1 Jawˇmawˇ li‸ 5
5
Sawˉla‸monˍ bon yehˬ te tuˬ gu ve
1Tuˉruˆ jawˇmawˇ Hiˆranˍ lehˬ, Daˍviˆ ve awˬ chawˇ hpeh‸ ve yoˬ. Chi beu‸ Daˍ viˆ awˬ tan Sawˉla‸monˍ jawˇmawˇ kʼaw‸ te chehˇ ve awˬ hkawˇ hta‸ yawˇ gʼa kaˇ ve teˇ yanˇ, yawˇ ve awˬ tan te shehˍ hpaˇ teˇ hpaˍ hta‸ yawˇ geh kʼai tcuh ve yoˬ. 2Hkʼe te leh, Sawˉla‸monˍ jawˇmawˇ Hiˆranˍ hta‸ chi hkʼe kʼoˆ feu piˇ ve yoˬ. 3Ngaˬ pa Daˍviˆ lehˬ, hkʼaˬ htaˆ ka‸ ma‸ gʼa bawˆ chehˇ ve hta‸ nawˬ shiˍ chehˇ ve yoˬ. Chi hta‸ pa taw, yawˇ lehˬ Gʼuiˬsha hta‸ oˉ kʼoˍ pui kuiˬ bon yehˬ te maˇ gʼa sheˍ ve yoˬ. 4Ya‸ hkʼaˇ, chi beu‸ ngaˬ ve Gʼuiˬsha lehˬ ngaˬ hta‸ gawˬ lehˍ uˉ peunˍ tcuh laˇ taˍ ve yoˬ. Ngaˬ hta‸ ca bawˆ la tuˬ ve canˇ paˍ teˇ gʼaˇ ka‸ maˇ cawˬ. 5Gʼuiˬsha lehˬ, ngaˬ pa hta‸ ka ti‸ chi hkʼe te piˇ taˍ ve yoˬ. Nawˬ ve yaˇ paˍ lehˬ ngaˬ awˬ pon bon yehˬ teˇ maˬ te laˇ tuˬ ve yoˬ, teh‸ kʼoˆ piˇ taˍ ve yoˬ. Hkʼe te leh, ngaˬ ve Gʼuiˬsha hta‸ oˉ kʼoˍ pui kuiˬ bon yehˬ teˇ maˬ te tuˬ, chi beu‸ ngaˬ dawˇ cheˆ taˍ peuˬ. 6Chi hta‸ pa taw, nawˬ ve chaw teˇ hpaˍ hta‸ hpehˇ leh Leˍbaˍnonˍ hkʼaw hkʼoˆ lo cawˬ ve htawˇ cehˬ teˇ hpaˍ ngaˬ awˬ pon a ciˉ ca htu laˇ tcuh-o. Ngaˬ ve chaw teˇ hpaˍ ka‸, yawˇ hui geh kʼai tcuh tuˬ yoˬ. Nawˬ ve chaw teˇ hpaˍ kanˉ te ve gʼaˇ hpfuhˇ nawˬ lawˬ ve hkʼe ngaˬ pe‸ laˇ tuˬ yoˬ. Ngaˬ ve chaw teˇ hpaˍ lehˬ, nawˬ ve chaw teˇ hpaˍ hkʼe taw suhˆ htu maˇ puiˉ ve hta‸ nawˬ shiˍ taˍ ve yoˬ, teh‸ yawˇ hta‸ kʼoˆ feu piˇ ve yoˬ.
7Hiˆranˍ lehˬ, Sawˉla‸monˍ ve tawˇ oˇ ve teˇ hpaˍ hta‸ gʼa kaˇ ve teˇ yanˇ, ha lehˬ jaˇ leh kʼoˆ ve, Gʼuiˬsha lehˬ chaw ceuˬ lonˉ oˇ ve teˇ ceuˬ hta‸ uˉ peunˍ tuˬ, Daˍviˆ hta‸ cuˇ yiˍ uiˍ jaˇ ve yaˇ paˍ teˇ gʼaˇ piˇ taˍ ve pa taw, Gʼuiˬsha hta‸ chiˇ mvuh-o, teh‸ kʼoˆ ve yoˬ. 8Hkʼe te leh, yawˇ Sawˉla‸monˍ hta‸ chi hkʼe kʼaw‸ kʼoˆ feu piˇ ve yoˬ. Nawˬ shanˍ feu laˇ ve tawˇ hta‸ ngaˬ gʼa kaˇ peuˬ. Nawˬ kʼoˆ ve hkʼe ngaˬ te laˇ tuˬ yoˬ. Nawˬ loˍ ve suhˆ teˇ hpaˍ hta‸ ngaˬ ca laˇ tuˬ yoˬ. 9Ngaˬ ve chaw teˇ hpaˍ lehˬ, suhˆ oˇ ve teˇ hpaˍ hta‸ laˇ tsuhˇ gʼuiˬ lo gʼawˬ ya‸ la leh hpeh tsuh‸ da‸ peuˬ hkʼaw‸ nawˉ, nawˬ kʼoˆ laˇ ve chehˇ kuiˬ lo hkʼa gaˬ shi ya‸ peu laˇ tuˬ yoˬ. Oˇ kaˬ lo ngaˬ ve chaw teˇ hpaˍ lehˬ, suhˆ oˇ ve teˇ hpaˍ hta‸ kʼaw‸ hpui baˬ leh nawˬ ve chaw teˇ hpaˍ gʼa kʼaw‸ nyi ha‸ shaˉ kʼai tuˬ yoˬ. Ngaˬ ve chaw teˇ hpaˍ loˍ ve caˇ tuˬ dawˬ tuˬ teˇ hpaˍ hta‸ nawˬ a ciˉ ga piˇ-oˆ, teh‸ yawˇ hta‸ kʼaw‸ kʼoˆ feu piˇ ve yoˬ.
