlaˆ lehˬ, Ngaˬ chehˇ taˍ ve yoˬ, teh‸ kʼaw‸ yaw hkʼaw‸ piˇ leh, 5Eˇliˆ geh gʼuiˇ kʼai ve yoˬ. Nawˬ ngaˬ hta‸ kuˬ ve pa taw ngaˬ laˬ ve yoˬ, teh‸ yawˇ Eˇliˆ hta‸ kʼoˆ piˇ ve yoˬ.
Oˇ htaˇ Eˇliˆ lehˬ, Ngaˬ nawˬ hta‸ maˇ kuˬ. Ca kʼaw‸ zuh‸ taˍ-o‸, teh‸ yawˇ hta‸ kʼoˆ piˇ ve yoˬ. Hkʼe te leh, Saˍmo-eˍlaˆ kʼo‸-e leh ca kʼaw‸ zuh‸ taˍ ve yoˬ.
6Gʼuiˬsha Saˍmo-eˍlaˆ hta‸ teˇ pawˆ kʼaw‸ kuˬ ve yoˬ. Gʼuiˬsha yawˇ hta‸ tawˇ teˇ pawˆ ka‸ maˇ yaw piˇ jaw ve pa taw, Gʼuiˬsha kuˬ chehˇ ve teh‸ yawˇ maˇ shiˍ. 7Hkʼe te leh, yawˇ tu leh Eˇliˆ geh kʼaw‸ kʼai leh, Nawˬ ngaˬ hta‸ kuˬ ve pa taw ngaˬ laˬ ve yoˬ, teh‸ kʼoˆ piˇ ve yoˬ.
Oˇ htaˇ Eˇliˆ lehˬ, Ngaˬ yaˇ paˍ-oˬ, ngaˬ nawˬ hta‸ maˇ kuˬ. Ca kʼaw‸ zuh‸ taˍ-o‸, teh‸ yawˇ hta‸ kʼoˆ piˇ ve yoˬ.
8Gʼuiˬsha Saˍmo-eˍlaˆ hta‸ shehˆ pawˆ teˇ pawˆ kʼaw‸ kuˬ ve yoˬ. Yawˇ tu leh Eˇliˆ geh kʼaw‸ kʼai ve yoˬ. Nawˬ ngaˬ hta‸ kuˬ ve pa taw ngaˬ laˬ ve yoˬ, teh‸ Eˇliˆ hta‸ kʼoˆ piˇ ve yoˬ.
Oˇ htaˇ, Eˇliˆ lehˬ yaˇ paˍ chi hta‸ Gʼuiˬsha kuˬ chehˇ ve hta‸ yawˇ dawˇ shiˍ la ve yoˬ. 9Hkʼe te leh yawˇ yaˇ paˍ hta‸ kʼo piˇ ve, Kʼo‸-e leh ca kʼaw‸ zuh‸ taˍ-o‸. Yawˇ nawˬ hta‸ teˇ pawˆ kʼaw‸ kuˬ ve kʼo, Jawˇmawˇ-oˬ, tawˇ yaw laˇ-oˆ. Nawˬ ve awˬ ceˬ paˍ na chehˇ ve yoˬ, teh‸ kʼaw‸ yaw hkʼaw‸ piˇ-oˆ, teh‸ yawˇ hta‸ kʼoˆ piˇ ve yoˬ. Hkʼe te leh, Saˍmo-eˍlaˆ ca kʼaw‸ zuh‸ taˍ ve yoˬ.
10Gʼuiˬsha laˬ leh oˇ kaˬ lo huˉ taˍ ve yoˬ. Ponˬ laˬ htaˇ hkʼa shuˍ yawˇ lehˬ, Saˍmo-eˍlaˆ-oˬ, Saˍmo-eˍlaˆ-oˬ, teh‸ kuˬ ve yoˬ.
Oˇ htaˇ Saˍmo-eˍlaˆ lehˬ, Tawˇ yaw laˇ-oˆ. Nawˬ ve awˬ ceˬ paˍ na chehˇ ve yoˬ, teh‸ kʼaw‸ yaw hkʼaw‸ piˇ ve yoˬ.
11Gʼuiˬsha yawˇ hta‸ kʼoˆ piˇ ve, Iˉsaˍreˍlaˆ chaw hui hta‸ ngaˬ kawˆ tuˬ uiˍ jaˇ ve kanˉ teˇ ceuˬ te maˍ piˇ tuˬ yoˬ. Awˬ lawn oˇ ve hta‸ hkʼa gʼa kaˇ ve chaw hkʼa peu-eˬ kawˆ jaˇ tuˬ yoˬ. 12Awˬ nyi oˇ ve teˇ nyi hkʼaw, ngaˬ ve nyi ma zuhˆ ve awˬ ceuˬ Eˇliˆ ve yehˬ kʼa awˬ hkʼoˆ lo teˇ ceuˬ peuˬ teˇ ceuˬ gaˬ la tuˬ yoˬ. 13Awˬ lawn kʼo, yawˇ ve yaˇ teˇ hpaˍ ngaˬ hta‸ maˇ shawˍ maˇ caˆ kʼoˆ ve pa taw, yawˇ ve yehˬ kʼa hta‸ ciˍ yanˍ piˇ tuˬ ngaˬ yawˇ hta‸ kʼoˆ piˇ taˍ peuˬ. Eˇliˆ lehˬ, yawˇ ve yaˇ teˇ hpaˍ haiˬ ve kanˉ te chehˇ ve hta‸ shiˍ taˍ ve htawˇ, yawˇ hui hta‸ maˇ tawˍ taˍ. 14Chi hta‸ pa taw, Eˇliˆ ve yehˬ yaˇ kʼa yaˇ teˇ hpaˍ ngaˬ hta‸ hkʼaˬ ma tuˉ tanˇ laˇ ve htawˇ, kawˆ tuˬ uiˍ jaˇ ve venˇbaˆ chi hta‸ yawˇ hui gʼa ponˬ tuˬ ve maˇ heˆ, teh‸ kʼoˆ ve yoˬ.
15Saˍmo-eˍlaˆ lehˬ, mvuhˇ htiˇ la htaˇ hkʼa gaˬ zuh‸ taˍ ve yoˬ. Oˇ ve hkʼaw‸ nawˉ yawˇ tu leh, bon yehˬ ve yehˬ miˉ teˇ hpaˍ hta‸ hpaw ve yoˬ. Yawˇ gʼa shiˍ gʼa kaˇ taˍ ve awˬ lawn oˇ ve teˇ hpaˍ Eˇliˆ hta‸ yawˇ hto piˇ maˇ haˆ. 16Oˇ htaˇ Eˇliˆ lehˬ, Ngaˬ yaˇ paˍ Saˍmo-eˍlaˆ-oˬ, teh‸ kuˬ ve yoˬ.
Saˍmo-eˍlaˆ htawˇ, Ngaˬ chehˇ taˍ ve yoˬ, teh‸ kʼaw‸ yaw hkʼaw‸ piˇ ve yoˬ.
17Gʼuiˬsha nawˬ hta‸ aˬ hto‸ ma kʼoˆ laˇ ve le. Ngaˬ mehˆ gʼuˇ suhˍ teˇ ceuˬ ka‸ taˇ faˉ taˍ. Yawˇ hkʼa kʼoˆ laˇ ve tawˇ hkʼa peu-eˬ nawˬ ngaˬ hta‸ maˇ hto laˇ ve kʼo, Gʼuiˬsha nawˬ hta‸ hehnˇ chaweh ciˍ yanˍ laˇ tuˬ yoˬ, teh‸ yawˇ hta‸ kʼoˆ piˇ ve yoˬ. 18Hkʼe te leh, Saˍmo-eˍlaˆ lehˬ teˇ ceuˬ ka‸ maˇ faˉ taˍ leh yawˇ hta‸ hkʼa peu-eˬ hto maˍ piˇ ve yoˬ. Oˇ htaˇ Eˇliˆ lehˬ, Yawˇ Gʼuiˬsha hpeh‸ ve yoˬ. Yawˇ a loˍ cawˇ ve hkʼe yawˇ te tuˬ yoˬ, teh‸ kʼoˆ ve yoˬ.
19Saˍmo-eˍlaˆ lehˬ uiˍ la chehˇ ve yoˬ. Gʼuiˬsha yawˇ geh chehˇ taˍ leh, yawˇ hkʼa kʼoˆ ve teˇ hpaˍ biˇ la chehˇ ve yoˬ. 20Chi hta‸ pa taw, mvuhˇmiˬ teˇ peˆ le le hkʼaw chehˇ taˍ ve Iˉsaˍreˍlaˆ chaw teˇ hpaˍ, Saˍmo-eˍlaˆ lehˬ awˬ tehˬ awˬ na Gʼuiˬsha ve paw hkuˇ hpeh‸ ve hta‸ shiˍ la ve yoˬ. 21Gʼuiˬsha lehˬ, Shiˉlonˍ venˇ hkʼaw chehˇ taˍ leh Saˍmo-eˍlaˆ hta‸ tawˇ yaw piˇ chehˇ ve yoˬ. Saˍmo-eˍlaˆ tawˇ yaw ve teˇ yanˇ, Iˉsaˍreˍlaˆ chaw hkʼa peu-eˬ na yuˬ ve yoˬ.
Currently Selected:
1 Saˍmo-eˍlaˆ li‸ 3: LHBE
Highlight
Share
Copy
Want to have your highlights saved across all your devices? Sign up or sign in
Lahu Bible Edited © Thailand Bible Society and Bible Society of Myanmar, 2010, 2020.
