1 Jawˇmawˇ li‸ 4
4
Sawˉla‸monˍ ve a ma‸ lonˉ teˇ hpaˍ
1Sawˉla‸monˍ lehˬ, Iˉsaˍreˍlaˆ chaw hkʼa peu-eˬ ve jawˇmawˇ lonˉ hpeh‸ ve yoˬ. 2Chi ve lehˬ, yawˇ ve a ma‸ lonˉ teˇ hpaˍ ve caˇ lanˇ hpeh‸ ve yoˬ.
Paw hkuˇ lonˉ lehˬ, Zaˍdoˆ ve yaˇ Aˍzaˍriˆ hpeh‸ ve yoˬ.
3Shaˉnanˉ hkʼaw ve ceˇ leˇ lonˉ teˇ hpaˍ lehˬ, Shiˇshaˆ ve yaˇ Eˇliˇhawˇraˆ leh Aˍbiˇyaˆ hui hpeh‸ ve yoˬ.
Caˇ lanˇ teˇ hpaˍ hta‸ ha‸ shaˉ shehˍ hpaˇ lehˬ, Aˍhiˇluˆ ve yaˇ Yeˍhawˇshaˍ hpaˆ hpeh‸ ve yoˬ.
4Ma‸ poˍ lonˉ lehˬ, Yawˇyaˍdaˆ ve yaˇ Beˍnaˍyaˆ hpeh‸ ve yoˬ.
Paw hkuˇ teˇ hpaˍ lehˬ, Zaˍdoˆ leh Aˍbyaˍtaˍ hui hpeh‸ ve yoˬ.
5Shu a‸ kehˉ uiˍ jaˇ ve a ma‸ lonˉ lehˬ, Naˍtanˍ ve yaˇ Aˍzaˍriˆ hpeh‸ ve yoˬ.
Yawˇ hta‸ dawˇ hkʼaˇ piˇ shehˍ hpaˇ lehˬ, Naˍtanˍ ve yaˇ Zaˍdoˆ hpeh‸ ve yoˬ.
6Hawˉ yehˬ hkʼaw kanˉ te chehˇ ve chaw hui hta‸ nyi shehˍ hpaˇ lehˬ, Aˍhiˆshaˍ hpeh‸ leh,
awˬ ceˬ teˇ hpaˍ hta‸ nyi shehˍ hpaˇ lehˬ, Aˍbaˍdaˆ ve yaˇ Aˍdawˇniˍ ranˍ hpeh‸ ve yoˬ.
7Sawˉla‸monˍ lehˬ, Iˉsaˍreˍlaˆ mvuhˇmiˬ hkʼaw cawˬ ve mvuhˇmiˬ ehˉ teˇ hpaˍ hta‸ uˉ peunˍ tuˬ awˬ hoˉ awˬ naˬ 12 gʼaˇ hta‸ leuˆ yuˬ taˍ ve yoˬ. Yawˇ hui lehˬ jawˇmawˇ leh yawˇ ve yehˬ yaˇ kʼa yaˇ teˇ hpaˍ awˬ pon, a shu yawˇ mvuhˇmiˬ hkʼaw cawˬ ve caˇ tuˬ dawˬ tuˬ teˇ hpaˍ gʼa shaw caˍ piˇ ve yoˬ. Teˇ hkʼaw‸ awˬ hkʼaw lo, teˇ gʼaˇ teˇ ha pa chi hkʼe gʼa te ve yoˬ. 8Chi ve lehˬ, awˬ hoˉ awˬ naˬ oˇ ve 12 gʼaˇ ve awˬ meh hpeh‸ leh, yawˇ hui hta‸ uˉ peunˍ tcuh taˍ ve venˇ teˇ hpaˍ hpeh‸ ve yoˬ.
Benˍhuˇraˆ, yawˇ lehˬ Eˇhpaˍrenˍ mvuhˇmiˬ teˇ tawn hta‸ uˉ peunˍ shehˍ hpaˇ hpeh‸ ve yoˬ.
