1 Jawˇmawˇ li‸ 6
6
Sawˉla‸monˍ bon yehˬ lonˉ te ve
1Sawˉla‸monˍ jawˇmawˇ te ve 4 hkʼaw‸ 1 hkʼaw‸, ha pa 2 maˬ teˇ maˬ gaˬ htaˇ, yawˇ bon yehˬ hta‸ tanˬ te ve yoˬ. (Chi lehˬ, Iˉsaˍreˍlaˆ chaw hui Eˇjiˇtu‸ mvuhˇmiˬ hkʼaw tawˆ la ve 480 hkʼaw‸ biˇ htaˇ hpeh‸ ve yoˬ.) 2Bon yehˬ oˇ ve lehˬ, zuhˬ hpawˇ 60 shaw‸, kʼehˬ hpawˇ 20 shaw‸ leh mvuh hpawˇ 30 shaw‸ cawˬ ve yoˬ. 3Bon yehˬ hkʼaw tanˬ lo‸-e ve awˉ lawˉ peuˇ ve teˇ bawehˇ lehˬ, aˉ po kʼo bon yehˬ hkʼe hui cawˬ leh, zuhˬhpawˇ 20 shaw‸, kʼehˬ hpawˇ 10 shaw‸ cawˬ ve yoˬ. 4Bon yehˬ gʼo‸ pa hkʼoˆ lo awˬ baˬ hpawˇ a ciˉ i leh awˬ hkʼaw hpawˇ a ciˉ kʼoˍ ve yehˬ miˉ ehˉ teˇ hpaˍ te keu taˍ ve yoˬ 5Ko taˍ ve gʼo‸ pa awˬ baˬ hpawˇ lo, 3 htai‸ cawˬ leh mvuh hpawˇ 5 shaw‸ cawˬ ve awˬ bawehˇ teˇ hpaˍ kʼaw‸ te caˉ taˍ ve yoˬ. 6Awˬ hawˉ hpawˇ leh leh ve teˇ htai‸ lehˬ, kʼehˬ hpawˇ 5 shaw‸ cawˬ ve yoˬ. 3 htai‸ teˇ htai‸ lehˬ kʼehˬ hpawˇ 7 shaw‸ cawˬ ve yoˬ. Bawehˇ oˇ ve teˇ hpaˍ awˬ pon suhˆ cawˆ lonˉ maˇ gʼa kʼaw‸ keu leh gʼo‸ pa hkʼoˆ lo teh taˍ hpeh‸ tuˬ, gʼo‸ pa oˇ ve hta‸ shaˬ te shaˬ i kʼai piˇ taˍ ve yoˬ.
7Bon yehˬ te htaˇ, hta tu dawˆ ve awˬ hkawˇ, ceˉ ceˇ htawˆ ve awˬ hkawˇ leh awˬ nu ve awˬ hkawˇ teˇ hpaˍ maˇ gʼa bvuhˬ tawˆ la tuˬ, haˉ pui shiˍ teˇ hpaˍ hta‸ teˇ na‸ htaˇ ka‸ hkʼa deh‸ gu taˍ ve yoˬ.
8Awˬ hawˉ leh leh ve teˇ bawehˇ hkʼaw lo‸-e tuˬ ve yehˬ miˉ lehˬ, awˬ hawˉ hpawˇ lo cawˬ leh, 2 htai‸ teˇ htai‸ leh 3 htai‸ teˇ htai‸ lo taˆ-e tuˬ ve go te tcuhˉ taˍ ve yoˬ. 9Hkʼe te leh, jawˇmawˇ Sawˉla‸monˍ bon yehˬ hta‸ te peuˬ sheˬ ve yoˬ. Yawˇ lehˬ keˍdaˍ suhˆ baˉ yuˬ leh bon yehˬ awˬ hkʼaw hpawˇ lo nehˉ keu taˍ ve yoˬ. 10Yawˇ lehˬ toˉ la‸ lonˉ teˇ hpaˍ keu leh gʼo‸ pa awˬ baˬ hpawˇ lo mvuh hpawˇ 5 shaw‸ cawˬ ve awˬ bawehˇ ehˉ teˇ hpaˍ te keu taˍ ve yoˬ.
