1 Saˍmo-eˍlaˆ li‸ 4
4
Ka ti‸ shaˉ caˆ ta kʼoˍ shu yuˬ kʼai ve
1Awˬ yanˇ oˇ ve awˬ hkʼaw lo, Iˉsaˍreˍlaˆ chaw teˇ hpaˍ Hpiˇliˇtiˆ chaw hui hta‸ bawˆ da‸ tuˬ tawˆ kʼai ve yoˬ. Iˉsaˍreˍlaˆ chaw teˇ hpaˍ lehˬ, Eˇbaˍneˍzaˍ venˇ paˇ lo deh chehˇ taˍ leh, Hpiˇliˇtiˆ chaw teˇ hpaˍ lehˬ, Aˍhpehˆ venˇ paˇ lo deh chehˇ taˍ ve yoˬ. 2Hpiˇliˇtiˆ chaw teˇ hpaˍ lehˬ, ma‸ bawˆ tuˬ hkʼa deh‸ gu taˍ ve yoˬ. Yawˇ hui Iˉsaˍreˍlaˆ chaw hui hta‸ gʼaˇ hte‸ hoˆ bawˆ leh, Iˉsaˍreˍlaˆ chaw 4,000 gʼaˇ hta‸ tiˇ pehˍ piˇ ve yoˬ. 3Iˉsaˍreˍlaˆ chaw teˇ hpaˍ, yawˇ hui deh chehˇ taˍ kuiˬ lo kʼaw‸ gaˬ la ve teˇ yanˇ, awˬ hoˉ awˬ naˬ teˇ hpaˍ kʼoˆ ve, Aˬ hto‸ ma pa taw Gʼuiˬsha ya‸ nyi ngaˬ hui hta‸ ma‸ bawˆ shonˇ tcuh laˇ ve le. Gʼuiˬsha ve ka ti‸ shaˉ caˆ ta kʼoˍ hta‸ ca taˆ-a veuˬ, teh‸ kʼoˆ ve yoˬ. 4Hkʼe te leh, yawˇ hui chaw hta‸ hpehˇ leh Shiˉlonˍ venˇ hkʼaw teh taˍ ve kanˇ paˆ uiˍ ve Jawˇmawˇ Gʼuiˬsha ve ka ti‸ shaˉ caˆ ta kʼoˍ hta‸ ca taˆ-e tcuh ve yoˬ. Eˇliˆ ve yaˇ paˍ Hawˇhpaˍniˆ leh Hpiˇneˍhaˆ htawˇ ka ti‸ shaˉ caˆ ta kʼoˍ geh laˬ ve yoˬ.
5Ka ti‸ shaˉ caˆ ta kʼoˍ gaˬ la ve teˇ yanˇ, Iˉsaˍreˍlaˆ chaw hui gʼaˇ hte‸ hpoˆ kuˬ ve pa taw, miˬ hiˆ la ve yoˬ. 6Hpiˇliˇtiˆ chaw teˇ hpaˍ kuˬ hkawˇ oˇ ve hta‸ gʼa kaˇ ve teˇ yanˇ, Heˍbrehˇ chaw hui deh chehˇ taˍ kuiˬ lo bvuhˬ tawˆ la chehˇ ve awˬ hkawˇ hta‸ na sheˍ. Yawˇ hui aˬ hto‸ ma te chehˇ ve le, teh‸ kʼoˆ ve yoˬ. Heˍbrehˇ chaw hui deh chehˇ taˍ kuiˬ lo Gʼuiˬsha ve ka ti‸ shaˉ caˆ ta kʼoˍ gaˬ la taˍ peuˬ ve hta‸ yawˇ hui gʼa shiˍ ve teˇ yanˇ, 7yawˇ hui kawˆ jaˇ leh kʼoˆ ve, Yawˇ hui deh chehˇ taˍ kuiˬ lo gʼuiˬsha teˇ gʼaˇ gaˬ la peuˬ ve yoˬ. Chi teˇ pawˆ ngaˬ hui gʼa shonˇ tuˬ yoˬ. Ponˬ laˬ htaˇ chi hkʼe teˇ pawˆ ka‸ maˇ hpeh‸ la jaw. 8Kanˇ paˆ uiˍ ve gʼuiˬsha oˇ ve teˇ hpaˍ ve la‸ sheh hkʼaw a shu ngaˬ hui hta‸ ponˬ laˇ gʼa tuˬ le. Gʼuiˬsha oˇ ve teˇ hpaˍ lehˬ, heh puiˉ hkʼaw lo Eˇjiˇtu‸ chaw hui hta‸ tiˇ pehˍ piˇ ve gʼuiˬsha hpeh‸ ve yoˬ. 9Hpiˇliˇtiˆ chaw teˇ hpaˍ-oˬ, ha‸ hanˉ ve hkʼaw awˬ gʼaˇ yuˬ tawˆ leh ma‸ bawˆ-oˆ. Oˇ hkʼe maˇ te ve kʼo, chi beu‸ Heˍbrehˇ chaw ngaˬ hui ve awˬ ceˬ te chehˇ ve hkʼe, ngaˬ hui lehˬ yawˇ hui ve awˬ ceˬ gʼa kʼaw‸ te tuˬ yoˬ. Chi hta‸ pa taw, ha‸ hanˉ ve hkʼaw ma‸ gʼaˇ hte‸ bawˆ-oˆ, teh‸ kʼoˆ ve yoˬ.