9Benˍdeˍkaˍ, yawˇ lehˬ Maˍkaˆ venˇ, Shaˍlaˍbenˍ venˇ, Behˆseˍmehˆ venˇ, Eˇ lonˍ venˇ leh Beˍhaˍnanˍ venˇ chi teˇ hpaˍ hta‸ uˉ peunˍ shehˍ hpaˇ hpeh‸ ve yoˬ.
10Benˍheˍsehˆ, yawˇ lehˬ Aˍruˇboˆ venˇ teˇ hpaˍ, Sawˇhkawˇ venˇ leh Heˍhpaˍ mvuhˇmiˬ hkʼa peu-eˬ ve hta‸ uˉ peunˍ shehˍ hpaˇ hpeh‸ ve yoˬ.
11Benˍaˍbiˆnaˍdaˆ, yawˇ lehˬ Sawˉla‸monˍ ve yaˇ miˇ Taˍhpaˆ hta‸ heuˆ leh, Dawˇraˆ mvuhˇmiˬ hkʼa peu-eˬ ve hta‸ uˉ peunˍ shehˍ hpaˇ hpeh‸ ve yoˬ.
12Aˍhiˇluˆ ve yaˇ Baˍnaˍ, yawˇ lehˬ Taˍnehˆ venˇ, Mehˆgiˇdoˍ venˇ, Behˆshanˍ venˇ, Zaˍreˍtanˍ venˇ, Yeˍzaˍreˍlaˆ venˇ awˬ hawˉ hpawˇ teˇ tawn hta‸ te leh, Aˍbeˍlaˆmaˍhawˍlaˆ venˇ, Yoˆmanˍ venˇ chi teˇ hpaˍ hta‸ uˉ peunˍ shehˍ hpaˇ hpeh‸ ve yoˬ.
13Benˍgeˍbaˍ, yawˇ lehˬ Giˇlaˆ mvuhˇmiˬ hkʼaw cawˬ ve Raˍmoˆ venˇ, Maˍnaˍseˍ awˬ ceuˬ awˬ hkʼaˇ Yaˍiˇraˆ ve hkʼaˆ hkʼa peu-eˬ, Baˍshanˍ mvuhˇmiˬ hkʼaw cawˬ ve Aˍgawˇbaˆ venˇ leh, hkʼa deh‸ caw ko taˍ leh kuiˇ taˍ meu‸ hpe‸ te taˍ ve awˬ nu ve venˇ 60 venˇ hta‸ uˉ peunˍ shehˍ hpaˇ hpeh‸ ve yoˬ.
14Iˉdoˍ ve yaˇ Aˍhiˆnaˍdaˆ, yawˇ lehˬ Maˍhaˍnenˍ mvuhˇmiˬ hta‸ uˉ peunˍ shehˍ hpaˇ hpeh‸ ve yoˬ.
15Aˍhiˆmaˆ, yawˇ lehˬ Sawˉla‸monˍ ve yaˇ miˇ Baˍseˍmehˆ hta‸ heuˆ leh, Naˍtaˍliˆ mvuhˇmiˬ hta‸ uˉ peunˍ shehˍ hpaˇ hpeh‸ ve yoˬ.
16Huˆsheˇ ve yaˇ Baˍnaˍ, yawˇ lehˬ Aˍshaˍ mvuhˇmiˬ leh Baˍloˆ venˇ hta‸ uˉ peunˍ shehˍ hpaˇ hpeh‸ ve yoˬ.
17Paˍruˇ-aˍ ve yaˇ Yawˇshaˍhpaˆ, yawˇ lehˬ Iˉsaˍhkaˍ mvuhˇmiˬ hta‸ uˉ peunˍ shehˍ hpaˇ hpeh‸ ve yoˬ.
18Eˇlaˍ ve yaˇ Sheˍmiˆ, yawˇ lehˬ Beˍyaˍmenˍ mvuhˇmiˬ hta‸ uˉ peunˍ shehˍ hpaˇ hpeh‸ ve yoˬ.
