1 Saˍmo-eˍlaˆ li‸ 2
2
Haˍnaˆ ve bon lawˬ hkawˇ
1Oˇ ve hkʼaw‸ nawˉ Haˍnaˆ bon chi hkʼe lawˬ ve yoˬ.
Gʼuiˬsha lehˬ ngaˬ ve nyi ma hta‸ ha lehˬ tuˬ biˇ la piˇ peuˬ.
Yawˇ te taˍ peuˬ ve kanˉ hta‸ pa taw ngaˬ ha lehˬ jaˇ ve yoˬ.
Ngaˬ ve canˇ paˍ teˇ hpaˍ hta‸ ngaˬ gʼuiˬ yawˬ jaˇ ve yoˬ.
Gʼuiˬsha ngaˬ hta‸ ga laˇ peuˬ ve pa taw, ngaˬ ha lehˬ jaˇ ve yoˬ.
2Gʼuiˬsha hkʼa shuˍ da‸ kehˬ ve chaw teˇ gʼaˇ ka‸ maˇ cawˬ.
Ngaˬ hui ve Gʼuiˬsha hkʼa shuˍ ha‸ shaˉ laˇ puiˉ shehˍ hpaˇ maˇ cawˬ.
3Nawˬ hui tawˇ uiˍ tawˇ mvuh taˇ kʼaw‸ yaw chehˇ-oˆ.
Awˬ lawn kʼo Jawˇmawˇ Gʼuiˬsha lehˬ, hkʼa peu-eˬ ve hta‸ shiˍ shehˍ hpaˇ hpeh‸ leh,
chaw yaˇ hkʼa te ve kanˉ hkʼa peu-eˬ hta‸ suhˉ jehˬ chehˇ ve yoˬ.
4Awˬ gʼaˇ uiˍ ve ma‸ yaˇ teˇ hpaˍ ve hkaˆ teˇ hpaˍ luˬ kʼai peuˬ.
Ya‸ hkʼaˇ, awˬ gʼaˇ nuˇ ve chaw teˇ hpaˍ awˬ gʼaˇ kʼaw‸ uiˍ la peuˬ.
5Paw sha ve chaw teˇ hpaˍ chi beu‸ gʼaˇ ga caˇ chehˇ ve yoˬ.
Ya‸ hkʼaˇ, meu‸ ve kaˆ ve chaw teˇ hpaˍ chi beu‸ maˇ kʼaw‸ meu‸-o.
Chaw meh ma lehˬ, chi beu‸ yaˇ suhˍ gʼaˇ cawˬ peuˬ.
Ya‸ hkʼaˇ, yaˇ maˇ maˇ cawˬ ve awˬ e lehˬ, chi beu‸ yaˇ teˇ gʼaˇ ka‸ maˇ kʼaw‸ cawˬ.
6Gʼuiˬsha lehˬ, chaw yaˇ hta‸ tiˇ pehˍ gʼa leh, a sha‸ kʼaw‸ te‸ la piˇ gʼa ve yoˬ.
Yawˇ lehˬ chaw yaˇ teˇ hpaˍ hta‸ suh mvuhˇmiˬ lo kʼai tcuh leh,
yawˇ hui hta‸ teˇ pawˆ kʼaw‸ shiˍ hkʼaw‸ veu laˇ ve yoˬ.
7Yawˇ lehˬ chaw teˇ hpaˍ hpaˍ hta‸ haˍ gʼawˇ piˇ lawˬ leh, teˇ hpaˍ hpaˍ hta‸ paw sha piˇ lawˬ ve yoˬ.
Chaw teˇ hpaˍ hpaˍ hta‸ yawˇ nyiˉ ya‸ piˇ leh,
teˇ hpaˍ hpaˍ hta‸ chaw uiˍ chaw mvuh hpeh‸ la piˇ ve yoˬ.
8Je‸ meu-e hkʼaw chehˇ taˍ ve haˍ yaˇ gʼawˇ yaˇ teˇ hpaˍ hta‸ yawˇ cawˍ tu piˇ leh,
dawˇ haˍ kuiˬ hkʼaw yawˇ hui hta‸ chiˇ taˆ piˇ ve yoˬ.
Yawˇ lehˬ chaw oˇ ve teˇ hpaˍ hta‸ jawˇmawˇ ve yaˇ teˇ hpaˍ geh
awˬ me‸ awˬ hponˇ cawˬ ve chehˇ kuiˬ lo chehˇ tcuh piˇ lawˬ ve yoˬ.