11Oˇ htaˇ, Gʼuiˬsha Sawˉla‸monˍ hta‸ chi hkʼe kʼoˆ piˇ ve yoˬ. 12Nawˬ lehˬ ngaˬ ve awˬliˇtawˇhkawˇ teˇ hpaˍ hta‸ na yuˬ ve kʼo, nawˬ pa Daˍviˆ hta‸ ngaˬ ka ti‸ te piˇ taˍ ve awˬ ceuˬ hkʼa peu-eˬ hta‸ te biˇ la piˇ tuˬ yoˬ. 13Ngaˬ lehˬ nawˬ te taˍ ve bon yehˬ chi hkʼaw chehˇ taˍ leh, ngaˬ ve chaw teˇ hpaˍ hta‸ teˇ pawˆ ka‸ chiˇ baˬ piˇ tuˬ ve maˇ heˆ, teh‸ yawˇ hta‸ kʼoˆ piˇ ve yoˬ.
14Hkʼe te leh, Sawˉla‸monˍ lehˬ bon yehˬ lonˉ hta‸ te peuˬ sheˬ ve yoˬ.
Bon yehˬ awˬ hkʼaw hpawˇ lo te taˍ ve kanˉ
15Bon yehˬ awˬ hkʼaw hpawˇ ve gʼo‸ pa teˇ hpaˍ hta‸ keˍdaˍ suhˆ baˉ yuˬ nehˉ taˍ ve yoˬ. 16Da‸ kehˬ jaˇ ve bawehˇ hta‸ bon yehˬ awˬ hkʼaw‸ nawˉ paˉ teˇ tawn lo te taˍ ve yoˬ. Bawehˇ oˇ ve lehˬ, zuhˬ hpawˇ 20 shaw‸ cawˬ leh gʼo‸ pa hta‸ keˍdaˍ suhˆ baˉ yuˬ nehˉ taˍ ve yoˬ. 17Da‸ kehˬ jaˇ ve bawehˇ gʼuˇ suhˍ lo cawˬ ve da‸ kehˬ ve bawehˇ teˇ maˬ lehˬ, zuhˬ hpawˇ 40 shaw‸ cawˬ ve yoˬ. 18Oˇ kaˬ lo nehˉ taˍ ve keˍdaˍ suhˆ baˉ awˬ hkʼoˆ lo, aˉ mo‸ kʼoˍ shiˍ leh suhˉ veˆ awˬ han htawˆ keu taˍ ve yoˬ. Bon yehˬ awˬ hkʼaw hpawˇ lo kawˍ taˍ ve haˉ pui shiˍ hta‸ maˇ gʼa mawˬ tuˬ keˍdaˍ suhˆ baˉ hkʼa deh‸ yuˬ nehˉ taˍ ve yoˬ.
19Bon yehˬ awˬ hkʼaw lo, Gʼuiˬsha ve ka ti‸ shaˉ caˆ ta kʼoˍ teh tuˬ ve bawehˇ teˇ maˬ hta‸ htawˇ te taˍ ve yoˬ. 20Bawehˇ oˇ ve lehˬ, zuhˬ hpawˇ, kʼehˬ hpawˇ leh mvuh hpawˇ 20 shaw‸ cawˬ leh, shi hkʼa deh‸ oˍ taˍ ve yoˬ. Tuˉ tanˇ kuiˬ hta‸ htawˇ keˍdaˍ suhˆ baˉ hkʼa deh‸ nehˉ taˍ ve yoˬ. 21Bon yehˬ awˬ hkʼaw hpawˇ lo shi oˍ taˍ leh, da‸ kehˬ jaˇ ve bawehˇ hkʼaw lo‸-e kuiˬ yehˬmiˉhpe‸ hkʼoˆ lo shi caˆ teˇ hpaˍ hpeh chiˇ taˍ ve yoˬ. 22Bon yehˬ awˬ hkʼaw hpawˇ lo cawˬ ve mawˇ teˇ hpaˍ hta‸ shi oˍ taˍ leh, tuˉ tanˇ kuiˬ hta‸ htawˇ shi oˍ taˍ ve yoˬ.
23Toˍ la‸ kʼuˉ cawˬ ve Hkeˍruˆbenˍ 2 maˬ hta‸ shaˍlonˍ suhˆ yuˬ te taˍ leh, da‸ kehˬ jaˇ ve bawehˇ hkʼaw teh taˍ ve yoˬ. 24Hkeˍruˆbenˍ oˇ ve 2 maˬ lehˬ, mvuh hpawˇ 10 shaw‸ cawˬ leh, nyiˇ maˬ maˬ hkʼa shuˍ hpeh‸ ve yoˬ. 25Teˇ maˬ ve toˍ la‸ kʼuˉ nyiˇ maˬ hkʼa shuˍ cawˬ ve yoˬ. Teˇ maˬ ve toˍ la‸ kʼuˉ nyiˇ paˉ cawˬ leh, toˍ la‸ kʼuˉ oˇ ve teˇ hpaˍ 5 shaw‸ zuhˬ ve yoˬ. 26Toˍ la‸ kuˉ teˇ meuˇ leh teˇ meuˇ awˬ kaˍ lo 10 shaw‸ cawˬ ve yoˬ. 27Yawˇ huiˉ maˬ hta‸ da‸ kehˬ jaˇ ve bawehˇ hkʼaw teh taˍ leh, bawehˇ awˬ kʼaw ji teˇ hkʼaˇ lo yawˇ huiˉ maˬ ve toˍ la‸ kʼuˉ daw‸ da‸ taˍ ve yoˬ. Awˬ nu ve toˍ la‸ kʼuˉ nyiˇ paˉ lehˬ, gʼo‸ pa hta‸ daw‸ taˍ ve yoˬ. 28Hkeˍruˆbenˍ chi ve nyiˇ maˬ hta‸ shi oˍ taˍ ve yoˬ.
