1 Jawˇmawˇ li‸ 7
7
Sawˉla‸monˍ ve hawˉ yehˬ
1Sawˉla‸monˍ lehˬ, yawˇ chehˇ tuˬ ve hawˉ yehˬ teˇ maˬ hta‸ htawˇ kʼaw‸ te ve yoˬ. Hawˉ yehˬ chi ve hta‸ te ve 13 hkʼaw‸ maw ve yoˬ. 2Yawˇ ve hawˉ yehˬ hkʼaw, chaw moˍ lonˉ hpawnˬ da‸ tuˬ ve yehˬ teˇ maˬ hta‸ Leˍbaˍnonˍ hteunˍ lonˉ teh‸ meh piˇ taˍ ve yoˬ. Yehˬ lonˉ chi ve zuhˬ hpawˇ 100 shaw‸, kʼehˬ hpawˇ 50 shaw‸, leh mvuh hpawˇ 30 shaw‸ cawˬ ve yoˬ. Yehˬ lonˉ oˇ ve hkʼaw lo, yehˬ hkuiˉ daw shehˆ cawˆ cawˬ leh, teˇ cawˆ ve yehˬ hkuiˉ daw 15 maˬ cawˬ ve yoˬ. 3Yehˬ chi hkʼaw keu taˍ ve toˉ la‸ lonˉ teˇ hpaˍ lehˬ, mawˇ teh kuiˬ bawehˇ awˬ hkʼoˆ lo hkʼa gaˬ te keu taˍ ve yoˬ. 4Yehˬ lonˉ oˇ ve teˇ hpawˇ lo, yehˬ miˉ ehˉ shehˆ cawˆ te keu taˍ ve yoˬ. 5Yehˬ miˉ leh yehˬ miˉ ehˉ teˇ hpaˍ lehˬ, awˬ ceˍ awˇ ceˍ cawˬ ve yehˬ miˉ teˇ hpaˍ hpeh‸ ve yoˬ. Yehˬ miˉ ehˉ oˇ ve teˇ hpaˍ lehˬ, teˇ hpawˇ leh teˇ hpawˇ hteˇ leh‸ cawˬ ve yoˬ.
6Awˬ nu ve yehˬ teˇ maˬ lehˬ, Yehˬ hkuiˉ daw yehˬ teh‸ kʼoˆ ve yoˬ. Yehˬ chi ve lehˬ, zuhˬ hpawˇ 50 shaw‸, kʼehˬ hpawˇ 30 shaw‸ cawˬ ve yoˬ.
7Sawˉla‸monˍ suhˉ jehˬ kuiˬ yehˬ hta‸ suhˆ baˉ hkʼa deh‸ ko taˍ ve yoˬ.
8Sawˉla‸monˍ chehˇ tuˬ ve yehˬ hta‸, suhˉ jehˬ kuiˬ yehˬ awˬ hkʼaw‸ nawˉ paˉ lo te taˍ ve yoˬ. Yawˇ miˇ ma Eˇjiˇtu‸ chaw awˬ pon htawˇ, yehˬ oˇ hkʼe ve teˇ maˬ te piˇ taˍ ve yoˬ.
9Yehˬ chi teˇ hpaˍ hta‸ da‸ jaˇ ve haˉ pui shiˍ teˇ hpaˍ yuˬ kawˍ taˍ ve yoˬ. Haˉ pui shiˍ chi teˇ hpaˍ hta‸ awˇ ceˍ awˇ hpawˇ hkʼa shuˍ te htawˆ taˍ ve yoˬ. 10Awˬ hkuiˉ puiˍ kawˍ tuˬ ve haˉ pui shiˍ teˇ hpaˍ hta‸ a ciˉ uiˍ chaweh te htawˆ taˍ ve yoˬ. Teˇ hpaˍ hpaˍ 8 shaw‸ zuhˬ leh teˇ hpaˍ hpaˍ 10 shaw‸ cawˬ ve yoˬ. 11Oˇ ve teˇ hpaˍ awˬ hkʼoˆ lo, awˬ nu ve haˉ pui shiˍ teˇ hpaˍ hta‸ kawˍ leh, keˍdaˍ suhˆ toˉ la‸ lonˉ teˇ hpaˍ keu taˍ ve yoˬ. 12Hawˉ yehˬ awˬ pon, da‸ kehˬ ve bawehˇ awˬ pon, bon yehˬ hkʼaw ve bawehˇ lonˉ awˬ pon, ko taˍ ve gʼo‸ pa lehˬ, haˉ pui shehˆ htai‸ kawˍ leh keˍdaˍ suhˆ teˇ htai‸ keu taˍ ve yoˬ.