Miˬguiˬ chi hta‸ Gʼuiˬsha te taˍ leh, miˬguiˬ chi lehˬ Gʼuiˬsha ve mawˇ hpeh‸ ve yoˬ.
9Gʼuiˬsha lehˬ, ka ti‸ yeˬ ve yawˇ ve chaw teˇ hpaˍ hta‸ ha‸ shaˉ piˇ chehˇ ve yoˬ.
Ya‸ hkʼaˇ, haiˬ ve chaw teˇ hpaˍ lehˬ, naˆ ho‸ ve hkʼaw mehˉ kʼai ve yoˬ.
Chaw yaˇ lehˬ, yawˇ ve awˬ gʼaˇ awˬ shaˉ hta‸ pa taw gʼaˇ shehˍ hpaˇ hpeh‸ ve maˇ heˆ.
10Gʼuiˬsha ve canˇ paˍ teˇ hpaˍ lehˬ, te luˬ te sheˆ ve hta‸ gʼa hkanˍ tuˬ yoˬ.
Yawˇ lehˬ mvuhˇ naw ma hkʼoˆ chehˇ taˍ leh, yawˇ hui hta‸ ciˍ yanˍ piˇ tuˬ yoˬ.
Gʼuiˬsha lehˬ, miˬguiˬ hkʼa peu-eˬ ve hta‸ suhˉ jehˬ piˇ tuˬ yoˬ.
Yawˇ leuˆ yuˬ taˍ ve jawˇmawˇ hta‸ yawˇ kanˇ paˆ piˇ leh, yawˇ hta‸ gʼaˇ shehˍ hpaˇ hpeh‸ la piˇ tuˬ yoˬ, teh‸ kʼoˆ ve yoˬ.
11Oˇ ve hkʼaw‸ nawˉ, Eˇlaˍkaˍnaˆ Raˍmaˆ venˇ lo kʼaw‸ kʼo‸-e ve yoˬ. Ya‸ hkʼaˇ, yaˇ paˍ oˇ ve Shiˉlonˍ venˇ hkʼaw chehˇ taˉ leh, paw hkuˇ Eˇliˆ geh Gʼuiˬsha ve kanˉ hta‸ te chehˇ taˍ ve yoˬ.
Eˇliˆ ve yaˇ teˇ hpaˍ
12Eˇliˇ ve yaˇ teˇ hpaˍ lehˬ haiˬ ve chaw hpeh‸ ve yoˬ. Yawˇ hui lehˬ, Gʼuiˬsha ve tawˇ hta‸ maˇ na yuˬ. 13Chi awˬ hkʼoˆ, paw hkuˇ teˇ gʼaˇ chaw yaˇ teˇ hpaˍ geh lawˬ yuˬ cawˇ ve awˬ liˇ awˬ hkʼaˇ hta‸ htawˇ yawˇ hui maˇ ca. Chaw teˇ gʼaˇ Gʼuiˬsha hta‸ ca tanˇ la ve teˇ yanˇ, paw hkuˇ ve awˬ ceˬ paˍ lehˬ luˉ kʼu lonˉ yuˬ veu laˇ leh, shu shaˍ caˉ taˍ ve mu‸ hkʼu hkʼaw beˆ gʼawˆ ve yoˬ. 14Luˉ kʼu hkʼaw hkʼa nyiˉ gʼa veu laˇ ve shaˍ teˇ hpaˍ lehˬ, paw hkuˇ awˬ pon hpeh‸ ve yoˬ. Yawˇ hui Shiˉlonˍ venˇ hkʼaw chehˇ taˍ leh, Gʼuiˬsha hta‸ ca tanˇ la ve Iˉsaˍreˍlaˆ chaw teˇ hpaˍ hta‸ chi hkʼe tiˉ te piˇ chehˇ ve yoˬ. 15Awˬ chu hta‸ yuˬ tawˆ leh maˇ gʼa tuˉ tanˇ piˇ sheˍ gʼuˇ suhˍ, paw hkuˇ ve awˬ ceˬ lehˬ Gʼuiˬsha hta‸ tanˇ piˇ chehˇ ve chaw oˇ ve geh laˬ leh, Paw hkuˇ hta‸ piˬ caˍ piˇ tuˬ ngaˬ hta‸ shaˍ a ciˉ pe‸ laˇ-oˆ. Yawˇ lehˬ caˉ taˍ ve shaˍ hta‸ caˇ tuˬ ve maˇ heˆ. Hkʼe te leh, shaˍ awˬ tcuhˇ a ciˉ pe‸ laˇ-oˆ, teh‸ yawˇ hta‸ kʼoˆ piˇ ve yoˬ.