10Hkʼe te leh, Hiˇranˍ lehˬ Sawˉla‸monˍ loˍ ve suhˆ teˇ hpaˍ hta‸ hkʼa deh‸ gʼa ca piˇ ve yoˬ. 11Sawˉla‸monˍ htawˇ, kanˉ te shehˍ hpaˇ oˇ ve teˇ hpaˍ awˬ pon 1hkʼaw‸ ve caˬ hkʼa 100,000 hkʼawˍ lawˇ leh shaˍlonˍ chu 3,000 punˇ hkʼe feu piˇ ve yoˬ.
12Gʼuiˬsha lehˬ yawˇ ka ti‸ te taˍ peuˬ ve hkʼe, Sawˉla‸monˍ hta‸ shiˍ puiˉ ve cuˇ yiˍ cawˬ la piˇ ve yoˬ. Hiˆranˍ leh Sawˉla‸monˍ lehˬ shaˉ caˆ caˇ taˍ ve pa taw, yawˇ huiˉ maˬ awˬ kaˍ lo mvuhˇmiˬ gawˬ lehˍ cawˬ ve yoˬ.
13Jawˇmawˇ Sawˉla‸monˍ lehˬ, Iˉsaˍreˍlaˆ chaw 30,000 gʼaˇ hta‸ leuˆ yuˬ leh kanˉ te tcuh ve yoˬ. 14Yawˇ hui hta‸ nyi ha‸ shaˉ leh kanˉ te tcuh tuˬ, kanˉ nyi paˍ awˬ hoˉ Aˍdawˇ niˍranˍ hta‸ leuˆ yuˬ taˍ ve yoˬ. Yawˇ lehˬ kanˉ te paˍ oˇ ve teˇ hpaˍ hta‸ 3 moˍ pehˬ leh, 1 moˍ ve hta‸ Leˍbaˍnonˍ hkʼaw hkʼoˆ lo ha pa teˇ maˬ kanˉ ca te tcuh ve yoˬ. Peuˬ hkʼaw‸ nawˉ, ha pa 2 maˬ gʼaˇ jehˇ tcuh ve yoˬ. 15Chi hkʼoˆ ka‸, Sawˉla‸monˍ lehˬ yawˇ ve chaw 8,000 gʼaˇ hta‸ hkʼaw hkʼoˆ lo haˉ pui ca hpfuhˆ duˇ tcuh leh, chaw 70,000 gʼaˇ hta‸ haˉ pui oˇ ve teˇ hpaˍ taˆ hpoˆ tcuh ve yoˬ. 16Kanˉ te paˍ oˇ ve teˇ hpaˍ hta‸ nyi ha‸ shaˉ piˇ tuˬ, yawˇ lehˬ kanˉ nyi paˍ awˬ hoˉ 3,000 gʼaˇ hta‸ htawˇ leuˆ teh taˍ ve yoˬ. 17Sawˉla‸monˍ kʼoˆ piˇ taˍ ve hkʼe, yawˇ hui lehˬ bon yehˬ awˬ hkuiˉ puiˍ kawˍ tuˬ ve da‸ jaˇ ve haˉ pui shiˍ teˇ hpaˍ hta‸ hkʼa deh‸ htawˆ taˍ ve yoˬ. 18Sawˉla‸monˍ ve chaw, Hiˆranˍ ve chaw leh Geˍbaˍlaˆ venˇ yaˇ teˇ hpaˍ lehˬ, bon yehˬ awˬ pon haˉ pui shiˍ leh suhˆ teˇ hpaˍ hta‸ hkʼa deh‸ gu taˍ ve yoˬ.
Currently Selected:
1 Jawˇmawˇ li‸ 5: LHBE
Highlight
Share
Copy
Want to have your highlights saved across all your devices? Sign up or sign in
Lahu Bible Edited © Thailand Bible Society and Bible Society of Myanmar, 2010, 2020.