Huˍranˍ ve kanˉ
13Jawˇmawˇ Sawˉla‸monˍ lehˬ, Tuˇruˆ venˇ hkʼaw chehˇ ve cheuˬ jaˇ ve la‸shaˉmaˉ Huˍranˍ hta‸ ca kuˬ tcuh ve yoˬ. Yawˇ lehˬ kuiˇ hta‸ yuˬ leh kanˉ te puiˉ jaˇ ve chaw hpeh‸ ve yoˬ. 14Yawˇ ve awˬ pa lehˬ suh kʼai peuˬ. Yawˇ htawˇ kuiˇ hta‸ yuˬ leh kanˉ te puiˉ jaˇ ve chaw hpeh‸ ve yoˬ. Yawˇ ve awˬ e lehˬ, Naˍtaˍliˆ awˬ ceuˬ awˬ hkʼaˇ hpeh‸ ve yoˬ. Jawˇmawˇ Sawˉla‸ monˍ kuˬ piˇ ve hkʼe, yawˇ ha lehˬ ha kʼa kʼai ve yoˬ.
Kuiˇ yehˬ hkuiˉ daw lonˉ nyiˇ maˬ
15Huˍranˍ lehˬ, kuiˇ yehˬ hkuiˉ daw lonˉ nyiˇ maˬ te ve yoˬ. Yehˬ hkuiˉ daw lonˉ oˇ ve nyiˇ maˬ lehˬ, zuhˬ hpawˇ 18 shaw‸, uiˍ ve hpawˇ 12 shaw‸ cawˬ leh, bon yehˬ gʼuˇ suhˍ lo duˇ ti taˍ ve yoˬ. 16Yehˬ hkuiˉ daw lonˉ oˇ ve nyiˇ maˬ awˬ hkʼoˆ lo, mvuh hpawˇ 5 shaw‸ cawˬ ve awˬ hoˆ te hoˆ taˍ ve yoˬ. 17Yehˬ hkuiˉ daw oˇ ve awˬ hkʼoˇ meuˇ lo, aˉ caˆ hkeh vaw‸ da‸ taˍ ve awˬ han htawˆ keu taˍ leh, 18kuiˇ aˉ ci ku shiˍ nyiˇ cawˆ te keu taˍ ve yoˬ.
19Yehˬ hkuiˉ daw oˇ ve teˇ hpaˍ awˬ hkʼoˆ lo te hoˆ taˍ ve ta kʼoˍ oˇ ve teˇ hpaˍ lehˬ, lawˉ bo veˆ hta‸ shuˍ leh, 4 shaw‸ cawˬ ve yoˬ. 20Ta kʼoˍ chi hta‸ aˉ caˆ hkeh hpeh tsuh‸ da‸ taˍ ve awˬ han htawˆ taˍ ve awˬ hkʼoˆ lo teh taˍ ve yoˬ. Ta kʼoˍ oˇ ve awˬ hkʼoˆ lo, aˉ ci ku shiˍ nyiˇ cawˆ te nehˉ taˍ leh, aˉ ci ku shiˍ hkʼa peu-eˬ 200 shiˍ cawˬ ve yoˬ.