16Oˇ htaˇ chaw oˇ ve lehˬ, Ngaˬ awˬ chu hta‸ awˉ lawˉ tanˇ piˇ shaˍ. Peuˬ hkʼaw‸ nawˉ, nawˬ heuˆ gaˇ ve hkʼe yuˬ kʼai-o, teh‸ kʼoˆ piˇ ve htawˇ, paw hkuˇ ve awˬ ceˬ paˍ lehˬ, Chi hkʼe maˇ heˆ. Chi beu‸ ngaˬ hta‸ shaˍ awˉ lawˉ pe‸ laˇ-oˆ. Nawˬ maˇ pe‸ laˇ ve kʼo, ngaˬ nawˬ geh lu yuˬ tuˬ yoˬ, teh‸ kʼaw‸ kʼoˆ piˇ ve yoˬ.
17Eˇliˆ ve yaˇ teˇ hpaˍ te chehˇ ve venˇbaˆ chi teˇ hpaˍ lehˬ, Gʼuiˬsha mehˆ gʼuˇ suhˍ cha‸ chiˆ jaˇ ve yoˬ. Awˬ lawn kʼo, yawˇ hui lehˬ Gʼuiˬsha hta‸ tanˇ piˇ tuˬ ve awˬ ceuˬ teˇ hpaˍ hta‸ maˇ shawˍ maˇ caˆ te chehˇ ve pa taw yoˬ.
Saˍmo-eˍlaˆ awˬ lawn
18Yaˇ paˍ ehˉ Saˍmo-eˍlaˆ lehˬ, da‸ kehˬ ve veu‸ kʼaˇ veuˬ deh leh, Gʼuiˬsha ve paw hkuˇ te chehˇ taˍ ve yoˬ. 19Teˇ hkʼaw‸ teˇ pawˆ yawˇ ve awˬ e lehˬ, yawˇ ve awˬ pa geh teˇ geh Gʼuiˬsha hta‸ ca tuˉ tanˇ la ve teˇ yanˇ, yawˇ awˬ pon aˉ po‸ awˬ suhˉ teˇ hkʼoˆ tawˉ veu laˇ piˇ ve yoˬ. 20Oˇ htaˇ Eˇliˆ lehˬ, Eˇlaˍkaˍnaˆ leh yawˇ ve awˬ miˇ ma hta‸ bon na‸ piˇ leh kʼoˆ ve, Nawˬ huiˉ maˬ Gʼuiˬsha hta‸ chiˇ a‸ piˇ taˍ ve yaˇ paˍ chi awˬ tan, Gʼuiˬsha lehˬ yaˇ miˇ chi hta‸ awˬ nu ve yaˇ teˇ hpaˍ kʼaw‸ cawˬ la piˇ-oˆ, teh‸ kʼoˆ ve yoˬ.
Oˇ ve hkʼaw‸ nawˉ, yawˇ hui aˉ hkʼaw lo kʼaw‸ kʼo‸-e ve yoˬ.
21Gʼuiˬsha Haˍnaˆ hta‸ awˬ bon kʼaw‸ na‸ piˇ leh, yawˇ lehˬ awˬ nu ve yaˇ paˍ shehˆ gʼaˇ leh yaˇ miˇ nyiˇ gʼaˇ kʼaw‸ cawˬ la ve yoˬ. Yaˇ paˍ Saˍmo-eˍlaˆ lehˬ, Gʼuiˬsha ve kanˉ awˬ hkʼaw lo uiˍ la chehˇ ve yoˬ.