10Hkʼe te leh, Hpiˇliˇtiˆ chaw teˇ hpaˍ ma‸ gʼaˇ hte‸ bawˆ ve yoˬ. Iˉsaˍreˍlaˆ chaw teˇ hpaˍ shonˇ kʼai leh, a shu yawˇ ve yehˬ lo gʼuiˇ kʼo‸-e ve yoˬ. Bawˆ da‸ kuiˬ hkʼaw Iˉsaˍreˍlaˆ chaw 30,000 gʼaˇ suh-e ve yoˬ. 11Gʼuiˬsha ve ka ti‸ shaˉ caˆ taˍ kʼoˍ htawˇ canˇ paˍ teˇ hpaˍ yuˬ kʼai leh, Eˇliˆ ve yaˇ paˍ Hawˇhpaˍniˆ leh Hpiˇneˍhaˆ htawˇ ma‸ bawˆ kuiˬ lo suh-e ve yoˬ.
Eˇliˆ suh-e ve
12Beˍyaˍmenˍ awˬ ceuˬ awˬ hkʼaˇ teˇ gʼaˇ lehˬ, oˇ ve teˇ nyi ma‸ bawˆ kuiˬ lo tu leh Shiˉlonˍ venˇ lo kʼaw‸ gaˬ la ve yoˬ. Yawˇ hkʼaˬ ma dawˇ haˍ ve hta‸ hpeu‸ maˍ tuˬ, yawˇ ve veu‸ kʼaˇ hta‸ tzuh‸ suhˍ leh, yawˇ ve oˉ kʼoˍ hkʼoˆ lo je‸ meu-e hkaˆ pfuhˍ taˍ ve yoˬ. 13Eˇliˆ lehˬ ya‸ kʼaw ceˍ lo yawˇ ve mui hkʼawˇ hkʼoˆ mui chehˇ ve yoˬ. Yawˇ lehˬ Gʼuiˬsha ve ka ti‸ shaˉ caˆ ta kʼoˍ awˬ lawn dawˇ nyi leh dawˇ haˍ chehˇ ve yoˬ. Chaw oˇ ve lehˬ, hpeh‸ la peuˬ ve awˬ lawn hkʼa peu-eˬ venˇ hkʼaw chehˇ ve chaw hui hta‸ hto maˍ piˇ leh, chaw hkʼa peu-eˬ kawˆ jaˇ ve pa taw hawˬ chehˇ ve yoˬ. 14Eˇliˆ lehˬ duiˆ-ehˍ shaˇ-ehˍ hpeh‸ chehˇ ve awˬ hkawˇ hta‸ gʼa kaˇ ve teˇ yanˇ, Aˬ hto‸ ma pa taw chaw yaˇ teˇ hpaˍ duiˆ-ehˍ shaˇ-ehˍ te chehˇ ve le, teh‸ na nyi ve yoˬ. Chaw oˇ ve lehˬ, hpeh‸ la peuˬ ve awˬ lawn Eˇliˆ hta‸ hto‸ maˍ piˇ tuˬ, yawˇ geh gʼuiˇ kʼai ve yoˬ. 15(Eˇliˆ lehˬ, a sha‸ 98 hkʼaw‸ gaˬ peuˬ leh, mehˆ a ciˉ ka‸ maˇ mawˬ-o.) 16Oˇ htaˇ chaw oˇ ve lehˬ, Ya‸ nyi ngaˬ ma‸ bawˆ kuiˬ lo gʼuiˇ kʼaw‸ la ve yoˬ, teh‸ Eˇliˆ hta‸ kʼoˆ piˇ ve yoˬ.