21Huˍranˍ lehˬ kuiˇ yehˬ hkuiˉ daw lonˉ chi ve nyiˇ maˬ hta‸ bon yehˬ yehˬmiˉhpe‸ lo teh taˍ ve yoˬ. La‸ sha paˉ hpawˇ lo teh taˍ ve teˇ maˬ hta‸ Yaˍhkenˍ teh‸ meh piˇ leh, la‸ mehˍ paˉ hpawˇ ve teˇ maˬ hta‸ Bawˇzaˆ, teh‸ meh piˇ ve yoˬ. 22Yehˬ hkuiˉ daw oˇ ve teˇ hpaˍ hkʼoˆ lo teh taˍ ve ta kʼoˍ oˇ ve teˇ hpaˍ lehˬ, lawˉ bo veˆ hta‸ shuˍ ve yoˬ.
Hkʼe te leh, yehˬ hkuiˉ daw teˇ hpaˍ hta‸ te peuˬ ve yoˬ.
Kuiˇ iˉ kaˆ punˇ kʼoˍ lonˉ
23Huˍranˍ lehˬ, zuhˬ hpawˇ 30 shaw‸, kʼehˬ hpawˇ 10 shaw‸ leh mvuh hpawˇ 5 shaw‸ cawˬ ve kuiˇ iˉ kaˆ punˇ kʼoˍ lonˉ teˇ maˬ hta‸ htawˇ kʼaw‸ te ve yoˬ. 24Punˇ kʼoˍ lonˉ oˇ ve awˬ hkʼoˇ meuˇ lo, kuiˇ aˉ mo‸ kʼoˍ shiˍ awˬ han nyiˇ cawˆ htawˆ keu taˍ ve yoˬ. 25Punˇ kʼoˍ lonˉ chi lehˬ, kuiˇ yuˬ te taˍ ve nuˇ paˍ lonˉ 12 hkeh awˬ hkʼoˆ lo teh taˍ ve yoˬ. Nuˇ paˍ lonˉ chi teˇ hpaˍ lehˬ, shehˆ hkeh teˇ hpawˇ mawˍ taˍ ve yoˬ. 26Kuiˇ punˇ kʼoˍ lonˉ chi ve lehˬ, htu ve hpawˇ la‸ naw awˇ hkeh cawˬ leh, awˬ hkʼoˇ meuˇ lo iˉ kaˆ kawˆ hkʼe te taˍ ve yoˬ. Punˇ kʼoˍ lonˉ chi ve hkʼaw iˉ kaˆ awˇ meunˍ punˇ keu daw ve yoˬ.
Kuiˇ lawˬ 10 maˬ
27Huˍranˍ lehˬ, zuhˬ hpawˇ 4 shaw‸, kʼehˬ hpawˇ 4 shaw‸, leh mvuh hpawˇ 3 shaw‸ cawˬ ve kuiˇ lawˬ ehˉ 10 maˬ kʼaw‸ te ve yoˬ. 28Lawˬ ehˉ chi teˇ hpaˍ hta‸ awˇ ceˍ awˇ hpawˇ hkʼa shuˍ ve suhˆ baˉ yuˬ te leh, 29suhˆ baˉ chi teˇ hpaˍ awˬ hkʼoˆ lo, laˇ caˬ shiˉ awˬ han, nuˇ paˍ lonˉ awˬ han leh, Hkeˍruˆbenˍ awˬ han te keu taˍ ve yoˬ. 30Lawˬ ehˉ chi teˇ hpaˍ hta‸ kuiˇ gaˉ yaw 4 maˬ te tcuhˉ taˍ ve yoˬ. Lawˬ ehˉ chi teˇ hpaˍ awˬ ceˍ 4 ceˍ lo, hkehˇ pe le teh taˍ gʼa tuˬ, kuiˇ yehˬ hkuiˉ daw ehˉ 4 maˬ te keu taˍ ve yoˬ. 31Yehˬ hkuiˉ dawˬ ehˉ chi teˇ hpaˍ awˬ hkʼoˆ lo, hkehˇ teh taˍ tuˬ kuiˇ caˆ gʼawˉ-ehˍ te htawˆ keu taˍ ve yoˬ. Kuiˇ caˆ chi ve lehˬ, lawˬ ehˉ hkʼoˆ lo teˇ shaw‸ hkʼe mvuh taˆ la leh, lawˬ ehˉ hkʼaw teˇ htu hkʼe lo‸-e taˍ ve yoˬ. Kuiˇ baˉ chi ve hta‸ nyi sha tuˬ awˬ han htawˆ keu taˍ ve yoˬ. 32Gaˉ yaw teˇ hpaˍ lehˬ, teˇ shaw‸ teˇ htu mvuh ve yoˬ. 33Gaˉ yaw oˇ ve teˇ hpaˍ lehˬ, iˉ mvuhˇ lawˬ ve gaˉ yaw hkʼe hpeh‸ leh, hkʼa peu-eˬ ve hta‸ kuiˇ ceh tiˉ yuˬ te taˍ ve yoˬ. 34Lawˬ ehˉ oˇ ve awˇ ceˍ lo vawˆ ciˇ kuiˬ awˇ maˬ te keu taˍ ve yoˬ. 35Chi hkʼoˆ ka‸ lawˬ ehˉ oˇ ve awˬ hkʼoˆ lo, fe hpawˇ teˇ htu cawˬ ve kuiˇ caˆ yuˬ hpeh taˍ ve yoˬ. 36Yehˬ hkuiˉ daw ehˉ leh kuiˇ caˆ chi teˇ hpaˍ awˬ hkʼoˆ lo Hkeˍruˆbenˍ awˬ han, laˇ caˬ shiˉ awˬ han leh tcuhˉ pui cehˬ awˬ han te keu taˍ ve yoˬ. 37Chi ve lehˬ, lawˬ ehˉ teˇ hpaˍ hta‸ hkʼaˬ hkʼe te taˍ ve awˬ lawn hpeh‸ ve yoˬ. Lawˬ ehˉ chi teˇ hpaˍ hkʼa shuˍ shuˍ hpeh‸ ve yoˬ.
38Huˍranˍ lehˬ, lawˬ ehˉ chi teˇ hpaˍ awˬ pon hkehˇ pe le 20 maˬ kʼaw‸ te ve yoˬ. Hkehˇ chi teˇ hpaˍ lehˬ, kʼehˬ hpawˇ 4 shaw‸ cawˬ leh, iˉ kaˆ 800 kawˆ hkʼe keu daw ve yoˬ. 39Yawˇ lehˬ lawˬ ehˉ oˇ ve 5 maˬ hta‸ bon yehˬ awˬ hawˉ hpawˇ lo teh taˍ leh, awˬ nu ve 5 maˬ hta‸ bon yehˬ awˬ na hpawˇ lo teh taˍ ve yoˬ. Yawˇ lehˬ kuiˇ punˇ kʼoˍ lonˉ hta‸ mvuhˇ nyi tawˆ awˬ hawˉ hpawˇ teˇ ceˍ lo teh taˍ ve yoˬ.
Bon yehˬ awˬ pon te taˍ peuˬ ve mawˇ teˇ hpaˍ
40-45Huˍranˍ lehˬ, mu‸ hkʼu, hkʼaw‸ laˉ toˆ baˬ tuˬ, leh hkehˇ teˇ hpaˍ hta‸ htawˇ kʼaw‸ te ve yoˬ. Yawˇ lehˬ bon yehˬ awˬ pon jawˇmawˇ Sawˉla‸monˍ te tcuh ve kanˉ hkʼa peu-eˬ hta‸ te peuˬ ve yoˬ. Yawˇ te taˍ peuˬ ve mawˇ teˇ hpaˍ lehˬ,
Yehˬ hkuiˉ daw lonˉ nyiˇ maˬ,
Awˬ hoˆ nyiˇ maˬ,
Oˇ ve awˬ hkʼoˆ lo te keu piˇ tuˬ ve kuiˇ caˆ teˇ hpaˍ,
Kuiˇ aˉ ci ku shiˍ 200 shiˍ, teˇ cawˆ teˇ ha shiˍ te keu tuˬ,
Lawˬ ehˉ 10 maˬ leh
Hkehˇ pe le 10 maˬ,
Punˇ kʼoˍ lonˉ teˇ maˬ leh,
Oˇ ve hta‸ kanˬ chiˇ piˇ taˍ tuˬ ve nuˇ paˍ lonˉ 12 hkeh,
Mu‸ hkʼu, hkʼaw‸ laˉ toˆ baˬ tuˬ, hkehˇ leh, awˬ nu ve hkehˇ teˇ hpaˍ hpeh‸ ve yoˬ.