Eˇliˆ leh yawˇ ve yaˇ teˇ hpaˍ
22Eˇliˆ lehˬ, chi beu‸ mawˇ jaˇ peuˬ. Yawˇ ve yaˇ teˇ hpaˍ Iˉsaˍreˍlaˆ chaw hui hta‸ hkʼaˬ hkʼe te piˇ chehˇ ve awˬ lawn leh, Gʼuiˬsha ve aˉ po kʼo bon yehˬ yehˬmiˉhpe‸ lo kanˉ te chehˇ ve yaˇ miˇ teˇ hpaˍ geh ca zuh‸ chehˇ ve awˬ lawn hta‸ maˇ kʼoˆ, yawˇ gʼa kaˇ tcuhˉ taˍ ve yoˬ. 23Chi hta‸ pa taw, yawˇ yawˇ hui hta‸ kʼoˆ piˇ ve, Aˬ hto‸ ma pa taw nawˬ hui chi hkʼe te ve le. Nawˬ hui te chehˇ ve haiˬ ve kanˉ teˇ hpaˍ awˬ lawn, shu ngaˬ hta‸ hto laˇ chehˇ ve yoˬ. 24Ngaˬ yaˇ paˍ teˇ hpaˍ-oˬ, oˇ hkʼe taˇ kʼaw‸ te-o. Nawˬ hui awˬ lawn Gʼuiˬsha ve chaw teˇ hpaˍ kʼoˆ da‸ chehˇ ve tawˇ lehˬ, na sha ve tawˇ hpeh‸ ve maˇ heˆ. 25Chaw teˇ gʼaˇ lehˬ, awˬ nu ve teˇ gʼaˇ hta‸ te ya‸ ve kʼo, Gʼuiˬsha yawˇ hta‸ suhˉ jehˬ piˇ tuˬ yoˬ. Ya‸ hkʼaˇ, Gʼuiˬsha hta‸ te ya‸ ve chaw teˇ gʼaˇ hta‸ a shu suhˉ jehˬ piˇ tuˬ ve le, teh‸ yawˇ hui hta‸ kʼoˆ piˇ ve yoˬ.
Gʼuiˬsha yawˇ hui hta‸ tiˇ pehˍ tuˬ dawˇ cheˆ taˍ peuˬ ve pa taw, yawˇ hui lehˬ awˬ pa maˍ piˇ ve tawˇ hta‸ maˇ na yuˬ.
26Yaˇ paˍ Saˍmo-eˍlaˆ uiˍ la chehˇ leh, Gʼuiˬsha ka‸ chaw yaˇ ka‸ yawˇ hta‸ nyi ma cawˇ ve yoˬ.
Eˇliˆ ve yehˬ kʼa hta‸ ciˍ yanˍ piˇ tuˬ
27Gʼuiˬsha ve tcuh kaˍ paˍ teˇ gʼaˇ Eˇliˆ geh laˬ leh kʼoˆ ve, Nawˬ ve awˬ puˍ lonˉ Aˍronˍ leh yawˇ ve yehˬ yaˇ kʼa yaˇ teˇ hpaˍ, Eˇjiˇtu‸ mvuhˇmiˬ hkʼaw Hpaˍ rawˇ ve awˬ ceˬ te chehˇ htaˇ, ngaˬ ve awˬ to yawˇ hta‸ maw piˇ taˍ ve yoˬ. 28Iˉsaˍreˍlaˆ chaw ceuˬ hkʼa peu-eˬ awˬ hkʼaw lo, yawˇ ve awˬ ceuˬ awˬ hkʼaˇ teˇ hpaˍ hta‸ ngaˬ ve paw hkuˇ te tcuh leh tuˉ tanˇ kuiˬ lo kanˉ te tuˬ awˬ pon maˇ kʼoˆ, sha hawnˉ tuˉ tanˇ tuˬ leh ngaˬ ve ka ti‸ shaˉ caˆ ta kʼoˍ hta‸ taˆ tuˬ awˬ pon maˇ kʼo, ngaˬ leuˆ yuˬ taˍ ve yoˬ. Tuˉ tanˇ kuiˬ awˬ hkʼoˆ lo tuˉ tanˇ tuˬ ve shaˍ teˇ hpaˍ hpaˍ hta‸ yawˇ hui yuˬ caˇ tuˬ ngaˬ a hkaw-anˬ piˇ taˍ ve yoˬ. 29Hkʼe te kʼo, aˬ hto‸ ma pa taw nawˬ hui ngaˬ ve tuˉ tanˇ tuˬ teˇ hpaˍ hta‸ sheˉ lai ve le. Eˇliˆ-oˬ, aˬ hto‸ ma pa taw nawˬ ve yaˇ teˇ hpaˍ hta‸ ngaˬ a‸ kehˉ taˍ uiˍ leh, ngaˬ ve chaw teˇ hpaˍ ngaˬ hta‸ tanˇ taˍ ve da‸ jaˇ ve shaˍ teˇ hpaˍ yawˇ hui hta‸ yuˬ caˇ tcuh ve