Ngaˬ yaˇ paˍ-oˬ, hkʼaˬ hkʼe hpeh‸ le, teh‸ Eˇliˆ yawˇ hta‸ na nyi ve yoˬ.
17Chaw oˇ ve kʼaw‸ yaw hkʼaw‸ leh kʼoˆ ve, Iˉsaˍreˍlaˆ chaw hui lehˬ Hpiˇliˇtiˆ chaw hui gʼuˇ suhˍ lo gʼuiˇ hpaw-e ve yoˬ. Ngaˬ hui shonˇ jaˇ ve yoˬ. Chi hkʼoˆ, nawˬ yaˇ paˍ Hawˉhpaˍniˆ leh Hpiˇneˍnaˆ htawˇ shu tiˇ pehˍ ve hta‸ gʼa hkanˍ leh, Gʼuiˬsha ve ka ti‸ shaˉ caˆ taˍ kʼoˍ htawˇ shu yuˬ kʼai peuˬ, teh‸ yawˇ hta‸ kʼoˆ piˇ ve yoˬ.
18Chaw oˇ ve Gʼuiˬsha ve ka ti‸ shaˉ caˆ ta kʼoˍ awˬ lawn kʼoˆ ve teˇ yanˇ, Eˇliˆ lehˬ yawˇ ve mui hkʼawˇ hkʼaw‸ nawˉ paˉ hpawˇ lo an ce ve yoˬ. Yawˇ lehˬ mawˇ jaˇ leh chu jaˇ ve pa taw, kʼawˍ hteh suh-e ve yoˬ. Yawˇ lehˬ, Iˉsaˍ reˍlaˆ chaw hui hta‸ 40 hkʼaw‸ awˬ hoˉ te ve yoˬ.
Hpiˇneˍhaˆ miˇ ma suh-e ve
19Eˇliˆ ve awˬ hkuiˇ ma Hpiˇneˍhaˆ miˇ ma lehˬ, yaˇ hu chehˇ leh yaˇ paw tuˬ awˬ yanˇ gaˬ la chehˇ ve yoˬ. Gʼuiˬsha ve ka ti‸ shaˉ caˆ ta kʼoˍ shu yuˬ kʼai peuˬ ve awˬ lawn hta‸ maˇ kʼoˆ, yawˇ ve awˬ puˍ leh yawˇ ve awˬ hpawˇ hui suh peuˬ ve awˬ lawn hta‸ maˇ kʼoˆ yawˇ gʼa shiˍ ve teˇ yanˇ, la‸ haˉ yaˇ paw sheˬ ve yoˬ. 20Yawˇ lehˬ suh la paˇ neˇ ve yoˬ. Yawˇ hta‸ ga piˇ chehˇ ve yaˇ miˇ teˇ hpaˍ yawˇ hta‸ awˬ gʼaˇ piˇ leh, Taˇ kawˆ. Nawˬ yaˇ paˍ teˇ gʼaˇ paw la peuˬ, teh‸ yawˇ hta‸ kʼoˆ piˇ ve yoˬ. Ya‸ hkʼaˇ, yawˇ maˇ na. 21Gʼuiˬsha ve ka ti‸ shaˉ caˆ ta kʼoˍ hta‸ shu yuˬ kʼai peuˬ ve pa taw maˇ kʼoˆ, yawˇ ve awˬ puˍ leh yawˇ ve awˬ hpawˇ hui htawˇ suh kʼai peuˬ ve hta‸ pa taw maˇ kʼoˆ, Gʼuiˬsha ve awˬ me‸ awˬ hponˇ Iˉsaˍreˍlaˆ chaw hui geh tawˆ kʼai peuˬ, teh‸ kʼoˆ leh, yaˇ paˍ oˇ ve hta‸ Iˉhkaˍboˆ teh‸ meh piˇ ve yoˬ. 22Gʼuiˬsha ve ka ti‸ shaˉ caˆ ta kʼoˍ hta‸ shu yuˬ kʼai peuˬ ve pa taw, Gʼuiˬsha ve awˬ me‸ awˬ hponˇ Iˉsaˍreˍlaˆ chaw hui geh tawˆ kʼai peuˬ, teh‸ yawˇ kʼoˆ ve yoˬ.
Currently Selected:
1 Saˍmo-eˍlaˆ li‸ 4: LHBE
Highlight
Share
Copy
Want to have your highlights saved across all your devices? Sign up or sign in
Lahu Bible Edited © Thailand Bible Society and Bible Society of Myanmar, 2010, 2020.