Bon yehˬ awˬ pon jawˇmawˇ Sawˉla‸monˍ te tcuh ve mawˇ chi hkʼa peu-eˬ hta‸, kuiˇ ceh tiˉ yuˬ te taˍ ve yoˬ. 46Jawˇmawˇ lehˬ, mawˇ chi teˇ hpaˍ hta‸ Suˇkoˆ leh Zaˍreˍtanˍ venˇ awˬ kaˍ lo cawˬ ve Yawˇ danˍ miˬ tawˬ kuiˬ lo te tcuh ve yoˬ. 47Sawˉla‸monˍ lehˬ, mawˇ chi teˇ hpaˍ hta‸ maˇ tsuh nyi. Awˬ lawn kʼo, kuiˇ chi teˇ hpaˍ hawˇ jaˇ ve pa taw yoˬ. Hkʼe te leh, mawˇ chi teˇ hpaˍ hkʼaˬ nyiˇ cawehˬ cawˬ ve hta‸ chaw teˇ gʼaˇ ka‸ maˇ shiˍ.
48Sawˉla‸monˍ lehˬ, bon yehˬ ve mawˇ chi teˇ hpaˍ hta‸ htawˇ, shi yuˬ te tcuh ve yoˬ. Tuˇ tanˇ kuiˬ, hkaoˍmonˇ teh taˍ tuˬ ve hpui lawˇ, 49da‸ kehˬ jaˇ ve bawehˇ gʼuˇ suhˍ lo teh taˍ tuˬ ve aˬ miˍ tuˉ teh kuiˬ teˇ chi maˬ, awˬ na hpawˇ ngaˇ maˬ leh awˬ hawˉ hpawˇ ngaˇ maˬ, suhˉ veˆ teˇ hpaˍ, kawˆ faiˇ teˇ hpaˍ, sho nuˆ teˇ hpaˍ, 50kawˆ teˇ hpaˍ, hkehˇ teˇ hpaˍ, sha hawnˉ keu tuˬ ve hkehˇ teˇ hpaˍ, shiˉ gʼeu‸ keu tuˬ ve hkehˇ teˇ hpaˍ, da‸ kehˬ jaˇ ve bawehˇ leh da‸ kehˬ ve bawehˇ yehˬ miˉ hkʼaw keu tuˬ ve paˆ taˍ, chi hkʼa peu-eˬ ve hta‸ shi ceh tiˉ te taˍ ve yoˬ.
51Jawˇmawˇ Sawˉla‸monˍ lehˬ bon yehˬ hta‸ te peuˬ ve teˇ yanˇ, yawˇ awˬ pa Daˍviˆ Gʼuiˬsha hta‸ tanˇ piˇ taˍ ve hpu, shi, leh awˬ nu ve mawˇ hkʼa peu-eˬ, bon yehˬ hkʼaw cawˬ ve bawehˇ hkʼaw hkʼa deh‸ keu taˍ ve yoˬ.
Currently Selected:
1 Jawˇmawˇ li‸ 7: LHBE
Highlight
Share
Copy
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fen.png&w=128&q=75)
Want to have your highlights saved across all your devices? Sign up or sign in
Lahu Bible Edited © Thailand Bible Society and Bible Society of Myanmar, 2010, 2020.