le. 30Ngaˬ Iˉsaˍreˍlaˆ jawˇmawˇ Gʼuiˬsha lehˬ, ponˬ laˬ htaˇ nawˬ ve awˬ ceuˬ awˬ hkʼaˇ teˇ hpaˍ hta‸ ngaˬ ve paw hkuˇ te tuˬ ka ti‸ te taˍ ve yoˬ. Ya‸ hkʼaˇ, chi beu‸ ka ti‸ oˇ ve hta‸ ngaˬ kʼaw‸ te luˬ ve yoˬ. Ngaˬ hta‸ taˍ uiˍ ve chaw hta‸ ngaˬ taˍ uiˍ leh, ngaˬ hta‸ chiˇ baˬ ve chaw hta‸ ngaˬ chiˇ baˬ tuˬ yoˬ. 31Nyi loˬ, chi beu‸ nawˬ ve yehˬ kʼa hkʼaw leh nawˬ ve awˬ ceuˬ awˬ hkʼaˇ awˬ hkʼaw lo ve yaˇ nehˬ teˇ hpaˍ hta‸ ngaˬ tiˇ pehˍ piˇ tuˬ ve awˬ yanˇ gaˬ la chehˇ ve yoˬ. Yawˇ hui lehˬ, mawˇ htaˇ hkʼa gaˬ a sha‸ gʼa te‸ chehˇ tuˬ ve maˇ heˆ. 32Nawˬ gʼa dawˇ haˍ jaˇ leh, Iˉsaˍreˍlaˆ chaw hui hta‸ ngaˬ piˇ tuˬ ve awˬ bon teˇ hpaˍ hta‸ nawˬ hkawehˉ ve nyi ma hkʼa biˇ cawˬ tuˬ yoˬ. Ya‸ hkʼaˇ, nawˬ ve yehˬ yaˇ kʼa yaˇ teˇ hpaˍ lehˬ, teˇ gʼaˇ ka‸ mawˇ htaˇ hkʼa gaˬ a sha‸ gʼa te‸ chehˇ tuˬ ve maˇ heˆ. 33Ya‸ hkʼaˇ, nawˬ ve awˬ ceuˬ awˬ hkʼaˇ teˇ gʼaˇ hta‸ ngaˬ a sha‸ te‸ chehˇ piˇ leh, ngaˬ ve paw hkuˇ te tcuh tuˬ sheˍ ve yoˬ. Ya‸ hkʼaˇ, yawˇ mehˆ cuˉ kʼai leh dawˇ law tuˬ hkʼa peu-eˬ mehˉ kʼai tuˬ yoˬ. Nawˬ ve awˬ ceuˬ awˬ hkʼaˇ hkʼa peu-eˬ ve lehˬ, tiˇ pehˍ ve hta‸ gʼa hkanˍ tuˬ yoˬ. 34Nawˬ ve yaˇ paˍ Hawˇhpaˍniˆ leh Hpiˇneˍhaˆ yawˇ huiˉ maˬ nyiˇ gʼaˇ, teˇ nyi tiˉ awˬ hkʼaw lo shu tiˇ pehˍ ve hta‸ gʼa hkanˍ ve teˇ yanˇ, ngaˬ kʼoˆ taˍ ve tawˇ teˇ hpaˍ biˇ la peuˬ ve hta‸ nawˬ gʼa shiˍ tuˬ yoˬ. 35Ngaˬ hta‸ ka ti‸ yeˬ leh, ngaˬ ve a loˍ hta‸ te ve paw hkuˇ teˇ gʼaˇ hta‸ ngaˬ kʼaw‸ leuˆ yuˬ tuˬ yoˬ. Ngaˬ yawˇ hta‸ awˬ ceuˬ awˬ hkʼaˇ maˇ maˇ cawˬ la piˇ leh, yawˇ hui lehˬ ngaˬ leuˆ yuˬ taˍ ve jawˇmawˇ gʼuˇ suhˍ lo kanˉ gʼa te tuˬ yoˬ. 36A sha‸ te‸ chehˇ taˉ sheˍ ve nawˬ ve awˬ ceuˬ awˬ hkʼaˇ teˇ hpaˍ lehˬ, jawˇmawˇ geh hpu leh caˇ tuˬ gʼa ca lawˬ ve awˬ hkʼoˆ, yawˇ hui gʼa caˇ gʼa dawˬ tuˬ awˬ pon, paw hkuˇ hta‸ ga piˇ ve kanˉ hta‸ gʼa ca lawˬ te tuˬ yoˬ, teh‸ Eˇliˆ hta‸ kʼoˆ piˇ ve yoˬ.
Currently Selected:
1 Saˍmo-eˍlaˆ li‸ 2: LHBE
Highlight
Share
Copy
Want to have your highlights saved across all your devices? Sign up or sign in
Lahu Bible Edited © Thailand Bible Society and Bible Society of Myanmar, 2010, 2020.