29Bon yehˬ awˬ hkʼaw hpawˇ gʼo‸ pa awˬ hkʼoˆ lo, Hkeˍruˆbenˍ awˬ han, tcuhˉ pui cehˬ, leh suhˉ veˆ awˬ han htawˆ keu taˍ ve yoˬ. 30Bon yehˬ hkʼaw lo hkʼawˇ taˍ ve suhˆ baˉ awˬ hkʼoˆ lo htawˇ, shi oˍ taˍ ve yoˬ.
31Da‸ kehˬ jaˇ ve bawehˇ hkʼaw lo‸-e tuˬ ve yehˬmiˉhpe‸ hta‸, yehˬ miˉ nyiˇ maˬ te hoˆ taˍ ve yoˬ. Yehˬ miˉ oˇ ve awˬ na hpawˇ teˇ meuˇ lehˬ, aˉlaˇmiˬshiˉjaw hkʼe a ciˉ gʼawˉ-ehˍ cawˬ ve yoˬ. 32Yehˬ miˉ oˇ ve teˇ hpaˍ awˬ hkʼoˆ lo, Hkeˍruˆbenˍ awˬ han, tcuhˉ pui cehˬ leh suhˉ veˆ awˬ han teˇ hpaˍ htawˆ keu taˍ ve yoˬ. Yehˬ miˉ leh htawˆ taˍ ve awˬ han oˇ ve teˇ hpaˍ hta‸ shi oˍ taˍ ve yoˬ. 33Da‸ kehˬ ve bawehˇ hkʼaw lo‸-e ve yehˬ miˉ hta‸ shaˍlonˍ suhˆ yuˬ te taˍ leh, awˬ ceˍ awˇ ceˍ cawˬ ve yehˬ miˉ te keu taˍ ve yoˬ. 34Chi hkʼoˆ ka‸, oˇ kaˬ lo yawˇ hkʼaˇ yawˇ hpaw puiˉ hoˆ puiˉ ve yehˬ miˉ nyiˇ maˬ htawˇ te keu taˍ ve yoˬ. 35Yehˬ miˉ chi teˇ hpaˍ hta‸ Hkeˍruˆbenˍ awˬ han, tcuhˉ pui cehˬ leh suhˉ veˆ awˬ han teˇ hpaˍ htawˆ keu taˍ leh, shi oˍ taˍ ve yoˬ.
36Chaw moˍ lonˉ hpawnˬ da‸ kuiˬ bawehˇ hta‸ bon yehˬ awˬ gʼuˇ suhˍ lo te taˍ ve yoˬ. Oˇ kaˬ lo ko taˍ ve gʼo‸ pa lehˬ, haˉ pui shehˆ htai‸ leh suhˆ teˇ htai‸ keu taˍ ve yoˬ.
37Bon yehˬ chi ve hta‸ Sawˉla‸monˍ jawˇmawˇ te ve 4 hkʼaw‸ teˇ hkʼaw‸, ha pa nyiˇ maˬ teˇ maˬ htaˇ tanˬ kawˍ taˍ ve yoˬ. 38Sawˉla‸monˍ jawˇmawˇ te ve 10 hkʼaw‸ teˇ hkʼaw‸, ha pa 8 maˬ teˇ maˬ htaˇ, bon yehˬ chi ve hta‸ awˬ hkʼaˇ gu taˍ ve hkʼe, hkʼa deh‸ te peuˬ ve yoˬ. Bon yehˬ chi hta‸ 7 hkʼaw‸ gʼa te ve yoˬ.
Currently Selected:
1 Jawˇmawˇ li‸ 6: LHBE
Highlight
Share
Copy
Want to have your highlights saved across all your devices? Sign up or sign in
Lahu Bible Edited © Thailand Bible Society and Bible Society of Myanmar, 2010, 2020.