19Uˇriˆ ve yaˇ Geˍbaˍ, yawˇ lehˬ ponˬ laˬ htaˇ Aˍmawˇriˆ jawˇmawˇ Siˉhonˍ leh, Baˍshanˍ mvuhˇmiˬ ve jawˇmawˇ Awˇgaˆ uˉ peunˍ taˉ ve Giˇlaˆ mvuhˇmiˬ hta‸ uˉ peunˍ shehˍ hpaˇ hpeh‸ ve yoˬ.
Chi hkʼoˆ ka‸, awˬ hoˉ awˬ naˬ chi ve 12 gʼaˇ awˬ hkʼoˆ hta‸ uˉ peunˍ shehˍ hpaˇ a ma‸ lonˉ teˇ gʼaˇ cawˬ sheˍ ve yoˬ.
Sawˉla‸monˍ mvuhˇmiˬ hta‸ uˉ peunˍ ve
20Yuˇda‸ leh Iˉsaˍreˍlaˆ chaw teˇ hpaˍ lehˬ, laˇ tsuhˇ gʼuiˬ pfuhˍ lo cawˬ ve shehˇ shiˍ hkʼa shuˍ maˇ jaˇ ve yoˬ. Yawˇ hui ha lehˬ ha kʼa caˇ chehˇ dawˬ chehˇ ve yoˬ. 21Sawˉla‸monˍ uˉ peunˍ ve mvuhˇmiˬ lehˬ, Uˉhpaˍraˆ iˉ kaˆ lawˬ hta‸ te leh Hpiˇliˇtiˆ mvuhˇmiˬ, leh Eˇjiˇtu‸ miˬ tcuhˉ lo hkʼa gaˬ hpeh‸ ve yoˬ. Mvuhˇmiˬ yaˇ oˇ ve hkʼa peu-eˬ, yawˇ a sha‸ te‸ chehˇ ve teˇ co-e, yawˇ hta‸ awˬ hkawnˍ keu piˇ chehˇ ve yoˬ.
22Sawˉla‸monˍ teˇ nyi le le loˍ ve caˇ tuˬ dawˬ tuˬ teˇ hpaˍ lehˬ, junˍ meu-e 150 hkʼawˍ lawˇ, cho‸ meu-e 300 hkʼawˍ lawˇ, 23hkʼa deh‸ caˍ chu taˍ ve nuˇ paˍ lonˉ 10 hkeh, hkʼaw hkʼoˆ lawˬ hkʼoˆ lo yuˬ veu laˇ ve nuˇ paˍ lonˉ 20 hkeh, leh awˬ nu ve hkuiˉ zuhˬ, heh nuˇ, leh gʼaˆ teˇ hpaˍ hpeh‸ ve yoˬ.
24Sawˉla‸monˍ lehˬ, Uˇhpaˍraˆ iˉ kaˆ lawˬ mvuhˇ nyi kʼehˬ hpawˇ lo cawˬ ve Tiˉhpaˍtaˆ venˇ hta‸ te leh, Gaˍsaˍ venˇ lo hkʼa gaˬ, awˬ kaˍ lo cawˬ ve mvuhˇmiˬ hkʼa peu-eˬ leh jawˇmawˇ hkʼa peu-eˬ ve hta‸ yawˇ uˉ peunˍ chehˇ taˍ ve yoˬ. Chi hkʼoˆ ka‸, yawˇ lehˬ awˬ paˇ awˬ kui lo cawˬ ve mvuhˇmiˬ teˇ hpaˍ hta‸ htawˇ shaˉ caˆ caˇ taˍ ve yoˬ. 25Yawˇ a sha‸ te‸ chehˇ ve teˇ co-e, Yuˇda‸ leh Iˉsaˍreˍlaˆ chaw hui gawˬ lehˍ gʼa chehˇ leh, a shu yawˇ ve a pehˉ meuˇ hko leh maˉ nawˆ hko te caˇ chehˇ ve yoˬ.
26Sawˉla‸monˍ lehˬ, iˉ mvuhˇ lawˬ gʼawˬ tuˬ ve iˉ mvuhˇ 40,000 leh ciˇ tuˬ ve iˉ mvuhˇ 12,000 cawˬ ve yoˬ. 27Yawˇ leuˆ yuˬ taˍ ve awˬ hoˉ awˬ naˬ oˇ ve 12 gʼaˇ lehˬ, a shu yawˇ hta‸ tinˍ piˇ taˍ ve ha pa gaˬ la htaˇ, jawˇmawˇ Sawˉla‸monˍ leh yawˇ ve hawˉ yehˬ hkʼaw hkʼa chehˇ ve chaw hkʼa peu-eˬ awˬ pon, loˍ ve caˇ tuˬ dawˬ tuˬ teˇ hpaˍ yuˬ veu laˇ piˇ chehˇ ve yoˬ. 28Loˍ la ve teˇ yanˇ, awˬ hoˉ awˬ naˬ oˇ ve teˇ hpaˍ lehˬ, a shu yawˇ ve caˬ ciˇ yehˬ hkʼaw ve junˍ leh chi gʼawˇ teˇ hpaˍ yuˬ laˬ leh, iˉ mvuhˇ oˇ ve teˇ hpaˍ hta‸ caˍ piˇ ve yoˬ.
29Gʼuiˬsha lehˬ Sawˉla‸monˍ hta‸ shiˍ puiˉ ve cuˇ yiˍ maˍ yiˍ hkʼa biˇ piˇ taˍ ve yoˬ. 30Sawˉla‸monˍ lehˬ, mvuhˇ nyi tawˆ hpawˇ lo chehˇ ve cuˇ yiˍ cawˬ paˍ leh, Eˇjiˇtu‸ mvuhˇmiˬ hkʼaw chehˇ ve cuˇ yiˍ cawˬ paˍ teˇ hpaˍ a‸ kehˉ cuˇ yiˍ uiˍ jaˇ ve yoˬ. 31Yawˇ lehˬ, awˬ nu ve chaw hkʼa peu-eˬ a‸ kehˉ cuˇ yiˍ uiˍ jaˇ ve yoˬ. Cuˇ yiˍ cawˬ paˍ Eˇzaˍraˍheˆ awˬ ceuˬ awˬ hkʼaˇ Eˇtanˍ leh Maˍhawˇlaˆ ve yaˇ Heˍmanˍ, Kaˍlaˍkawˇlaˆ leh Daˍraˍdaˆ hui a‸ kehˉ ka‸ yawˇ cuˇ yiˍ uiˍ jaˇ ve yoˬ. Hkʼe te leh, mvuhˇmiˬ hkʼaˬ ti chi ti lo yawˇ ve awˬ meh bvuhˬ kʼai ve yoˬ. 32Yawˇ lehˬ, tawˇ naˉ ve tawˇ 3,000 hkawˇ leh, kʼa muiˬ hkawˇ 1,000 puˆ hpaˆ bvuh‸ tawˆ taˍ ve yoˬ. 33Yawˇ lehˬ, Leˍbaˍnonˍ hkʼaw hkʼoˆ lo cawˬ ve htawˇ cehˬ lonˉ teˇ hpaˍ hta‸ te leh, lanˇ venˇ hkʼoˆ lo yeˬ chehˇ ve mvuh‸ teˇ hpaˍ htaˇ hkʼa gaˬ ve awˬ lawn teˇ hpaˍ hta‸ kʼoˆ taˍ ve yoˬ. Chi hkʼoˆ ka‸, yawˇ lehˬ to nuˇ to shaˆ, ngaˆ, vuiˬ, leh ngaˇ teˇ hpaˍ awˬ lawn hta‸ ka‸ kʼoˆ taˍ ve yoˬ. 34Miˬguiˬ hkʼaˬ ti chi ti lo chehˇ ve jawˇmawˇ teˇ hpaˍ, yawˇ cuˇ yiˍ uiˍ jaˇ ve awˬ hkawˇ gʼa kaˇ ve pa taw, yawˇ hui ve chaw teˇ hpaˍ hta‸ hpehˇ leh, yawˇ ve tawˇ hta‸ ca na tcuh ve yoˬ.
Currently Selected:
1 Jawˇmawˇ li‸ 4: LHBE
Highlight
Share
Copy
Want to have your highlights saved across all your devices? Sign up or sign in
Lahu Bible Edited © Thailand Bible Society and Bible Society of Myanmar, 2010, 2020.